bua kutantamena bipeta bibi bia mpekatu wende. Dimubuikidila bubi ne didisangisha ne bena Kristo netu nebiambuluishe muntu eu bua kupetulula makanda a mu nyuma. Ku diambuluisha dia mulambu wa Kristo wakafilaye bua kutupikula, muntu udi unyingalala bua mpekatu wende udi mua kufika ku dilabula “bunene bua luse [lua Nzambi].”​—Efeso 1:7, Muanda Mulenga Lelu.

“Mutshima mutoke” ne “nyuma mujalame”

Kunyima kua Davidi mumane kutonda mpekatu wende, kakatungunuka anu ne kudimona bu muntu uvua kayi kabidi ne mushinga nansha. Mêyi ende adi mu misambu yakafundaye bua ditonda mpekatu adi aleja disulakana diakumvuaye ne dipangadika diende dia kusadila Nzambi ne lulamatu. Tshilejilu, bala Musambu wa 32. Mu mvese 1 tudi tubala ne: ‘Disanka didi kudi muntu udi ne ditomboka diende diumushibue, ne udi ne bubi buende bubuikidibue!’ Nansha mpekatu yeye bunene kayi, muntu udi mua kupetulula nsombelu muimpe bikalaye munyingalale ne muoyo mujima bua bubi buende. Umue mushindu wa yeye kuleja ne: mmunyingalale ne muoyo mujima nkuitaba bujitu buonso bua bienzedi biende bibi abi anu muakenza Davidi. (2 Samuele 12:13) Kakakeba bua kudibingisha kumpala kua Yehowa anyi bua kuela bakuabu tshilumbu atshi pambidi to. Mvese 5 udi wamba ne: ‘Ngakatonda bubi buanyi kûdi, tshiakasokoka dipambuka dianyi ku buakane. Ngakamba ne: Nentonde matomboka anyi kudi Yehowa; ne wewe wakandekelela dipila dia bubi buanyi.’ Ditonda mpekatu dia bushuwa didi disulakaja muntu, bualu kuondo kende ka muoyo kakakumulubakaja kabidi bua malu mabi avuaye muenze to.

Kunyima kua yeye mumane kulomba Yehowa bua amubuikidile mpekatu, Davidi wakamusengelela ne: ‘Nzambi, umfukile mutshima mutoke munda muanyi, ungenzele nyuma mujalame munda muanyi.’ (Musambu 51:10) Kulomba kua Davidi kua “mutshima mutoke” ne “nyuma mujalame” kudi kuleja ne: uvua mumanye bimpe muvua meji ende matangija anu ku dienza mpekatu ne muvuaye ujinga bua Nzambi amuambuluishe bua atokeshe mutshima wende ne abangulule nsombelu wende bimpe. Pamutu pa yeye kushala anu mubungame, uvua mudisuike bua kutungunuka ne kusadila Nzambi. Wakasambila ne: ‘Mukalenge, ubulule mishiku yanyi, ne mukana muanyi nemumanyishe bantu butumbi buebe.’​—Musambu 51:15.

Mmunyi muvua Yehowa umona dinyingalala ne muoyo mujima dia Davidi bua mpekatu wende ne mushindu uvuaye mudisuike bua kumusadila? Wakakolesha Davidi ku muoyo ne: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’ (Musambu 32:8) Mêyi aa adi aleja ne: Yehowa udi umona

Nkonko ya babadi

Bu mudi Yehowa muikale witaba bua kubuikidilangana mpekatu bua mulambu wa Muanende udi upikula bantu, bua tshinyi bena Kristo badi ne bua kutonda mpekatu kumpala kua bakulu ba tshisumbu?

Tudi mua kumvuila bualu ebu bimpe mu tshilumbu tshia Davidi ne Beta-sheba, pavua Yehowa mumubuikidile mpekatu nansha muvuaye munene, bualu wakadilengeja ku bubi buende. Pakayikila nende muprofete Natana, Davidi wakatonda patoke ne: “Nakenzela Yehowa bibi.”​—2 Samuele 12:13.

Tshiakumanya ntshia se: Yehowa kêna anu witaba ditonda mpekatu ne muoyo mujima patupu to, kadi udi kabidi ubuikidila udi muenze mpekatu ne ulongolola mushindu wa kuambuluisha muntu eu udi mupambuke bua kupetululaye makanda a mu nyuma. Bua Davidi, muprofete Natana ke wakamuambuluisha. Lelu, mu tshisumbu tshia bena Kristo mudi balume bakole mu nyuma anyi bakulu. Muyidi Yakobo udi umvuija bualu ebu ne: ‘Muntu udi ne disama [dia mu nyuma] munkatshi muenu anyi? Abikile biende bakulu ba ekeleziya; buobu bamulombele Nzambi, bamuele manyi mu dîna dia Mukalenge; ne kulomba kudi ne ditabuja nekusungile muena disama, ne Mukalenge neamubishe; ne bikalaye muenze bualu bubi, Nzambi neamubuikidile bubi buende.’​—Yakobo 5:14, 15.

Bakulu bapiluke badi benza muabu muonso bua kutuyisha kanyinganyinga ka didipisha kadi mu mutshima wa muntu udi muenze mpekatu. Badi badienzeja