Bantu bonso pa buloba badi mua kulua babanji anyi?
Ku ditunga ne ku dikuabu, bantu badi benza ngendu ya minyengu mu mpala bualu mbamone ne: kudi kansungansunga mu malu a makuta. Malu mmalue kukola kabidi bikole bua tshipupu tshia disama dia Korona. Nunku bantu ba bungi ki mbasanke bua mudibu kabayi mua kupatuka ku mbanza yabu, mbapangile bintu bikuabu bia mushinga, ne kabena ne mpunga wa kuondopibua mudibi bikengela to. Kadi kabiena nanku bua bena kantu ku bianza to. Malu aa mmaleje dishilangana dinene mu mushindu udibu benzela bapele ne bena kantu ku bianza malu.
Lutatu lua dipangila makuta nelujike dimue dituku anyi? Eyowa. Bible udi uleja tshikala Nzambi mua kuenza bua kujikija ntatu itudi nayi lelu eu.
Ntatu yikala Nzambi mua kujikija
Lutatu: Bantu ki mmbenze ndongoluelu wa malu a makuta udi mua kukumbajila bantu bonso majinga abu to.
Muajikalu: Nzambi neumbushe makalenge a bana ba bantu bua kuteka Bukalenge buende, butudi tubikila ne: Bukalenge bua Nzambi. Nebukokeshe buloba bujima kumbukila mu diulu.—Danyele 2:44; Matayi 6:10.
Muikala malu: Bu mualua Bukalenge bua Nzambi kukosha buloba bujima, nebulombole malu onso bimpe bitambe. Bantu kabakuikala bapele to, ne kabakusamisha mutu bua kumanya ni nebikale ne kantu kadibu mua kudiambuluisha naku. (Misambu 9:7-9, 18) Kadi nebasanke ne bipeta bia mudimu wabu, ne nebikale mu nsombelu muimpe bobu ne bena mu mêku abu. Bible mmulaye ne: “Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu. Kabakuibaka bua muntu mukuabu asombelamu, ne kabakukuna bintu bua bantu bakuabu babidie.”—Yeshaya 65:21, 22.
Lutatu: Bantu kabena mua kupangisha malu adi mua kubakebela ntatu anyi adi mua kuenza bua bapangile bintu bidibu nabi dijinga abafikile to.
Muajikalu: Nzambi neumbushe malu onso adi enza bua bantu bikale ne buôwa anyi bua badimone kabayi mu bukubi ku diambuluisha dia Bukalenge buende.
Muikale malu: Mu bukokeshi bua Nzambi, bantu kabakutuilangana ne malu enza bua bobu ne bena mu mêku abu bajimije bintu biabu to. Tshilejilu, mvita, biyole bia nzala, ne bipupu bia masama kabiakuenzeka kabidi nansha. (Misambu 46:9; 72:16; Yeshaya 33:24) Nzambi udi wamba ne: “Bantu banyi nebasombele muaba udi ditalala dia kashidi, mu miaba ya kusombela ya bukubi ne mu miaba ya kuikishila ya bupole.”—Yeshaya 32:18.
Lutatu: Misangu ya bungi, badinangi ne bena lukuka batu badila pambidi pa bantu bakuabu.
Muajikalu: Bena dia Bukalenge bua Nzambi nebalonge bua kunanga bakuabu bikole kupita mudibu badinange bobu.—Matayi 22:37-39.
Muikale malu: Mu Bukalenge bua Nzambi, bantu nebanange bakuabu anu mudi Nzambi mubanange, mmumue ne: nebikale ne dinanga didi ‘kadiyi didikebela anu masanka adi.’ (1 Kolinto 13:4, 5) Bible udi wamba ne: “Kabiakuenzelangana bibi anyi kukebesha tshinyangu mu mukuna wanyi wonso wa tshijila to, bualu buloba nebuwule tente bushuwa ne dimanya dia Yehowaa bu mudi mâyi abuikila mbuu.”—Yeshaya 11:9.
Bible udi uleja ne: tudi mu matuku a ku nshinkidilu wa ndongoluelu wa malu eu, ne mu katupa kîpi emu Nzambi neakumbaje mulayi wende wa kujikija lutatu lua makuta.b (Misambu 12:5) Pautshidi muindile dikumbana diawu edi, mêyi manene a mu Bible adi mua kukuambuluisha bua umone mua kupita bimpe ne lutatu lua dipangila dia makuta luudi nalu lelu eu. Tshilejilu, tangila tshiena-bualu tshia: “Muudi mua kutula makuta makese audi nawu” ne tshia “Mmuenenu muimpe wa makuta.”
a Yehowa ke dîna dia Nzambi bilondeshile Bible.—Misambu 83:18.
b Bua kumanya bua tshinyi udi mua kuitaba tshidi Bible wamba, tangila tshiena-bualu tshia “Bible mmukanda wa kueyemena udi ne bulelela.”