Nuele bianza bia bulamatshi muulu mu disambila
“Ndi musue bua bantu balume basambile miaba yonso, bele bianza [“bia bulamatshi,” NW] mulu bua kusambila, kabayi ne tshiji nansha matandu.”—1 TIMOTEYI 2:8, MMM.
1, 2. (a) Mmunyi mudi 1 Timote 2:8 wakula bua masambila adi atangila bantu ba Yehowa? (b) Mbualu kayi butuakonkonona mpindieu?
YEHOWA mmutekemene bua bantu bende bikale ne bulamatshi kudiye ne kudi umue ne mukuabu. Mupostolo Paulo wakasuikakaja bulamatshi ne disambila pakafundaye ne: “Ndi musue bua bantu balume basambile miaba yonso, bele bianza [“bia bulamatshi,” NW] mulu bua kusambila, kabayi ne tshiji nansha matandu.” (1 Timoteyi 2:8, MMM) Bidi bimueneka ne: Paulo uvua wakula bua masambila menza pa bantu “miaba yonso” ivua bena Kristo basangila. Mbanganyi bavua ne bua kusambila bua bantu ba Nzambi mu bisangilu bia tshisumbu? Anu bantu balume bansantu, bakane ne ba kanemu bavua batumikila ne ntema malu onso a mu Mifundu malomba kudi Nzambi. (Muambi 12:13, 14) Bavua ne bua kuikala kabayi kalema mu nyuma ne mu tshikadilu ne badifile bushuwa kudi Yehowa Nzambi.
2 Nangananga bakulu ba tshisumbu badi ne bua ‘kuela bianza bia bulamatshi muulu bua kusambila.’ Masambila abu menza ne muoyo mujima ku butuangaji bua Yezu Kristo adi aleja bulamatshi kudi Nzambi ne adi abambuluisha bua kuepuka matandu ne biji. Bushuwa, muntu yonso udi ne diakalenga dia kusambila bua tshisumbu tshia bena Kristo munkatshi mua bantu kêna ne bua kuikala ne tshiji, meji mabi, ne dipanga bulamatshi kudi Yehowa ne kudi bulongolodi buende nansha. (Yakobo 1:19, 20) Nngenyi-miludiki kayi mikuabu ya mu Bible idi mua kuambuluisha bantu badi ne diakalenga dia kusambila bua bakuabu munkatshi mua bantu? Ne ng’amue mêyi-maludiki kayi atudi ne bua kutumikila mu masambila etu a pa nkaya ne a mu dîku?
Dianjila kuela meji bua disambila
3, 4. (a) Bua tshinyi kudianjila kuela meji bua disambila dia kuenza munkatshi mua bantu kudi ne dikuatshisha? (b) Ntshinyi tshidi Mifundu ileja bua bule bua masambila?
3 Buobu batulombe bua kuenza disambila pa bantu, pamu’apa netudianjileku kuela meji bua disambila dituenza. Kuenza nenku kudi mua kutuambuluisha bua kuakula malu makanyine a mushinga, kakuyi dienza disambila dile anyi kadiyi ne kudidi diya to. Bushuwa, tudi mua kupatula dîyi patudi tuenza masambila etu a pa nkaya ne adi mua kuikala a bule butudi basue. Yezu wakasambila butuku bujima kumpala kua kusungula bapostolo bende 12. Kadi pakajadikaye Tshivulukilu tshia lufu luende, bidi bimueneka ne: masambila ende bua diampa ne bua mvinyo avua a mu tshikoso. (Mâko 14:22-24; Luka 6:12-16) Ne tudi bamanye ne: nansha masambila mîpi avua Yezu wenza avua manyisha tshishiki kudi Nzambi.
4 Tufuanyikije ne: tudi ne diakalenga dia kusambila bua dîku dijima kumpala kua kudia. Mu bualabale kampanda disambila edi didi mua kuikala dîpi—kadi mu bionso bitudi tuamba mudi ne bua kuikala mêyi a dianyisha bua biakudia. Bituikala tuenza disambila bua bantu ba bungi kumpala anyi kunyima kua tshisangilu tshia bena Kristo, katuena ne bua kuenza disambila dile didi dilenga malu a bungi nansha. Yezu wakadiwula baskribe bavua “badingidija ne masambila male.” (Lukase 20:46, 47, MMM) Muntu udi utshina Nzambi kêna ne bua kujinga bua kuenza nanku to. Kadi ku misangu, disambila dienza pa bantu dikaleku bu dile didi mua kuikala diakanyine. Tshilejilu, mukulu musungula bua kuenza disambila dia ndekelu mu mpuilu udi ne bua kudianjila kudielela meji, ne udi mua kujinga bua kuakula malu a bungi. Kadi nansha disambila dia nunku kadiena ne bua kuikala dipite bule nansha.
Semena kudi Nzambi ne kanemu
5. (a) Ntshinyi tshitudi ne bua kuvuluka patudi tuenza disambila munkatshi mua bantu? (b) Bua tshinyi kusambila ne kanemu ne bunême?
5 Patudi tuenza disambila pa bantu tudi ne bua kuvuluka ne: ki mbantu batudi tuyukila nabu nansha. Kadi tuetu bifukibua bia mpekatu tudi tulomba Mfumu Mukulu Yehowa. (Musambu 8:3-5, 9; 73:28) Pa nanku tudi ne bua kuleja ditshina dia kanemu dia kubenga kumubungamija ku bitudi tuamba ne mushindu utudi tubiamba. (Nsumuinu 1:7) Davidi mufundi wa misambu wakimba ne: ‘Kadi meme panyi nembuele mu nzubu muebe bua kukumbana kua luse luebe; nenkuinamine mu ntempelo webe ne dikutshina dianyi.’ (Musambu 5:7) Tuetu bikale ne mmuenenu eu, mmushindu kayi utuakula padibu batulombe bua kuenza disambila bua bantu ba bungi mu tshisangilu tshia Bantemu ba Yehowa? Bushuwa, bu tuetu tuakula kumpala kua mukalenge wa pa buloba, tuvua mua kuenza nenku ne kanemu ne bunême. Masambila etu kaenaku ne bua kuikala mene a bunême ne kanemu kavule, bu mutudi tusambila Yehowa, “Mukalenge wa tshiendelele” anyi? (Buakabuluibua 15:3, NW) Nenku patudi tusambila netuepuke biambilu bu mudi: “Yehowa muoyo,” “Tudi tukutumina dinanga dietu,” anyi “Tudi tukujingila dituku dilenga.” Mifundu idi ileja ne: Yezu Kristo, Muana umuepele mulela wa Nzambi, katu muanji kuambila Tatuende wa mu diulu malu mushindu’eu nansha.
6. Ntshinyi tshitudi ne bua kuvuluka patudi ‘tusemena ku nkuasa wa bumfumu wa bulenga bukena butuakanyine’?
6 Paulo wakamba ne: “Tusemenayi ne budikadidi bua diakula ku nkuasa wa bumfumu wa bulenga bukena butuakanyine.” (Ebelu 4:16, NW) Bua ditabuja dietu mu mulambu wa tshia-bupikudi wa Yezu Kristo, tudi mua kusemena kudi Yehowa ne “budikadidi bua diakula” nansha mutudi bena mpekatu. (Bienzedi 10:42, 43; 20:20, 21) Kadi, “budikadidi bua diakula” ebu kabuena bumvuija ne: tudi tuambila Nzambi biambamba; peshi ne: tudi ne bua kumuambila malu mu mushindu mubule kanemu to. Bua masambila etu menza munkatshi mua bantu kusankishawu Yehowa, adi ne bua kuikala menza ne kanemu ne bunême buakanyine, ne kabiakuikala bikumbane bua kuenzela mamanyisha, kubela bantu anyi kukanyina bateleji mu masambila.
Sambila ne budipuekeshi
7. Mmunyi muakaleja Solomo budipuekeshi pakasambilaye dituku dia dibanjija ntempelo wa Yehowa?
7 Nansha tuetu tuenza disambila munkatshi mua bantu ba bungi anyi pa nkaya, dîyi-diludiki dia mushinga dia mu Mifundu ditudi ne bua kuvuluka ndia se: tudi ne bua kuleja mmuenenu wa budipuekeshi mu masambila etu. (2 Kulondolola 7:13, 14) Mukalenge Solomo wakaleja budipuekeshi mu disambila diende dienza kumpala kua bantu dituku dia dibanjija ntempelo wa Yehowa mu Yelushalema. Solomo uvua ufuma ku dijikija umue wa ku nzubu mitambe bulengele. Nansha nanku, ne budipuekeshi wakasambila ne: “[“Nzambi,” NW] mene udi mua kusomba ne bantu pa buloba apa anyi? Diulu dijima kadiena dianji kukukumbana, amu nzubu undi muase ewu ngudi mua kukukumbana anyi?”—1 Bamfumu 8:27, MMM.
8. Mmu imue mishindu kayi mutudi tuleja budipuekeshi mu disambila dienza munkatshi mua bantu?
8 Anu bu Solomo, tudi ne bua kuikala ne budipuekeshi patudi tusambila bua bakuabu. Nansha mutudi ne bua kuepuka ngakuilu wa buena Nzambi bua lubombo, tudi mua kulejila budipuekeshi ku dîyi dietu. Masambila menza ne budipuekeshi kaena a didileja anyi a diambu nansha. Adi akoka ntema, ki nkudi muntu udi usambila, kadi kudi Eu udibu basambila. (Matayo 6:5) Budipuekeshi budi kabidi bumuenekela ku bitudi tuamba mu disambila. Bituasambila ne budipuekeshi, katuakukungula bu badi balomba bua Nzambi kuenza amue malu mutudi tuetu basue to. Pamutu pa nanku, netulombe Yehowa bua kuenzaye malu mushindu udi umvuangana ne disua diende dia tshijila. Mufundi wa misambu wakafila tshilejilu tshia mmuenenu muakanyine pakalombaye ne: “Tudi tukusengelela, Yehowa, ne, Utusungile. Yehowa, tudi tukusengelela ne, Ututumine diakalengele.”—Musambu 118:25; Luka 18:9-14.
Enza disambila didi difuma mu mutshima
9. Mmubelu kayi mulenga mufila kudi Yezu udi mu Matayo 6:7, ne mmunyi mutudi mua kuutumikila?
9 Bua masambila etu menza pa bantu anyi pa nkaya kusankishawu Yehowa, adi ne bua kufuma mu mutshima. Nenku katuakuambulula patupu mushindu kampanda wa disambila misangu ne misangu katuyi tuela meji bua bitudi tuamba. Mu Muyuki wende wa pa Mukuna, Yezu wakabela bantu ne: “Panudi nusambila, kanuambi malu amue-amue misangu ne misangu, anu bu mutu bantu ba bisamba benza, bualu badi bela meji [mu ntupakanyi] ne: nebabateleje bua diamba diabu dia mêyi a bungi.” Mu mêyi makuabu, Yezu wakamba ne: “Kanuambi mêyi a biakulakula; kanuambi malu amue-amue a patupu.”—Note kuinshi bua Matayo 6:7, NW.
10. Bua tshinyi bidi mua kuikala biakanyine bua kusambila bua bualu bumuebumue misangu ya bungi?
10 Bushuwa, tudi mua kuikala ne dijinga dia kusambila bua bualu bumuebumue misangu ya bungi. Kabiakuikala bibi to, bualu Yezu wakabela ne: “Tungunukayi ne kulomba, ne nebanupeshe; tungunukayi ne kukeba, ne nenupete; tungunukayi ne kukokola, ne nebanunzuluile.” (Matayo 7:7, NW) Pamu’apa tudi dijinga ne Nzubu wa Bukalenge mupiamupia bualu Yehowa udi udiundisha mudimu wa buambi muaba utudi. (Yeshaya 60:22) Nebikale biakanyine bua kutungunuka ne kuakula bua dijinga edi patudi tusambila pa nkayetu anyi patudi tuenza masambila mu bisangilu bia bantu ba Yehowa. Kuenza nenku kakuakumvuija ne: ‘tudi tuamba malu amue-amue a patupu’ nansha.
Uvuluke dianyisha ne ditumbisha Nzambi
11. Mmunyi mudi Filipoi 4:6, 7 utangila masambila a pa nkaya ne a munkatshi mua bantu?
11 Bantu ba bungi batu basambila anu bua kulomba tshintu kampanda, kadi dinanga ditudi nadi bua Yehowa Nzambi didi ne bua kutusaka bua kumuela tuasakidila ne kumutumbisha mu masambila a pa nkaya ne a munkatshi mua bantu. Paulo wakafunda ne: ‘Lekelayi kuditatshisha ku bualu [nansha] bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu nedilame mitshima yenu ne meji enu mu Kristo Yezu.’ (Filipoi 4:6, 7) Eyowa, kusakidila ku mitendekenu ne milombu, tudi ne bua kuela Yehowa tuasakidila bua mabenesha a mu nyuma ne a ku mubidi. (Nsumuinu 10:22) Mufundi wa misambu wakimba ne: ‘Fila mulambu wa disakidila kudi Nzambi, futa mitshipu yebe kudi Udi Mutambe Bunene wa mu Diulu.’ (Musambu 50:14) Ne musambu muimba ne muoyo mujima kudi Davidi uvua ne mêyi aa adi alenga ku muoyo: “Nentumbishe dina dia Nzambi ne musambu, nemmunemeke ne kusakidila kuanyi.” (Musambu 69:30) Katuenaku ne bua kuenza bia muomumue mu masambila etu a munkatshi mua bantu ne a pa nkayetu anyi?
12. Mmunyi mudi Musambu 100:4, 5 wenda ukumbana lelu’eu, ne nanku tudi mua kusakidila Nzambi ne kumutumbisha bua bualu kayi?
12 Mufundi wa misambu wakimba bua Nzambi ne: ‘Buelayi bienu mu bibuelelu biende ne disakidila, buelayi mu biendedi biende ne misambu ya kumutumbisha nayi. Numusakidile, nuvudijile dîna diende disanka. Bualu bua Yehowa udi muimpe; luse luende lujalame ludiku tshiendelele, lulamatu luende lua bushuwa ludiku too ne ku bikondo bionso.’ (Musambu 100:4, 5) Lelu’eu, bantu ba bisamba bionso badi babuela mu biendedi bia sanktiwere wa Yehowa, ne bua muanda eu tudi mua kumutumbisha ne kumusakidila. Utu uleja dianyisha kudi Nzambi bua Nzubu wa Bukalenge unudi nende, pa kudisangishamu pa tshibidilu ne bantu badi bamunange anyi? Pautu mu Nzubu wa Bukalenge, utu ubandisha dîyi diebe ne muoyo mujima mu dimba misambu bua kutumbisha ne kusakidila Tatu wetu wa mu diulu muena dinanga anyi?
Kuikadi ne bundu bua kusambila
13. Ntshilejilu kayi tshia mu Mifundu tshidi tshileja ne: tudi ne bua kutendekena Yehowa nansha tuetu tudiumvua katuyi bakanyine bua dipila kampanda?
13 Nansha tuetu tudiumvua katuyi bakanyine bua dipila kampanda, tudi ne bua kutangila kudi Nzambi pa kumutendekena ne muoyo mujima. Pakenza bena Yuda mpekatu mu diangata bakaji ba ku ba bende, Ezela wakatua binu panshi, kuelaye bianza biende bia bulamatshi muulu kudi Nzambi, ne kusambilaye ne budipuekeshi ne: ‘O Nzambi wanyi, bundu budi bunkuata bikole bua meme kubandisha mêsu anyi kuudi, Nzambi wanyi; bualu bua malu mabi etu akavulangana pa mitu petu, ne kupila kuetu kuakamana kufika mu diulu. Ku matuku a bankambua betu too ne ku lelu tuakutamba kupila. Kunyima kua makenga onso atuakakenga bua malu mabi etu ne kupila kuetu kunene, bualu bua wewe Nzambi wetu kuakatamba kutukengesha bu muakadi mibi yetu, ne wakutushila difuka edi dia bantu, netushipe mikenji yebe kabidi bua kubuelakana ne bantu aba mu malu abu a bundu munyi? Bituenza nunku wewe kuena wikala netu tshiji too ne pawatubutula buonso buetu, nunku difuka dikese dia bantu kadiena mua kushala anyi kupanduka anyi? Yehowa, Nzambi wa Izalele, wewe udi muakane; bualu bua wewe wakatushila difuka dipanduke bu mudidi lelu’eu; mona, tudi ku mêsu kuebe mu kupila kuetu; kakuena udi mumanye mua kuimana kumpala kuebe bua bualu ebu.’—Ezela 9:1-15; Dutelonome 7:3, 4.
14. Bu muvuabi bileja mu matuku a Ezela, ntshinyi tshitudi mua kuenza bua Nzambi kutubuikidilaye?
14 Bua Nzambi kutubuikidilaye, tudi ne bua kumutondela bubi ne kuleja dinyingalala pamue ne “mamuma adi makanangane ne dikudimuna dia mitshima.” (Luka 3:8; Yobo 42:1-6; Yeshaya 66:2) Mu matuku a Ezela, mmuenenu wa dinyingalala uvua muleja pamue ne madikolela menza bua kulongolola tshilema pa kuipata bakaji ba ku ba bende. (Ezela 10:44; fuanyikija ne 2 Kolinto 7:8-13.) Bituikala tukeba bua Nzambi atubuikidile bubi bunene, tutondayi bubi mu disambila dienza ne budipuekeshi ne tukuame mamuma makanangane ne dinyingalala. Lungenyi lua dinyingalala ne dijinga dia kulongolola tshilema nebitusake kabidi bua kukeba diambuluisha dia mu nyuma dia kudi bakulu bena Kristo.—Yakobo 5:13-15.
Petela busambi ku disambila
15. Mmunyi mudi bualu buakafikila Hana buleja ne: tudi mua kupeta busambi mu disambila?
15 Padi mutshima wetu unyingalala bua bualu kampanda, tudi mua kupeta busambi mu disambila. (Musambu 51:17; Nsumuinu 15:13) Muena bulamatshi Hana wakenza nanku. Uvua ne muoyo mu tshikondo tshivua bantu bikale balela bana ba bungi mu Izalele mujima, kadi yeye kavua mulele muana nansha umue to. Bayende Elekana uvua ne bana ba balume ne ba bakaji ba kudi mukajende mukuabu Penina. Mukenende eu uvua umusendeka bua muvuaye nkumba. Hana wakasambila ne muoyo mujima, ne wakalaya ne: buobu bamubeneshe ne muana wa balume, ‘uvua ne bua kumufila kudi Yehowa matuku ende onso a muoyo wende.’ Mukolesha kudi disambila diende ne kudi mêyi a Muakuidi Munene Eli, Hana ‘kakanyingalala kabidi.’ Wakalela muana wa balume e kumuinyikaye ne: Samuele. Pashishe, wakamufila bua mudimu wa mu sanktiwere wa Yehowa. (1 Samuele 1:9-28) Ne dianyisha bua bulenga buvua Nzambi mumuleje, wakenza disambila dia diela Nzambi tuasakidila—disambila diakatumbisha Yehowa bu muntu udi kayi ne wa kutembangana nende. (1 Samuele 2:1-10) Anu bu Hana, tudi mua kupetela busambi ku disambila, bashindike ne: Nzambi udi wandamuna milombu yonso idi yumvuangana ne disua diende. Patudi tupumuna mutshima wetu kumpala kuende, ‘katunyingaladi kabidi’ nansha, bualu neumbushe bujitu buetu anyi neatupeshe bukole bua kubuambula.—Musambu 55:22.
16. Anu bu mudibi bileja mu muanda wakafikila Yakoba, bua tshinyi tudi ne bua kusambila patudi ne buôwa anyi ne disumpakana?
16 Bikala nsombelu kampanda ufila buôwa, kanyinganyinga mu mutshima anyi disumpakana, katupangi kunyemena kudi Nzambi bua kupeta busambi mu disambila. (Musambu 55:1-4) Yakoba uvua ne buôwa pakavuaye pa kusambakena ne Esau muanabu uvua mumukine. Kadi, Yakoba wakasambila ne: ‘Yehowa Nzambi wa kaku wanyi Abalahama, ne Nzambi wa tatuanyi Isaka, wewe wakangambila ne: Upingane kuebe, ne kudi bana benu, nenkuenzele bimpe. Tshiena ne buimpe bua kudiangatshila tshitupa tshia luse ne bulelela biwakaleja muntu webe; ngakasabuka musulu eu wa Yadene anu ne tshibangu, katataka ngakulua bisumbu bibidi. Ndi nkutendekena ne: Unsungile mu bianza bia mukuluanyi Esau, ndi mmutshina ne: yeye nealue kunshipa ne bamamu ne bana. Wewe wakangambila ne: Bulelela, nenkuenzele bimpe, nenkukumbajile tunkanunuina tuebe bungi bua nsenga ya kukala kua mâyi manene, idibu kabayi mua kubala.’ (Genese 32:9-12) Esau kakaluisha Yakoba ne bonso bavua nende nansha. Nenku Yehowa ‘wakenzela Yakoba bimpe’ musangu au.
17. Mu diumvuangana ne Musambu 119:52, mmunyi mudi disambila mua kutusamba patudi mu ntatu mikole?
17 Mu mitendekenu yetu, tudi mua kupeta busambi mu divuluka malu mamba mu Dîyi dia Nzambi. Mu musambu udi mupite yonso ku bule—disambila dilengele dimba ne mijiki—pamu’apa Mukalenge Hezikiya ke wakimba ne: ‘Ngakavuluka mêyi ebe majalame a kale, Yehowa, ngakakolesha mutshima wanyi.’ (Musambu 119:52) Mu disambila dienza ne budipuekeshi patudi mu ntatu mikole, tudi mua kuvuluka dîyi-diludiki anyi mukenji wa mu Bible udi mua kutuambuluisha bua kulonda nsombelu udi ufikisha ku dishindika didi dikolesha dia se: tudi tusankisha Tatu wetu wa mu diulu.
Bena bulamatshi badi bananukila mu masambila
18. Bua tshinyi tudi mua kuamba ne: ‘muntu yonso udi unanga Nzambi neamulombe’?
18 Bonso badi ne bulamatshi kudi Yehowa Nzambi ‘nebananukile mu disambila.’ (Bena Roma 12:12, MMM) Mu Musambu wa 32, muenza pamu’apa panyima pa Davidi mumane kuenza mpekatu ne Beta-sheba, Davidi wakumvuija kanyinganyinga kende bua muvuaye kayi mukebe dibuikidila ne disulakana bivua dinyingalala ne ditondela Nzambi bubi bimutuadile. Nenku Davidi wakimba ne: “Bua bualu ebu [bualu luse lua Yehowa ludiku bua bantu badi banyingalala bushuwa] muntu yonso udi unanga Nzambi akulombe mu tshikondo tshidiye mumanye mua kukusangana.”—Musambu 32:6.
19. Bua tshinyi tudi ne bua kuela bianza bia bulamatshi muulu mu disambila?
19 Bituanyisha bikole mushinga wa malanda atudi nawu ne Yehowa Nzambi, netumulombe luse mu disambila bashindamene pa mulambu wa tshia-bupikudi wa Yezu. Tuetu bikale ne ditabuja, netusemene ku nkuasa wa bumfumu wa bulenga bukena butuakanyine ne budikadidi bua diakula bua kutufuabu luse ne kupeta diambuluisha mu tshikondo tshiakanyine. (Ebelu 4:16) Kadi kudi tubingila tupite bungi tutudi mua kuenzela masambila! Nenku ‘tusambile dîba dionso’—misangu mivule ne mêyi adi afumina mu mutshima bua kutumbisha ne kuela Nzambi tuasakidila. (1 Bena Tesalonyika 5:17, MMM) Tuelayi bianza bia bulamatshi muulu butuku ne munya mu disambila.
Newandamune munyi?
◻ Kudianjila kuela meji bua disambila dia kuenza kumpala kua bantu kudi ne dikuatshisha kayi?
◻ Bua tshinyi tudi ne bua kusambila ne kanemu ne bunême?
◻ Mmuenenu kayi utudi ne bua kuleja patudi tusambila?
◻ Patudi tusambila, bua tshinyi tudi ne bua kuvuluka diela Nzambi tuasakidila ne dimutumbisha?
◻ Mmunyi mudi Bible uleja ne: tudi mua kupetela busambi ku disambila?
[Tshimfuanyi mu dibeji 17]
Mukalenge Solomo wakaleja budipuekeshi mu disambila diende dienza kumpala kua bantu dituku dia dibanjija ntempelo wa Yehowa
[Bimfuanyi mu dibeji 18]
Anu bu Hana, udi mua kupetela busambi ku disambila