Keba malongesha a mushinga audi mua kutumikila

Patudi tubala Bible, tudi mua kuenza makebulula bua kukeba malongesha a mushinga. Mmunyi mudi kuenza nanku mua kutuambuluisha bikole?

Teya ntema ku malu onso a mu muyuki uudi ubala. Tshilejilu, manya uvua mufunde mukanda au, bavuaye uwufundila, ne dîba divuaye muwufunde. Nsombelu kayi uvuaku? Mmalu kayi avua menzeke kumpala? Mmalu kayi avua menzeke pashishe?

Jingulula malongesha paudi ukeba mandamuna a nkonko bu mudi: ‘Mmunyi muvua bantu badibu bakuile aba bumvue? Nngikadilu kayi ivuabu nayi? Bua tshinyi ndi ne bua kuidikija ngikadilu ayi anyi kuyepuka?’

Tumikila malongesha audi mupete. Enza nanku pamuapa paudi mu buambi anyi paudi ne bantu bakuabu. Wewe muatumikile, neuleje muudi ne meji a Nzambi anu mudi Bible muambe ne: “Muntu udi ne meji neatumikile malu aa.”—Mis. 107:43.

• Tshia kuenza: Mona mudi malu adi mu tshitupa tshia Biuma bia mu Dîyi dia Nzambi tshia bisangilu bia munkatshi mua lumingu tshituambuluisha bua kuimanyina pa mushindu utudi mua kutumikila malu atudi tulonga. Tshitupa atshi tshitu ne nkonko itutu tudiela, malu atudi mua kuelela meji, ne bimfuanyi bitudi mua kukonkonona.