Malu adibu baledile mu Mabeji a tshisangilu tshia Nsombelu ne mudimu wetu
© 2022 Christian Congregation of Jehovah’s Witnesses
LUMINGU LUA DIA 2-8/1
BIUMA BIA MU DÎYI DIA NZAMBI | 2 BAKALENGE 22-23
“Bua tshinyi mbimpe kuikala muena budipuekeshi?”
Yehowa wakanyisha Yoshiya mudipuekeshi
Ne dinda dionso, balongolodi ba ntempelo badi bakuata mudimu mukole. Bushuwa, Yoshiya udi ne dianyisha kudi Yehowa bua mudi bena mudimu balongolola miaba ivua bankambua bende babi banyange ku nzubu wa Nzambi. Patshidibu benda benza mudimu, Shafana udi umutuadila mukenji. Tshidi mu tshianza tshia Shafana ntshinyi? Kakaa! Mmukuate muvungu! Udi wambila Yoshiya ne: Muakuidi munene Hilekiya mmuangule “mukanda wa mikenji [ya Yehowa] wakafundabu kudi Mose.” (2 Kulondolola 34:12-18) Bualu bua dikema! Bushuwa, eu mmukanda wa Mikenji wa ntuadijilu menemene!
Yoshiya udi uzuka bua kumvua mêyi onso a mu mukanda eu. Padi Shafana umubadilawu, mukalenge udi ukeba bua kumvua mudi mukenji wonso udi mu mukanda eu umutangila yeye, utangila ne bantu bonso. Tshidi nangananga tshimulenga mmudi mukanda eu muimanyine pa bualu bua ntendelelu mulelela, umanyisha makenga ne dikuatshibua mu bupika bivua mua kufikila bantu bu buobu mua kuditua mu ntendelelu wa dishima. Padi Yoshiya ujingulula se: kuvua mikenji mikuabu ya Nzambi ivuabu kabayi batumikila, udi upanda bilamba biende pashishe utumina Hilekiya, Shafana, ne bakuabu dîyi ne: ‘Nutuebejile Yehowa bua malu onso adi mafunda mu mukanda [eu]; bualu bua Yehowa wakatukuatshila tshiji tshikole bualu bankambua betu kabakatumikila mêyi adi mu mukanda eu.’—2 Bakelenge 22:11-13; 2 Kulondolola 34:19-21.
Yehowa wakanyisha Yoshiya mudipuekeshi
Batumibue ba Yoshiya kuyabu kudi Huleda muprofete mukaji wa mu Yelushalema, e kupingana ne mukenji. Huleda mmuambulule dîyi dia Yehowa, uleja ne: makenga adibu bafunde mu mukanda udibu bafume ku diangula eu neakuate tshisamba tshia bupidia etshi. Kadi bu mudi Yoshiya mudipuekeshe kumpala kua Yehowa Nzambi, yeye kakumona makenga aa nansha. Nebamusangishe ne bankambua bende, nebamuele mu lukita mu ditalala.—2 Bakelenge 22:14-20; 2 Kulondolola 34:22-28.
Bubanji bua mu Dîyi dia Nzambi
Udi mua kuenza malu mimpe nansha biwikale kuvua mukolesha bilenga
Nansha muvua Yoshiya mumone malu mabi ku buana buende, wakenza malu makane ku mêsu kua Yehowa. Bukokeshi buende buvua buimpe menemene, ke bualu kayi Bible udi wamba ne: ‘Kakuakadi mukalenge mukuabu kumpala kuende wakakudimuna mutshima wende ne muoyo wende ne bukole buende kudi Yehowa bua kutumikilaye mikenji yonso ya Mose bu muakenzaye; kakuakadi mukalenge mukuabu wakalonda kunyima kuende bu yeye.’—2 Bakalenge 23:19-25.
Yoshiya udi tshilejilu tshidi tshikankamija aba bonso bakatantamena malu mabi avuabu bamone ku buana buabu! Tshilejilu tshiende etshi tshidi tshitulongesha tshinyi? Ntshinyi tshiakambuluisha Yoshiya bua kusungula njila muakane ne kushalamu?
LUMINGU LUA DIA 9-15/1
BIUMA BIA MU DÎYI DIA NZAMBI | 2 BAKALENGE 24-25
“Ikala mumanye matuku atudi”
Dituku dia dilumbuluisha dia Yehowa dikadi pabuipi!
2 Kakuyi mpata, malu akamanyisha muprofete Sefanya ke akatamba kusaka nsonga Yoshiya bua kumbusha ntendelelu mubi mu Yuda. Mukalenge wakumbusha ntendelelu wa dishima mu Yuda, kadi kakajikija bubi buonso buvua butangalake mu bantu to. Kakajikija mpekatu ya kakuende Mukalenge Manashe, uvua ‘mûje Yelushalema tente ne mashi a bantu bakadi kabayi ne bilumbu’ nansha. (2 Bakelenge 24:3, 4; 2 Kulondolola 34:3) Ke bualu kayi dituku dia Yehowa divua anu ne bua kulua.
Malu manene a mu mukanda wa Yelemiya
Tudi mu tshidimu tshia 607 kumpala kua Yezu. Sedekiya ukadi mu tshidimu tshia 11 tshia bukokeshi buende. Ngondo ikadi 18 idi Nebukadanesâ Mukalenge wa Babulona mujingile Yelushalema ne masalayi ende. Dituku dia 7 dia ngondo muitanu wa tshidimu tshia 19 tshia bukokeshi bua Nebukadanesâ, Nebuzaladana uvua kapitene ka basalayi balami ‘kuluaye’ anyi kufikaye ku Yelushalema. (2 Bakelenge 25:8) Pamuapa Nebuzaladana wakabanga kutentekela Yelushalema pambelu pa lumbu lua tshimenga mu tshitudilu tshiabu, ulongolola tshia kuenza. Kunyima kua matuku 3, anyi mu dituku dia dikumi dia ngondo au, ‘kuluaye’ anyi kubuelaye munda mua Yelushalema. Kutuadijaye kutua Yelushalema mujima kapia.—Yelemiya 52:12, 13.
Bubanji bua mu Dîyi dia Nzambi
Malu manene a mu mukanda muibidi wa Bakelenge
24:3, 4. Bu muvua Manashe ne dibanza dia mashi, Yehowa ‘wakabenga bua kubuikidila [Yuda] mibi yende.’ Nzambi udi wangata ne mushinga mashi a bantu badi kabayi ne bualu. Tudi ne bua kuikala bashindike se: Yehowa neasombuele mashi a badi kabayi ne bualu pa kubutula aba badi bela mashi panshi.—Musambu 37:9-11; 145:20.
LUMINGU LUA DIA 16-22/1
BIUMA BIA MU DÎYI DIA NZAMBI | 1 KULONDOLOLA 1-3
“Bible mmukanda wa malu malelela, ki ngua mianu to”
w09-F 1/9 14 §1
Adama ne Eve bavua bantu balelela anyi?
Tuangabi tshilejilu tshia milongolongo ya bankambua ba bena Yuda idibu batele mu Bible mu 1 Kulondolola nshapita wa 1 too ne wa 9, ne mu Evanjeliyo wa Luka mu nshapita 3. Malu a bantu adibu bumvuije bimpe aa adi atangila bikondo 48 ne bipungu bia bantu 75 bionso musangu umue. Mu Luka mbafunde milongolongo ya bankambua ba Yezu padi eku mu Kulondolola bafunda milongolongo ya bakalenge ne bakuidi ba mu Isalele. Mu mikanda yonso ibidi eyi badi batela mêna a bantu badi bamanyike bimpe bu mudi: Solomo, Davidi, Yakoba, Izaka, Abalahama, Noa, ne ndekelu wa bionso Adama. Mêna onso adibu batele mu mikanda ibidi eyi nga bantu balelela. Mu mikanda yonso eyi badi batuadija anu ne Adama bu muntu wa kumpala pa buloba. (Adama uvua muntu mulelela)
Bualu bua Mvula wa kabutu ne Noa mbulelela anyi mmuanu?
Mikanda ibidi ya mu Bible idi yakula bua ndelanganyi ya bantu bakale idi ijadika ne: Noa uvua muntu wa muoyo. (1 Kulondolola 1:4; Luka 3:36) Ezela ne Luka bavua bafunde mulongolongo wa ndelanganyi eyi bavua benze mukebulula ne muoyo mujima. Luka uvua mufunde mulongo wa ndelanganyi ya Yezu too ne ku Noa.
w09-F 1/9 14, 15
Adama ne Eve bavua bantu balelela anyi?
Tuakule bua tshia kupikulangana natshi, dilongesha dikuabu dia mu Bible ditu ne mushinga wa bungi kudi bantu batu batendelela. Batu balongesha ne: Yezu Kristo wakafila muoyo wende wa muntu mupuangane bu tshia kupikulangana natshi bua kupikula bantu ku mpekatu yabu. (Matayi 20:28; Yone 3:16) Tudi bamanye bimpe ne: tshia kupikulangana natshi mmushinga mukumbanangane utubu bafila bua kukuula tshintu anyi kufuta tshivua tshijimina peshi tshinyanguke. Ke bualu kayi badi bamba mu Bible mudi Yezu muikale “tshia kupikulangana natshi tshidi tshikumbanangane.” (1 Timote 2:6) Tudi mua kudiebeja ne: ntshikumbananangane ne tshinyi? Bible udi wandamuna wamba ne: “Anu bu mudi bantu bonso bafua mu Adama, nunku kabidi mu Kristo bonso nebapete muoyo.” (1 Kolinto 15:22) Muoyo mupuangane uvua Yezu mufile bua kupikula bantu badi batumikila mmukumbanangane ne muoyo mupuangane uvua Adama mujimije pavuaye muenze mpekatu mu Edene. (Lomo 5:12) Bidi bimueneka patoke ne: bu Adama kayi muntu mulelela nanku mulambu wa Kristo wa tshia kupilangana natshi kawuvua ne bua kuikala ne mushinga to.
Bubanji bua mu Dîyi dia Nzambi
it-1-F 977 §2, 3
Dilondangana dia bankambua
Mêna a bantu bakaji. Bavua bafunda mêna a bantu bakaji mu mikanda ya dilondangana dia bankambua ku mpukampuka, pavuaku bualu buvua bulombe ne benze nanku. Bidi bimueneka patoke ne: badi batela Salai (Sala) mu Genese 11:29, 30, bualu Muana uvuabu balaye uvua ne bua kupatukila kudiyi yeye, kabiyi kudi mukaji mukuabu wa Abalahama to. Bavua pamuapa batele pende Mileka mu mvese ayi bualu uvua kakuende wa Lebeka mukaji wa Izaka; basue kuleja mu mushindu kampanda ne: Lebeka uvua wa mu dîku dia balela ba Abalahama, bualu Izaka kavua ne bua kusela mukaji wa tshisamba tshikuabu to. (Gen 22:20-23; 24:2-4) Mu Genese 25:1, badi batela dîna dia Ketula mukaji uvua Abalahama mulue kusela. Biumvuika bimpe ne: Abalahama uvua mulue kuselulula pakafua Sala ne utshivua anu ne bukole bua kulela too ne bidimu 40 panyima pa dîba divua Yehowa mubapeshilule bukole abu mu tshishima. (Lom 4:19; Gen 24:67; 25:20) Malu aa adi aleja kabidi malela avua pankatshi pa bena Midiyana ne bisa bikuabu bia bena Arabe ne Isalele.
Mbatele Lea, Lakela ne bakaji bavua Yakoba mubanjije, pamue ne bana babu ba balume. (Gen 35:21-26) Bidi bituambuluisha bua kumvua mushindu uvua Nzambi mulue kuenzela bana abu malu. Bua malu a muomumue, tudi tupeta mêna a bakaji bakuabu mu mikanda ya dilondangana dia bankambua. Bavua bafunda mêna abu mu mikanda ayi anu pavua bumpianyi bupitshila kudibu. (Nom 26:33) Bushuwa, mbatele Tama, Lahaba, ne Luta bua malu makuabu. Mu nsombelu yonso, kudi anu bualu kampanda budi buleja mudi bakaji aba bafike ku dibuela mu milongolongo ya bankambua ba Masiya, Yezu Kristo. (Gen 38; Lut 1:3-5; 4:13-15; Mat 1:1-5) Mbatele bantu bakaji mu milongolongo ya bankambua miaba mikuabu bu mudi mu 1 Kulondolola 2:35, 48, 49; 3:1-3, 5.
LUMINGU LUA DIA 23-29/1
BIUMA BIA MU DÎYI DIA NZAMBI | 1 KULONDOLOLA 4-6
“Ntshinyi tshitu masambila antu ngenza aleja bua bualu buanyi?”
w10-F 1/10 23 §3-7
“Muteleji wa disambila”
Yabesa uvua muntu wa masambila. Wakatuadija kusambila usengelela Nzambi bua amubeneshe. Pashishe kumulombaye malu asatu avua aleja muvuaye ne ditabuja dikole.
Bua kumpala, Yabesa wakalomba Nzambi wamba ne: ‘Diundisha buloba buanyi.’ (Mvese wa 10) Muntu wakunemekibua au kavua munyengianganyi wa maloba, uvua walakana maloba a bakuende to. Dilomba divuaye mulomba ne muoyo mujima adi divua pamuapa ditangila bantu kabiyi anu bua maloba to. Uvua pamuapa ulomba bua kuikale ditalala divule mu buloba buende, bua muikale batendeledi ba Nzambi mulelela ba bungi.
Buibidi, Yabesa wakalomba bua “tshianza” tshia Nzambi tshikale nende. Tshianza tshia Nzambi atshi tshidi tshileja bukole buende butuye wambuluisha nabu batendeledi bende. (1 Kulondolola 29:12) Bua kupete mandamuna a bivuaye mulomba, Yabesa uvua anu mutekemene kudi Nzambi bualu tshianza tshiende katshitu tshîpi kudi bantu badi ne lulamatu kudiye to.—Yeshaya 59:1.
Buisatu, Yabesa wakasambila wamba ne: ‘Ndame ku dikenga, bua bualu bubi nansha bumue kabumfikidi to.’ Tshiambilu tshia ne: “bua bualu bubi nansha bumue kabumfikidi to” tshidi pamuapa tshileja ne: Yabesa kavua musambile bua dikenga kadimufikidi to, kadi mbua kadimutshibuidi panshi anyi bua ananukile ntatu idi ifumina kudi mubi.
Disambila dia Yabesa didi dileja muvuaye uditatshisha bua ntendelelu mulelela ne muvuaye ne ditabuja weyemena muteleji wa disambila. Yehowa wakamuandamuna mushindu kayi? Muyuki wa tshitupa eu udi ujika ne mêyi a ne: “Nzambi wakenza tshivuaye mulombe.”
Bubanji bua mu Dîyi dia Nzambi
Malu manene a mu mukanda wa kumudilu wa Kulondolola
5:10, 18-22. Mu matuku a Mukalenge Shaula, bisa bia ku est kua Yadene biakatshimuna bena Hageli nansha muvuabu bapite bisa ebi ku bungi misangu mipite pa 2. Bivua nanku bualu bantu ba bukitu ba mu bisa ebi bakeyemena Yehowa ne bakamulomba diambuluisha. Tuikale beyemene Yehowa ne muoyo mujima patudi tutungunuka ne kuluangana mvita yetu ya mu nyuma ne baluishi ba bukole bua bungi.—Efeso 6:10-17.
LUMINGU LUA DIA 30/1–5/2
BIUMA BIA MU DÎYI DIA NZAMBI | 1 KULONDOLOLA 7-9
“Yehowa udi mua kukuambuluisha bua kuenza mudimu udi ne ntatu”
Malu manene a mu mukanda wa kumudilu wa Kulondolola
9:26, 27. Bena Lewi bavua balama ku biibi bavua benza mudimu wa mushinga wa bungi. Bavua babapeshe nsapi ya ku tshibuelelu tshia miaba minsantu ya mu ntempelo. Bakaleja muvuabu ba kueyemena pavuabu bunzulula biibi dituku dionso. Tuetu petu mbatupeshe mudimu wa kuya kudi bantu ba mu tshitupa tshietu ne bua kubambuluisha bua kulua kutendelela Yehowa. Katuenaku ne bua kudileja bantu ba kueyemena anu bu muvua bena Lewi bavua balama ku biibi anyi?
Udiku mua kuidikija Pinehasa paudi utuilangana ne ntatu anyi?
Pinehasa uvua ne mudimu munene mu Isalele wa kale, kadi bu muvuaye ne dikima ne busunguluji ne mueyemene Nzambi, wakawukumbaja bimpe nansha mu nsombelu mikole. Yehowa wakamuanyisha bua muvuaye uditatshisha bikole bua kulama tshisumbu tshiende. Bidimu bitue ku 1 000 pashishe, nyuma muimpe wakasaka Ezela bua kufunda ne: ‘Diambedi Pinehasa, muana wa Eleazâ, wakadi ku mutu kuabu ne Yehowa wakadi nende.’ (1 Kul. 9:20) Tshilejilu tshia Pinehasa tshiambuluisheku bana betu bonso badi ne majitu mu tshisamba tshia Nzambi, tshiambuluisheku kabidi bena Kristo balelela bonso.
Bubanji bua mu Dîyi dia Nzambi
Tuimbilayi Yehowa misambu
6 Yehowa wakambila batendeledi bende ku butuangaji bua baprofete bende bua bikale bamutumbisha ne misambu. Bavua bakepeshe midimu ya bena Lewi bimbi ba misambu bua kabenji midimu ivua bena Lewi bakuabu benza bua bapete dîba dia bungi dia kufunda misambu ne pamuapa dia kuyambulula.—1 Kul. 9:33.
LUMINGU LUA DIA 6-12/2
BIUMA BIA MU DÎYI DIA NZAMBI | 1 KULONDOLOLA 10-12
“Kolesha dijinga diebe dia kuenza disua dia Nzambi”
“Unyishe mua kuenza bu mudi disua diebe”
12 Davidi uvua mumanye mêyi manene a mu mikenji ne uvua uatumikila; tudi kabidi ne bua kumuidikija. Tumone tshivua tshienzeke pavua Davidi mumvue bua ‘kunua mâyi a mu dina dia mu Beteleheme.’ Basalayi basatu ba Davidi bakenza muabu muonso bua kubuela mu tshimenga tshivuabu bakuate kudi bena Peleshete ne kuluabu ne mâyi. Kadi, ‘Davidi wakapidia kuanua, wakaapongolola kudi Yehowa.’ Bua tshinyi? Davidi wakamba ne: ‘Nzambi wanyi ampidishe bua meme tshienji nunku; nennue mashi a bantu aba bakuamba kufua bua bualu buanyi anyi? Bualu bua bobu bakuamba kufila mioyo yabu pakuluabu nawu.’—1 Kul. 11:15-19.
13 Davidi uvua mumanye bilondeshile mikenji ne: kabivua bimpe bua kudia mashi to, bavua ne bua kuapongolola panshi kumpala kua Yehowa. Uvua kabidi mumvue bua tshinyi bivua bikengela kuenza nanku. Davidi uvua mumanye ne: “mashi adi bu muoyo wa tshintu.” Kadi au avua mâyi, kaavua mashi to. Davidi uvua mubenge bua kuanua bua tshinyi? Uvua mumanye dîyi dinene divua mu mukenji au. Bua Davidi, mâyi au avua ne mushinga anu bu wa mashi a bantu basatu abu. Ke bualu kayi wakabenga bua kuanua. Pamutu pa kuanua, wakamona ne: uvua ne bua kuapongolola panshi.—Lew. 17:11; Dut. 12:23, 24.
Mikenji ya Nzambi ne mêyi ende manene bilongeshe kondo kebe ka muoyo
5 Bua mikenji ya Nzambi kutuambuluisha, kabiena bikengela anu kuyibala anyi kuyimanya patupu to. Tudi ne bua kuyinanga ne kuyitumikila. Dîyi dia Nzambi didi diamba ne: “Kinayi malu mabi, nangayi malu mimpe.” (Amo 5:15) Mmunyi mutudi mua kuenza nunku? Bualu bunene butudi mua kuenza nkulonga mua kumona malu mudi Yehowa uamona. Fuanyikijabi ne: mbikukolele bua kumona tulu. Doktere udi ukufundila amue malu a kulonda bu mudi kudia biakudia bidi bimpe, kuibidija mubidi, ne kushintulula bimue bibidilu. Mpindieu dilonda malu aa ndikuambuluishe bua kumona tulu! Kakuyi mpata, newikale ne dianyisha dia bungi kudi doktere au bua mudiye mukuambuluishe.
6 Bia muomumue, Mufuki wetu mmutuelele mikenji idi itukuba ku ntatu idi kuenza mpekatu kukebesha bua tuikale ne nsombelu muimpe. Anji elabi meji bua mudi kutumikila mibelu ya mu Bible kutuambuluisha mu malu bu mudi dishima, dilukakaja meji mabi, masandi, tshikisu, ne malu a mîdima. (Bala Nsumuinu 6:16-19; Buak. 21:8) Patudi tupeta masanka bua mutudi tuenza malu mudi Yehowa musue, tudi tumunanga yeye ne mikenji yende bikole ne tumuanyisha.
Bubanji bua mu Dîyi dia Nzambi
it-1-F 492 §2, 3
Muoyo
Mua kuenza mudimu ne “muoyo mujima.” Bua muoyo wetu muena dîna eu kuenzawu mudimu bimpe bikengela wikale ne bitupa biawu bionso, kadi wa mu tshimfuanyi wowu udi mua kutapuluka. Davidi wakasambila ne: “Vuija muoyo wanyi muoyo umue bua ntshine dîna diebe,” uleja muvua muoyo wa muntu mua kutapuluka bua malu adiye munange ne adiye utshina. (Mis 86:11) Muntu wa nunku udi mua kuikala ne “muoyo mukuatshidile,” mmumue ne: utendelela Nzambi ne tshiuyuya. (Mis 119:113; Bua 3:16) Muntu udi mua kuikala kabidi ne “mioyo ibidi” (ku muaku ku muaku, muikale ne muoyo ne muoyo mukuabu), ujinga kuenzela bamfumu babidi mudimu, anyi wamba bualu bua dishima mukana padiye wela meji ku tshikuabu munda muende. (1Ku 12:33; Mis 12:2, dim) Yezu kavua munange nansha kakese bena lubombo bavua ne mioyo ibidi to.—Mat 15:7, 8.
Muntu udi ukeba bua kusankisha Nzambi kena ne bua kuikala ne mioyo ibidi anyi ne muoyo mukuatshididile to, kadi udi ne bua kumuenzela mudimu ne muoyo mujima. (1Ku 28:9) Bua kuenza nanku bidi bikengela kudienzeja bualu muoyo wetu utu utudinga utusanka anu ku malu mabi. (Yel 17:9, 10; Gen 8:21) Bua tuetu kulama muoyo wetu wonso mujima mbimpe tuikale tusambila ne muoyo wa munda wonso (Mis 119:145; Mdi 3:41), tulonga Dîyi dia Nzambi pa tshibidilu (Ezl 7:10; Nsu 15:28), tuyisha lumu luimpe ne tshisumi (fuanyikija ne Yel 20:9), ne tudisangisha ne bantu badi badifile pabu ne muoyo mujima kudi Yehowa.—Fuanyikija ne 2Bk 10:15, 16.
LUMINGU LUA DIA 13-19/2
BIUMA BIA MU DÎYI DIA NZAMBI | 1 KULONDOLOLA 13-16
“Kulonda buludiki kutu kupetesha bipeta bimpe”
Utuku udiebeja ne: ‘Yehowa udi penyi’ anyi?
12 Mukalenge Davidi wakajinga bua kutuala mushete wa tshipungidi ku Yelushalema panyima pa bamane kuupingajila bena Isalele ne baulame bidimu bivule ku Kîyata-yalima. Wakapunga dîyi ne tupita tua bantu ne kuamba ne: balue ne Mushete wa tshipungidi ‘bielanganabu meji bimpe, ne biasua Yehowa.’ Kadi wakalengulula bua kukeba tshivua menemene disua dia Yehowa pa muanda au. Bu yeye mudikebe, kabavua ne bua kuambuila Mushete au pa ditempu nansha. Bena Lewi ba mu dîku dia Kohata ke bavua ne bua kuwambula pa makaya bu muvua Nzambi mubileje patoke. Nansha muvua Davidi muikale ne tshibidilu tshia kukeba bulombodi bua Yehowa, kakabukeba mu mushindu muimpe musangu au to. Tshipeta tshiakamueneka tshivua tshibi menemene. Davidi wakalua kuamba pashishe ne: ‘Yehowa Nzambi wakapatuka kutudi bua kutukengesha, bualu bua tuetu katuakakeba disua diende mu mukenji eu.’—1 Kulondolola 13:1-3; 15:11-13; Nomba 4:4-6, 15; 7:1-9.
Utuku udiebeja ne: ‘Yehowa udi penyi’ anyi?
13 Ndekelu wa bionso pakalua bena Lewi kuambula Mushete wa tshipungidi ku nzubu wa Obeda-edome, bakimba musambu uvua Davidi mufunde. Uvua uvuluija bualu bua mushinga mukole ebu: ‘Kebayi bienu Yehowa ne bukole buende, kebayi mpala wende matuku onso. Nuvuluke bienu bienzedi bia kukema biakenzaye, malu ende a kukema, ne dilumbulula dia mukana muende.’—1 Kulondolola 16:11, 12.
Bubanji bua mu Dîyi dia Nzambi
Tendelela Yehowa Mukalenge wa tshiendelele
14 Davidi wakaya ne mushete wa tshijila wa tshipungidi mu Yelushalema. Mu tshikondo tshia disanka etshi, bena Lewi bakimba musambu wa butumbi ne mêyi a mushinga adi mu 1 Kulondolola 16:31 adi amba ne: ‘Bambe munkatshi mua bisamba ne: Yehowa udi ukokesha.’ Muntu udi mua kudiebeja ne: ‘Bu mudi Yehowa muikale Mukalenge wa tshiendelele, mmunyi mudibi ne: wakalua Mukalenge mu tshikondo atshi?’ Yehowa udi ulua Mukalenge padiye ukuata mudimu ne bumfumu buende anyi uteka muntu bua ikale muleji-mpala wende. Mushindu wa bukokeshi bua Yehowa eu udi ne diumvuija dia pa buadi. Kumpala kua Davidi kufua, Yehowa wakamulaya ne: bukalenge buende buvua ne bua kutungunuka tshiendelele wamba ne: ‘Pakumbana matuku ebe, pawalala tulu ne bankambua bebe, nensungule muanebe udi ulupuka munda muebe, nenjadike bukalenge buende.’ (2 Sam. 7:12, 13) Ku ndekelu kua dikumbana dia malu onso avuabu balaye, “muana” peshi kankanunuina ka Davidi kakalua kumueneka bidimu bipite pa 1 000 pashishe. Nnganyi uvua ne bua kuikala kankanunuina aka? Ndîba kayi divuaku ne bua kulua Mukalenge?
LUMINGU LUA DIA 20-26/2
BIUMA BIA MU DÎYI DIA NZAMBI | 1 KULONDOLOLA 17-19
“Ikala ne disanka nansha padibu bakuela mâyi ku makasa”
Tuanyishe bulongolodi buimpe bua Yehowa
DAVIDI Mukalenge wa Isalele wa kale udi umue wa ku bantu ba pa buabu badi Mifundu ya tshiena-Ebelu yakula bualu buabu. Uvua mulami wa mikoko, kangimba, muprofete ne mukalenge. Uvua weyemena Yehowa Nzambi ne muoyo wende mujima. Malanda mimpe avuaye nawu ne Yehowa akamujula dijinga dia kumuibakila nzubu. Nzubu eu anyi ntempelo uvua ne bua kulua muaba wa ntendelelu mulelela mu Isalele. Davidi uvua mumanye ne: ntempelo ne midimu ivua ne bua kuenzekelamu bivua ne bua kupetesha tshisamba tshia Nzambi disanka ne mabenesha. Ke bualu kayi Davidi wakimba ne: ‘Disanka didi kudi muntu uudi [wewe Yehowa] usungula ne uudi ufikisha pepi nebe, bua ashikame mu biendelu bia tshitendelelu tshiebe! Tuetu netuikale ne mitshima mitalale bua buimpe bua nzubu webe, ntempelo webe wa tshijila.’—Musambu 65:4.
Ikala ne disanka bua tshiudi wenza mu mudimu wa Yehowa
11 Bia muomumue, tuetu tudifila muetu muonso bua kuenza mudimu kayi wonso udibu batupesha mu bulongolodi bua Yehowa netuvudije disanka dietu. ‘Difila bikole’ mu mudimu wa diyisha, ne ikala wenza midimu ya mu tshisumbu ne tshisumi. (Bien. 18:5; Eb. 10:24, 25) Ikala uya mu bisangilu mudilongolole bua kufila mandamuna adi akolesha a mu binuikala ne bua kulonga. Ikala wangata mudimu wonso wa mulongi udibu bakupesha mu tshisangilu tshia munkatshi mua lumingu ne mushinga wa bungi. Buobu bakulombe bua kuenza mudimu kampanda mu tshisumbu, ikala unemeka dîba ne ikala muntu wa kueyemena. Kuikadi umona mudimu udibu bakupeshe bu udi kawuyi ne dikuatshisha ne ukujimijila dîba diebe tshianana to. Dienzeje bua upiluke mu diwenza. (Nsu. 22:29) Wewe udifila bikole mu mudimu uudi wenzela Yehowa, neuye kumpala lukasa ne disanka diebe nedivule bikole. (Gal. 6:4) Nebikale kabidi bikusankisha padibu bapesha bana betu bakuabu midimu mu tshisumbu iuvua pamuapa wewe ujinga kupeta.—Lomo 12:15; Gal. 5:26.
Bubanji bua mu Dîyi dia Nzambi
w20.02 12, kazubu
Tudi banange Yehowa Tatu wetu bikole menemene
Yehowa utu ummona meme anyi?
Bikadiku bikufikile bua kudiebeja ne: ‘Pa buloba apa padi bantu bungi bu ntunta ne ngenena, Yehowa udi mua kummona meme eu anyi?’ Biobi nanku, kuena nkayebe to. Mukalenge Davidi wakafunda ne: “Yehowa wanyi, muntu nnganyi bua wewe kumutangila, muana wa muntu ufuafua nnganyi bua wewe kutuma ntema yebe kudiye?” (Mis. 144:3) Davidi uvua mutuishibue ne: Yehowa uvua mumumanye bimpe. (1 Kul. 17:16-18) Yehowa udi kabidi ukujadikila mu Bible ne kupitshila ku bulongolodi buende ne: udi umona muudi mumunange. Mona amue malu a mu Dîyi dia Nzambi adi mua kukuambuluisha bua wikale mutuishibue bua bualu ebu:
• Yehowa uvua mukumone kumpala mene kua wewe kuledibua.—Mis. 139:16.
• Yehowa mmumanye malu adi mu muoyo webe, ne mmumanye meji audi wela.—1 Kul. 28:9.
• Yehowa utu uditelejila disambila dionso diudi wenza.—Mis. 65:2.
• Malu audi wenza adi mua kusankisha Yehowa anyi kumubungamija.—Nsu. 27:11.
• Yehowa nkayende mmukukoke kudiye.—Yone 6:44.
• Wewe mufue, Yehowa mmukumanye bimpe ne neakubishe ku lufu. Neenzulule mubidi webe ne neakupingajile meji ebe ne malu auvua mukuatamu, ukupingajila kabidi bumuntu buebe.—Yone 11:21-26, 39-44; Bien. 24:15.
LUMINGU LUA DIA 27/2–5/3
BIUMA BIA MU DÎYI DIA NZAMBI | 1 KULONDOLOLA 20-22
“Ambuluisha bansonga bua malu abu ende bimpe”
“Malu aa uapeshe balume ba lulamatu”
8 Bala 1 Kulondolola 22:5. Davidi uvua mua kuikala muele meji ne: Solomo kavua mukumbane bua kulombola mudimu wa mushinga eu to. Ntempelo uvua ne bua kuikala “muakane wa butumbi” ne Solomo utshivua “nsongalume udi mutekete.” Kadi Davidi wakamanya ne: Yehowa uvua ne bua kuambuluisha Solomo bua kuenza mudimu wa pa buawu eu. Ke bualu kayi Davidi wakenza muende muoyo bua kumuambuluisha bua adilongolole bua mudimu mutambe bunene eu.
“Malu aa uapeshe balume ba lulamatu”
7 Davidi uvua bushuwa musue kuibakila Yehowa ntempelo, ke bualu kayi bivua mua kuikala bimutonde bikole. Kadi wakatungunuka anu ne kukuatshisha ne muoyo mujima mudimu uvua muanende Solomo ulombola. Davidi wakambuluisha bua kulongolola bena mudimu ne kulongolola tshiamu tshifike, tshiamu tshia mitaku, arjan, or ne mitshi. Kavua musamishe mutu bua muntu uvua mua kupeta lumu lua kuibaka ntempelo wakaluabu kubikila ne: ntempelo wa Solomo to. Kadi wakakankamija Solomo wamba ne: ‘Katataka, muananyi, Yehowa ikale nebe; wikale ne diakalengele, wibakile Yehowa, Nzambi webe, nzubu bu muakuambaye bualu buebe.’—1 Kulondolola 22:11, 14-16.
Baledi wetu, ambuluishayi bana benu baye kumpala too ne ku batismo
14 Bu mudi bakulu bikale balami ba mu nyuma, badi mua kuelesha baledi diboko padibu bakula bimpe bua bipatshila bia mu nyuma. Muanetu wa bakaji mukuabu uvua muenze bumpanda-njila bidimu bipite pa 70 wakavuluka muvua muyuki wende ne muanetu Charles Russell mumukoleshe patshivuaye anu ne bidimu bisambombo. Wakamba ne: “Wakayukila nanyi mu minite 15 bua bipatshila bianyi bia mu nyuma.” Eyowa, mêyi mimpe adi akankamija adi mua kuambuluisha muntu bidimu bia bungi. (Nsu. 25:11) Bakulu badi mua kuenza bua baledi ne bana babu benze midimu ya ku Nzubu wa Bukalenge pamue, bapesha bana midimu idi ikumbanangana ne bidimu ne makanda abu.
15 Bena mu tshisumbu bakuabu badi pabu mua kuambuluisha padibu batabalela bana mu mushindu muimpe. Bualu ebu budi bulomba kutabalela malu adibu benza adi aleja ne: badi baya kumpala mu nyuma. Tshilejilu, muana kampanda uvuaku mufile diandamuna dilongolola bimpe didi dilenga ku muoyo anyi muenze mudimu mu tshisangilu tshia munkatshi mua lumingu anyi? Uvuaku mutantamene diteta kampanda anyi mubabidile mpunga bua kuyisha mu kalasa anyi? Ikala ne lukasa bua kumuela kalumbandi ne muoyo mujima. Kuenaku mua kudifundila tshipatshila tshia kuyukila ne muana kampanda kumpala kua bisangilu anyi padibi bijika bua kuleja muudi umutabalela anyi? Mu mishindu eyi ne mikuabu kabidi, bana nebadiumvue ne mushinga mu “tshisumbu tshinene tshia bantu.”—Mis. 35:18.
Bubanji bua mu Dîyi dia Nzambi
Malu manene a mu mukanda wa kumudilu wa Kulondolola
21:13-15. Yehowa wakambila muanjelu wende bua kuimanyika tshipupu atshi bualu Udi umvua bibi padi bantu bende bakenga. Bushuwa, ‘luse luende ludi lunene.’