Jozefe uvua umue wa ku bana ba Yakoba ba ndekelu. Batutuende bakamona ne: tatuabu uvua munange Jozefe bikole. Udi wela meji ne: bavua bumvue tshinyi bua bualu ebu? Bakumvuila Jozefe mukawu ne kumukinabu. Pavua Jozefe mulote bilota bia wabi mushindu, wakabilondela bana babu. Bakela meji ne: bilota abi bivua biumvuija ne: bavua ne bua kumuinamina dimue dituku. Ke bobu kumukina kabidi bikole menemene!

Dimue dituku bana babu ne Jozefe bavua balama mikoko pabuipi ne tshimenga tshia Shekeme. Yakoba wakatuma Jozefe bua kuya kubatangila bua kumanya muvuabu. Bakamuenena Jozefe ku bule wenda ulua, kuambilanganabu ne: ‘Muena ndota nyeye au ulua. Tumushipayi!’ Bakamukuata, kumuelabu mu tshina tshile. Kadi muanabu Yuda wakabambila ne: ‘Katumushipi to! Tumupanayi nansha bu mupika.’ Nunku bakapana Jozefe kudi bangenda mushinga bena Midiyana bavua baya mu Ejipitu ku bitupa 20 bia arjan.

Pashishe bana babu ne Jozefe bakatua muzabi wende mu mashi a mbuji, kuwutuminabu tatuabu, kumuambilabu ne: ‘Muzabi eu ki ngua muanebe anyi?’ Nunku Yakoba wakela meji ne: nyama wa tshisuku uvua mushipe Jozefe. Wakanyingalala bikole. Kakuvua muntu uvua mukumbane bua kumusamba to.

Pakafikabu mu Ejipitu, bakapana Jozefe bu mupika kudi muena mudimu kampanda munene diende Potifâ. Kadi Yehowa uvua ne Jozefe. Potifâ wakamona ne: Jozefe uvua wenza mudimu bimpe ne uvua muntu wa kueyemena. Mu matuku makese bakateka Jozefe ku mutu kua bintu bionso bia Potifâ.

Mukaji wa Potifâ wakamona ne: Jozefe uvua muimpe kumona ne uvua muntu wa bukole. Uvua wambila Jozefe ku dituku ne ku dituku bua alale nende. Ntshinyi tshivua Jozefe mua kuenza? Wakabenga, kumuambilaye ne: ‘Tòo! Bualu ebu mbubi. Mfumuanyi mmungeyemene, wewe udi mukajende. Meme mulale nebe, nengenzele Nzambi mpekatu!’

Dimue dituku mukaji wa Potifâ wakakeba bua kulala ne Jozefe ku bukole. Wakakuata Jozefe mu bilamba, kadi Jozefe kunyema. Pakapingana Potifâ ku nzubu, wakamuambila ne: Jozefe uvua musue kulala nende ku bukole. Mukaji eu uvua ushima. Potifâ wakafika munda bikole, kuelaye Jozefe mu buloko. Kadi Yehowa kavua mupue Jozefe muoyo to.

Pavua Jozefe mu buloko, Palô mukalenge wa Ejipitu wakalota bilota bivua muntu nansha umue kayi mukokeshe mua kumvuija. Umue wa ku bena mudimu ba Palô wakamuambila ne: Jozefe uvua mua kumuambila diumvuija dia bilota biende. Diakamue Palô wakabikidisha Jozefe.

Palô wakamuebeja ne: ‘Udi mua kumvuija bilota bianyi anyi?’ Jozefe wakambila Palô ne: ‘Ditunga dia Ejipitu nedikale ne biakudia bia bungi munkatshi mua bidimu muanda mutekete, pashishe nekulue bidimu muanda mutekete bia tshiyole tshia nzala. Sungula muntu wa meji bua kulama biakudia bua bantu bebe kabalu kufua ne nzala.’ Palô wakamuandamuna ne: ‘Ndi nkusungula wewe! Newikale muntu muibidi wa bukole bua bungi mu Ejipitu!’ Mmunyi muvua Jozefe mumanye diumvuija dia bilota bia Palô? Yehowa uvua mumuambuluishe.

Munkatshi mua bidimu muanda mutekete biakalonda, Jozefe wakalama biakudia mu mayeba. Pashishe, tshiyole tshia nzala tshiakakuata buloba bujima, anu muvua Jozefe muambe. Bantu bakalua bafumina miaba yonso bua kusumba Jozefe biakudia. Tatuende Yakoba wakumvua lumu ne: kuvua biakudia mu Ejipitu, nunku wakatumamu bana bende ba balume dikumi bua kusumba biakudia.

Bana ba Yakoba bakaya kudi Jozefe, yeye kubamanya diakamue. Kadi bana babu kabakamanya Jozefe to. Bakamuinamina, anu muvuaye mulote patshivuaye muana. Jozefe wakajinga bua kumanya bikala bana babu batshivua ne lukinu. Ke yeye kubambila ne: ‘Nudi batentekedi. Nudi basue kumanya miaba ya kubuelela mu ditunga dietu.’ Bakamuambila ne: ‘Tòo! Tudi bana ba muntu 12 ba mu Kanâna. Muanetu umue ukadi mufue, ne wa mukala mmushale ne tatuetu.’ Ke Jozefe kubambila ne: ‘Ntuadilayi muanenu wa mukala au bua nnuitabuje.’ Nunku, bakapingana kudi tatuabu.

Pavua biakudia abi bibajike, Yakoba wakatuma kabidi bana bende mu Ejipitu. Musangu eu, bakaya ne Benyamina, muanabu wa mukala. Jozefe wakasokoka dikopo diende dia arjan mu mufuku wa biakudia wa Benyamina, ne pashishe kubandaye bana babu ne: bavua badibe, bua kubateta. Pavua bena mudimu ba Jozefe bapete dikopo mu mufuku wa Benyamina, biakatonda bana babu bikole. Bakalomba Jozefe bua abanyoke bobu pamutu pa Benyamina.

Mpindieu Jozefe wakamanya ne: bana babu bavua bashintuluke. Jozefe kakakokesha bua kukolesha kabidi muoyo to. Wakasa muadi, kuambaye ne: ‘Ndi muanenu Jozefe. Tatuanyi utshidi ne muoyo anyi?’ Bana babu bakapapuka. Yeye kubambila ne: ‘Kanumvu bibi bua tshinuvua bangenzele to. Nzambi uvua muntume kuneku bua kusungila mioyo yenu. Mpindieu ndayi lukasa nulue ne tatuanyi kuneku.’

Bakalukila kuabu bua kuambila tatuabu lumu luimpe alu ne kuluabu nende mu Ejipitu. Jozefe ne tatuende bakatuilangana kabidi panyima pa bidimu bia bungi.