Pakumbuka Adama ne Eva mu budimi bua Edene, bakalela bana ba bungi. Muanabu wa kumpala Kayina wakalua tshidime, ne muanabu muibidi Abele wakalua mulami wa mikoko.

Dimue dituku, Kayina ne Abele bakalambula Yehowa milambu. Buebe wewe, mulambu ntshinyi? Ndipa kampanda dia pa buadi. Yehowa wakanyisha mulambu wa Abele, kadi kavua muanyishe wa Kayina to. Kayina wakumvua tshiji tshikole. Yehowa wakadimuija Kayina ne: tshiji tshiende tshivua mua kumufikisha ku dienza bualu bubi. Kadi Kayina kakateleja to.

Nansha nanku, Kayina wakambila Abele ne: ‘Luaku tuye mu budimi.’ Pavuabu nkayabu mu budimi, Kayina wakakuata muanabu, kumushipaye. Ntshinyi tshivua Yehowa mua kuenza bua bualu abu? Yehowa wakapesha Kayina dinyoka, kumutumaye kule menemene ne bena mu dîku diabu. Kabavua mua kuanyishila Kayina bua kupinganaye to.

Ndilongesha kayi ditudi tupeta? Tudi mua kutuadija kumvua tshiji malu owu kaayi enzeka mushindu utuvua basue. Tuetu tumvua tshiji tshienda tshikola munda muetu, anyi bantu bakuabu bobu batudimuije padibu batumona ne tshiji, tudi ne bua kushintuluka ne lukasa ne kukanda tshiji tshietu kumpala kua tshiotshi kutufikisha ku bualu bubi.

Bu muvua Abele munange Yehowa ne muenze malu mimpe, Yehowa neikale anu umuvuluka. Nzambi neapeshilule Abele muoyo pavuijaye buloba mparadizu.

Mu kupita kua matuku, bantu bakavulangana pa buloba. Ba bungi ba kudibu bavua benza malu mabi. Too ne bamue banjelu mu diulu bakatuadija kuenza malu mabi. Bakashiya muaba wabu mu diulu ne kuluabu pa buloba. Udiku mumanye bua tshinyi bavua benze nanku anyi? Bua kukudimukabu kuluabu ne mibidi ya bantu ne kusela bakaji.

Banjelu abu ne bakaji bavuabu basele bakalela bana ba balume. Bana abu bakakola, kuluabu ne bukole bua bungi ne bavua bakengeshangana. Bavua benzela bantu bibi. Yehowa kavua mua kulekela malu a nunku atungunuka ne kuenzeka to. Nunku wakangata dipangadika dia kubutula bantu babi ku mvula wa bungi.

Kadi kuvua muntu uvua mushilangane nabu. Uvua munange Yehowa. Dîna diende divua Noa. Uvua ne mukaji ne bana ba balume basatu: Shema, Hama, ne Yafete, ne yonso wa kudibu uvua ne mukaji. Yehowa wakambila Noa bua kuenza buatu bunene bua yeye ne bena mu dîku diende kupanduka ku Mvula wa kabutu. Buatu mmushete munene udi mua kulelema pa mâyi. Yehowa wakambila kabidi Noa bua kubueja nyama ya bungi mu buatu bua yipanduke payi.

Diakamue Noa wakatuadija kuenza buatu. Noa ne bena mu dîku diende bakenza buatu munkatshi mua bidimu bitue ku 50. Bakabuenza anu muvua Yehowa mubambile. Pavuabu benda benza buatu, Noa uvua udimuija bantu bua Mvula wa kabutu. Kadi muntu nansha umue kakamuteleja to.

Ndekelu wa bionso, tshikondo tshia kubuelabu mu buatu tshiakakumbana. Tumone tshiakenzeka pashishe.