DILONGESHA DIA 34
Mutudi mua kuleja Yehowa ne: tudi bamunange
Udi udimona pabuipi menemene ne Yehowa katshia watuadija kulonga Bible anyi? Udi musue kutungunuka ne kukolesha bulunda buebe nende anyi? Biobi nanku, vuluka ne: padi Yehowa ukumona wenda umunanga bikole, yeye pende udi wenda ukunanga bikole ne ukutabalela. Mmunyi muudi mua kumuleja ne: udi mumunange?
1. Mmunyi mutudi mua kuleja Yehowa ne: tudi bamunange?
Tudi tuleja mutudi banange Yehowa patudi tumutumikila. (Balayi 1 Yone 5:3.) Katu wenzeja muntu bua kumutumikila to. Kadi mmupeshe yonso wa kutudi mpunga wa kumutumikila anyi kubenga kumutumikila. Bua tshinyi? Bualu mmusue bua ‘tumutumikile ne muoyo mujima.’ (Lomo 6:17) Tuambe ne: mmusue bua umutumikile, kuyi muenzeja to, kadi bualu udi mumunange. Tshitupa 3 ne 4 bia mukanda eu nebikuambuluishe bua kuleja ne: udi munange Yehowa pa kuenza malu adi amusankisha ne kuepuka adiye mukine.
2. Bua tshinyi bidi mua kutukolela bua kuleja mutudi banange Yehowa?
“Ntatu ya muntu muakane nya bungi.” (Misambu 34:19) Tuetu bonso tudi tuluangana ne bilema bietu. Tudi kabidi mua kupeta ntatu ya malu a makuta, anyi ntatu mikuabu ne badi mua kutuenzela malu bibi. Ntatu yoyi mitukuate, bidi mua kutukolela bua kuenza tshidi Yehowa utulomba. Bidi nanku bualu kutumikila Yehowa kakutu anu kupepele to. Kadi paudi wenza tshidi Yehowa ukuambila ne lulamatu luonso, udi uleja muudi mumunange yeye kupita bintu bionso. Dîba adi, udi uleja ne: udi mumulamate. Yehowa pende neakulamate. Kakukulekela nansha.—Balayi Misambu 4:3.
BUELA MU BUONDOKE
Mona bua tshinyi ditumikila diebe didi ne mushinga kudi Yehowa, ne mona tshidi mua kukuambuluisha bua ushale anu mumulamate.
3. Tshilumbu tshidi tshikutangila
Mukanda wa Yobo udi uleja ne: Satana wakabanda Yobo ne bantu bonso badi basue kuenzela Yehowa mudimu. Balayi Yobo 1:1, 6–2:10, pashishe nuandamune nkonko eyi:
Bilondeshile Satana, bua tshinyi Yobo uvua utumikila Yehowa?—Tangila Yobo 1:9-11.
Ntshinyi tshidi Satana wamba buebe wewe ne bua bantu bonso?—Tangila Yobo 2:4.
Balayi Yobo 27:5b, pashishe nuandamune lukonko elu:
Mmunyi muvua Yobo muleje ne: uvua munange Yehowa bushuwa?
Yobo wakaleja Yehowa ne: uvua mumunange pakashalaye mumulamate
Tudi tuleja mutudi banange Yehowa patudi tushala bamulamate
4. Sankisha muoyo wa Yehowa
Balayi Nsumuinu 27:11, pashishe nuandamune nkonko eyi:
Mmunyi mudi Yehowa umvua paudi wenza malu ne meji ne umutumikila? Bua tshinyi?
5. Udi mua kushala ne lulamatu kudi Yehowa
Dinanga ditudi banange Yehowa didi ditusaka bua kuambila bakuabu malu ende. Lulamatu luetu kudiye ludi lutusaka bua kubambilawu nansha padibi bikole. Tangilayi FILME, pashishe nuandamune nkonko idi ilonda.
Bitu bikukolela bua kuambila bakuabu malu a Yehowa anyi?
Mu filme eu, ntshinyi tshivua tshiambuluishe Grayson bua kutshimuna buôwa?
Mbipepele bua kulamata Yehowa tuetu banange malu adiye munange ne bakine adiye mukine. Balayi Misambu 97:10, pashishe nuandamune nkonko eyi:
Bilondeshile biukadi mulonge, mmalu kayi adi Yehowa munange? Mmalu kayi adiye mukine?
Mmunyi muudi mua kulonga mua kunanga malu mimpe ne kukina malu mabi?
6. Kutumikila Yehowa kudi kupetesha diakalenga
Kutumikila Yehowa kutu anu kuimpe misangu yonso. Balayi Yeshaya 48:17, 18, pashishe nuandamune nkonko eyi:
Buebe wewe, mbimpe tuitabe ne: Yehowa mmumanye misangu yonso tshidi tshitambe buimpe buetu tuetu anyi? Bua tshinyi?
Katshia watuadija kulonga, mmunyi mudi malu a mu Bible ne a Yehowa Nzambi mulelela makuambuluishe?
BAMUE BATU BAMBA NE: “Malu andi ngenza kaena ambila Nzambi bualu to.”
Mmvese kayi uudi mua kubabadila bua kuleja ne: malu atudi tuenza adi mua kusankisha Yehowa anyi kumubungamija?
TSHIA KUKUATA
Udi mua kuleja muudi munange Yehowa paudi umutumikila ne ushala mumulamate nansha mu ntatu.
Diambulula
Tshilejilu tshia Yobo ntshikulongeshe tshinyi?
Mmunyi muudi mua kuleja Yehowa ne: udi mumunange?
Ntshinyi tshiakuambuluisha bua kushala mulamate anu Yehowa?
BIA KUTANGILA KABIDI
Mona muudi mua kulamata Yehowa ne tshisumbu tshiende.
“Kudi muntu udi ne lulamatu, wewe udi wenza malu ne lulamatu” (16:49)
Mona malu makuabu adi Satana ubanda nawu bantu.
“Yobo wakalama muoyo wende mutoke” (Mukenji udi Bible utumanyisha, tshitupa 6)
Mona mudi too ne bana mua kuleja Yehowa ne: mbamunange.
Mmunyi mudi nsonga udibu basuya kudi bansonga nende bua kuenza malu mabi mua kushala mulamate anu Nzambi?