Malu adibu baledile mu Mabeji a tshisangilu tshia Nsombelu ne mudimu wetu
© 2024 Watch Tower Bible and Tract Society of Pennsylvania
LUMINGU LUA DIA 4-10/11
BIUMA BIA MU DÎYI DIA NZAMBI | MISAMBU 105
“Udi uvuluka tshipungidi tshiende bua kashidi”
Mutudi mua kukolesha ditabuja dietu mu mulayi wa Yehowa wa bulongolodi bupiabupia
11 Tumonayi amue malu avua Yehowa mulaye bantu bende ku kale avua amueneka kaayi mua kuenzeka. Wakajadikila Abalahama ne Sala ne: bavua ne bua kulela muana wa balume nansha mukavuabu bakulakaje. (Gen. 17:15-17) Kumuambilaye kabidi ne: bavua ne bua kupesha ndelanganyi yende buloba bua Kanâna. Bu muvua bena Isalele bavua ndelanganyi ya Abalahama mu bupika mu Ejipitu munkatshi mua bidimu bia bungi, bivua bimueneka bu ne: mulayi au kawuvua mua kukumbana to. Kadi wakakumbana. Pashishe, Yehowa wakamanyisha Elizabeta ukavua mukulakaje ne: uvua ne bua kulela muana. Wakambila kabidi Mariya utshivua kamama ne: uvua ne bua kulela muana wa Nzambi ukavua Yehowa mumanyishe dilua diende bidimu binunu bia bungi mu budimi bua Edene. Eu mmulayi mukuabu uvua mukumbane.—Gen. 3:15.
12 Tuetu tuela meji a milayi ya Yehowa idiye mulaye ne mukumbaje, tudi tukolesha ditabuja dietu mu bukole budiye nabu bua kutubueja mu bulongolodi bupiabupia. (Bala Yoshua 23:14; Yeshaya 55:10, 11.) Bualu ebu budi butulongolola bimpe bua tuikale tuambuluisha bakuabu bua kujingululabu ne: mulayi wa bulongolodi bupiabupia ki ntshilota anyi bualu busuikakaja to. Yehowa nkayende wakamba bua diulu dipiadipia ne buloba bupiabupia ne: “Mêyi aa nga lulamatu ne mmalelela.”—Buak. 21:1, 5.
it-2-F 493 §2
Dîyi
Bifukibua bionso bidi mu diulu ne pa buloba bidi bitumikila dîyi dia Nzambi. Udi ukuata nabi mudimu bua kukumbaja malu adiye mulongolole. (Mis 103:20; 148:8) Dîyi diende ndia kueyemena; Nzambi utu kabidi uvuluka bua kukumbaja bualu buonso budiye mulaye. (Dut 9:5; Mis 105:42-45) Anu bu mudiye muambe, ‘dîyi diende didi dishala kashidi;’ kadiakupingana kudiye kadiyi dikumbaje bualu buvuaye mulongolole.—Yes 40:8; 55:10, 11; 1Pt 1:25.
Bubanji bua mu Dîyi dia Nzambi
Lama ditalala dia mu muoyo nansha kuoku mashintuluka
3 Jozefe uvua ne bidimu bitue ku 17 pavua bana babu bamupane bu mupika bua mukawu uvuabu nawu bualu tatuabu uvua mutambe kumunanga anu yeye. (Gen. 37:2-4, 23-28) Jozefe wakenza bidimu bitue ku 13 mu buloko mu Ejipitu muvuaye mupika, kule menemene ne tatuende Yakoba. Ntshinyi tshivua tshiambuluishe Jozefe bua kubenga kujimija ditekemena, kayi ufiikilangana munda?
4 Pavua Jozefe ukenga mu buloko apu, uvua anu ne bua kuikala mutume meji ende ku mushindu uvua Yehowa umuambuluisha. (Gen. 39:21; Mis. 105:17-19) Bilota bivua ne mêyi a buprofete bivua Jozefe mulote patshivuaye nsonga bivua anu kabidi mua kuikala bimushindikile ne: Yehowa uvua umuanyisha. (Gen. 37:5-11) Bidi bimueneka ne: uvua anu wambila Yehowa yende yonso ya munda. (Mis. 145:18) Yehowa wakandamuna masambila ende au, umujadikila ne: neikale “nende” mu ntatu yende yonso.—Bien. 7:9, 10.
LUMINGU LUA DIA 11-17/11
BIUMA BIA MU DÎYI DIA NZAMBI | MISAMBU 106
“Bakuapua Nzambi uvua mubapandishe muoyo”
“Udi ku luseke lua Yehowa nnganyi?”
13 Bena Isalele bavua bumvue buôwa bua ditutu difiike, mipenyi, ne bimanyinu bikuabu bia dikema bivua Nzambi muenze. Bobu kulomba Mose bua akule ne Yehowa pa muaba wabu ku mukuna wa Sinai. (Ekes. 20:18-21) Mose kuya ku mutu kua mukuna, kuya lonso. Bena Isalele bavuaku mpindieu bakalame mu tshipela kabayi ne mulombodi wabu uvuabu beyemena anyi? Bidi bimueneka ne: ditabuja dia bena Isalele divua dikola pavuabu bamona Mose ne mêsu. Bakapampakana, kuambilabu Alona ne: “Utuenzele Nzambi waya kumpala kuetu, bualu katuena bamanye tshidi tshifikile Mose eu, muntu uvua mutupatule mu buloba bua Ejipitu.”—Ekes. 32:1, 2.
Bubanji bua mu Dîyi dia Nzambi
Malu manene a mu mukanda muisatu ne muinayi wa Misambu
106:36, 37. Mvese eyi idi isuikakaja ditendelela dia mpingu ne milambu mipesha bademon. Bualu ebu budi buleja ne: muntu udi wenza mudimu ne mpingu udi mua kulua ku bukokeshi bua bademon. Bible udi utudimuija ne: “Nudilame kudi mpingu.”—1 Yone 5:21.
LUMINGU LUA DIA 18-24/11
BIUMA BIA MU DÎYI DIA NZAMBI | MISAMBU 107-108
“Elayi Yehowa tuasakidila, bualu yeye udi muimpe”
Tshisumbu tshitumbishe Yehowa
2 Tshisumbu ki nsangilu patupu wa bantu to. Ki ndingumba dia bantu ba muaba umue anyi badi banaya dinaya kampanda dia muomumue badi badisangishe nansha. Kadi tshisumbu ntshienza diambedi bua kutumbisha Yehowa Nzambi. Bidi nanku katshia ku kale anu mudi mukanda wa Misambu uleja. Tudi tubala mu Musambu 35:18 ne: ‘Nenkusakidile mu disangisha dinene dia bantu; nenkutumbishe munkatshi mua tshisumbu tshinene.’ Bia muomumue, badi batukankamija mu Musambu 107:31, 32 ne: ‘Basakidile biabu Yehowa bua luse luende lujalame ne bua bienzedi biende bia kukema bidiye wenzela bana ba bantu! Bamunemeshe mu disangisha dia bantu.’
Ela Yehowa tuasakidila ne upete mabenesha
4 Tuetu basue kupeta muoyo wa dianyisha ne kuwulama, tudi ne bua kumanya ne kuelangana meji bikole bua mabenesha a kudi Yehowa ne kukonkonona bimpe malu adiye mutuenzele ne dinanga dia lulamatu. Pavua mufundi wa Misambu muenze nunku, wakakatshila bua bungi bua bintu bia kukema bivua Yehowa muenze.—Bala Musambu 40:5; 107:43.
Bubanji bua mu Dîyi dia Nzambi
“Neakukoleshe”—Mushindu kayi?
20 Nansha patudi batekete, “netupetele bukole kudi Nzambi.” (Mis. 108:13) Yehowa ukadi mutupeshe bionso bidi bikengela bua tupete bukole bua kudiye. Nanku wewe dijinga ne diambuluisha bua kukumbaja mudimu udibu bakupeshe, bua kunanukila mu lutatu, anyi bua kulama disanka diebe, sambila ne muoyo mujima ne wenze makebulula. Lekela bena Kristo nebe bakukankamije. Ikala welangana meji a malu audi mutekemene. Dîba adi, ‘neukoleshibue ne bukole buonso bilondeshile bukole [bua Nzambi] bua butumbi bua umone mua kunanukila tshishiki ne lutulu ne disanka.’—Kolos. 1:11.
LUMINGU LUA DIA 25/11–1/12
BIUMA BIA MU DÎYI DIA NZAMBI | MISAMBU 109-112
Tuaku Mukalenge Yezu mpanda!
Malu menene a mu mukanda muitanu wa Misambu
110:1, 2—Pavua Yezu Kristo ‘Mukalenge wa [Davidi]’ usomba ku diboko dia balume dia Nzambi uvua wenza tshinyi? Kunyima kua dibika dia Yezu ku lufu, wakabanda mu diulu ne kushalaye muindile ku diboko dia balume dia Nzambi too ne muakasombaye mu nkuasa wa bumfumu mu 1914. Katshia ku tshikondo etshi, Yezu udi ukokesha balongi bende bela manyi, ubalombola mu mudimu wa diyisha ne dilongesha bantu Dîyi dia Nzambi ne wenda ubalongolola bua kukokeshabu nende mu Bukalenge buende.—Matayo 24:14; 28:18-20; Luka 22:28-30.
Badi baluisha Nzambi kabakutshimuna!
3 Badi baluisha bantu ba Yehowa katshia ku ntuadijilu kua lukama lua bidimu lua 20. Mu matunga a bungi, bantu ba muoyo mubi mbakebe mua kupumbishisha peshi mene mua kulekesha dimanyisha dia lumu luimpe lua Bukalenge bua Nzambi. Mbabasake kudi Muluishi wetu munene Diabolo, udi “wendakana bu nyama wa ntambue udi ukungula, ukeba bantu ba kudieye.” (1 Petelo 5:8) Pakajika ‘tshikondo [tshijadika] tshia bisamba bia bende’ mu 1914, Nzambi wakateka Muanende Mukalenge mupiamupia wa buloba, kumuambilaye ne: “Ukokeshe biebe munkatshi mua badi n’ebe lukuna.” (Luka 21:24; Musambu 110:2) Ku diambuluisha dia bukokeshi buende ebu, Yezu wakipata Satana mu diulu ne kumuelaye ku mutumba wa buloba. Mpindieu Diabolo udi ujikijila bena Kristo bela manyi ne balunda babu tshiji bualu mmumanye ne: matuku ende mmashale makese. (Buakabuluibua 12:9, 17) Mvita eyi ya munanunanu idibu batuele kudi bantu badi baluisha Nzambi mmienze malu kayi?
Ndaku anu kumpala!
Kukuata mudimu ne tshipedi tshiebe kudi kukulomba bua kuikala wa kumpala bua kuenza malu. Utuku ulomba bakuebe bua kuyabu nebe mu buambi anyi? Utuku ukeba mushindu wa kuambuluisha bana ne bantu bapiabapia ne balema ba mu tshisumbu tshienu anyi? Utuku ukomba mu Nzubu wa Bukalenge, wenza midimu ku budisuile mu mpuilu ne mpungilu anyi? Utuku ne tshibidilu tshia kuenza mudimu wa bumpanda-njila buambuluishi anyi? Udiku mua kulua mpanda-njila wa pa tshibidilu peshi kuambuluisha tshisumbu tshidi dijinga ne bamanyishi anyi? Biwikale muntu mulume, udiku uditatshisha bua kukumbaja ngikadilu idi Bible ulomba muntu bua kulua musadidi wa mudimu peshi mukulu anyi? Wewe ne muoyo wa kudifila ne wa kuitaba majitu, udi uleja ne: udi wenda ukola.—Mus. 110:3.
Bubanji bua mu Dîyi dia Nzambi
Ikala ne ditabuja dikole bua Bukalenge
15 Nansha mudi tshipungidi tshia Abalahama ne tshipungidi tshia Davidi bijadika ne: kankanunuina ka mukaji nekenze mudimu wa kukokesha, mudimu eu nkayawu kawakukumbana bua kupetesha bantu ba mu bisamba bionso mabenesha to. Bua bantu kupetabu mabenesha, bavua ne bua kubapikula ku bupika bua bubi ne kubabueja mu dîku dia Yehowa dia buloba bujima. Bua bualu ebu kukumbanabu, kankanunuina kavua kabidi mua kuenza mudimu wa buakuidi. Mufuki wa meji wakenza bualu ebu ku diambuluisha dia bualu bukuabu buvuaye mulongolole, mbuena kuamba ne: tshipungidi tshia muakuidi bu Melekisedeke.
16 Yehowa wakasokolola ku butuangaji bua mukalenge Davidi ne: uvua ne bua kudia tshipungidi ne Yezu bua bipatshila bibidi: bua ‘ashikame ku tshianza tshia balume’ too ne patshimunaye baluishi bende ne paluaye “muakuidi tshiendelele wa ku mulongo wa Melekisedeke.” (Bala Musambu wa 110:1, 2, 4.) Bua tshinyi “wa ku mulongo wa Melekisedeke”? Bualu, matuku a bungi kumpala kua muntu nansha umue wa mu ndelanganyi ya Abalahama kayi muanji kupiana Buloba bulaya, Melekisedeke, mukalenge wa Salema wakenza mudimu bu “muakuidi wa Nzambi Mutambe Bunene.” (Eb. 7:1-3) Yehowa nkayende ke uvua mumusungule bua kuenza mudimu eu. Yeye nkayende ke udi Mifundu ya tshiena Ebelu ileja ne: uvua muenze mudimu bu mukalenge ne muakuidi. Kabidi, bu muvuaye kayi ne muntu uvuaye mupinganyine peshi uvua mua kumupinganyina, badi mua kumubikila ne: “muakuidi bua kashidi” anyi bua tshiendelele.
17 Yehowa mmuteke Yezu muakuidi ku diambuluisha dia tshipungidi tshidiye mudie nende, ne neashale “muakuidi kashidi bu Melekisedeke.” (Eb. 5:4-6) Bualu ebu budi buleja patoke ne: Yehowa mmudisuike bua kuenza mudimu ne Bukalenge bua Masiya bua kukumbaja tshivuaye mulongolole ku ntuadijilu bua bantu ne buloba.
LUMINGU LUA DIA 2-8/12
BIUMA BIA MU DÎYI DIA NZAMBI | MISAMBU 113-118
Netupingajile Yehowa tshinyi?
Dinanga dikukoleshe
13 Mêyi a Yezu aa adi aleja patoke ne: tshia kumpalampala tudi ne bua kunanga Yehowa. Kadi, katutu tuledibua bikale banange Yehowa bikole to. Ntshintu tshitudi ne bua kudienzeja bua kuikala natshi. Patuakumvua bualu buende musangu wa kumpala, malu atuakumvua akatukoka kudiye. Ku kakese ku kakese, tuakamanya muvuaye mulongoluele bantu buloba. (Genese 2:5-23) Tuakamanya mushindu udiye muenzele bantu malu, tuetu kumvua ne: kakatulekela pakabuela mpekatu mu bantu to, kadi wakalongolola mishindu ya kutupikula. (Genese 3:1-5, 15) Wakenzela bena lulamatu malu mimpe, ne ku ndekelu kufilaye Muanende umuepele mulela bua kutubuikidila mpekatu yetu. (Yone 3:16, 36) Dimanya edi (divua dienda divula) diakakolesha dianyisha dietu bua Yehowa. (Yeshaya 25:1) Mukalenge Davidi wakamba ne: uvua munange Yehowa bualu uvua umukuba ne dinanga. (Musambu 116:1-9) Lelu, Yehowa udi utukuba, utulombola, utukolesha ne utukankamija. Patudi tulonga malu a bungi adi amutangila, dinanga dietu padi didi dienda dikola.—Musambu 31:23; Sefanya 3:17; Lomo 8:28.
Itaba ne dianyisha, upeshangana ne muoyo mujima
Mufundi wa musambu kampanda wa mu Bible wakadiebeja ne: ‘Nempingajile Yehowa tshinyi bua malu ende mimpe onso akungenzelaye?’ (Mus. 116:12) Mmalu kayi mimpe avua Yehowa mumuenzele? Uvua mumuambuluishe pavuaye mu ‘ntatu ne tunyinganyinga.’ Yehowa uvua kabidi ‘mupandishe muoyo wende.’ Mpindieu uvua musue ‘kupingajila’ Yehowa tshintu kampanda. Ntshinyi tshivuaye mua kumupesha? Wakamba ne: ‘Nemmane mitshipu yanyi kudi Yehowa.’ (Mus. 116:3, 4, 8, 10-14) Uvua mudisuike bua kukumbaja malu onso avuaye mulaye Yehowa ne kuenza bionso bivua Yehowa umulomba.
Udi pebe mua kuenza nanku. Mushindu kayi? Udi ne bua kuikala ne nsombelu udi umvuangana ne mikenji ya Yehowa misangu yonso. Ke bualu kayi, udi ne bua kuenza muebe muonso bua ntendelelu wa Yehowa ikale misangu yonso pa muaba wa kumpala mu nsombelu webe ne bua nyuma wa Nzambi akulombole mu malu ebe onso. (Muam. 12:13; Gal. 5:16-18) Kadi mu bulelela, kakuena tshintu tshiudi mua kupesha Yehowa tshidi mua kukumbanangana ne bionso bidiye mukuenzele to. Tshidibi, ‘mutshima wa Yehowa udi usanka’ padiye ukumona udifila ne muoyo webe mujima mu mudimu wende. (Nsu. 27:11) Kusankisha Yehowa ndiakalenga dinene be!
Malu adi mukanda wa Lewitiki mua kutulongesha
9 Dilongesha dibidi: Tudi tuenzela Yehowa mudimu bualu tudi ne dianyisha kudiye. Bua kumvua bualu ebu bimpe, tuanji tukonkonone bualu bukuabu bua mushinga mu ntendelelu mulelela mu Isalele wa kale; bualu abu mbua milambu ya diumvuangana. Mukanda wa Lewitiki udi utuleja ne: muena Isalele uvua mua kufila mulambu wa diumvuangana kudi Nzambi ‘bua kumuela tuasakidila.’ (Lew. 7:11-13, 16-18) Muntu uvua uwufila bualu uvua musue kuwufila, kadi ki mbualu bavua bamuenzeje to. Nanku eu uvua mulambu uvua muntu udifidila bualu uvua munange Yehowa Nzambi wende. Mufidi wa mulambu eu ne bena mu dîku diende ne bakuidi bavua badia munyinyi wa nyama wa mulambu. Kadi kuvua bitupa bikuabu bia nyama bivuabu bapesha anu Yehowa nkayende. Mbitupa kayi abi?
10 Dilongesha disatu: Tudi tupesha Yehowa tshitudi natshi tshia tshimpe menemene bualu tudi bamunange. Bua Yehowa, mafuta a nyama ke avua mapite bintu bikuabu bionso bia ku nyama. Bualu bukuabu, wakaleja ne: bimue bitupa binene bia nyama, nansha tuonyi kabidi, bivua ne mushinga wa pa buawu. (Bala Lewitiki 3:6, 12, 14-16.) Nanku pavua muena Isalele udifidila nkayende bintu ebi kudi Yehowa kusangisha ne mafuta a nyama, bivua bitamba kumusankisha. Muena Isalele uvua ufila mulambu wa nunku uvua uleja ne: uvua ne dijinga dikole dia kulambula Nzambi tshintu tshimpe menemene tshivuaye natshi. Mu mushindu wa muomumue, Yezu wakenzela Yehowa mudimu ne anyima wende mujima bua kuleja ne: uvua musue kumupesha tshintu tshimpe menemene tshivuaye natshi kayi muenzeja bualu uvua mumunange. (Yone 14:31) Bua Yezu, kuenza disua dia Nzambi kuvua kumuenza disanka; uvua munange mikenji ya Nzambi muyinangilamu. (Mis. 40:8) Pavua Yehowa umona muvua Yezu umuenzela mudimu kayi muenzeja, uvua usanka bikole be!
11 Anu bu milambu ya diumvuangana ayi, mudimu utudi tuenzela Yehowa mmushindu utudi tumuleja nkayetu mutudi tudiumvua bua bualu buende. Tudi tupesha Yehowa tshintu tshimpe menemene tshitudi natshi, ne tudi tumupeshatshi bualu tudi bamunange ne muoyo wetu mujima. Padi Yehowa umona batendeledi bende miliyo ne miliyo bamuenzela mudimu ku budisuile bua mudibu bamunange ne basue kuenza malu mudiye musue, udi umvua disanka dia katshia! Patudi tuvuluka ne: Yehowa udi umona malu atudi tuenza ne tshidi tshitusaka bua kuenza ne ubiangata ne mushinga, bidi bitukolesha. Tshilejilu, wewe muikale mukulakaje kutshiyi kabidi mua kuenza malu a bungi muudi musue, ikale mutuishibue ne: Yehowa mmumanye ne: kuena mua kuenza kabidi malu muuvua uenza kumpala to. Udi mua kumona ne: kuena ne tshia nsongo tshia kufila, kadi Yehowa udi umona yeye ne: dinanga dikole didi munda muebe ke didi dikusaka bua kuenza tshiudi mua kuenza. Udi usanka bua kuitaba tshionso tshiudi mua kufila bilondeshile makanda ebe.
Bubanji bua mu Dîyi dia Nzambi
Nkonko ya babadi
Mufundi wa Misambu kampanda wakafunda ku bukole bua nyuma muimpe ne: ‘Lufu lua bansantu bende ludi ne mushinga mukole ku mêsu kua Yehowa.’ (Mus. 116:15) Muoyo wa mutendeledi wa Yehowa yonso udi ne mushinga wa bungi ku mêsu kuende. Kadi mêyi adi mu Musambu wa 116 aa adi aleja bualu bukuabu bua mushinga kupita lufu lua mutendeledi wa Yehowa.
Padi muntu wenza muyuki dîba didi muena Kristo kampanda mufue, ki mbimpe aleje ne: mêyi adi mu Musambu wa 116:15 adi akumbanyina muntu udi mufue au to, nansha yeye muikale mutendeledi mulelela wa Yehowa. Bua tshinyi? Bualu mêyi a mufundi wa Misambu aa adi ne diumvuija dialabale. Adi umvuija ne: Yehowa kakuanyisha bua batendeledi bende bonso babutuke to bualu udi ubangata ne mushinga wa bungi.—Bala Musambu wa 72:14; 116:8.
LUMINGU LUA DIA 9-15/12
BIUMA BIA MU DÎYI DIA NZAMBI | MISAMBU 119:1-56
“Mmunyi mudi nsongalume mua kulama njila wende mukezuke?”
w87-F 1/11 18 §10
Nutshidi bakezuke mu malu onso anyi?
10 Paulo mmutudimuije mu Efeso 5:5 ne: “Bualu nudi bamanye bualu ebu, babujingulule bimpe nuenu nkayenu ne: kakuena muena masandi anyi muntu udi mukoya anyi muena lukuka, mmumue ne: kuikala mutendeledi wa mpingu, udi ne bumpianyi mu Bukalenge bua Kristo ne bua Nzambi to.” Kadi tshidimu tshionso etshi, batu babela bantu binunu ne binunu patoke anyi babipata mu tshisumbu bua dienda dia masandi, mmumue ne: ‘benzela mubidi wabu bibi.’ (1 Kolinto 6:18) Mbifikile ba bungi nanku bualu kabavua ‘badimuke ne benze malu bilondeshile dîyi dia Nzambi to.’ (Misambu 119:9) Tshilejilu, bana betu ba bungi ba balume kabatu badilama bimpe mu tshikondo tshia dikisha to. Batu batuadija kulengulula bisangilu, badia bulunda ne balongi babu anyi bena mudimu babu badi kabayi Bantemu. Bena Kristo netu bakuabu batu baditua mu dienza malu adi Bible mukandike ne bantu abu bualu badi bela meji ne: ‘mbantu bimpe.’ Bakuabu pabu mbadie bulunda bua katapula kateka ne bena mudimu babu. Mukulu mukuabu muena Kristo uvua mudie bulunda ne muena mudimu wabu wa bakaji, yeye kulekela dîku diende, kuyaye kusomba nende! Bua bualu abu, bakamuipata mu tshisumbu. Bualu ebu budi bujadika mudi mêyi a mu Bible a ne: “Malunda mabi adi anyanga bibidilu bimpe” mikale malelela!—1 Kolinto 15:33.
‘Mêyi ebe awakammanyisha adi disanka dianyi’
YEHOWA utu utuvuluija mêyi ende bua kutuambuluisha bua kutantamena mu tshikondo tshia malu makole etshi. Utu utuvuluijawu patudi tudibadila Bible, mu miyuki ne malu makuabu atudi tumvua mu bisangilu bietu bia bena Kristo. Malu a bungi atudi tubala anyi tumvua aa kaena anu mapiamapia to. Pamuapa tukadi bamane kulonga malu a muomumue kumpala. Kadi bu mutudi tupua malu muoyo misangu ya bungi, mbimpe bikala batuvuluija mêyi ne mikenji ne malu adi Yehowa mulongolole. Tudi ne bua kuela Yehowa tuasakidila bua malu adiye utuvuluija. Adi atukolesha ne atuambuluisha bua kubenga kupua muoyo malu avua matusake bua kuikala ne nsombelu udi umvuangana ne disua dia Nzambi. Ke bualu kayi mufundi wa Misambu wakimbila Yehowa ne: ‘Mêyi ebe awakammanyisha adi disanka dianyi.’—Musambu 119:24.
Umbusha mêsu ebe ku malu a patupu
2 Kadi malu atudi tutangila adi kabidi mua kutukebela ntatu. Bu mutu mêsu etu apetangana bikole ne lungenyi, malu atudi tumona adi mua kujula majinga kampanda mu muoyo wetu anyi kuakolesha. Pashishe bu mutudi munkatshi mua bantu badi ku bukokeshi bua Satana Diabolo badi ne bikadilu bibi ne basue kudisankisha, tudi tumona bimfuanyi bidi mua kutupambuisha nansha tuetu katuyi basue. (1 Yone 5:19) Nunku kabiena bitukemesha bua muvua mufundi wa Musambu wa 119 mulombe Nzambi ne: ‘Ukudimune mêsu anyi bua kaatangidi malu a patupu, usangaje muoyo wanyi mu njila yebe.’—Mus. 119:37.
Bubanji bua mu Dîyi dia Nzambi
Eyemena Dîyi dia Yehowa
2 Bualu bunene budi mu Musambu wa 119 mmushinga wa dîyi dia Nzambi anyi mukenji wende. Wakafunda musambu eu mu bitupa bilondangane bilondeshile maleta a alfabe bua kuikalawu pamuapa umuvuluija malu. Mmusambu udi ne mvese 176 mifunda mu bitupa mu bitupa bilondeshile dilondangana dia maleta a alfabe wa tshiena-Ebelu. Mu tshiena-Ebelu tshia ku ntuadijilu, tshitupa tshionso tshia ku bitupa 22 bia musambu eu tshidi ne milongo 8 ya tubiambilu idi ituadija anu ne dileta dimue dimue. Musambu eu udi wakula bua dîyi dia Nzambi, mikenji yende, njila yende, mêyi adiye ututumina, mêyi adi atuludika, mapangadika a kulumbulula kuende, mêyi adiye utuambila ne mêyi ende mafunda atudi ne bua kunemeka. Mu tshiena-bualu etshi ne tshidi tshilonda, netuikale mua kulonga Musambu wa 119 bilondeshile nkudimuinu mujalame wa Bible wa mu tshiena-Ebelu. Kuelangana meji pa malu a basadidi ba Yehowa ba kale ne ba lelu kudi ne bua kubandisha ngumvuilu wetu wa musambu eu udi mufundisha ku nyuma wa Nzambi ne kuvudija dianyisha ditudi nadi bua Dîyi dia Nzambi didiye mufundishe mu Bible.
LUMINGU LUA DIA 16-22/12
BIUMA BIA MU DÎYI DIA NZAMBI | MISAMBU 119:57-120
Mua kunanukila mu dikenga
“Mona mundi munange mikenji yebe!”
2 Udi ne bua kudiebeja ne: “Mmunyi muvua mikenji ya Nzambi mua kukolesha mufundi wa Misambu?” Mufundi wa Misambu uvua mumanye ne: Yehowa uvua umutabalela ne bualu ebu buvua bumukolesha. Bu muvuaye mumanye ne: kutumikila mikenji ivua Nzambi mufile ne dinanga nkuimpe, uvua uyitumikila ne disanka nansha muvua baluishi bende bamukengesha. Uvua mumanye ne: Yehowa uvua mumuleje bulenga. Kutumikila mikenji ya Nzambi kuakamuvuija kabidi muena meji kupita baluishi bende ne kuakamuambuluisha bua kukuba muoyo wende. Kuvua kumupesha kabidi ditalala ne kondo ka muoyo kimpe.—Musambu 119:1, 9, 65, 93, 98, 165.
Tutu banange bikole malu adi Yehowa utuvuluija anyi?
3 Malu adi Nzambi utuvuluija avua ne mushinga wa bungi kudi mufundi wa misambu wakimba ne: ‘Ngakenda lukasa, tshiakajanguluka bua kulonda mikenji yebe. Mionji ya bantu babi yakunjingila, kadi tshiakupua mikenji yebe muoyo.’ (Musambu 119:60, 61) Malu adi Yehowa utuvuluija adi atuambuluisha bua kutantamana padibu batukengesha, bualu tudi bajadike ne: Tatu wetu wa mu diulu udi mua kukosa mionji yonso idi baluishi batujingila bua kutukuata. Mu tshikondo tshiakanyine, udi utupikula ku bipumbishi bionso ebi bua tuetu kumona mua kuenza mudimu wa diyisha Bukalenge.—Mâko 13:10.
Malu menene a mu mukanda muitanu wa Misambu
119:71—Mbualu buimpe kayi budi muntu mua kupeta padiye mu dikenga? Dikenga didi mua kutulongesha mua kueyemena Yehowa, mua kumulomba diambuluisha ne muoyo mujima ne kulonga Bible bikole ne mua kutumikila malu adiye wamba. Kabidi mushindu utudi tuenza malu patudi mu dikenga udi mua kuleja butekete kampanda butudi nabu. Tuetu tuitaba dikenga bua kutulengeja, katuakumvua bibi menemene to.
“Nudile ne badi badila”
3 Tatu wetu wa luse, Yehowa, ke muntu munene udi utusamba ne busambi butudi nabu dijinga. (Bala 2 Kolinto 1:3, 4.) Yeye udi tshilejilu tshitambe bunene tshia muntu udi uditeka pa muaba wa bakuabu, ne udi ulaya bantu bende ne: “Meme, meme mene, nyeye udi unusamba.”—Yesh. 51:12; Mis. 119:50, 52, 76.
5 Tudi ne bua kuikala ne dishindika dikole dia ne: Yehowa neatuambuluishe. Nunku tudi ne bua kuikala misangu yonso tudiumvua badilekelele bua kumusambila ne kumuleja kanyinganyinga kakole katudi naku. Ndikoleshibua ku muoyo kayipu dia kumanya ne: Yehowa mmumanye mutudi tudiumvua ne udi utusamba ne busambi butudi nabu dijinga! Mmunyi mudiye wenza nanku?
Bubanji bua mu Dîyi dia Nzambi
Malu menene a mu mukanda muitanu wa Misambu
119:96—Ku ndekelu kua malu onso makane’ kudi kumvuija tshinyi? Mufundi wa Misambu udi wakula bua malu makane anyi mapuangane ku mmuenenu wa bantu. Pamuapa uvua uleja ne: malu makane bua bantu adi ne mikalu. Kadi mikenji ya Nzambi kayena yoyi ne mikalu ya buena eyi to. Mikenji yende idi ne mushinga mu malu onso a mu nsombelu.
LUMINGU LUA DIA 23-29/12
BIUMA BIA MU DÎYI DIA NZAMBI | MISAMBU 119:121-176
Mmunyi mutudi mua kuepuka tunyinganyinga tua patupu
Mikenji ya Nzambi ne mêyi ende manene bilongeshe kondo kebe ka muoyo
5 Bua mikenji ya Nzambi kutuambuluisha, kabiena bikengela anu kuyibala anyi kuyimanya patupu to. Tudi ne bua kuyinanga ne kuyitumikila. Dîyi dia Nzambi didi diamba ne: “Kinayi malu mabi, nangayi malu mimpe.” (Amo. 5:15) Mmunyi mutudi mua kuenza nunku? Bualu bunene butudi mua kuenza nkulonga mua kumona malu mudi Yehowa uamona. Fuanyikijabi ne: mbikukolele bua kumona tulu. Doktere udi ukufundila amue malu a kulonda bu mudi kudia biakudia bidi bimpe, kuibidija mubidi, ne kushintulula bimue bibidilu. Mpindieu dilonda malu aa ndikuambuluishe bua kumona tulu! Kakuyi mpata, newikale ne dianyisha dia bungi kudi doktere au bua mudiye mukuambuluishe.
6 Bia muomumue, Mufuki wetu mmutuelele mikenji idi itukuba ku ntatu idi kuenza mpekatu kukebesha bua tuikale ne nsombelu muimpe. Anji elabi meji bua mudi kutumikila mibelu ya mu Bible kutuambuluisha mu malu bu mudi dishima, dilukakaja meji mabi, masandi, tshikisu, ne malu a mîdima. (Bala Nsumuinu 6:16-19; Buak. 21:8) Patudi tupeta masanka bua mutudi tuenza malu mudi Yehowa musue, tudi tumunanga yeye ne mikenji yende bikole ne tumuanyisha.
Bansonga—mbinganyi binudi nuipatshila?
12 Nangananga, udi ne bua kulonga mua kukina, kutshina, ne kubenga bubi. (Musambu wa 97:10) Mmunyi muudi mua kukina tshintu tshidi pa kutshiangata muditshi amu, tshisankisha ne tshilengelela? Mpa kuela meji ku bipeta bibi! “Kanudingibu: kabatu baseka Nzambi. Bushuwa, tshionso tshidi muntu ukuna, ke tshiotshi tshianowaye; bualu, eu udi ukuna bua mubidi neanowe dinyanguka ku mubidi wende.” (Galatia 6:7, 8) Biwatetshibua bua kupona pa kukokela dijinga dibi, ela meji ku tshipeta tshitambe bubi—mushindu wanyingalajabi Yehowa Nzambi. (Fuanyikija ne Musambu wa 78:41.) Ela kabidi meji ku mpukapuka ya dîmi kadiyi ditekemena peshi ku disama bu mudi SIDA. Ndekelu wa bionso, ela meji ku malanda ebe ne bakuabu ne kanemu ka bumuntu buebe biwajimija anu bua ngenzelu webe mubi. Kudi mua kupatuka kabidi bipeta bibi bianenga matuku mavule. Muena nkristo kampanda mukaji wakitaba ne: “Bayanyi ne meme muine tuvua bamanyangane kumpala kua kupetangana bua dibaka. Lelu’eu, nansha mutudi bena nkristo buonso babidi, nsombelu wetu wa masandi wa matuku mashale udi mpokolo wa dipanga kumvuangana ne mutshiawudi mu dibaka dietu.” Kabidi, kupu muoyo nansha kakese dijimija dia masanka ebe a mu bulongolodi bua Nzambi ne njiwu ya kuipatshibua mu tshisumbu tshia bena nkristo! (1 Kolinto 5:9-13) Ki nkufuta bipitshidile anu bua disanka dia katupa kîpi anyi?
Bubanji bua mu Dîyi dia Nzambi
w23 01 2 §2
Ikala mutuishibue ne: ‘Dîyi dia Nzambi mbulelela’
2 Tuetu batendeledi ba Yehowa tudi batuishibue ne: Yehowa udi “Nzambi wa bulelela” ne utu anu musue tshidi tshimpe buetu tuetu. (Mis. 31:5; Yesh. 48:17) Tudi bamanye ne: tudi mua kueyemena mêyi atudi tubala mu Bible aa: “Nshindamenu muine wa dîyi [dia Nzambi] mbulelela.” (Bala Misambu 119:160.) Tudi tuitaba tshiakamba mumanyi kampanda wa malu a mu Bible tshia ne: “Mu malu onso avua Nzambi muambe kamuena kalu ka dishima nansha kamue ne kamuena budi mua kupanga kukumbana to. Bantu ba Nzambi badi mua kuitaba bidiye wamba bualu badi bamueyemena.”
LUMINGU LUA DIA 30/12–5/1
BIUMA BIA MU DÎYI DIA NZAMBI | MISAMBU 120-126
Bakakuna ne binsonji, kunowabu ne disanka
Badi batumbisha Nzambi badi bapeta mabenesha
10 Patudi tuambula tshikokedi tshidi Kristo utupesha bu bayidi bende, tudi tuluangana ne Satana. Yakobo 4:7 udi ulaya ne: “Nukandamene Diabolo ne yeye neanunyeme.” Ebi kabiena bileja ne: mbipepele bua kukandamena Satana to. Kusadila Nzambi kudi kulomba madikolela a bungi. (Luka 13:24) Kadi Bible udi utulaya mu Musambu wa 126:5 ne: ‘Badi bamiamina maminu ne binsonji ku mêsu nebapuole biakudia ne mbila ya disanka.’ Bulelela, katuena tutendelela Nzambi udi kayi ne dianyisha to. Udi “mufutshi wa badi bamukeba,” ne udi ubenesha bantu badi bamutumbisha.—Ebelu 11:6.
Newikale ne ditabuja dikole anyi?
17 Udi mu kanyinganyinga udila anu kudila bua muudi mufuishe anyi? Ikala ubala miyuki ya mu Bible ya bavuabu babishe ku lufu bua ukoleshe ditabuja diebe dia ne: nebabishe bantu ku lufu. Udi udila unyingalala bualu mbipate mulela webe mu tshisumbu anyi? Ikala udilongela bua wikale mutuishibue ne: mushindu utu Nzambi unyoka bantu mmuimpe mutambe. Ikala umona lutatu luonso ludi lukukuata bu mpunga wa wewe kukolesha ditabuja diebe. Ikala wambila Yehowa yebe yonso ya munda. Kuikadi uditola to, kadi ikala pabuipi ne bena Kristo netu. (Nsu. 18:1) Enza malu akuambuluisha bua kunanukila, nansha uenza ne binsonji ku mêsu. (Mis. 126:5, 6) Tungunuka ne kubuela bisangilu, kuya mu buambi, ne kubala Bible. Tuma lungenyi luebe ku malu mimpe adi asankisha adi Yehowa mukulongoluele. Wewe umona mushindu udi Yehowa ukuambuluisha, nebikoleshe kabidi ditabuja diebe kudiye bikole.
Tunanukilayi mu mudimu wa dinowa!
13 Mêyi a mu Musambu 126:5, 6 adi akolesha bikole bena mudimu wa Nzambi wa dinowa, nangananga aba badibu bakengesha, bualu adi amba ne: ‘Badi bamiamina maminu ne binsonji ku mêsu nebapuole biakudia ne mbila ya disanka. Udi uya biende, wenda udila, mutuale maminu bua kukuna, neapingane bulelela ne mbila ya disanka, mutuale bisumbu biende bia blé.’ Mêyi aa a mufundi wa Misambu adi amba bua dikuna ne dinowa adi aleja muvua Yehowa muambuluishe ne mubeneshe bashadila bakafuma mu bupika mu Babulona wa kale. Bavua ne disanka dia bungi pakabalekelabu, kadi bavua mua kuikala badile miadi pavuabu bakuna maminu mu buloba bunyangakaja buvua bushale kabuyi budima bidimu bionso 70 bivuabu mu bupika. Kadi, bantu bakatungunuka ne midimu yabu ya kukuna ne kuibaka bakapola mamuma ne disanka dia ku mudimu wabu mukole.
14 Tudi mua kupuekesha binsonji patudi mu lutatu anyi patudi tuetu anyi bena Kristo netu tukenga bua buakane. (1 Petelo 3:14) Kumpala, bidi mua kututonda bualu katuena tumueneka bu tudi ne tshintu tshidi tshileja ne: mudimu wetu wa dinona udi wenda bimpe to. Kadi tuetu batungunuke ne kukuna ne kumiamina mâyi, Nzambi neakoleshe bikunyibua ebi, neapitshishe ne mutuvua belele meji. (1 Kolinto 3:6) Tuangate tshilejilu tshia bipeta bitudi bapatule mu diabanya dia Bible ne mikanda yetu mikuabu.
Bubanji bua mu Dîyi dia Nzambi
Bukole bua kutukuba nabu: “Nzambi udi tshinyemenu tshietu”
15 Tuanjayi kuakula bua mutu Yehowa utukuba mu mubidi. Mutudi bantu ba Yehowa, tudi mua kutekemena bua atukube mu tshibungi. Tshianana, Satana udi mua kutujikija bipepele, bualu tshidiye yeye “mukokeshi wa buloba ebu” mua kutamba kujinga tshidi anu tshia kubutula ntendelelu mulelela. (Yone 12:31; Buakabuluibua 12:17) Imue mbulamatadi ya bukole ikadi mikandike mudimu wetu wa kuyisha ne ikadi mijinge kutubutula bonso. Kadi bantu ba Yehowa mbashale anu bashindame kabayi balekela kuyisha. Bua tshinyi matunga a bukole mmapangile bua kuimanyika mudimu wetu, petu tumueneka bu tshisumbu tshikese tshidi katshiyi nansha ne bukole bua nsongo? Bidi nanku bualu Yehowa udi utukuba mu mapuapua ende a bukole.—Musambu 17:7, 8.