NKONKO IDI BANSONGA BADIELA

Bungi bua baudi nabu mu site ya dipetelangana ku Enternete budi ne mushinga anyi?

Nsonga kampanda diende Elaine udi wamba ne: “Pamvua mmona balunda banyi ba mu kalasa ne balunda nkama ya bungi mu site ya dipetelangana ku Enternete, mvua ndiambila ne: ‘Mbabamanye tshia bushuwa!’ Mu kuamba kuimpe, mvua mbumvuila kamukawu.”

Ukadiku mumvue pebe nanku anyi? Biobi nanku, tshiena-bualu etshi tshidi mua kukuambuluisha bua kubenga kudina ne kasuki mu dikeba kumanyika bikole mu site ya dipetelangana ku Enternete.

Nnjiwu kayi idiku?

Bible udi wamba mu Nsumuinu 22:1 ne: “Mbimpe kusungula dîna dimpe pamutu pa bubanji bua bungi.” Nunku kujinga kuikala ne lumu luimpe nansha kukeba bua bakuabu bakunange ki nkubi to.

Misangu mikuabu dijinga dia bakuabu bakunange didi mua kukola bikole dikupangisha bua kuikala ne disanka wewe kuyi mumanyike bikole. Kudi mua kuikala njiwu anyi? Ke tshidi Onya udi ne bidimu 16 wamba:

“Mu kalasa ndi mumone balongi benza malu a dipote bu mudi kutumpika ku tshisasa tshia kumpala anu bua batumone batuambe.”

Bua bansonga bakuabu kukoka ntema ya bansonga nabu, badi badikuata filme ya malu a dipote ne bayela mu site ya dipetelangana ku Enternete. Tshilejilu, bansonga ba bungi bavua bambule filme yabu bobu bine ya benda badia nsabanga ya kusukula nayi bilamba ne banua manga a musenga adi ne bintu bia mulungu, bualu budi muntu nansha umue kayi ne bua kuenza to.

Bible udi wamba ne: ‘Kanuenji muanda bua kuditumbisha kua patupu.’—Filipoyi 2:3, Mukanda wa Nzambi.

Nkonko ya kuelela meji:

Buebe wewe bungi bua baudi nabu mu site ya dipetelangana ku Enternete budi ne mushinga anyi?
Udi mua kuteka makanda ebe mu njiwu anyi muoyo webe bua kukoka ntema ya bansonga nebe anyi bua kubasankisha anyi?

Tshidi bansonga nebe bamba

“Padi bantu badisuika bua kuenza tshionso tshidi tshikengela bua bamanyike bikole, badi bela meji ne: bobu bakula, bavuala, anyi benza malu mushindu kampanda (nansha ku Enternete) nebamanyike bikole. Neunyingalale wewe muenze bualu buudi mumanye ne: mbubi anu bua wikale mumanyike to.”—Leianna.

“Lungenyi lua dishima lua ne: mbamanyike”

Kudienzeja bua kumanyika bikole kakutu anu kukebela bantu bonso njiwu to. Mona tshidi Erica udi ne bidimu 22 wamba bua bualu bukuabu budi bamue bansonga benza:

“Bantu batu bela foto ya bungi ya bidibu benza mu nsombelu wabu ku Enternete, bienze anu bu ne: badi ne balunda ba pa muoyo bungi kabuyi kubala badibu bapita nabu kapepe. Kuenza nanku nkufikishe ba bungi ku diela meji ne: mbamanyike.”

Mona tshidi Cara udi ne bidimu 15 wamba bua bantu badi bashimangana nanku:

“Ndi mumone bantu badikuata foto bamueneka anu bu ne: bavua mu difesto, pabu bikale kumbelu.”

Matthew udi ne bidimu 22 udi witaba ne: wakenza pende nanku:

“Ngakela foto wa muenze anu bu ne: mvua mudikuatayi ku mukuna wa Everest, nansha muntu tshiyi muanji kuya ku Azi.”

Bible udi wamba ne: ‘Tudi basue kuenda mu bululame mu malu onso.’—Ebelu 13:18.

Nkonko ya kuelela meji:

Wewe ubuela miaba ya dipetelangana ku Enternete, utuku wela bintu bia dishima bua umanyike anyi?
Foto ne biudi ufunda wela miaba ya dipetelangana ku Enternete bidiku bileja tshiudi ne malu adi witabuja anyi?

Tshidi bansonga nebe bamba

“Bamue batu benza tshionso tshidibu mua kuenza bua bantu ba bungi banyishe bidibu bela ku Enternete. Kadi udi musue kumanyikila bua malu kayi? Bua kuakula ne kuvuala bibi anyi? Bua kuditemba bua bintu biudi nabi anyi? Peshi bua ngikadilu yebe mimpe ne bua muudi utabalela bakuabu ne muoyo umue anyi? Kudiumvua munangibue nkuimpe, kadi enza bua bikale bua malu audi mua kudisua nawu.”—Hannah.

Bungi bua badi bakulonda ku Enternete ne banyisha biudi welaku budi ne mushinga anyi?

Ba bungi badi bamba ne: bua wewe kumanyika bikole miaba ya dipetelangana ku Enternete, mbimpe wikale ne bantu bavule badi bakulonda ne aba badi banyisha biudi welaku. Matthew, utukadi batele, udi witaba ne: uvua pende umvua nanku:

“Mvua anu ngebeja bakuabu ne: ‘Badi ne bantu bungi kayi badi babalonda?’ anyi ‘Bakadi ne bantu bungi kayi badi banyisha bidibu bela ku Enternete?’ Bua kuvudija badi bandonda, mvua ndonda bantu bamvua tshiyi mumanye to, mutekemene ne: bobu pabu nebandonde. Ngakapeta dijinga dikole dia kumanyika, ne miaba ya dipetelangana ku Enternete yakasonsola dijinga adi.”

Bimfuanyi bilamakaja: 1. Nsongakaji utangila bungi bua bantu badi banyishe bidiye muele muaba wa dipetelangana ku Enternete ne ufukisha mimuemue. 2. Nsongakaji umue umue au udia biakudia bia nsukadi bidi mu kabakudi tente. 3. Nsongakaji mudikuate bianza mu difu umueneka mumvue bibi. — Kuikala ne bantu bavule badi bakulonda mu site ya dipetelangana ku Enternete kudi anu bu biakudia bia nsukadi—mbimpe bua tshikondo tshîpi kadi kuakukuta to

Maria udi ne bidimu 25 udi wamba ne: bamue batu baditumbisha bua bungi bua bantu badi babalonda ku Enternete ne bua badi banyisha bidibu belaku:

“Nsongakaji yeye muele foto udiye mudikuate, bantu ba bungi bobu kabayi bafunde ne: mbanange foto au, udi wamba ne: nanku yeye mmubi kuîsu. Bushuwa kuamba nanku nkubi, kadi mu nsombelu au, ba bungi nebambe pabu nanku. Mu ngumvuilu kampanda, badi baditatshisha bobu nkayabu.”

Bible udi wamba ne: “Katukebi bua kudileja bu ne: tudi bapite bakuabu, tukebesha ditembangana munkatshi muetu, tualakanangana.”—Galatiya 5:26.

Nkonko ya kuelela meji:

Wewe ubuela miaba ya dipetelangana ku Enternete, utuku umona ne: itu ikusaka bua kudifuanyikija ne bakuabu anyi?
Utuku uditatshisha bikole bua bungi bua badi bakulonda pamutu pa kukeba balunda ba nsongo badi bakutabalela anyi?

Tshidi bansonga nebe bamba

“Bua kumanyika bikole ku Enternete mbimpe ulue muntu udi bantu banyisha, mmumue ne: pa tshibidilu mbimpe ulue bu bantu abu. Bidi mua kukufikisha ku ditamba kuela meji bikole a mudi bakuabu bakumona ne muudi mua kubasankisha. Dijinga dia kunangibua kudi bakuabu ki ndibi to, kadi kukeba anu bua umanyike kudi mua kukufikisha ku ditamba kuelela dijinga adi meji bikole.”—Joshua.

Dimukila “budipuekeshi bua dishima”

Ukadi mumone mudi bamue baditumbisha bua bikadibu benze kadi benze anu bu ne: badi badiabakena anyi?

“Katshia ngapeta mashinyi mapiamapia, bantu batu anu bandomba bua mbambule tuye kuendakana nabu!”
“Bitu bingenza tshiji patubu bangela kalumbandi bua mundi munyane!”

Muntu udi wakula udiabakena bua kumueneka ne: mmuena budipuekeshi pende muikale ne diambu dia dikema.

Mubelu: Kuditambisha, anyi kudibandisha nanku, kutu pa tshibidilu kunyingalaja bakuabu, bualu bantu mbamanye tshiudi ukeba kuamba atshi. Bu mudi budipuekeshi bua dishima buleja ne: muntu udi wamba malu a mafi, misangu ya bungi bantu mbabukine bikole kupita muntu udi uleja diambu diende patoke.

Musangu udi ulonda paudi ufunda bintu mu site ya dipetelangana ku Enternete anyi welaku foto, dimukila budipuekeshi bua dishima. Tumikila mubelu wa mu Bible wa meji eu: “Munga muntu akutumbishe, kadi mukana muebe kamukutumbishi to.”—Nsumuinu 27:2.