Lota uvua musombe ne tatuende mukuabu Abalahama mu buloba bua Kanâna. Ndekelu wa bionso, Abalahama ne Lota bakapeta nyama ya bungi, ne buloba kabuvua bukumbana bua kusombayi buonso buayi to. Abalahama wakambila Lota ne: ‘Kakuena mushindu wa tuetu kusomba kabidi kaba kamue to. Wewe musue, sungula luseke luudi musue kuya, ne meme nenye luseke lukuabu.’ Bidi bileja ne: Abalahama kavua ukeba anu masanka ende to, ki mmuomu anyi?

Lota wakamona tshitupa tshia buloba tshilenga pabuipi ne tshimenga tshivuabu babikila ne: Sodoma. Tshivua ne mâyi a bungi ne bisonsa bibishi. Nunku wakasungula muaba au, kuyaye kusombelamu ne bena mu dîku diende.

Bantu ba mu Sodoma ne ba mu tshimenga tshia Amola tshivua pabuipi apu bavua benza malu mabi bikole. Eyowa, bu muvuabu benza malu mabi menemene, Yehowa wakapangadija bua kubutula bimenga abi. Kadi Nzambi uvua musue kupandisha Lota ne bena mu dîku diende, nunku wakatuma banjelu babidi bua kubadimuija ne: ‘Enzayi lukasa! Patukayi mu tshimenga etshi! Yehowa ukadi pa kutshibutula.’

Lota kavua mupatuke diakamue to. Wakatungunuka ne kujanguluka. Nanku banjelu bakakuata Lota ne mukajende ne bana bende ba bakaji babidi ku tshianza, kupatukabu nabu mu tshimenga lukasa, babambila ne: ‘Nyemayi! Nyemayi bua kupandisha mioyo yenu, kanutangidi panyima to. Nuenu batangile panyima nenufue!’

Pakafikabu mu tshimenga tshivuabu babikila ne: Soâ, Yehowa wakalokesha kapia ne sufre mu Sodoma ne Amola. Bimenga bibidi ebi biakabutuka bionso. Pavua mukaji wa Lota mubenge kutumikila Yehowa ne mutangile panyima, wakandamuka dibue dia mukele! Kadi Lota ne bana bende ba bakaji bakapanduka bualu bavua batumikile Yehowa. Bavua ne bua kuikala babungame bikole bua muvua mukaji wa Lota mubenge kutumikila. Kadi bavua ne disanka bua muvuabu bateleje malu avua Yehowa mubambile.

Abalahama wakalongesha muanende Izaka bua kunanga Yehowa ne kueyemena milayi yonso ya Yehowa. Kadi pakakumbaja Izaka bidimu bitue ku 25, Yehowa wakalomba Abalahama bua kuenza bualu buvua mua kuikala bukole menemene bua kubuenza. Mbualu kayi abu?

Nzambi wakambila Abalahama ne: ‘Angata koku muanebe mulela umuepele umufile bu mulambu pa mukuna mu buloba bua Moliya.’ Abalahama kavua mumanye bua tshinyi Yehowa uvua mumulombe bua kuenza bualu ebu to. Kadi wakatumikila anu Yehowa.

Mu dituku diakalonda mu dinda menemene, Abalahama wakangata Izaka ne bena mudimu babidi, kuyabu batangile ku Moliya. Panyima pa matuku asatu bakatuadija kumuenena mikuna ku bule. Abalahama wakambila bena mudimu bende bua bashale bindile pavuaye yeye ne Izaka baya bua kulambula mulambu. Abalahama wakapesha Izaka nkunyi bua ambule, ne yeye wakambula kele. Izaka wakakonka tatuende ne: ‘Nyama wa tuetu kulambula wepi?’ Abalahama wakandamuna ne: ‘Muananyi, Yehowa neatupeshaye.’

Pakafikabu ku mukuna, bakasa tshioshelu. Pashishe Abalahama wakasuika Izaka bianza ne makasa, kumutekaye pa tshioshelu.

Abalahama wakambula kele. Pa dîba adi, muanjelu wa Yehowa wakamuela dîyi mu diulu ne: ‘Abalahama! Kuenzedi nsongalume bibi to! Mpindieu ndi mumanye ne: udi ne ditabuja kudi Nzambi bualu udi muitabe bua kulambula muanebe.’ Pashishe Abalahama wakamona tshimpanga tshia mukoko tshivua ne nsengu yatshi mikalame mu tumitshi. Wakasulula Izaka ne lukasa, ne kulambulaye tshimpanga tshia mukoko atshi.

Kutuadijila anu ku dituku adi, Yehowa wakabikila Abalahama ne: mulunda wende. Udi mumanye bua tshinyi uvua umubikila nanku anyi? Bualu Abalahama wakenza bualu buonso buvua Yehowa mumuambile bua kuenza, nansha pavuaye kayi mumvue bua tshinyi uvua umulomba bua kubuenza.

Yehowa wakambuluila Abalahama mulayi wende wa ne: ‘Nenkubeneshe, ne nemvudije bana bebe.’ Bualu ebu budi buleja ne: Yehowa uvua ne bua kubenesha bantu bimpe bonso ku diambuluisha dia dîku dia Abalahama.