Bobu bakose mutshi, udiku mua kusampila kabidi anyi?

PATUDI tufuanyikija mutshi munene wa sedre wa mu Lebanona ne mutshi wa olive udi mukole ne mukonyangale, mutshi wa olive udi umueneka kawuyi ukemesha to. Kudi bimue bitupa bia mitshi ya olive bitu ne bukole bua kushala bibishi nansha mutshi wowu mûme. Badi batshinka ne: imue ikadi mienze bidimu 1 000. Bu mudi miji ya mutshi wa olive ibuela mu buloba bikole, idi iwambuluisha bua kusampila nansha mulamba wa mutshi au mûme. Bu mudi miji ishala mibishi matuku a bungi, neusampile kabidi.

Yobo uvua mutuishibue ne: nansha yeye mufue, uvua ne bua kupetulula kabidi muoyo. (Yobo 14:13-15) Wakakula bua mutshi, pamuapa wa olive bua kuleja dishindika divuaye nadi dia ne: Nzambi neamujule ku lufu. Yobo wakamba ne: ‘Badi bamanye mua kutekemena mutshi ne: biawutapilabu kuinshi, neusampile kabidi.’ Padiku minanga mikole, tshikuku tshiûme tshia mutshi wa olive tshidi mua kupatula lutonga ku miji yatshi “bu mutshi utshidi mutekete.”​—Yobo 14:7-9.

Anu mudi tshidime windila ne muoyo mujima bua kumona mutshi wa olive uvuaye mukose usampila kabidi, Yehowa pende udi ne dijinga dikole dia kupeshilula batendeledi bende ne bantu bakuabu ba bungi badi bafue muoyo. (Mat. 22:31, 32; Yone 5:28, 29; Bien. 24:15) Netuikale ne disanka dia bungi dia kuakidila bantu bakadi bafue ne kubamona kabidi ne muoyo.