Bena Isalele bakumbuka ku mukuna wa Sinai, kuenzabu luendu bapitshila mu tshipela tshia Palana batangile ku Kadeshe. Yehowa wakambila Mose kuntu aku ne: ‘Tuma bantu balume 12, mu tshisa tshionso muntu umue, bua kutentekela Kanâna, buloba bungapesha bena Isalele.’ Nunku Mose wakasungula bantu balume 12, kubambilaye ne: ‘Ndayi mu Kanâna, numone bikala buloba bukumbane bua kudimamu biakudia. Numone bikala bantu badimu batekete anyi ba bukole, ne bikalabu basombele mu ntenta anyi mu bimenga.’ Batentekedi 12 bakaya mu Kanâna, munkatshi muabu muvua Yoshua ne Kaleba.

Pakapita matuku 40, batentekedi bakapingana, kuluabu ne tumuma tua mfigi, bimuma bia grenade, ne tumuma tua mvinyo. Batentekedi bakamba ne: ‘Buloba mbuimpe, kadi bantu badimu badi ne bukole ne bimenga bidi ne bimanu bile.’ Pashishe Kaleba wakamba ne: ‘Tudi mua kubatshimuna. Tuyayi anu mpindieu!’ Udiku mumanye bua tshinyi Kaleba uvua muambe nanku anyi? Bualu yeye ne Yoshua bavua beyemene Yehowa. Kadi batentekedi bakuabu dikumi bakamba ne: ‘Tòo! Bantu badi muntu amu mbantu ba mpolondo, banene bale! Tuetu tudi anu bu mpasu kumpala kuabu.’

Bena Isalele bakateketa mu maboko. Bakatuadija kudilakana bambilangana ne: ‘Tusungulayi mfumu mukuabu ne tupingane mu Ejipitu. Bua tshinyi tudi ne bua kuya kuntu aku bua baye kutushipa?’ Yoshua ne Kaleba bakamba ne: ‘Kanubengi kutumikila Yehowa, ne kanutshinyi to. Yehowa neatukube.’ Kadi bena Isalele kabakateleja to. Bakajinga too ne bua kushipa Yoshua ne Kaleba!

Ntshinyi tshiakenza Yehowa? Wakambila Mose ne: ‘Nansha mundi muenzele bena Isalele malu onso, kabena anu bantumikila to. Nunku nebashale mu tshipela bidimu 40, ne nebafuilamu. Anu bana babu balela, pamue ne Yoshua ne Kaleba ke basomba mu buloba bumvua mulaye bua kubapesha.’

Tshikondo kampanda pashishe, pavua bena Isalele mu tshipela, Kola, Datana, Abilama, ne bantu bakuabu 250 bakatombokela Mose. Bakamuambila ne: ‘Biebe biatutondi! Bua tshinyi wewe udi ne bua kuikala mulombodi wetu ne Alona muakuidi munene? Yehowa udi netu bonso, kena anu nebe wewe ne Alona to.’ Yehowa kakasanka to. Wakamona bualu ebu bu dimutombokela yeye!

Mose wakambila Kola ne bena diende ne: ‘Nulue ku ntenta wa tshitendelelu malaba ne bintu bienu bia kuambuila kapia biuwuja ne musenga wa manananshi. Yehowa neatuleje muntu udiye musungule.’

Dituku diakalonda, Kola ne bantu balume 250 bakaya bua kutuilangana ne Mose ku ntenta wa tshitendelelu. Kuoku aku bakosha musenga wa manananshi benze anu bu ne: bavua bakuidi. Yehowa wakambila Mose ne Alona ne: ‘Umbukayi kudi Kola ne bantu bende.’

Nansha muvua Kola muye ku ntenta wa tshitendelelu kuvua Mose, Datana ne Abilama ne mêku abu bakabenga bua kuyaku. Yehowa wakambila bena Isalele bua kumbuka ku ntenta wa Kola ne wa Datana ne wa Abilama. Bena Isalele bakumbukaku musangu umue. Datana ne Abilama ne mêku abu bakimana pambelu pa ntenta yabu. Diakamue buloba buakapandika, kubaminabu! Kapia kakapueka ku ntenta wa tshitendelelu aku, koshaku Kola ne bantu bende balume 250.

Pashishe Yehowa wakambila Mose ne: ‘Angata dikombo kudi mulombodi wa tshisa ne tshisa tshionso ne ufundapu dîna diende. Kadi pa dikombo dia tshisa tshia Lewi ufunde dîna dia Alona. Uateke mu ntenta wa tshitendelelu, ne dikombo dia muntu ungasungula nediele bilongo.’

Dituku diakalonda, Mose wakapatula makombo onso, kualejaye balombodi ba bisa abi. Dikombo dia Alona divua diele bilongo, ne divua ne tumuma tua amande tubobe. Eu ke mushindu uvua Yehowa muleje ne: uvua musungule Alona bua ikale muakuidi munene.