Mose ne Alona bakaya bua kuambila Palô mukenji wa Nzambi eu: ‘Wewe kuyi mulekele bantu banyi bua baye, nentume mabubu mu buloba ebu.’ Bisumbu bia mabubu biakabuela mu nzubu ya bena Ejipitu, babanji ne bapele. Buloba buonso buvua buwule tente ne mabubu. Kadi mu buloba bua Goshene muvua bena Isalele basombele kamuvua dibubu nansha dimue to. Kutuadijila ku tshipupu tshinayi etshi, bipupu biakakuata anu bena Ejipitu. Palô wakalomba ne: ‘Lomba Yehowa bua umbushe mabubu aa. Bantu benu badi mua kuya.’ Kadi pakumbusha Yehowa mabubu, Palô wakashintulula lungenyi luende. Palô uvuaku mupete dilongesha anyi?

Yehowa wakamba ne: ‘Palô yeye kayi mulekele bantu banyi bua baye, nyama ya bena Ejipitu neyisame ne neyifue.’ Dituku diakalonda, nyama yakatuadija kufua. Kadi nyama ya bena Isalele kayakafua to. Nansha nanku, Palô uvua anu ne mutu mukole, ne kavua mutekete to.

Pashishe Yehowa wakambila Mose bua apingane kudi Palô, ele butu muulu. Butu buakalua lupuishi luvua luwule tente mu lupepele ne luakikila pambidi pa bena Ejipitu bonso. Lupuishi alu luakakebela bena Ejipitu bonso ne nyama yabu biuwuja bivua bisama bikole. Nansha nanku, Palô wakabenga bua kulekela bena Isalele bua baye.

Yehowa wakapingaja Mose kudi Palô bua amuambile mukenji wende eu: ‘Utshidi anu ubenga bua kulekela bantu banyi bua baye anyi? Malaba mvula wa mabue nealoke mu buloba ebu.’ Dituku diakalonda, Yehowa wakatuma mvula wa mabue, makubakuba, ne kapia. Tshivua tshipupu tshibi tshitambe tshivua katshiyi tshianji kuenzeka mu Ejipitu to. Mitshi yonso ne bia pa madimi biakanyanguka, kadi bia mu Goshene kabiakanyanguka to. Palô wakamba ne: ‘Lomba Yehowa bua alekeshe bintu ebi! Pashishe nudi mua kuya.’ Kadi diakamue pakakama mvula wa mabue, Palô wakashintulula lungenyi luende.

Pashishe Mose wakamba ne: ‘Mpindieu mpasu neyidie bikunyibua bionso bivua mvula wa mabue mushiye.’ Mpasu mipite bungi yakadia bintu bionso bivua bishale mu madimi ne ku mitshi. Palô wakalomba ne: ‘Lomba Yehowa bua umbushe mpasu eyi.’ Kadi nansha pakumbusha Yehowa mpasu ayi, Palô uvua anu ne mutu mukole.

Yehowa wakambila Mose ne: ‘Olola tshianza tshiebe muulu.’ Diakamue diulu diakafiika fitutuu. Mu matuku asatu, bena Ejipitu kabavua mua kumona tshintu anyi muntu nansha umue to. Anu bena Isalele ke bavua ne butoke mu nzubu yabu.

Palô wakambila Mose ne: ‘Wewe ne bantu benu nudi mua kuya. Kadi shiyayi nyama yenu.’ Mose wakamba ne: ‘Tudi ne bua kuya ne nyama yetu bua kuyilambula Nzambi wetu.’ Palô wakafiika munda bikole. Wakamusamina ne: ‘Umbuka kumpala kuanyi! Meme mukumone kabidi muaba eu, ndi nkushipa.’

Mose wakalaya Palô ne: kavua mua kukeba bua kumonangana kabidi nende to. Kadi kumpala kua yeye kumbuka, wakambila Palô ne: ‘Mundankulu, muanabute yonso wa mu Ejipitu, kubangila ku muana wa balume wa Palô too ne ku bana ba balume ba bapika, nebafue.’

Yehowa wakambila bena Isalele bua kudia biakudia bia pa buabi. Wakabambila ne: ‘Shipayi tshimpanga tshia mukoko anyi mbuji wa mpumbu wa tshidimu tshimue, nulabe mashi ku mabaya a ku mushiku wa mbelu. Nuoshe munyinyi, nuwudie ne mampa kaayi mela luevene. Nuikale bavuale bilamba ne bavuale sandala ku makasa, badilongolole bua kuya. Nennupikule butuku ebu.’ Udiku mua kudifuanyikijila muvua bena Isalele mua kuikala basanke anyi?

Mundankulu muanjelu wa Yehowa wakaya ku nzubu yonso wa mu Ejipitu. Muanabute wa mu nzubu yonso ivua kayiyi milaba mashi ku mabaya a ku mushiku wa mbelu wakafua. Kadi muanjelu wakapita nzubu yonso uvua mulaba mashi. Dîku dionso dia bena Ejipitu, dia babanji anyi bapele, diakafuisha muana. Kadi muana wa bena Isalele nansha umue kakafua to.

Too ne muana wa balume wa Palô wakafua. Palô kavua mua kupapisha kabidi muoyo to. Wakambila Mose ne Alona diakamue ne: ‘Jukayi. Umbukayi muaba eu. Ndayi nutendelele Nzambi wenu. Angatayi nyama yenu, nuye!’

Ngondo uvua mutokeshe bikole pavua bena Isalele bapatuke mu Ejipitu, ne bavua balongolola bilondeshile mêku ne bisa. Kuvua bena Isalele bantu balume binunu 600 ne bantu bakaji ba bungi ne bana. Bantu bakuabu ba bungi bakabalonda bua kutendelelabu pabu Yehowa. Ndekelu wa bionso bena Isalele bakumbuka ku bupika!

Bua kuvuluka muvua Yehowa mubasungile, bavua ne bua kudia biakudia bia pa buabi tshidimu tshionso. Bavua babikila didia edi ne: Pasaka.