Izaka uvua ne bidimu 40 pakaselaye Lebeka. Uvua mumunange bikole. Panyima pa matuku, bakalela bana ba balume babidi ba mapasa.

Bavua babikila wa kumpala ne: Esau, ne muibidi ne: Yakoba. Esau uvua munange kuikala mu mpata, ne uvua tshilembi tshinene tshia nyama. Kadi Yakoba uvua munange kuikala kumbelu.

Tshikondo atshi, muana wa balume wa kumpala ke uvuabu bapesha tshitupa tshinene tshia buloba ne makuta a bungi pavua tatuende ufua. Bavua babikila bintu ebi ne: bumpianyi. Mu dîku dia Izaka, kuikala ne muaba mu malu avua Yehowa mulaye Abalahama kuvua kabidi bumpianyi. Esau kavua muangate milayi ayi ne mushinga to, kadi Yakoba uvua mumanye ne: ivua ne mushinga wa bungi.

Dimue dituku Esau wakapingana kumbelu mutshioke bikole bua muvuaye muipate nyama dituku dijima. Wakumvua mupuya muimpe wa biakudia bivua Yakoba ulamba, ne kuamba ne: ‘Ndi mua kufua ne nzala! Mpesha ndambu wa nkunde mikunze ayi!’ Yakoba wakamuambila ne: ‘Ndi nkupesha, kadi anji njadikila ne: udi umpesha bumpianyi buebe.’ Esau kumuambilaye ne: ‘Tshiena mmona bumpianyi buanyi ne mushinga to! Udi mua kubuangata. Ndi musue kudia!’ Udi wela meji ne: tshivua Esau muenze etshi mbualu bua meji anyi? Tòo. Esau wakalekela tshintu tshia mushinga mukole, anu bua dilongo dia nkunde dietu edi.

Pakavua Izaka mukulakaje bikole, tshikondo tshiakakumbana tshia kubeneshaye muanende wa kumpala. Kadi Lebeka wakambuluisha Yakoba, muanende muibidi, bua kupetaye dibenesha adi. Pakamanya Esau bualu abu, wakapeta tshiji tshikole ne kulongololaye bua kushipa dipasa diende. Izaka ne Lebeka bavua basue kukuba Yakoba, ke bualu kayi bakamuambila ne: ‘Ndaku usombe ne mansebebe Labana too ne pajika tshiji tshia Esau.’ Yakoba wakateleja mubelu wa baledi bende, kunyemaye bua kupandisha muoyo wende.

Yehowa wakalaya Yakoba ne: uvua ne bua kumukuba anu muvuaye mukube Abalahama ne Izaka. Yakoba wakasombela muaba uvuabu babikila ne: Halana, kuselaye, kuluaye dîku dinene ne kupetaye bubanji bua bungi.

Ndekelu wa bionso Yehowa wakambila Yakoba ne: ‘Pingana mu buloba buenu.’ Nunku Yakoba ne dîku diende bakenza luendu lule bua kupinganamu. Pavuabu mu njila, bamue bantu bakalua kudi Yakoba, kumuambilabu ne: ‘Muanenu Esau udi wenda ulua, udi ne bantu 400!’ Yakoba uvua ne buôwa wela meji ne: Esau uvua ukeba kumuenzela yeye ne bena mu dîku diende bibi. Wakasambila Yehowa wamba ne: ‘Nsungila koku kudi muanetu.’ Dituku diakalonda Yakoba wakatumina Esau dipa dia mikoko ya bungi, mbuji, ngombe, tumelu ne mpunda.

Pavua Yakoba nkayende butuku abu, wakamona muanjelu! Muanjelu wakatuadija kuluangana nende mvita ya bibula. Bakaluangana too ne mu dinda. Nansha muvuabi bisama Yakoba, kavua mulekele to. Muanjelu wakamuambila ne: ‘Ndekela nye.’ Kadi Yakoba wakamuambila ne: ‘Tshiena nkulekela to, anu wewe mumbeneshe.’

Ndekelu wa bionso muanjelu wakabenesha Yakoba. Mpindieu Yakoba wakamanya ne: Yehowa kavua mua kulekela Esau umuenzela bibi to.

Mu dinda amu Yakoba wakatangidila ku bule ne kumonaye Esau ne bantu 400. Yakoba wakapita kumpala kua bena mu dîku diende, kuinamaye panshi kumpala kua muanabu misangu muanda mutekete. Esau wakaya lubilu kudi Yakoba, kumupukilaye. Bubidi buabu bakatuadija kudila, ne bakalengejangana. Udi wela meji ne: Yehowa uvua mumvue bishi bua mushindu uvua Yakoba mujikije tshilumbu etshi?

Pashishe Esau wakapingana kuende, Yakoba pende wakaya kuende. Bana ba balume ba Yakoba bonso bavua 12. Mêna abu ngowu aa: Lubena, Simeona, Lewi, Yuda, Dana, Nafatale, Gada, Ashê, Yisakâ, Zebulona, Jozefe, ne Benyamina. Yehowa wakenza mudimu ne Jozefe, umue wa ku bana aba, bua kusungila bantu Bende. Udi mumanye muvuaye muenze nende mudimu anyi? Tumone mpindieu.