Bansonga ba bungi badi bakolela mu mêku a Bantemu ba Yehowa batu babatijibua tshidimu tshionso etshi. Utu pebe wela meji a kuangata batismo anyi? Bikalabi nanku, tshia wewe kuanji kuenza ntshia kumanya tshidi mene didilambula ne batismo biumvuija.

• Batismo ntshinyi?

• Didilambula ntshinyi?

• Bua tshinyi kubatijibua kudi ne mushinga?

• Tshidi bansonga nebe bamba

• Mudi bamue babuejakaja ne bulelela bua bualu

Batismo ntshinyi?

Batismo udibu bamba mu Bible nkuina kua muntu yonso mujima mu mâyi, kadi ki nkumumiamina kua mâyi patupu to, bualu kuinyibua mu mâyi nanku kudi ne diumvuija dinene.

• Kuinyibua muinshi mua mâyi dîba dia batismo kudi kuleja patoke ne: kutshiena ne muoyo bua kuenza anu malu adi akusankisha wewe to.

• Kupatuka mu mâyi kudi kuleja muudi mubange nsombelu mupiamupia udi mutangija yeye nangananga ku dienza malu adi asankisha Nzambi.

Paudi ubatijibua, udi uleja patoke muudi witaba ne: Yehowa ngudi ne bukokeshi bua kutuelela mikenji ya tshidi tshimpe ne tshidi tshibi, ne udi umanyisha bonso mutshipu uudi muenze wa kulonda tshidiye ukulomba ne muoyo wonso wa budisuile.

Tshia kuelela meji: Bua tshinyi mbimpe wewe kuitaba ku mêsu kua bonso bua kushala utumikila Yehowa mu nsombelu webe mujima? Tangila 1 Yone 4:19 ne Buakabuluibua 4:11.

Didilambula ntshinyi?

Kumpala kua wewe kubatijibua, mbimpe wewe kuanji kudilambula pa nkayebe kudi Yehowa. Neudilambule mushindu kayi?

Mmu disambila dia pa nkayebe dia wambila Yehowa ne: udi umulaya bua kumuenzela mudimu kashidi, kabidi ne: newenze tshidiye yeye musue nansha nsombelu kayi mua kumueneka, nansha bakuabu mua kusungula tshikuabu tshia kuenza.

Mmumue ne: batismo nkuleja patoke ne: ukavua mudilambule pa nkayebe mushindu au. Batismo udi uleja bakuabu ne: kutshiena kabidi mfumu wa malu ebe to, mpindieu ukadi muntu wa Yehowa.​—Matayi 16:24.

Tshia kuelela meji: Bua tshinyi nsombelu webe neatambe kulengela paudi ulua muntu wa Yehowa? Tangila Yeshaya 48:17, 18 ne Ebelu 11:6.

Bua tshinyi kubatijibua kudi ne mushinga?

Batismo mbualu budi Yezu mulombe bonso badi balua bayidi bende. (Matayi 28:19, 20) Ke bualu kayi batismo utshidi bualu budi bulombibue kudi bena Kristo. Mu kuamba kuimpe, Bible udi wamba ne: bidi bikengela kuangata batismo bua kupandishibua.​—1 Petelo 3:21.

Kadi tshidi ne bua kukusaka bua kubatijibua mbimpe tshikale dinanga ne dianyisha biudi nabi kudi Yehowa. Ngelelu webe wa meji ikale bu wa mufundi wa Misambu wakafunda ne: “Nempingajile Yehowa tshinyi bua malu mimpe onso adiye mungenzele? . . . Nembile dîna dia Yehowa. Nenkumbaje mitshipu yanyi kudi Yehowa.”​—Misambu 116:12-14.

Tshia kuelela meji: Mbualu kayi buimpe bukadi Yehowa mukuenzelaku? Ntshinyi tshiudi pebe mua kumufuta? Tangila Dutelonome 10:12, 13 ne Lomo 12:1.

Biwikala ne nsombelu udi umvuangana ne mêyi a mu Bible ne wenda udia bulunda ne Nzambi, mbikumbane menemene bua wewe kubanga kuela meji a mua kubatijibua. Kadi mmunyi muwamanya ne: ukadi mukumbane bua kuangata batismo?a

Malu awapeta mu tshiena-bualu etshi:

• Bikengela ngikale mumanye malu bungi kayi?

• Mbimpe ngikale ngenza tshinyi?

• Tshidi bansonga nebe bamba

Bikengela ngikale mumanye malu bungi kayi?

Kudilongolola bua batismo kakuena kumvuija kukuata malu ku muoyo bu mutubu benza kudi badi baluangana bua kukuata mateta a mu kalasa to. Kadi nebikulombe bua kudienzeja ne ‘tshieledi tshiebe tshia meji’ tshionso bua kupeta dishindika dijalame dia ne: Bible udi ulongesha bulelela. (Lomo 12:1) Tshilejilu:

• Udi mutuishibue ne: Nzambi udiku bushuwa ne mmuakanyine wewe kumutendelela anyi?

  Bible udi wamba ne: “Yonso udi usemena kudi Nzambi udi ne bua kuitaba ne: yeye udi ne udi ulua mufutshi wa badi bamukeba ne muoyo mujima.”​—Ebelu 11:6.

  Dikonka ne: ‘Bua tshinyi ndi ngitaba ne: Nzambi udiku?’ (Ebelu 3:4) ‘Bua tshinyi ndi nende dibanza dia kumutendelela?’​—Buakabuluibua 4:11.

  Tukuambuluishe anyi? Tangila “Mbifukibue anyi mbiditantshile?​—Tshitupa tshia 1: Ntshinyi tshindi ngitabila ne: Nzambi udiku?”

• Udi mutuishibue ne: malu adi mu Bible nga kudi Nzambi anyi?

  Bible udi wamba ne: “Dîyi dionso didi mu Mifundu ndifundisha kudi Nzambi ku bukole bua nyuma wende ne didi diambuluisha bua kulongesha, bua kubela, bua kululamija malu, bua kunyoka mu buakane.”​—2 Timote 3:16.

  Dikonka ne: ‘Ntshinyi tshidi tshingitabujija ne: Bible ki mmukanda wa ngenyi ya bantu to?’​—Yeshaya 46:10; 1 Tesalonike 2:13.

  Tukuambuluishe anyi? Tangila “Mmushindu kayi udi Bible mua kungambuluisha​—Tshitupa tshia 1: Tambakana mu Bible webe.”

• Udi mutuishibue ne: Yehowa mmupeshe tshisumbu tshia bena Kristo mudimu wa kukumbaja disua diende anyi anyi?

  Bible udi wamba ne: “butumbi buikale kudiye ku butuangaji bua tshisumbu ne ku butuangaji bua Kristo Yezu bua bipungu bionso kashidi ne tshiendelele.”​—Efeso 3:21.

  Dikonka ne: ‘Malu atutu tulonga mu bisangilu, ntu ngamona bu adi afumina kudi Yehowa anyi bu adi afumina kudi bantu?’ (Matayi 24:45) ‘Ntu mbuela mu bisangilu nansha padi baledi banyi kabayi babuelamu anyi (padibu bakuitabile)?’​—Ebelu 10:24, 25.

  Tukuambuluishe anyi? Tangila “Bua tshinyi mbimpe kubuela mu bisangilu ku Nzubu wa Bukalenge?”

Mbimpe ngikale ngenza tshinyi?

Bua kubatijibua, kuena mulombibue bua kuikala mupuangane kuyi kalema to. Kadi udi ne bua kuikala uleja mu nsombelu webe ne: udi bushuwa ujinga ‘kumbuka ku malu mabi, bua kuenza malu mimpe.’ (Misambu 34:14) Tshilejilu:

• Udi ne nsombelu udi umvuangana ne mikenji ya Yehowa anyi?

  Bible udi wamba ne: “Nuikale anu ne kondo ka muoyo kimpe.”​—1 Petelo 3:16.

  Dikonka ne: ‘Nku tshinyi kundi ndeja ne: “bieledi [bianyi] bia meji bia kujingulula nabi malu” mbibidija bua “kutapulula tshidi tshimpe ne tshidi tshibi”?’ (Ebelu 5:14) ‘Ndiku mvuluka misangu misunguluke inkadi mukandamene bansonga nanyi bavua bansaka ku malu mabi anyi? Balunda banyi batu bankankamija bua kuenza malu adi makane anyi?’​—Nsumuinu 13:20.

  Tukuambuluishe anyi? Tangila “Mmunyi mundi mua kulongesha kondo kanyi ka muoyo?”

• Udi mumvuaku ne: udi dibanza ne Yehowa mu malu onso audi wenza anyi?

  Bible udi wamba ne: “Yonso wa kutudi neabadile Nzambi malu ende nkayende.”​—Lomo 14:12.

  Dikonka ne: ‘Ntu meme muine muena bululame munda muanyi nansha mu malu anyi ne bakuabu anyi?’ (Ebelu 13:18) ‘Ntu ngitaba bilema bianyi anyi? Peshi ntu anu njinga kubisokoka anyi kubiela bakuabu pambidi?’​—Nsumuinu 28:13.

  Tukuambuluishe anyi? Tangila “Ntshinyi tshindi mua kuenza pandi ngenza tshilema?”

• Utu utabalela bulunda buebe ne Yehowa anyi?

  Bible udi wamba ne: “Semenayi pabuipi ne Nzambi ne yeye neasemene pabuipi nenu.”​—Yakobo 4:8.

  Dikonka ne: ‘Ntshinyi tshindi ngenzaku tshidi tshinsemeja pabuipi ne Yehowa?’ Tshilejilu: ‘Ntu mbala Bible misangu bungi munyi?’ (Misambu 1:1, 2) ‘Ntu nsambila pa tshibidilu anyi?’ (1 Tesalonike 5:17) ‘Mu masambila anyi ntuku ngamba malu masunguluke anyi? Balunda banyi batu balunda ba Yehowa anyi?’​—Misambu 15:1, 4.

  Tukuambuluishe anyi? Tangila “Mmushindu kayi udi Bible mua kungambuluisha​—Tshitupa 2: Vuija dibala dia Bible bualu bua disanka” ne “Bua tshinyi mbimpe kusambila?”

MUBELU: Bua kukuambuluisha wewe kudilongolola bua batismo, bala nshapita wa 37 wa mukanda wa Les jeunes s’interrogent. Réponses pratiques (volume 2). Tabalela nangananga kazubu ka bia kuandamuna kadi mu dibeji dia 308 ne dia 309.