Malu adibu baledile mu Mabeji a tshisangilu tshia Nsombelu ne mudimu wetu
© 2024 Watch Tower Bible and Tract Society of Pennsylvania
LUMINGU LUA DIA 1-7/7
BIUMA BIA MU DÎYI DIA NZAMBI MISAMBU 57-59
Yehowa udi ukondakaja badi baluisha bantu bende
“Too ne ku miaba ya kule menemene ya pa buloba”
14 Stefano wakayisha ne dikima kumpala kua kumushipabu kudi bena lukuna bende. (Bien. 6:5; 7:54-60) Pakatuadijabu ‘kukengesha bayidi bikole’ tshikondo atshi, buonso buabu bakatangalaka mu Yudaya mujima ne mu Samalea, kadi bapostolo bakashala. Kadi kabiakimanyika mudimu wa diyisha to. Filipo wakaya mu Samalea bua ‘kuyisha bualu bua Kristo’ ne kuakapatuka bipeta bimpe. (Bien. 8:1-8, 14, 15, 25) Bible udi kabidi wamba ne: “Bantu bavuabu batangalaje bua dikengeshibua divua dijuke bua Stefano bakaya too ne ku Foinike, ku Kupulio, ne ku Antiokia, kadi bavua bamba dîyi anu kudi bena Yuda. Kadi bamue bantu ba munkatshi muabu ba ku Kupulio ne ku Kulene bakalua ku Antiokia ne bakatuadija kuakula ne bantu bavua bakula tshiena Greke, bamanyisha lumu luimpe lua Mukalenge Yezu.” (Bien. 11:19, 20) Dibakengesha ke diakenza bua lumu luimpe lutangalake tshikondo atshi.
15 Mu bikondo bietu ebi, bualu bua muomumue buakenzeka mu Union Soviétique wa kale. Bakakuata Bantemu ba Yehowa binunu ne binunu, kuyabu nabu mu Sibérie nangananga mu bidimu bia 1950. Bu muvuabu babatangalaje mu misoko ya bungi, lumu luimpe luakatangalaka mu ditunga dialabale adi. Kakuvua Bantemu bungi nanku bavua mua kupeta makuta makumbane bua kuenza luendu lua kilometre binunu 10 bua kuya kuambamu lumu luimpe to! Kadi mbulamatadi nkayende ke uvua mubatumamu. Muanetu mukuabu wa balume udi wamba ne: “Bualu bua dikema, banene ba mbulamatadi nkayabu ke bakambuluisha bantu ba mu Sibérie bungi tshianana bua bafike ku dimanya bulelela.”
Bubanji bua mu Dîyi dia Nzambi
“Nuikale bashindame, kanuyi kunyungisha”
16 Ikala ne muoyo mushindame. Mukalenge Davidi wakaleja muvuaye kayi mua kulekela kunanga Yehowa pakambaye ne: “Muoyo wanyi mmushindame, Nzambi wanyi.” (Mis. 57:7) Tuetu petu tudi mua kushindamija muoyo wetu, tueyemena Yehowa ne muoyo mujima. (Bala Misambu 112:7.) Mona muvuabi biambuluishe Bob utukadi batele. Pakamuambilabu ne: bobu dijinga ne mashi nebikale nawu ku luseke, wakabaleja diakamue ne: bobu bajinge kumuelawu, uvua ne bua kumbuka mu lupitadi alu. Panyima pa matuku, wakamba ne: “Tshivua ne dielakana nansha dikese ne tshivua ne buôwa bua tshivua mua kuenzeka to.”
17 Bob uvua mushindame bualu matuku a bungi kumpala kua kuyaye ku lupitadi, ukavua mupangadije bua kushala mushindame. Tshia kumpala, uvua musue kusankisha Yehowa. Tshibidi, uvua udilongela bimpe tshivua Bible ne mikanda yetu idi imumvuija yamba bua mudi muoyo ne mashi bikale bintu bia tshijila. Tshisatu, uvua mutuishibue ne: kutumikila mikenji ya Yehowa kuvua ne bua kumupetesha mabenesha a kashidi. Tuetu petu tudi mua kuikala ne muoyo mushindame nansha mu ntatu ya mushindu kayi.
LUMINGU LUA DIA 8-14/7
BIUMA BIA MU DÎYI DIA NZAMBI MISAMBU 60-62
Yehowa udi wenza bua tudiumvue mu bupole, mu bukubi, ne utushindamija
it-2-F 1089 §9
Tshibumba
Mu ngumvuilu wa mu tshimfuanyi. Yehowa udi ukuba bantu badi bamutumukila ne badi ne ditabuja kudiye. Davidi wakamba bua bualu abu ne: “Wewe [Yehowa] udi tshinyemenu tshianyi, tshibumba tshikole tshidi tshinkuba kudi muena lukuna.” (Mis. 61:3) Bantu bonso badi bajingulula tshidi dîna diende, bamueyemena, ne bamanyisha dîna adi ne muoyo mujima, kabena ne tshia kutshinyina to, bualu “dîna dia Yehowa didi tshibumba tshikole. Muntu muakane udi unyemenamu ne udi upeta bukubi.”—Nsu. 18:10; fuanyikija ne 1 Sam. 17:45-47
it-2-F 1061 §3
Ntenta
Bavua benza kabidi mudimu ne muaku “ntenta” mu ngumvuilu wa mu tshimfuanyi mu nsombelu ya bungi. Ntenta uvua muntu wasa uvua muaba wa kuikishila ne uvua umukuba ku malu a bungi. (Gen. 18:1) Bua tshilele tshia kuakidila benyi, muenyi uvua umanya ne: bavua ne bua kumutabalela ne kumunemeka pavuabu bamuakidila mu ntenta. Nunku, padi Buakabuluibua 7:15 wamba bua musumba munene wa bantu ne: Nzambi “neabalule ntenta wende pa mutu pabu,” bidi bileja muabakubaye ne muabalamaye. (Mis. 61:3, 4) Yeshaya udi wakula malu adi Siona, mukaji wa Nzambi ne bua kulongoluela bana balelaye. Mbamuambile bua ‘kudiundisha muaba wa ntenta wende bikole.’ (Yesh. 54:2) Nunku, udi walabaja muaba udi bana bende mua kusomba mu bukubi.
Mikenji ya Nzambi idiku bua diakalenga dietu
14 Mikenji ya Nzambi kayena mua kushintuluka nansha kakese. Mu bikondo bia ndululu bitudi ebi, Yehowa udi dibue dinene dia nshindamenu, udi kuoku bua kashidi ne kashidi. (Musambu 90:2) Wakamba yeye nkayende pa bidi bimutangila ne: “Meme Yehowa tshitu ngakudimuka.” (Malaki 3:6) Mikenji yonso ya Nzambi idi mu Bible idi ya kueyemena, kayena bu ngenyi ya bantu idi ishintuluka dîba dionso tshianana to. (Yakobo 1:17) Tshilejilu, kukadi kupite bidimu, bamanyi ba malu a bikadilu bia bantu bavua bamba ne: mbimpe kulekela bana benda badikolela, kadi kunyima bamue bakashintuluka, e kumonabu ne: mubelu wabu eu uvua mubi. Mikenji ne mibelu ya panu idi itangila tshilumbu etshi idi itua kumpala itua kunyima, bu misakila kudi lupepele. Kadi Dîyi dia Yehowa kadiena ditenkakana to. Kukadi nkama ya bidimu Bible mmufile mibelu ya mushindu wa kukolesha bana ne dinanga. Mupostolo Paulo wakafunda ne: ‘Batatu, kanufuishi bana benu balela tshiji; nubadiundishe bimpe ne dibela ne didimuija bia [Yehowa].’ (Efeso 6:4) Kabienaku bisankisha bua kumanya ne: tudi ne bua kueyemena mikenji ya Yehowa, ne bua se: kayena mua kushintuluka anyi?
Bubanji bua mu Dîyi dia Nzambi
Malu manene a mu mukanda muibidi wa Misambu
62:11. Nzambi kêna dijinga ne bukole budi bufumina muaba mukuabu bualu yeye ke muenabu. ‘Bukole mbualu buende.’
LUMINGU LUA DIA 15-21/7
BIUMA BIA MU DÎYI DIA NZAMBI MISAMBU 63-65
‘Dinanga diebe dia lulamatu dimpe dipite muoyo’
Udi mua kutupandulula ku dinanga dia Nzambi nnganyi?
17 Dinanga dia Nzambi didi dikukuatshisha ku tshinyi? Udiku ne meji a buena a Davidi wakafunda ne: ‘Bualu bua luse luebe lujalame ludi lupita muoyo bulengele, mishiku yanyi neyikutumbishe. Nunku nenkuvudijile disanka pantshidi ne muoyo; nengolole bianza bianyi kulu bua kutendelela mu dîna diebe.’ (Musambu 63:3, 4) Kudiku tshintu tshidi nsombelu wa panu mua kutupesha tshidi tshipite kunangibua kudi Nzambi ne kudia nende bulunda bua lulamatu anyi? Tshilejilu, kuenza mudimu wa makuta a bungi nkupite kuikala ne ditalala dia mu mutshima ne disanka bidi bifumina ku malanda mashême ne Nzambi anyi? (Luka 12:15) Bamue bena Kristo bakadi badimone kumpala kua lutatu lukole: kulekela Yehowa peshi kuitaba bua kufua. Ke tshiakenzekela Bantemu ba Yehowa ba bungi mu maloko manene a bena Nazi mu tshikondo tshia Mvita Mibidi ya Buloba bujima. Pa kumbusha bantu bakese menemene, bana betu ba balume bakapangadika bua kushala mu dinanga dia Nzambi ne kuitababu bua kufua nansha kufua. Aba badi bashala mu dinanga dia Nzambi ne lulamatu bikale bajadike ne: neabapeshe tshintu tshidi bena panu kabayi mua kutupa to: muoyo wa tshiendelele mu matuku atshilualua. (Mâko 8:34-36) Kadi kabakupeta anu muoyo wa tshiendelela nkayawu to.
18 Nansha mutudi katuyi mua kuikala ne muoyo wa kashidi mpindieu, tetabi bua kutshinka bule bua muoyo utuvua mua kuikala nawu bu Yehowa Mufuki wetu yeye kayiku. Uvua ne bua kuikala muoyo wa tshianana, kauyi ne tshipatshila tshilelela. Yehowa mmupeshe bantu bende mudimu mulenga mu matuku a ku nshikidilu aa. Nenku tuikalayi bajadike ne: pikala Yehowa, Mukumbaji Munene wa disua diende mua kutupesha muoyo wa tshiendelele, newikale muoyo wa malu mimpe a dikema ne a mushinga wa bungi a tuetu kulonga ne kuenza. (Muambi 3:11) Nansha tuetu mua kulonga malu bungi kayi mu binunu bia bidimu bitshilualua, katuakumvua tshishiki ‘ndondo wa bubanji bua meji ne lungenyi bia Nzambi’ to.—Lomo 11:33.
“Nuikale . . . bena dianyisha”
Mbimpe tuikale tutamba kuleja Nzambi dianyisha. (1 Tes. 5:18) Kudi misangu iudi mua kuikala muele meji bua bintu bia bungi bia mu nyuma ne bia ku mubidi bidiye mukupeshe ne bitshidiye ukupesha. (Dut. 8:17, 18; Bien. 14:17) Kadi pamutu pa kutuma meji anu kakese ku malu mimpe adi Nzambi mukuenzele, bua tshinyi kubenga kuangata dîba dia kuelangana meji bua malu mimpe a bungi adiye mukuenzele wewe, muenzele kabidi bantu baudi munange. Wewe welangana meji bua bintu bidi Mufuki webe ukupesha ne tshianza tshilekelela, dianyisha diudi nadi kudiye nedivule ne neutambe kumona mudiye mukunange ne ukumona mikolo bunene.—1 Yone 4:9.
Tungunuka ne kuelangana meji a malu a mu nyuma
7 Bidi bitulomba bua kudienzeja bikole bua kuelangana meji ne kutuma ntema ku malu atudi tulonga. Ke bua tshinyi mbimpe kuelangana meji paudi kuyi mutshioke, ne mbimpe kuikala muaba udi kawuyi mutoyi anyi bintu bidi mua kukubueja mu ditanaji. Davidi mufundi wa Misambu uvua welangana meji pavuaye pa bulalu mutabale munkatshi mua butuku. (Musambu 63:6) Yezu muntu mupuangane uvua usungula miaba ivua kayiyi mitoyi bua kuelangana meji ne kusambila.—Luka 6:12.
Longesha ne dinanga bua kuidikija Yezu
6 Tutu basue kuambila bantu malu atudi banange ne patudi tuenza nunku, bantu badi bamona mutudi ne disanka dia kubambilawu. Ke tshitutu tuenza nangananga bua muntu utudi banange. Muoyo utu utusaka bua kuambila bakuabu malu ende. Tudi tumutumbisha, tumunemeka ne tumuakuila. Tudi tuenza nunku bualu tudi basue bua bakuabu banange muntu au, banange kabidi ngikadilu yende anu bu tuetu.
Bubanji bua mu Dîyi dia Nzambi
Utuku ukolesha bakuabu anyi?
Kupula nkutekete, kuibaka nkukole. Ke mutubi kabidi nansha bua muyiki ne muntu, kumukolesha nkukole kadi kumutekesha nkutekete. Tuetu bonso tutu tuenza bilema bualu tudi bapange bupuangane. Mukalenge Solomo wakamba ne: ‘Bulelela, kakuena muntu muakane pa buloba utu wenza malu makane, kayi wenza malu mabi.’ (Muambi 7:20) Bitu bipepele bua kumona bilema bia bakuabu ne kubamba mêyi mabi. (Misambu 64:2-4) Ku lukuabu luseke, kabitu bipepele bua kuikala ne ngakuilu muimpe.
LUMINGU LUA DIA 22-28/7
BIUMA BIA MU DÎYI DIA NZAMBI MISAMBU 66-68
Yehowa udi wambula bujitu buetu dituku dionso
Mutu Yehowa wandamuna masambila etu
15 Yehowa katu wandamuna masambila etu misangu yonso mu mushindu udi ukemesha to. Kadi mandamuna atutu tupeta atu anu atutu nawu dijinga bua kushala ne lulamatu kudi Tatu wetu wa mu diulu. Nunku, ikala ukeba bua kumanya mudi Yehowa wandamuna masambila ebe. Muanetu wa bakaji Yoko uvua umona anu bu ne: Yehowa kavua wandamuna masambila ende to, kadi pashishe wakatuadija kufunda malu avuaye ulomba Yehowa. Panyima pa matuku, wakatangila malu avuaye mufunde au, kumonaye ne: Yehowa uvua muandamune masambila ende a bungi too ne akavuaye yeye muine mupue muoyo. Ku musangu ne ku musangu, mbimpe tuikale tuelangana meji a mudi Yehowa wandamuna masambila etu.—Mis. 66:19, 20.
Tuambuluishayi muledi udi mushale udikoleshila bana
Yehowa wakafundisha misambu ya tshijila ivua bena Isalele ne bua kuimba mu bikondo bivuabu bamutendelela ku diambuluisha dia nyuma wende. Elabi meji muvua misambu ya nunku mua kukolesha bakaji ba mu lufuila ne bana ba nshiya pavuabu bateleja mêyi mafundisha ku nyuma wa Nzambi avua abavuluija muvua Yehowa muikale “Tatu” ne “Mulumbuluidi” wabu ne uvua ne bua kubapetesha disulakana. (Musambu 68:5; 146:9) Tuetu petu tudi mua kubakolesha ne mêyi mimpe adibu mua kushala bavuluka bidimu bivule. Mamu mukuabu diende Ruth utshidi uvuluka umue musangu uvua tatu mukuabu mumuambile nansha mukadiku kupite bidimu bitue ku 20 ne: “Muudi ukolesha bana bebe babidi, udi wenza mudimu muimpe be! Tungunuka ne kuenza nanku.” Ruth udi wamba ne: “Pangakumvua mêyi ende aa, biakandenga ku muoyo bikole.” Bushuwa, ‘dîyi dia luse didi disanguluja’ muntu, ne didi mua kukolesha muledi udi mushale udikoleshila bana mu mushindu uudi kuyi mua kumvua to. (Nsumuinu 12:25) Ukadiku muela meji pa mushindu kampanda uudi mua kuela muledi wa nunku kalumbandi ne muoyo mujima anyi?
Tatu wa bana ba nshiya
‘MU MUABA wende wa tshijila mudiye mushikame mudi Nzambi, Tatu wa bana ba nshiya.’ (Musambu 68:5) Mêyi au mafundisha ku nyuma adi atupesha dilongesha dinene pa bidi bitangila Yehowa Nzambi dia ne: mmumone majinga a badi bakenga. Mushindu udiye utabalela bana badi bafuishe muledi wabu, mmumuenekele mu mukenji uvuaye muelela bena Isalele. Tukonkononayi mêyi a kumpala adi Bible wamba bua “bana ba nshiya,” adi mu Ekesode 22:22-24.
Yehowa udi ukuambuluisha bua utute diakalengele
17 Bala Misambu 40:5. Tshipatshila tshia muntu utu ubanda pa mukuna ntshia kufika ku lusongo luawu. Kadi kutu miaba ya bungi ituye wimana bua kubandila bidiye umona. Bia muomumue, ikala ukeba dîba dia kuanji kuimana ne kuela meji a mudi Yehowa ukututshisha diakalengele nansha paudi unanukila mu lutatu kampanda lukole. Ikala udiebeja ku ndekelu kua dituku dionso ne: ‘Mmushindu kayi udi Yehowa mumbeneshe lelu eu? Nansha mutshidiku lutatu, mmunyi mudi Yehowa ungambuluisha bua kulunanukila?’ Keba bua kumanya bualu buimpe nansha bumue budi Yehowa mukuenzele bua kukututshisha diakalengele.
Bubanji bua mu Dîyi dia Nzambi
Malu manene a mu mukanda muibidi wa Misambu
68:18—Mbanganyi bavuabu bangata bu ‘mapa munkatshi mua bantu’? Mbantu bavua bena Isalele bakuate ku bupika pavuabu benda bakuata Buloba Bulaya. Bakabateka bua kuambuluisha bena Lewi mu midimu yabu.—Ezela 8:20.
LUMINGU LUA DIA 29/7–4/8
BIUMA BIA MU DÎYI DIA NZAMBI MISAMBU 69
Mukavua Misambu 69 mudianjile kumanyisha malu avua menzekele Yezu
Bavua bindile Masiya
17 Bantu bavua ne bua kukina Masiya kakuyi bualu. (Mus. 69:4) Yezu wakamba ne: ‘Bu meme tshiyi muenze munkatshi muabu malu akadi muntu mukuabu kayi muenze, bobu kabakadi kuikala ne bubi; kadi katataka bakuntangila ne Tatu wanyi, bakadi ne bubidi buetu lukuna. Nunku bua kushikija dîyi diakadi difunda mu mikenji yabu ne: bakadi nanyi lukuna tshianana.’ (Yone 15:24, 25) ‘Mikenji’ idibu bafunde muaba eu idi yumvuija Mifundu minsantu ivuabu nayi tshikondo atshi. (Yone 10:34; 12:34) Malu a Yezu atudi tubala mu Bible adi aleja ne: bantu ba bungi bavua bamukine nangananga bamfumu ba bitendelelu bia bena Yuda. Yezu wakamba kabidi ne: ‘Ba pa buloba kabena bamanye mua kuikala nenu lukuna; kadi badi nanyi lukuna, bualu bua ndi mbamba ne: malu adibu benza mmabi.’—Yone 7:7.
Tuikale ne lukunukunu bua ntendelelu mulelela
7 Bualu bukuabu buakenza Yezu budi buleja lukunukunu luvuaye nalu. Buakenzeka ku ntuadijilu kua mudimu wende wa kuyisha, mu tshibilu tshia Kupita kua Yehowa tshia mu 30. Yezu ne bayidi bende bakaya ku Yelushalema ne kusangana ku ntempelo ‘bapanyi ba ngombe ne mikoko ne nyunyi ya nkutshi, ne bashintakaji ba mpalata bashikame.’ Yezu wakenza tshinyi? Bualu abu buakavuluija bayidi bende tshinyi?—Bala Yone 2:13-17.
8 Tshivua Yezu muenze ne muambe dituku adi tshiakavuluija bayidi bende mulayi uvua Davidi muambe wa ne: ‘Lukunukunu lua ku nzubu webe luakundia.’ (Mus. 69:9) Bua tshinyi? Bualu tshivua Yezu muenze atshi tshivua tshilomba dikima dia bungi, bualu tshivua tshiteka muoyo wende mu njiwu. Bakuidi, bafundi ne bantu bakuabu bavua batangila malu a ku ntempelo bavua banyishe tshisalu tshivua tshienzeka ku ntempelo bualu bavua bapeta pabu makasa. Yezu wakadikebela bilumbu ne bamfumu abu pavuaye muele patoke malu abu ne munyangakaje tshisalu tshiabu. Anu muvua bayidi bamone, Yezu uvua ne ‘lukunukunu bua nzubu wa Nzambi’ anyi tshisumi bua ntendelelu mulelela. Kadi lukunukunu ntshinyi? Ndushilangane ne bualu bua kuenza ne lukasa anyi?
g95-F 22/10 31 §4
Muntu udi mua kufua bua muoyo musunsuke anyi?
Bamue badi bamba ne: muoyo musunsuke ke uvua mufikishe Yezu Kristo ku lufu, anu bu mukavuabu balaye bua bualu buende ne: “Bipendu mbisunsule muoyo wanyi, ne mputa kena mua kuma.” (Misambu 69:20) Mêyi aa nga kumvua anu mudiwu emu anyi? Imue misangu, bualu Yezu uvua ukengakana ne muoyo bikole mêba ndambu kumpala kua kufua. (Matayi 27:46; Luka 22:44; Ebelu 5:7) Bualu bukuabu, “mashi ne mâyi” bivua bipatuke mu mputa wa difuma divuabu bamutue yeye mumane kukuula muoyo, bidi mua kuikala bileja muvuaye ne muoyo musunsuke. Muoyo anyi mujilu munene utu umbusha mashi ku muoyo wowu mutapike, mashi adi mua kupongolokela mu tshiadi anyi mu tshipompa tshitu tshiambule muoyo. Tshipompa atshi tshitu ne luayiyi munda. Nansha difuma dituile ku muoyo anyi ku mujilu, bintu bivua bu “mashi ne mâyi” bivua mua kupatukila muaba uvuabu batuile difuma au.—Yone 19:34.
it-2-F 600
Tshisonsa tshidi tshilewulangana
Bakavua bamanyishe bua Masiya ne: bavua ne bua kumupesha “tshisonsa tshidi tshilewulangana” bu tshiakudia. (Mis. 69:21) Bualu ebu mbukumbene Yezu Kristo kumpala kua kumupopela ku mutshi wa makenga pavuabu bamupeshe mvinyo musambakaja ne bintu bia bululu. Pakamulabulaye, wakabenga bua kumunua nansha muvuabu mua kuikala bamupeshaye bua kukepesha dikenga diende. Padi Matayi (27:34) wakula bua dikumbana dia dîyi dia buprofete adi, udi utela muaku wa mu tshiena Greke kholê (tshintu tshia bululu), udibu batele kabidi mu Misambu 69:21 mu Bible wa Septante. Kadi Evanjeliyo wa Mâko udi utela yeye mire. (Mâko 15:23) Bualu ebu budi buleja ne: “tshisonsa tshidi tshilewulangana” anyi “bintu bia bululu” bivuabu bamupeshe bivua “mire.” Bualu bukuabu budi ne: bintu bivua bikuata abi bivua ne bintu bia bululu ne mire.
Bubanji bua mu Dîyi dia Nzambi
Nuele bianza bia bulamatshi muulu mu disambila
11 Bantu ba bungi batu basambila anu bua kulomba tshintu kampanda, kadi dinanga ditudi nadi bua Yehowa Nzambi didi ne bua kutusaka bua kumuela tuasakidila ne kumutumbisha mu masambila a pa nkaya ne a munkatshi mua bantu. Paulo wakafunda ne: ‘Lekelayi kuditatshisha ku bualu [nansha] bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu nedilame mitshima yenu ne meji enu mu Kristo Yezu.’ (Filipoi 4:6, 7) Eyowa, kusakidila ku mitendekenu ne milombu, tudi ne bua kuela Yehowa tuasakidila bua mabenesha a mu nyuma ne a ku mubidi. (Nsumuinu 10:22) Mufundi wa misambu wakimba ne: ‘Fila mulambu wa disakidila kudi Nzambi, futa mitshipu yebe kudi Udi Mutambe Bunene wa mu Diulu.’ (Musambu 50:14) Ne musambu muimba ne muoyo mujima kudi Davidi uvua ne mêyi aa adi alenga ku muoyo: “Nentumbishe dina dia Nzambi ne musambu, nemmunemeke ne kusakidila kuanyi.” (Musambu 69:30) Katuenaku ne bua kuenza bia muomumue mu masambila etu a munkatshi mua bantu ne a pa nkayetu anyi?
LUMINGU LUA DIA 5-11/8
BIUMA BIA MU DÎYI DIA NZAMBI MISAMBU 70-72
‘Ambila ba mu tshipungu tshia bantu tshidi tshilua’ bualu bua bukole bua Nzambi
Bansonga: Ibidijayi biumvuilu bienu!
17 Nebikengele kuikala ne budimu misangu yonso bua kuepuka mateyi a Satana—ne pamu’apa kuikala ne dikima dikole. Ku misangu udi mua kudimona kuyi umvuangana, ki ng’anu ne balunda bebe, kadi ne bantu bonso. Davidi mufundi wa misambu wakasambila ne: ‘Wewe, Mukalenge Yehowa, udi ditekemena dianyi; udi tshieyemenu tshianyi ku buana buanyi too ne katataka. Nzambi, wewe wakunyisha ku buana buanyi too ne mpindieu; too ne mpindieu ntshidi ngambila bantu bua bienzedi biebe bia kukema.’ (Musambu 71:5, 17) Davidi mmumanyike bua dikima divuaye nadi. Kadi ndîba kayi divuaye mudipete? Wakadipeta patshivuaye nsonga! Nansha kumpala kua kuluanganaye mvita ne Goleyata itudi bamanye bimpe, Davidi ukavua muleje dikima dia pa buadi pakashipaye ntambue ne nkashama bua kukuba mikoko ya tatuende. (1 Samuele 17:34-37) Nansha nanku, Davidi wakapesha Yehowa lumu bua dikima dionso divuaye muleje, umubikila ne: ‘tshieyemenu tshianyi ku buana buanyi too ne katataka.’ Davidi wakapeta dikima dia kutantamena mateta onso akamufikila bualu uvua mueyemene Yehowa. Wewe pebe neumone se: wewe mueyemene Yehowa, neakupeshe dikima ne bukole bua ‘kutshimuna bukua-panu.’—1 Yone 5:4, Mukenji Mulenga.
g04-F 8/10 23 §3
Tudi ne bua kuenzela bakulakaje malu mushindu kayi?
Muimbi wa misambu wakasambila ne: “Kumbengi ku bukulakaja buanyi; kundekedi padi bukole buanyi bushikila.” (Misambu 71:9) Nzambi katu ‘ulekela’ batendeledi bende ba lulamatu nansha bobu badimona kabatshiyi ne mushinga to. Muimbi wa misambu kavua umona ne: Yehowa uvua mumulekele to; kadi uvua mumanye ne: bivua bikengela eyemene Mufuki wende bikole nansha mukavuaye mukulakaje. Yehowa utu wandamuna masambila a nunku, wambuluisha muntu mu nsombelu wende. (Misambu 18:25) Misangu ya bungi, diambuluisha adi ditu difumina kudi bena Kristo netu.
Enzela Yehowa mudimu padi matuku mabi kaayi manji kulua
4 Biwikala ukadi mumanye malu a bungi bu muudi muntu mukole, udi ne bua kudiela lukonko lua mushinga mukole elu: ‘Ntshinyi tshindi mua kuenza ne muoyo wanyi mpindieu bu muntshidi ne ndambu wa makanda a mubidi?’ Bu muudi muena Kristo ukadi mumonamone malu, udi ne mpunga ya bungi idi bantu bakuabu kabayi nayi. Udi mua kulondela bansonga malu audi mulongele kudi Yehowa. Udi mua kukolesha bakuabu paudi ubalondela malu audi mupete mu dienzela Nzambi mudimu. Mukalenge Davidi wakasambila bua kupeta mpunga ya yeye kuenza nunku. Wakafunda ne: ‘Nzambi, wewe wakunyisha ku buana buanyi too ne mpindieu. Nzambi, kundekedi nansha, too ne ku bununu buanyi ne pangikala ne mvia; kundekedi too ne pangambila ba mu tshikondo tshialua bua tshianza tshiebe tshikole, ne pangambila badi bandonda kunyima bua bukole buebe.’—Mus. 71:17, 18.
5 Mmunyi muudi mua kuleja meji audi mupete mu bungi bua bidimu biukadi muenze? Kuenaku mua kubikila batendeledi ba Nzambi batshidi bansonga ku nzubu kuebe bua kubakankamija anyi? Kuenaku mua kubalomba bua kuyisha nabu ne kubaleja disanka diudi mupete mu dienzela Yehowa mudimu anyi? Elihu, muntu uvua ne muoyo kale wakamba ne: muntu “wa matuku a bungi udi ne bua kuakula, ne bena bidimu bivule badi ne bua kuyisha bantu meji.” (Yobo 32:7) Mupostolo Paulo wakalomba bakaji bena Kristo bakulumpe bua kukankamija bakuabu mu mêyi ne mu bienzedi. Wakafunda ne: ‘Bakaji bakulumpe bikale balongeshi ba malu mimpe.’—Tito 2:3.
Bubanji bua mu Dîyi dia Nzambi
it-1-F 825
Pelata
Mikalu ya buloba ivuabu bakosele Isalele. Pavua Nzambi muyukile ne Abalahama, uvua mudie nende tshipungidi tshia kupesha ndelanganyi yende buloba “kubangila ku musulu wa Ejipitu too ne ku musulu munene, musulu wa Pelata.” (Gen. 15:18) Mulayi au wakakumbena tshisamba tshia Isalele. (Ekes. 23:31; Dut. 1:7, 8; 11:24; Yosh. 1:4) 1 Kulondolola 5:9 udi uleja ne: imue ndelanganyi ya Lubena ya mu tshikondo tshia kumpala kua Davidi kukokesha yakalabaja muaba uvuayi misombele “ku ntuadijilu kua tshipela tshidi tshiye too ne ku musulu wa Pelata.” Kadi bu muvua musulu wa Pelata ntanta wa kilometre mitue ku 800 kumbukila ku “est kua Gilada” (1 Kul. 5:10), bidi bileja pamuapa ne: bena Lubena bavua balabaje buloba buabu ku est kua Gilada too ne ku tshipela tshia Sulia tshivua tshiya ne ku musulu wa Pelata. (Mukanda wa Nzambi (MNZ) udi wamba ne: “Ku tshibuelelu tshia tshihela ku musulu wa Pelata”; Mukanda wa Mvidi Mukulu (MMM) udi wamba pawu ne: “Ku ntuadijilu wa tshipela tshidi tshiabuluja ditunga diabo ne musulu wa Efrata.”) Bidi bimueneka ne: mulayi wa Yehowa uvua mukumbane bua musangu wa kumpala pavua Davidi ne Solomo bakokesha dîba divua mikalu ya buloba bua Isalele mialabale miangate bukalenge bua Alama bua ku Soba miye mikafika too ne ku musulu wa Pelata; bidi bimueneka ne: ntshitupa tshia buloba tshivua tshiye too ne diamuamua dia ku nord kua Sulia.—2 Sam. 8:3; 1 Bak. 4:21; 1 Kul. 18:3-8; 2 Kul. 9:26.
LUMINGU LUA DIA 12-18/8
BIUMA BIA MU DÎYI DIA NZAMBI MISAMBU 73-74
Tshia kuenza ntshinyi tuetu tualakana bantu badi kabayi batendelela Yehowa?
“Yehowa . . . udi upandisha badi batekeshibue mu maboko”
14 Mufundi wa Musambu wa 73 uvua muena Lewi. Nanku uvua ne diakalenga dia kuenza mudimu muaba wa kutendelela Yehowa. Kadi kuvua musangu kampanda uvuaye mutekete mu maboko. Bua tshinyi? Wakabanga kualakana bantu babi bena diambu. Ki mbualu uvua pende musue kuenza malu mabi to, kadi mbualu bavua bamueneka benda batanta. (Mis. 73:2-9, 11-14) Bivua anu bu ne: bobu ke bavua bakuabu balue kufila panuapa; bavua ne bubanji, nsombelu muimpe, kabayi ne tunyinganyinga. Bu muvua mufundi wa misambu ubamona mushindu au, wakateketa mu maboko, kufikaye too ne ku diamba ne: “Bushuwa, ndi mulame muoyo wanyi mukezuke patupu ne musukule bianza bianyi patupu bua kuleja mundi tshiyi ne bualu.” Bushuwa, kumona malu mushindu eu kuvua mua kumufikisha ku dilekela kuenzela Yehowa mudimu.
“Yehowa . . . udi upandisha badi batekeshibue mu maboko”
15 Bala Misambu 73:16-19, 22-25. Muena Lewi au ‘wakabuela mu muaba munene munsantu wa Nzambi.’ Mu nzubu wa Nzambi muvuaye mua kuikala ne batendeledi bakuabu ba Yehowa amu, uvua mua kutukija, kuela meji bimpe, ne kusambila bua nsombelu wende. Pashishe, wakabanga kumona ne: ngelelu wende wa meji ukavua wa bantu batshimbakane, kumonaye kabidi ne: ukavua mudiate pa kabue ka busenu kavua mua kumunyangila malanda ne Yehowa. Wakajingulula kabidi ne: bantu babi badi “pa muaba wa busenu” ne ‘nebashikile bibi bitambe.’ Bua mufundi wa misambu muena Lewi eu kulekela dialakana ne kukankamana, bivua bikengela ikale umona malu muvua Yehowa uamone. Pavuaye wenza nanku, uvua upetulula ditalala ne disanka. Wakamba ne: “Tshiena dijinga ne tshintu tshikuabu pa buloba to, anu [Yehowa].”
16 Tshidi bualu ebu butulongesha. Katuena ne bua kualakana bantu babi badi bamueneka bu badi batanta to. Disanka diabu ndia tshidingishilu ne ndia tshitupa tshîpi; kabakuikalaku bua kashidi to. (Muam. 8:12, 13) Tuetu tubalakana, netutekete mu maboko ne kufika pamuapa too ne ku dinyanga bulunda buetu ne Yehowa. Nanku wewe mudimone ukadi wenda walakana diakalenga didi bantu babi bamueneka bu badi nabi, enza tshivua muena Lewi muenze. Tumikila mibelu idi Nzambi utupesha ne dinanga dionso ne ikala udisangisha ne bakuabu badi benza disua dia Yehowa. Wewe munange Yehowa kupita bintu bikuabu bionso, neupete disanka dilelela ne neushale mu njila udi ufikisha ku “muoyo wa bushuwa.”—1 Tim. 6:19.
Widikije ditabuja dia Mose
5 Mmunyi muudi mua kukandamena “disanka dia tshitupa tshîpi dia bubi”? Uvuluke ne: disanka dia bubi ndia lupitapita. Ikala ne mêsu a ditabuja bua kumona ne: “buloba budi bupita ne majinga abu kabidi.” (1 Yone 2:15-17) Ela meji bua tshiafikila bantu babi badi kabayi banyingalala. Badi pa ‘muaba wa busenu, nebajimijibue tshiendelele.’ (Mus. 73:18, 19) Paudi kumpala kua diteta dia kuenza bubi kampanda, udiebeje ne: ‘Ndi musue bua malu kayi amfikile mu matuku atshidi alua?’
Kulekedi tshintu nansha tshimue tshikupangisha bua kupeta butumbi
3 Mufundi wa Misambu wakaleja muvua Yehowa mua kumukuata ku tshianza tshiende tshia balume ne kumulombola bua kupetaye butumbi bulelela. (Bala Musambu wa 73:23, 24.) Mmunyi mudi Yehowa wenza bualu ebu? Yehowa udi ulombola batendeledi bende badi badipuekesha bua kupetabu butumbi padiye ubapeshabu mu mishindu ya bungi. Udi ubambuluisha bua kumvuabu bimpe disua diende. (1 Kol. 2:7) Udi upesha bantu badi bateleja dîyi diende ne baditumikila lumu lua kuikala nende mu malanda mimpe.—Yak. 4:8.
4 Yehowa udi kabidi utupesha mudimu wa lumu padiye utuanyishila bua kuyisha lumu luimpe. (2 Kol. 4:1, 7) Mudimu eu udi utupetesha butumbi. Yehowa udi ulaya bantu badi ne diakalenga dia kuyisha bua kumutumbisha ne bua kuambuluisha bantu bakuabu ne: “Badi bantumbisha nembatumbishe.” (1 Sam. 2:30) Udi utumbisha bantu aba padiye ubapesha dîna dimpe, mmumue ne: ubanyisha. Bena Kristo bakuabu badi kabidi bakula bimpe bua bualu buabu.—Nsu. 11:16; 22:1.
5 Mmalu kayi adi mindile aba badi ‘bindile Yehowa ne balamate njila yende’? Udi ulaya ne: ‘Yeye [Yehowa] neanubandishe bua nuenu kupiana buloba. Pabutulabu bantu babi, nuenu nenumone muanda eu.’ (Mus. 37:34) Bantu aba mbatekemene ne muoyo mujima butumbi bua pa buabu, mmumue ne: kupeta muoyo wa tshiendelele.—Mus. 37:29.
Bubanji bua mu Dîyi dia Nzambi
it-2-F 132
Leviyatane
Mu Misambu 74 badi bakula bua muvua Nzambi mupandishe bantu bende; mu mvese wa 13 ne wa 14 badi bakula mu ngakuilu wa tshifuanyi bua muvuaye mupandishe bena Isalele kudi bena Ejipitu. Miaku idibu bambe muaba eu ne: “nyama minene ya mu mbuu [mu tshiena Ebelu ku bungi thanninim, ku bumue tannin]” batu kabidi bayitela bua kuakula bua “Leviyatane.” Batu bafuanyikija dizaza mitu ya Leviyatane ne muvuabu batshimune Palô ne biluilu biende tshikondo tshivua bena Isalele bapatuka mu Ejipitu. Mukanda wa Targoum wa mu tshiena Alama udi utela wowu “makole a Palô” pamutu pa kutela “mitu ya Leviyatane.” (Fuanyikija ne Yeh. 29:3-5, mudibu bafuanyikija Palô ne “nyama munene wa mu mbuu” munkatshi mua tusulu tua musulu wa Nile; fuanyikija kabidi ne Yeh 32:2.) Mu Yeshaya 27:1, dîna Leviyatane didi dileja pamuapa (Septante, “dragon”) bukalenge anyi bulongolodi bua buloba bujima budibu bakokesha kudi muntu udibu bafuanyikije ne “nyoka” anyi “dragon.” (Buak. 12:9) Dîyi dia buprofete adi didi diakula bua diakajilula dia Isalele. Padidi diamba kabidi ne: Yehowa “neatume ntema” kudi Leviyatane, didi diakula bua Babilona. Nansha nanku, mvese wa 12 ne wa 13 idi yakula payi bua Ashû ne Ejipitu. Leviyatane udibu bakuile muaba eu udi uleja bulongolodi bua buloba bujima anyi bukalenge budi buluisha Yehowa ne batendeledi bende.
LUMINGU LUA DIA 19-25/8
BIUMA BIA MU DÎYI DIA NZAMBI MISAMBU 75-77
Bua tshinyi katuena ne bua kuditambisha?
Mona dishilangana pankatshi pa bena mudimu ba Yehowa ne bantu bakuabu
4 Paulo mumane kuamba ne: bantu ba bungi bavua ne bua kuikala badinangi ne banangi ba makuta, wakafunda ne: bavua kabidi ne bua kuikala bena diambu, badibandishi, ne badiuwuja ne lutambishi, ngikadilu idi itamba kuleja mudi bantu badimona bapite bakuabu bua bipedi, tshimuenekelu, bubanji, anyi nsombelu mubandile udibu nende. Bantu badi ne ngikadilu eyi batu basue bua bakuabu bikale babanyisha ne babatumbisha. Mumanyi mukuabu wakafunda bua muntu udi ne lutambishi lua menemene ne: “Mu muoyo wende mudi katshioshelu kudiye udinamina.” Bamue badi bamba ne: lutambishi lunekesha ndubi bikole lutondesha too ne bena lutambishi bine padibu balumona kudi bakuabu.
5 Bushuwa Yehowa katu musue lutambishi to. Mmukine “mêsu a didibandisha.” (Nsu. 6:16, 17) Lutambishi ludi lupangisha muntu bua kudia malanda ne Nzambi. (Mis. 10:4) Nngikadilu wa Diabolo. (1 Tim. 3:6) Diakabi, too ne bamue bantu bavua balamate Nzambi bakapeta lutambishi. Uziya, mukalenge wa Yuda, uvua mulamate Nzambi bidimu bia bungi. Kadi Bible udi wamba ne: “Diakamue pakaluaye ne bukole, muoyo wende wakadibandisha kumufikishabi ku dibutuka, ne wakapanga lulamatu kudi Yehowa Nzambi wende pa kubuela mu ntempelo wa Yehowa bua kuosha musenga wa manananshi pa tshioshelu tshia musenga wa manananshi.” Panyima pa matuku, didibandisha diakakuata mukalenge Hezikiya pende, nansha muvuabi anu bua tshitupa tshîpi.—2 Kul. 26:16; 32:25, 26.
Malu manene a mu mukanda muisatu ne muinayi wa Misambu
75:4, 5, 10—Muaku “lusengu” udi umvuija tshinyi? Nsengu ya nyama itu tshia mvita tshia bukole. Nunku, muaku “lusengu” udi tshimfuanyi tshia makanda anyi bukole. Yehowa udi ubandisha nsengu ya bantu bende, ubatumbishisha, padiye eku ‘ukosa nsengu ya bantu babi.’ Badi batudimuija bua ‘katuambudi lusengu luetu mulu’ mu ngumvuilu wa se: katuena ne bua kuikala ne lutambishi anyi ne diambu. Yehowa ke udi ubandisha muntu, nanku tudi ne bua kumona majitu adibu batupeshe mu tshisumbu bu adi afumina kudiye.—Musambu 75:7.
Bubanji bua mu Dîyi dia Nzambi
Malu manene a mu mukanda muisatu ne muinayi wa Misambu
76:10—Mmunyi mudi “tshiji tshia bantu” mua kutumbisha Yehowa? Padi Nzambi ulekela bantu batuleja tshiji tshiabu bualu tudi basadidi bende, kudi mua kulua kumueneka bualu buimpe. Lutatu luonso lutudi mua kupeta ludi mua kutulongesha mu mushindu kampanda anyi kansanga. Yehowa udi ulekela dikenga dituvuila anu padidi ne tshipatshila tshia kutulongesha bualu kampanda. (1 Petelo 5:10) ‘Nzambi udi udiluatshisha ne tshiji tshia bantu tshidi tshishala.’ Kadi bituikala mua kukenga too ne ku lufu? Bualu ebu kabidi budi mua kutumbisha Yehowa Nzambi bualu bantu badi batumona tutantamena mateta ne lulamatu luonso badi bua kutuadija pabu kumutumbisha.
LUMINGU LUA DIA 26/8–1/9
BIUMA BIA MU DÎYI DIA NZAMBI MISAMBU 78
Tshilejilu tshia bena Isalele bavua kabayi ne lulamatu tshitudimuije
“Nuvuluke matuku a diambedi”—Bua tshinyi?
Diakabi, bena Izalele misangu ne misangu bakapona mu mpekatu wa tshipua-muoyo. Ne bipeta kayi? ‘E, [“misangu ne misangu,” NW] bakateta Nzambi, bakatatshisha wa Tshijila wa bena Izalele. Kabakavuluka bukole bua tshianza tshiende, anyi dituku diakabapikulaye mu bianza bia muena lukuna.’ (Musambu wa 78:41, 42) Ndekelu wa bionso, tshipua-muoyo tshiabu tshia mêyi-matuma a Yehowa tshiakafikisha ku dibengibua diabu kudiye.—Matayo 21:42, 43.
Tshilejilu tshimpe tshivua tshifila kudi mufundi wa misambu wakafunda ne: “Nentele bienzedi bia Yehowa, bualu bua nemvuluke malu ebe a kukema awakenza kale. Nengelangane meji a mudimu webe wonso, nengelangane meji munda muanyi a bienzedi biebe.” (Musambu wa 77:11, 12) Divuluka dia dieleela meji bu edi pa mudimu wa bulamatshi ne pa bienzedi bia dinanga bia Yehowa bia kale neditupeteshe disakibua, dikankamija, ne dianyisha bidi bikengedibua. Kabidi, ‘divuluka matuku a diambedi’ didi mua kuambuluisha bua kujimija dipungi ne didi mua kutusaka ku dienza bionso bitudi mua kuenza ne ku ditantamena dia lulamatu.
‘Kanuikadi nunungana’
16 Manunganyi adi atufikisha ku diditangila anu tuetu nkayetu ne malu adi atutatshisha, ne ku dipua muoyo masanka atudi nawu bua mutudi Bantemu ba Yehowa. Bua kukanda lungenyi lua kunungana, tudi ne bua kuikala tuvuluka masanka aa. Tshilejilu, yonso wa kutudi udi ne diakalenga dinene dia kubikidibua ku dîna dia Yehowa. (Yeshaya 43:10) Tudi mua kudia nende malanda masheme, ne dîba dionso ditudi basue tudi mua kumusambila yeye ‘utu umvua milombu.’ (Musambu 65:2; Yakobo 4:8) Muoyo wetu udi ne mushinga bualu tudi bamanye tshilumbu tshia bumfumu bunene bua Yehowa ne tudi tuvuluka kabidi ne: tudi ne diakalenga dia kushala bamulamate. (Nsumuinu 27:11) Tudi mua kuikala tuyisha lumu luimpe lua Bukalenge bua Nzambi pa tshibidilu. (Matayo 24:14) Bu mutudi tuitabuja mulambu udi upikula wa Yezu Kristo, tudi ne kondo ka muoyo kimpe. (Yone 3:16) Aa mmasanka adi muntu ne muntu nawu nansha yeye ukenga bishi.
w11-F 1/7 10 §3-4
Yehowa utu umvua mutu bantu bumvua anyi?
Muimbi wa misambu udi wamba ne: “Bungi buine bua misangu yakamutombokelabu mu tshipela!” (mvese wa 40) Mvese udi ulonda udi usakidila ne: “Bakela Nzambi mu diteta misangu ne misangu.” (Verse 41) Mona ne: muimbi wa misambu udi wakula bua lungenyi lua buntomboji. Lungenyi lubi alu luakamueneka kumpala kua dîba mmumue ne: mu tshipela, katupa kakese bobu bamane kupatuka mu Ejipitu. Bantu bakatuadija kunungana bua Nzambi, belakana ne: kavua mua kukumbana bua kubatabalela ne yeye muine kavua pamuapa ne dijinga adi to. (Nomba 14:1-4) Mukanda mukuabu wa bakudimunyi ba Bible udi wamba ne: miaku ya ne: “Bavua bamutombokele,” badi mua “kuyikudimuna mu mushindu mukuabu ne: ‘bakakoleshila Nzambi muoyo wabu’ anyi ne: ‘bakabenga Nzambi.’” Nansha nanku, Yehowa wakabuikidila bantu bende pavuabu banyingalala bua bilema biabu bu mudiye muena luse. Kadi bakenzulula kabidi bilema biabu abi, kutombokelabu Nzambi, ne kutungunukabu ne kuenza nanku.—Misambu 78:10-19, 38.
Mmunyi muvua Yehowa umvua misangu yonso ivuaye umona bantu bende bakavua ne lungenyi lubi bamutombokela? Mvese wa 40 udi wamba ne: ‘Bakamufikisha ku dinyingalala.’ Nkudimuinu mukuabu udi wamba ne: “Bakamubungamija.” Mukanda mukuabu wa malu a mu Bible udi umvuija ne: “Muaba eu bualu budi ne: tshikadilu tshia bena Isalele abu ntshikadilu tshivua mua kunyingalaja muntu anu mutubi bua bana batu babenga kutumikila baledi babu, babatombokela.” Anu mutu bana ba mutu mukole mua kunyingalaja baledi babu, bena Isalele bavua batombokela Nzambi abu “bakanyingalaja wa Tshijila wa Isalele.”—Mvese wa 41.
Bubanji bua mu Dîyi dia Nzambi
Malu manene a mu mukanda muisatu ne muinayi wa Misambu
78:24, 25—Bua tshinyi badi babikila mana ne: “blé wa mu diulu” ne “bidia bia bantu bakole”? “Bantu bakole” badibu bambe muaba eu mbanjelu ba mu diulu. Kadi biambilu bionso bibidi ebi kabiena biumvuija ne: mana avua tshiakudia tshia banjelu to. Avua “blé wa mu diulu” bualu avua mafumine mu diulu. (Musambu 105:40) Bu mudi banjelu anyi “bantu bakole” basombele mu diulu, tshiambilu tshia ne: “bidia bia bantu bakole” anyi banjelu tshidi mua kumvuija amu ne: Nzambi udi musombele mu diulu ke wakafila tshiakudia atshi. (Musambu 11:4) Yehowa uvua mua kuikala kabidi mutume banjelu bua kupesha bena Isalele mana.