Mmunyi muakuvuluka Yehowa?

‘NZAMBI wanyi, umvuluke.’ Nehemiya wakasengelela Nzambi njila ne njila ne mêyi aa. (Nehemiya 5:19; 13:14, 31) Ki mbibi to padi bantu mu dikenga banyemena kudi Nzambi ne bamutendekena ne mêyi a buena aa.

Kadi ntshinyi tshitu bantu natshi mu lungenyi padibu balomba Nzambi bua kubavulukaye? Mbiumvuike ne: badi batekemena bua Nzambi kubenzelaye malu a bungi kupita divuluka mêna abu patupu. Kakuyi mpata, batu ne ditekemena dia buena divua nadi umue wa ku bena tshibawu bavuabu bashipe pamue ne Yezu. Muena tshibawu au, mushilangane ne mukuende au, wakatendekena Yezu ne: “Umvuluke pawabuela mu Bukalenge buebe.” Uvua musue bua Yezu amuenzele bualu kampanda, amubishe ku lufu kupita dimuvuluka patupu ne: uvua nganyi.​—Luka 23:42, MMM.

Misangu mivule Bible utu uleja ne: bua Nzambi, “kuvuluka” kudi kumvuija kuenza bualu buimpe. Tshilejilu, pavua mâyi a mvula mabuikile buloba bujima mu matuku 150, ‘Nzambi wakavuluka Noa; Nzambi wakapepeja lupepele pa buloba ne mâyi akapueka.’ (Genese 8:1) Kunyima kua nkama ya bidimu, Shimishona uvua bena Peleshete bashipe mêsu ne basuike ne nkanu wakasambila ne: ‘Yehowa, umvuluke, ndi nkusengelela, unkoleshe anu musangu eu.’ Yehowa wakavuluka Shimishona pa kumupesha bukole budi butambe bua bantu bua kudisombuelaye kudi baluishi ba Nzambi. (Balumbuluishi 16:28-30) Bua Nehemiya, Yehowa wakabenesha madikolela ende, ne bakapingaja ntendelelu mulelela mu Yelushalema.

Mupostolo Paulo wakafunda ne: “Bionso bivuabo bafunde kale mbifunda bua kutulongesha, bua dinanukila ne ditusamba bia mu [Mifundu] bitupeshe ditekemena.” (Lomo 15:4, MMM) Bituavuluka Yehowa patudi tuditatshisha bua kuenza disua diende, anu muakenza basadidi bende mu bikondo bia kale, netuikale ne dishindika dia se: Yehowa neatuvuluke pa kutukumbajila majinga etu a ku dituku, kutukuatshisha mu mateta adi atufikila ne kutusungila pabutulaye bantu badi kabayi batshina Nzambi.​—Matayo 6:33; 2 Petelo 2:9.

Udi musue balue kukutangila anyi?

Nansha mudi malu manyanguke lelu, udi mua kupeta disanka didi difumina ku dimanya dijalame didi Bible ufila pa bidi bitangila Nzambi, Bukalenge buende ne malu malenga adiye mulongoluele bantu. Biwikala musue kumanya malu makuabu anyi musue balue kukutangila bua kulonga nebe Bible kuyi ufuta mfranga, udi mua kuebeja Bantemu ba Yehowa ba muaba uudi peshi kufundila Association “Les Témoins de Jéhovah”, B.P. 634 Limete, Kinshasa, République démocratique du Congo.