DILONGESHA DIA 14
Mudi ntendelelu wetu mua kusankisha Nzambi
Anu mutudi bamone mu dilongesha dishale, Nzambi katu wanyisha bitendelelu bionso to. Kadi tudi mua kutendelela Mufuki wetu mu mushindu udi umusankisha. ‘Nntendelelu anyi ntshitendelelu’ kayi tshidi tshimusankisha? (Yakobo 1:27, dimanyisha) Mona tshidi Bible ulongesha.
1. Ntendelelu wetu udi ne bua kushindamena pa tshinyi?
Ntendelelu wetu udi ne bua kushindamena mu Bible. Yezu wakambila Nzambi ne: “Dîyi diebe mbulelela.” (Yone 17:17) Bimue bitendelelu kabitu bilongesha bulelela budi mu Bible, Dîyi difundisha ku bukole bua Nzambi to. Mbipingaje malongesha a bantu ne bilele biabu pa muaba wadi. Kadi Yehowa kena wanyisha badi ‘balekela mikenji ya Nzambi to.’ (Balayi Mâko 7:9.) Ku lukuabu luseke, tudi tusankisha Nzambi patudi tulamata ku Bible ne tulonda mibelu idimu.
2. Mmunyi mutudi ne bua kutendelela Yehowa?
Bu mudi Yehowa Mufuki wetu, tudi ne bua kumutendelela anu yeye nkayende. (Buakabuluibua 4:11) Mmumue ne: tudi ne bua kumunanga ne kumutendelela anu yeye, katuyi tumutendelela ne mpingu, bimfuanyi, anyi bijimba to.—Balayi Yeshaya 42:8.
Ntendelelu wetu udi ne bua kuikala “wa tshijila ne . . . muanyishibue” kudi Yehowa. (Lomo 12:1) Mmumue ne: mbimpe tutumikile mikenji yende ya bikadilu. Tshilejilu, badi banange Yehowa mbanange mikenji yende idi yakula bua dibaka ne badi bayitumikila. Badi bepuka kabidi bikadilu bibi, bu mudi kunua makanya anyi tshiangatangata peshi bunuavi bua manga adi akuata ne maluvu makole.a
3. Bua tshinyi tudi ne bua kutendelela Yehowa pamue ne bena Kristo netu?
Bisangilu bitutu tuenza lumingu luonso bitu bitupetesha mushindu wa “[kutumbisha] Yehowa . . . mu tshisumbu.” (Misambu 111:1, 2) Tutu tuenza nanku patudi tuimba misambu ya kutumbisha nayi Nzambi. (Balayi Misambu 104:33.) Yehowa udi utulomba bua kubuela mu bisangilu bualu mmutunange ne mmumanye ne: nebituambuluishe bua kutunka ne muoyo kashidi. Mu bisangilu, tutu tukankamija bakuabu ne bobu pabu batukankamija.
BUELA MU BUONDOKE
Mona bua tshinyi Yehowa kena wanyisha dimutendelela ne mpingu. Mona malu a mushinga a mutudi mua kutumbisha Nzambi.
4. Katuena ne bua kutendelela Nzambi ne mpingu to
Ntshinyi tshidi tshitujadikila ne: Nzambi katu wanyisha dimutendelela ne mpingu? Tangilayi FILME, pashishe nuandamune lukonko ludi lulonda.
Ntshinyi tshivua tshienzeke pavua bamue batendeledi ba Nzambi ba bikondo bia kale batete kumutendelela ne lupingu kampanda?
Bamue batu batendelela Nzambi ne mpingu bua kusemena pabuipi nende. Kadi kuenza nanku kudi mua kubasemeja pabuipi nende anyi? Balayi Ekesode 20:4-6 ne Misambu 106:35, 36, pashishe nuandamune nkonko eyi:
Mbintu anyi mmpingu kayi iudi umona bantu batendelela nayi?
Mmunyi mutu Yehowa umona dimutendelela ne mpingu?
Mmunyi muutu umona ditendelela Nzambi ne mpingu?
5. Kutendelela anu Yehowa kudi kutupikula ku ngenyi ya dishima
Mona mudi kutendelela Yehowa mu mushindu udiye wanyisha mua kutupikula ku ngenyi ya dishima. Tangilayi FILME.
Balayi Misambu 91:14, pashishe nuandamune lukonko elu:
Ntshinyi tshidi Yehowa mulaye bua kutuenzela patudi tumutendelela anu yeye bua kuleja ne: tudi bamunange?
6. Tudi tutendelela Nzambi mu bisangilu
Tudi tutumbisha Yehowa ne tukoleshangana patudi tuimba misambu ne tuandamuna mu bisangilu. Balayi Misambu 22:22, pashishe nuandamune nkonko eyi:
Utu wanyisha mandamuna autu umvua mu bisangilu anyi?
Udi musue kudilongolola bua kuandamuna pebe anyi?
7. Yehowa udi usanka patudi tuambila bakuabu bitudi tulonga
Kudi mishindu ya bungi itudi mua kuambila bakuabu malu malelela a mu Bible. Balayi Misambu 9:1 ne 34:1, pashishe nuandamune lukonko elu:
Mbualu kayi buudi mulonge mu Bible buudi musue kuambila muntu mukuabu?
BAMUE BATU BAMBA NE: “Mbikole bua kusankisha Nzambi.”
Wewe udi wamba tshinyi?
TSHIA KUKUATA
Tudi tusankisha Mufuki wetu patudi tumutendelela anu yeye nkayende, tumutumbisha mu bisangilu, ne tuambila bakuabu malu atudi tulonga.
Diambulula
Mmunyi mutudi mua kumanya mua kutendelela Nzambi mu mushindu udiye wanyisha?
Bua tshinyi tudi ne bua kutendelela anu Yehowa?
Bua tshinyi tudi ne bua kutendelela Nzambi pamue ne bakuabu badi basue kumusankisha?
BIA KUTANGILA KABIDI
Bala muvua mamu mukuabu mulekele kutendelela mpingu mu tshiena-bualu tshia “Tshitshiena kabidi mupika wa mpingu to.”
“Bible utu ushintulula bantu” (Tshibumba tshia Nsentedi 1/10/2011)
Mona tshidi mua kukuambuluisha bua kuandamuna mu bisangilu.
“Tumbisha Yehowa munkatshi mua tshisumbu tshia bantu” (Tshibumba tshia Nsentedi 1/2019)
Mona muvua bisangilu biambuluishe nsongalume kampanda nansha muvuabi bikole bua yeye kubibuela.
Ba bungi batu bela meji ne: nkuruse udi uleja bukua buena Kristo, kadi tudi ne bua kutendelela Nzambi ne nkuruse anyi?
“Bua tshinyi Bantemu ba Yehowa kabatu batendelela ne nkuruse?” (Tshiena-bualu tshia mu jw.org)
a Netukonkonone biena-bualu ebi mu malongesha adi alonda.