Mvuadilu wetu ne tshimuenekelu tshietu bidi ne mushinga

Tuetu bonso tutu ne mushindu ututu basue kuvuala ne kumueneka ku bantu. Tuetu balonde amue mêyi manene a mu Bible, tudi mua kusungula mvuadilu utudi basue, kadi usankisha kabidi Yehowa. Tukonkononayi amue mêyi manene au.

1. Mmêyi manene kayi atudi ne bua kulonda patudi tusungula bilamba?

Tudi ne bua kusungula “mvuadilu udi mukumbane, ne bupuekele ne meji majalame,” ne kuikala ne tshimuenekelu tshimpe tshidi tshileja mutudi “balamate Nzambi.” (1 Timote 2:9, 10) Tukonkononayi mêyi manene anayi aa: 1) Mvuadilu wetu udi ne bua kuikala “mukumbane.” Anu muukadi mumone mu bisangilu bietu, bantu ba Yehowa kabatu bavuala mushindu umue to, kadi mvuadilu wetu ne mushindu utudi tulongolola nsuki yetu bidi bileja mutudi tunemeka Nzambi utudi tutendelela. 2) Kuvuala “ne bupuekele” kudi kumvuija ne: tshimuenekelu tshietu katshiena ne bua kujulangana majinga a kuenda masandi, anyi kukoka ntema ya bakuabu kutudi to. 3) Tudi tuleja “meji majalame” patudi katuyi tulonda mvuadilu yonso idi ipatuka to. 4) Tshimuenekelu tshietu tshidi ne bua kuleja misangu yonso mutudi “balamate Nzambi,” bua bakuabu bamone ne: tudi tutendelela Nzambi mulelela.​—1 Kolinto 10:31.

2. Ntshinyi tshidi mvuadilu wetu mua kuenzela bena Kristo netu?

Nansha mutudi ne budikadidi bua kusungula bia kuvuala, mbimpe tuele meji a tshikala mvuadilu wetu mua kuenzela bakuabu. Tudi tudienzeja bua kubenga kulenduishangana, ne tudi ‘tusankisha muinetu bua diakalenga diende, bua kumukolesha.’​—Balayi Lomo 15:1, 2.

3. Mmunyi mudi tshimuenekelu tshietu mua kukoka bakuabu mu ntendelelu mulelela?

Nansha mutudi tudienzeja bua mvuadilu wetu ikale muimpe dîba dionso, tudi tutamba kumutabalela patudi tubuela mu bisangilu anyi tuyisha. Mvuadilu wetu kena ne bua kupangisha bantu bua kutuma ntema ku mukenji utudi tubamanyisha to. Kadi tshimuenekelu tshietu tshidi mua kukoka bakuabu mu bulelela ne “kulengeja dilongesha dia Nzambi Mupandishi wetu.”​—Tito 2:10.

BUELA MU BUONDOKE

4. Tshimuenekelu tshietu tshimpe tshidi tshileja mutudi tunemeka Yehowa

Mbualu kayi bunene budi butusaka bua kutabalela tshimuenekelu tshietu? Balayi Misambu 47:2, pashishe nuandamune nkonko eyi:

• Tudi baleji mpala ba Yehowa. Mmunyi mudibi bitangila mvuadilu wetu?

• Buebe wewe, mbia meji bua tuetu kutabalela tshimuenekelu tshietu patudi tubuela mu bisangilu ne tuyisha anyi? Bua tshinyi?

5. Mua kusungula mvuadilu muimpe ne kuikala ne tshimuenekelu tshimpe

Tangilayi FILME.

FILME: “Nuenze malu onso bua butumbi bua Nzambi” (10:18)

Nansha tuetu ne bilamba bia mushinga mukole anyi mukese, bidi ne bua kuikala ne mankenda ne bikumbanyine malu atudi tuenza. Balayi 1 Kolinto 10:24 ne 1 Timote 2:9, 10. Pashishe, nuyukile bua tshinyi katuena ne bua kuvuala bilamba . . .

• bikodiakane anyi bilekelela.

• bidi bikuata pambidi, bidi bizola bitupa bia mubidi, anyi bijulangana majinga a kuenda masandi.

Nansha mudi bena Kristo kabayi ku mikenji ya Mose, idi ileja mudi Yehowa umona malu. Balayi Dutelonome 22:5, pashishe nuandamune lukonko elu:

• Bua tshinyi tudi ne bua kuepuka mvuadilu udi uvuija bantu balume bu bantu bakaji anyi bantu bakaji bu bantu balume?

Balayi 1 Kolinto 10:32, 33 ne 1 Yone 2:15, 16, pashishe nuandamune nkonko eyi:

• Bua tshinyi tudi ne bua kutabalela mvuadilu wetu bua kalenduishi bantu ba muaba utudi basombele anyi bena mu tshisumbu tshietu?

• Bantu ba bungi ba muaba uudi musombele batu basue kuvuala mushindu kayi?

• Buebe wewe, imue mishindu itubu bavuala ayi mmikumbanyine muena Kristo anyi? Bua tshinyi?

TSHIA KUKUATA

Patudi tusungula bua kuikala ne tshimuenekelu tshimpe, tudi tunemeka Yehowa ne bantu bakuabu.

Diambulula

• Bua tshinyi mvuadilu wetu ne tshimuenekelu tshietu bidi ne mushinga ku mêsu kua Yehowa?

• Ngamue mêyi manene kayi atudi ne bua kulonda patudi tusungula mushindu wa kumueneka ku bantu?

• Ntshinyi tshidi tshimuenekelu tshietu mua kuenzela mushindu udi bantu bamona ntendelelu mulelela?

BIA KUTANGILA KABIDI

Mona tshidi mvuadilu webe wambila bakuabu.

“Ntu mmueneka mushindu kayi?” (Tshiena-bualu tshia mu jw.org)

Mona bua tshinyi mbimpe kuela meji kumpala kua kuditapa nsalu pambidi.

“Ntshinyi tshidi Bible wamba bua nsalu?” (Tshiena-bualu tshia mu jw.org)

Mona mêyi manene makuabu atudi mua kulonda patudi tujinga kuangata mapangadika.

“Mvuadilu webe utuku utumbisha Nzambi anyi?” (Tshibumba tshia Nsentedi, 9/2016)

Mmunyi muvua mamu mukuabu mufike ku dikala ne nkatshinkatshi ku mushindu udi bakuabu basungula bua kumueneka ku bantu?

“Mvuadilu ne tshimuenekelu tshia bantu ke bivua bindenduisha” (Tabulukayi!, 22/12/2003)