BULOBA BUDI MU KAYUMBAYUMBA

4 | Kuba ditekemena diebe

BUA TSHINYI BIDI NE MUSHINGA?

Kusamisha mutu bikole bua ntatu idi pa buloba kudi mua kutukebela ntatu ku mubidi anyi mu lungenyi. Bantu ba bungi badi ntatu ya mushindu eu mifikile kabena bela meji ne: kudi ditekemena to. Ntshinyi tshitubu benza?

Bamue batu babenga nansha bua kuela meji bua matuku atshilualua.
Bakuabu batu banua maluvu makole anyi bintu bidi bikuata bua kupua tunyinganyinga tuabu muoyo.
Bantu bakuabu ndambu batu bamba ne: lufu nduimpe kupita muoyo. Batu badiebeja ne: “Bua tshinyi kutungunuka ne kuikala ne muoyo?”

Tshiudi ne bua kumanya

Imue ntatu iudi utuilangana nayi idi mua kuikala ya tshitupa tshîpi ne idi mua kujika mu mushindu uuvua kuyi muelele meji.
Nansha nsombelu webe kayi ushintuluka, kudi malu audi mua kuenza adi mua kukuambuluisha.
Bible udi utupesha ditekemena dilelela, dia ne: ntatu ya bukua bantu neyijike bua kashidi.

Tshiudi mua kuenza mpindieu

Bible udi wamba ne: “Kanuditatshishi bua dituku didi dilonda nansha, bualu dituku didi dilonda nedikale ne yadi ntatu. Dituku ne dituku didi ne yadi ntatu idi midikumbanyine.”—Matayi 6:34.

Imanyina anu pa malu a dituku. Kukebi bua kuela meji a ntatu yiwapeta malaba to, bualu nebikupangishe mua kuenza midimu yebe ya lelu.

Kusamisha mutu bua malu mabi adi mua kufika nekukukumbajile anu kanyinganyinga pa kakuabu, ne kudi mua kutekesha ditekemena dimpe diudi nadi bua matuku atshilualua.

TSHIA KUENZA—Malu a mushinga

IMANYINA PA MALU ADI MIMPE

Bible udi wamba ne: “Matuku onso a muena dikenga mmabi, kadi muntu udi ne muoyo musangale udi anu utshionkomoka. (Nsumuinu 15:15) Mmuenenu mubi wa malu udi mua kukupangisha bua kumona ne: kudi tshiudi mua kuenza bua kupita ne ntatu. Mmuenenu muimpe wa malu udi yeye mua kukuambuluisha bua kuela meji a mua kupita ne lutatu luudi nalu.

Dikosela dîba diudi ne bua kudifila bua kuteleja ngumu.
Ku ndekelu kua dituku dionso, ela meji a malu abidi anyi asatu adi mua kukusaka bua kuikala ne disanka.
Enza liste wa bia kuenza. Mu liste au muikale anu biudi mua kuenza ku dituku. Kusoloja midimu minene mu bitupa bua umone tshidi bionso biudi muenze bikupeteshe ku ndekelu kua dituku.

KEBA DIAMBULUISHA

Bible udi wamba ne: “Muntu udi uditola pa nkayende . . . udi ubenga meji onso adi ambuluisha.” (Nsumuinu 18:1) Kuena mua kudipatukila mu tshina tshile nkayebe to, anu muntu yeye mukuambuluishe.

Keba diambuluisha kudi bena mu dîku anyi kudi balunda.
Keba kabidi mishindu iudi mua kubambuluisha pebe. Kuenza nunku nekukuambuluishe bua kumona ne: kudi mushindu wa kupita ne yebe ntatu.
Wewe kutshiyi ne ditekemena ne wela meji ne: kabiena ne mushinga bua kuikala ne muoyo, mbimpe uye kumonangana ne munganga. Imue misangu tuetu tudiumvua bu tudi ne malu matupuile panshi, ntshimanyinu tshia disama dia mutu. Bantu ba bungi mbumvue bimpe padibu bakebe luondapu.a

a Tabulukayi! kena ufila luondapu kampanda lusunguluke to.

Bible udi ufila ditekemena dilelela

Mufundi wa misambu wakasambila, wamba ne: “Dîyi diebe didi muendu bua dikasa dianyi, ne didi butoke mu njila wanyi.” (Misambu 119:105) Mona mudi Bible, Dîyi dia Nzambi, muikale anu mudi mvese eu muambe:

Butuku, muendu utu utuambuluisha bua kumanya pa kuendela. Ke mudibi kabidi bua Bible. Mibelu ya meji idimu idi mua kutulombola patudi ne dipangandika dikole dia kuangata.

Butoke budi mua kututokeshila mu njila bua tumone bidi kumpala. Bia muomumue, Bible udi mua kututokeshila mmuenenu wetu wa malu adi matuindile kumpala eku.

Bible mmukanda wa tshijila. Kena anu ne miyuki ya bantu ya katshia ku tshifukidi to, kadi udi kabidi upesha bantu ditekemena dilelela bua matuku atshilualua. Udi wandamuna nkonko eyi:

Mushindu kayi?

Mmushindu kayi uvua makenga matuadije? Bible udi wamba ne: ‘Mpekatu wakabuela mu ba pa buloba kupitshila kudi muntu umue, ne lufu luakabuela bua mpekatu, ne mushindu eu lufu luakatampakana kudi bantu bonso bua muvuabu bonso benze mpekatu.’—Lomo 5:12.

Bua tshinyi?

Bua tshinyi bantu badi bakokesha mbapange mua kujikija ntatu yetu? Bible udi wamba ne: “Muntu udi wenda eu kena ne bukokeshi bua kuludika nansha dikasa diende to.” (Yelemiya 10:23) Malu adi enzeka pa buloba adi ajadika bualu ebu.

Ntshinyi?

Ntshinyi tshienza Nzambi bua kujikija bualu ebu? Bible udi uleja ne: “Neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”—Buakabuluibua 21:4.