BISUMBU bia Bantemu ba Yehowa pa kuamba bionso bitu ne muyuki wa patoke muashila pa Mifundu mu programe wabi lumingu luonso. Biwikala udi mukulu anyi musadidi wa mudimu, bantu batu bamona ne: udi ngamba-malu wa tshishiki peshi mulongeshi muimpe anyi? Biwikala ngamba-malu muakane, nebakupe muyuki wa patoke. Kalasa ka Mudimu wa Nzambi kakadi kambuluishe bantu binunu ne binunu bua kumanya mua kuenza miyuki eyi. Kadi biakupeshabu muyuki eu, neutuadijile penyi?

Longa plan

Bala plan udibu bakupeshe ne ela meji bua kumumvua kumpala kua kubanga kukebulula malu. Kuata bimpe tshiena-bualu anyi mutu wa bualu wa muyuki. Tshiwalongesha bantu ntshinyi? Tshiudi ukeba ntshinyi?

Ukuate malu manene bimpe. Ualonge. Mona mudi bualu bunene buonso bumvuangana ne tshiena-bualu. Muinshi mua bualu bunene bonso mudi ngenyi idi ibukuatshisha. Keba mudi malu onso adi mu bualu bunene bumue umvuangana ne a mu budi ku mutu kuabu, mudiwu akubueja mu budi bubulonda, ne mudiwu afikisha ku tshidibu bipatshila mu muyuki. Wewe mumane kumvua tshiena-bualu, tshipatshila tshia muyuki, ne mudi malu manene umvuangana natshi, udi mua kubanga mpindieu kuenza makebulula.

Bangabanga, mbimpe kukosolola muyuki mu bitupa binayi anyi bitanu, bilondeshile bungi bua malu manene. Longolola bualu bunene bumue ku bumue.

Plan udibu bakupeshe udi ukuambuluisha bua kulongolola malu. Kêna ne malu onso to, mmuenze bu mifuba nkayayi. Nanku bidi bikengela kuela misunyi, muoyo anyi mutshima ne mupuya wa muoyo.

Dikuata mudimu ne Mifundu

Yezu ne bayidi bende bavua bashila dilongesha diabu pa Mifundu. (Luka 4:16-21; 24:27; Bien. 17:2, 3) Ubidikije. Mifundu ke idi ne bua kuikala nshindamenu wa muyuki webe. Pamutu pa kumvuija ne kuleja mua kutumikila malu adi mu plan tshianana, keba mudi malu aa mashindamene pa mvese, ne longesha muimanyine pa mvese eyi.

Konkonona mvese yonso udi mu plan. Tangila mvese idi pabuipi nende mu Bible. Imue mvese idi mua kuikala ifila anu ngenyi mimpe tshianana. Kabiena bikengela kubala yonso anyi kuakuila pa yonso to. Sungula idi mua kuambuluisha bantu. Wewe mushindamene pa mvese idi mu plan, imue misangu kabiakukengela kabidi kusakidila yebe mvese to.

Kuenza mudimu ne mvese mivule ki nkudi kuakaja muyuki to, kadi mmushindu uudi ulongesha. Paudi ufila mvese, uleje kafidila kende. Ikala ne dîba dia kuleja mua kukuata nende mudimu. Kubuikidi Bible kunyima kua dibala mvese to. Nanku bantu nebakuidikije, balekela pabu yabu Bible mikangula. Udi mua kuenza tshinyi bua kujula bantu nzala ne kubambuluisha bimpe ne Dîyi dia Nzambi? (Neh. 8:8, 12) Udi mua kufila diumvuija, mufuanu, ne kuleja mushindu wa kutumikila mvese eu.

Diumvuija. Paudi usua kumvuija mvese kampanda, udiebeje ne: ‘Udi usua kuamba tshinyi? Ndi nkuata nende mudimu bua tshinyi? Bantu bandi ndongesha badi mua kuikala badiebeja tshinyi bua mvese eu?’ Udi mua kutangila mvese idi pabuipi nende mu Bible, malu adi mu mukanda muine, malu adi muaba au, miaku kampanda, ne tshivua mufundi wa mukanda ukeba. Bionso ebi bidi bilomba makebulula. Mikanda ya “mupika wa lulamatu ne wa budimu” neyikuambuluishe bikole. (Mat. 24:45-47, NW) Kukebi bua kuangata mvese ne kumvuija malu onso adi amutangila to. Umvuija tshiudi mubadile mvese au ne malu audi ulongesha.

Mifuanu. Mudimu wa mifuanu ng’wa kuambuluisha bantu bua bumvue bilenga menemene anyi bua kabapu bualu kampanda muoyo peshi bua kubuvulukabu. Mifuanu idi ifikisha bantu ku diumvua biudi wamba ne kubifuanyikija ne bintu bitubu bamanye. Ke tshiakenza Yezu pakelaye Muyuki wende muende lumu wa pa Mukuna. Kuakulaye bua “nyunyu ya mu diulu,” “bilongo bia mu mpata,” “mushiku wa mbelu mubumbakane,” ‘nzubu pa mutu pa dibue’ ne bikuabu bintu. Biakenza ne: dilongesha diende dikale ditambe bulenga, ditoke tòò, ne kadiyi kupua muoyo.​—Mat., Nshap. 5–7.

Ditumikila. Bantu badi bapeta dimanya patudi tumvuija mvese ne tufila mifuanu, kadi padibu batumikila dimanya edi, bidi bibambuluisha bikole. Nansha mudi muntu ne muntu ne bujitu bua kutumikila malu a mu Bible audi wamba, udi mua kubambuluisha bua kumona tshidibu mua kuenza. Wewe mumane kujadika ne: bantu mbumvue mvese ne mbamone mudiye umvuangana ne biudi wamba, pitshisha dîba ndambu bua kubaleja mudi mvese utangila ditabuja ne ngikadilu wabu. Shindamena pa bipeta bilenga bidibu mua kupeta buobu mua kulekela ngenyi anyi bibidilu bidi bibengangana ne lungenyi lua mvese uudi mubale.

Paudi wela meji pa mushindu wa kubaleja bua kutumikila mvese, kupu muoyo ne: bantu mbashilangane ne badi ne malu mashilangane. Kudi mua kuikala bapiabapia, bansonga, bakulumpe, ne banga badi ne ntatu ya bungi. Muyuki webe wikale wamba malu adi bantu bamona. Mibelu idi yenza anu bu idi itangila anu bantu bakese tshianana ba ku badi bakuteleja ki mmimpe to.

Mapangadika a ngamba-malu

Bakadi bakutekele amue malu. Tshilejilu, malu manene mmamana kukufundila, dîba dia kupitshisha pa bualu bunene buonso ndikukosela. Wewe ke udi mpindieu ne bua kuangata mapangadika adi mashale. Udi mua kupangadija bua kupitshisha dîba dia bungi anyi dikese pa imue ngenyi. Kukebi bua kuenza ngenyi yonso mushindu umue to. Bualu neuye lubilu lubilu ne nebitonde bantu bualu udi ne malu mapite bungi audi ubambila. Ntshinyi tshidi mua kukuleja ne: bidi bikengela kuimanyina apa, anyi kuakula anu kakese anyi mu lupitapita apa? Udiebeje ne: ‘Nngenyi kayi idi mua kungambuluisha bua kupatula lungenyi lunene lua muyuki? Nyepi idi mua kuambuluisha bantu bikole? Meme tshiyi mutele mvese kampanda ne ngenyi idi imutangila, malu nealondangane bimpe anyi?’

Udimuke bua kulu kusakidila ngenyi yebe nkayebe. Ke tshivua Yezu Kristo muana wa Nzambi ulonda pende. Wakamba ne: ‘Miaku indi nnuambila kayena ifuma kundi.’ (Yone 14:10, MMV) Wavuluka ne: bantu batu balua mu bisangilu bua kulonga Bible. Biwikale mulue ngamba-malu wa tshitembu ne bikala bantu banyisha miyuki yebe, mbualu utu utangija lungenyi luabu ku Dîyi dia Nzambi, pamutu pa kuudi wewe.​—Filip. 1:10, 11.

Wewe mumane kukumbaja mumvuija mu plan, dibanza didi dishala mpindieu ndia kuambulula. Bitu bimpe kuambulula ne dîyi dikole. Kadi tshidi ne bualu nkumanya ne: udi ne malu onso mu mutu. Wenze muyuki webe ne mutshima mujima, wenze bua usankishe bantu, ne uwenze ne musangelu. Kumpala kua kuela muyuki, wanji kudiebeja ne: ‘Ndi ngipatshila tshinyi? Malu manene adi amueneka patoke anyi? Mvese ke nshindamenu wa muyuki wanyi anyi? Bualu bunene buonso budi bufikisha ku budi bubulonda kakuyi lutatu anyi? Muyuki undi ngela udi usaka bantu bua kusankidilabu Yehowa ne malu adiye mulongolole anyi? Nkomenu udi umvuangana ne tshiena-bualu, uleja bantu tshia kuenza, ne ubasaka ku ditshienza anyi?’ Diandamuna diebe diodi dikale ne: ‘eyowa,’ mmumue ne: udi mua ‘kupatula lungenyi’ anyi dimanya bua kuambuluisha tshisumbu ne kutumbisha Yehowa.​—Nsu. 15:2.

MULONGESHI wetu, utu wipatshila tshinyi? Biwikala muambi wa lumu luimpe mupiamupia, bumue udi ukeba kumanya mua kulonga Bible ne bantu, bualu ke tshidi Yezu ulomba muyidi wende yonso. (Mat. 28:19, 20) Biwikala muambi wa lumu luimpe wa kale, pamu’apa udi ulumbila bua kuikala wamba malu adi alenga mitshima ya bantu baudi uyisha. Biwikala muledi, udi mua kuikala udila bua kulua mulongeshi udi mua kufikisha bana bebe ku didilambula kudi Nzambi. (3 Yone 4) Biwikala udi mukulu anyi ukeba kulua mukulu, bumue udi ujinga bua kulua ngamba-malu udi ufikisha bantu ku dianyisha Yehowa ne njila yende bikole. Kadi udi mua kuenza tshinyi?

Londa tshilejilu tshia Mulongeshi Munene, Yezu Kristo. (Luka 6:40) Yezu nansha pavuaye ulongesha bantu bavule pa mukuna peshi bantu bakese mu njila, malu avuaye ubambila avua ashala mu mitu yabu mutantshi mule. Yezu uvua ulenga mitshima ne lungenyi lua bantu, wakula malu avuabu mua kumvua. Udi pebe mua kuenza bia muomumue anyi?

Eyemena Yehowa

Yezu uvua ulongesha bimpe bualu uvua ne malanda mashême ne Tatuende ne kabidi bualu uvua ne nyuma wa Nzambi. Utu usambila ne mutshima mujima bua Yehowa kukuambuluishaye bua kulongesha bantu Bible bimpe anyi? Utu ulomba buludiki bua Yehowa bua kulongesha bana bebe anyi? Utu usambila ne muoyo umue pautu ulongolola muyuki wa patoke peshi udilongolola bua kulombola bisangilu anyi? Wewe usambila nunku, neulue mulongeshi wa dilambu.

Kushindamena pa Bible kudi kuleja kabidi muudi weyemena Yehowa. Yezu (muntu mupuangane) wakasambila Tatuende butuku kumpala kua kumushipabu ne: ‘Ngakubapa dîyi diebe.’ (Yone 17:14) Nansha muvua Yezu mumanye malu a bungi, kavua ulongesha malu a mu lungenyi luende to. Uvua ulongesha anu malu avua Tatuende mumulongeshe. Ke tshilejilu tshia tuetu kulonda etshi! (Yone 12:49, 50) Dîyi dia Nzambi (bu mudidi mu Bible) didi ne bukole bua kushintulula muntu: kushintulula bienzedi, ne meji a munda. (Eb. 4:12) Paudi uvudija dimanya dia Dîyi dia Nzambi ne ulonga mua kuenza nadi mudimu bimpe mu buambi, dilongesha diebe nedikoke bantu kudi Nzambi.​—2 Tim. 3:16, 17.

Tumbisha Yehowa

Kulonda tshilejilu tshia Yezu kakuena kumvuija kuenza miyuki milenga tshianana to. Mbulelela se: Yezu wakakemesha bantu bua “miaku [yende] milenga.” (Luka 4:22, MMM) Kadi uvua wipatshila tshinyi pavuaye wakula nanku? Bivua bua kutumbisha Yehowa, ki mbua kuditumbisha to! (Yone 7:16-18) Wakambila bayidi bende ne: ‘Munya wenu uteme ku mêsu kua bantu, bamone midimu yenu mimpe, batumbishe kabidi Tatu wenu udi mu diulu.’ (Mat. 5:16) Katupu bualu ebu muoyo patudi tulongesha to. Tuikalayi tuepuka tshintu tshionso tshidi mua kutupangisha bua kutumbishisha Nzambi. Nanku patudi tukeba bualu bua kuamba anyi mushindu wa kubuamba, tuikale tudiebeja ne: ‘Bualu ebu nebufikishe bantu ku disankidila Yehowa anyi, peshi nebantumbishe meme?’

Tshilejilu, mifuanu ne amue malu adi menzeke bidi mua kulengeja muyuki. Kadi padibi bipita bule, tulondela bantu malu ne mu kazadi, aku nkulekela kashiba bua kuela tshiala. Kulonda kabidi malu anu bua kusekesha bantu nkubi paku. Kuenza nunku nkutangija mêsu a bantu kutudi, nkupanga kukumbaja tshipatshila tshia dilongesha dia Nzambi.

‘Nusunguluje’

Bua muntu kuluaye muyidi mulelela, udi ne tshia kumvua biakane malu adibu bamulongesha. Udi ne tshia kuteleja bulelela ne kumona mudibu bushilangane ne malongesha a dishima. Nanku bidi bikengela kuleja dishilangana didi pankatshi pa malu.

Yehowa wakamba e kuambulula ulomba bena Isalele bua ‘basunguluje’ bintu bidi bibi ne bintu bidi bimpe. (Lew. 10:9-11, MMV) Wakamba ne: bantu bavua ne bua kuenza mudimu mu ntempelo wende munene wa mu nyuma bavua ne bua kulongesha bantu “mua kusunguluja tshintu tshia tshijila ne tshidi katshiyi tshia tshijila.” (Yeh. 44:23, MMM) Mukanda wa Nsumuinu udi wakula bikole bua dishilangana didi pankatshi pa buakane ne bubi, pankatshi pa meji ne butshimbakane. Nansha bintu bidi kabiyi bibengangana bidi mua kuikala bishilangane. Tshilejilu, mupostolo Paulo udi uleja mu Lomo 5:7 dishilangana didi pankatshi pa muntu muakane ne muntu muimpe. Mu mukanda wa Ebelu, udi uleja mudi mudimu wa Kristo wa buakuidi mupite wa Alona. Anu bu muakafunda mulongeshi Comenius (wa mu bidimu bia 1600): “Kulongesha kudi anu kumvuija kuleja mudi bintu bishilangane: ku mudimu wabi, ku bunene buabi, ne kudibi bifumine. . . . Nenku, muntu udi uleja dishilangana pankatshi pa bintu mmumanye kulongesha.”

Tshilejilu tuamba ne: udi ulongesha muntu kampanda pa Bukalenge bua Nzambi. Bikalaye kayi mumanye tshidi Bukalenge ebu, mbimpe kumuleja mudi Bible ubenga lungenyi ludi bantu nalu lua ne: Bukalenge ntshintu tshidi mu mutshima. Anyi udi mua kumuleja mudi Bukalenge ebu bushilangane ne mbulamatadi ya bantu. Kadi bua bantu badi bamanye malu aa, mbimpe kubuela ne mu tunungu tukese. Udi mua kubaleja tshilejilu, mudi Bukalenge bua Masiya bushilangane ne bumfumu bua Yehowa pa bintu bionso (Mus. 103:19), ‘bukalenge bua Muana wa dinanga dia Nzambi’ (Kolos. 1:13), ne “bulombodi.” (Ef. 1:10, NW) Patudi tuleja dishilangana kampanda, bantu badi bumvua bimpe dilongesha dinene dia mu Bible edi.

Yezu uvua pende ulongesha nanku. Wakaleja dishilangana divua pankatshi pa mushindu uvua bantu bumvua Mikenji ya Mose ne tshipatshila tshilelela tshia Mikenji eyi. (Mat. 5:21-48) Wakaleja dishilangana divua pankatshi pa dilamata Nzambi dilelela ne bienzedi bia lubombo bia Bafalese. (Mat. 6:1-18) Wakakula bua kuleja dishilangana didi pankatshi pa bantu badi ‘batumina bakuabu dîyi’ ne aba badi ne lungenyi lua didifila luvua bayidi bende ne bua kuleja. (Mat. 20:25-28) Umue musangu mene (bilondeshile Matayo 21:28-32) Yezu wakalomba bantu bua kuleja buobu nkayabu dishilangana didi pankatshi pa buakane bua tshidingidiji ne dikudimuna mutshima dilelela. Tshiakenzaye etshi tshidi tshitufikisha ku bualu bukuabu bua kuenza patudi tulongesha.

Ambuluisha bantu bua kuelabu meji

Yezu wakatuadija mufuanu udi mu Matayo 21:28 ne lukonko elu: “Nudi nuamba penu bishi?” (MMV) Mulongeshi muakane kêna wamba malu anyi ufila mandamuna patupu to. Udi wambuluisha bantu bua kuikala kuela meji. (Nsu. 3:21; Lomo 12:1) Nkonko ng’umue mushindu wa kuambuluisha bantu bua kuela meji. Mu Matayo 17:2, Yezu udi ukonka Petelo ne: ‘Simone, udi wela meji munyi? Panuapa, badi ne bua kufuta bakalenga ba matunga bitadi ne milambu mbanganyi? Bena diku diabu anyi, peshi mbantu bakuabu?’ (MMV) Nkonko milenga ya Yezu eyi yakambuluisha Petelo bua kudipetela nkayende diandamuna dimpe pa tshilumbu tshia tshitadi tshia ntempelo. Yezu wakenza bia muomumue bua kuandamuna muntu wakamuebeja ne: “Muntu nanyi nganyi?” Wakamuleja muvua ngikadilu wa muakuidi ne muena Lewi mushilangane ne wa muena Samariya. E kulua kumukonka ne: ‘Buebe wewe, ku basatu aba, nnganyi udi muleje muntu uvua mumate mu bianza bia bivi ne: mmuntu nende?’ (Luka 10:29-36, MMM) Pamutu pa kuandamuna pa muaba wa muntu eu, Yezu wakamulomba bua kudiandamuina lukonko luende.​—Luka 7:41-43.

Lenga mutshima

Balongeshi batu bamanye Dîyi dia Nzambi biakane batu bamanye bimpe se: bua kutendelela Yehowa mu bulelela, kabiena bikengela anu kukuata malu kampanda ku muoyo ne kulonda mikenji kansanga to. Kadi ntendelelu mulelela udi ne tshia kuikala muashila pa malanda mimpe ne Yehowa ne pa dinanga dia njila yende. Kutendelela kua nunku kudi kufumina mu mutshima. (Dut. 10:12, 13; Luka 10:25-27) Muaku “mutshima” mu Bible udi umvuija muntu wa munda mu bujima buende, katuyi tupua muoyo nkuka, majinga, mushindu ututu tudiumvua, ne bidi bitusaka bua kuenza malu.

Yezu uvua mumanye bimpe ne: bantu batu bamona mpala, kadi Nzambi yeye utu umona mutshima. (1 Sam. 16:7) Tshidi ne bua kutusaka bua kuenzela Nzambi mudimu ndinanga ditudi nadi kudiye, ki mbua batumone batuambe to. (Mat. 6:5-8) Bafalese bavua buobu benza malu mavule bua babamone babambe. Bavua batamba kunemenena pa tunungu tukese tua Mikenji ya Mose ne mikenji ivuabu bela buobu nkayabu. Kadi kabavua ne ngikadilu ya batendeledi ba Yehowa to. (Mat. 9:13; Luka 11:42) Yezu wakalongesha ne: nansha mudibi bimpe bua kutumikila Nzambi, kadi malu adi mu mutshima ke adi apesha ditumikila edi mushinga. (Mat. 15:7-9; Mâko 7:20-23; Yone 3:36) Tuetu balonde tshilejilu tshia Yezu, dilongesha dietu nediambuluishe bantu bikole. Kuambuluisha bantu bua kumanya malu adi Nzambi ubalomba kudi ne mushinga wa bungi. Kadi mbimpe kabidi bamanye Yehowa ne bamunange, bamumone bu muntu mulelela, apu ngikadilu wabu nealeje mudibu ne malanda mashême ne Nzambi mulelela eu.

Kadi tumanye ne: bua dilongesha edi kubambuluisha nunku, badi ne bua kuikala bakandamena malu adi mu mitshima yabu. Yezu wakalomba bantu bua kukonkonona tshivua tshibasaka ne tshivua munda muabu. Pavuaye wakaja mmuenenu kampanda mubi, uvua webeja bantu tshivua mu lungenyi luabu, tshivuabu bambila anyi benzela bualu kansanga. Kadi pamutu pa kubalekela nanku tshianana, Yezu uvua wamba mêyi, mufuanu, anyi wenza bualu kampanda buvua bubaleja tshidi tshilelela. (Mâko 2:8; 4:40; 8:17; Luka 6:41, 46) Tudi petu mua kulomba batudi tulongesha bua kudiela nkonko bu mudi eyi: ‘Bualu ebu budi bunsankisha bua tshinyi? Ndi ngenza malu nunku bua bualu kayi?’ Mpindieu tubafikishe ku dimona malu mudi Yehowa uamona.

Leja mushindu wa kutumikila malu

Mulongeshi muimpe mmumanye ne: ‘Meji adi kumpala kua malu onso makuabu.’ (Nsu. 4:7) Meji nngikadilu udi wambuluisha muntu bua kukuata mudimu bilenga ne dimanya, bua: kujikija malu, kuepuka njiwu, kukumbaja malu kampanda, ne kuambuluisha bakuabu. Mulongeshi ke udi ne bujitu bua kufikisha mulongi ku dienza malu aa, ki mbua kumuangatshila mapangadika to. Ambuluisha mulongi bua kuela meji panudi nuakula bua mikenji ya mu Bible. Udi mua kumutelela bualu bua ku malu atu enzeka ne kumukonka mushindu udi mukenji unudi bakuile mua kumuambuluisha pikale bualu ebu bumutulukile.​—Eb. 5:14.

Tshilejilu, dituku dia Pentekoste wa tshidimu tshia 33 bikondo bietu ebi, mupostolo Petelo wakaleja mua kutumikila malu e kulengabi bantu ku muoyo. (Bien. 2:14-36) Petelo wakanji kutela mvese isatu ivua bantu bamanye, panyima kuluaye kuleja muvuayi ikumbana bilondeshile malu avua bantu bonso aba badimuenene. Kuakapatuka bipeta bimpe: bantu bakumvua dijinga dia kutumikila malu avuaye ubambila. Ke mutubi bikuenzekela pebe anyi? Utu ubuela mu buondoke, wambuluisha bantu bua kumona tshidi malu ne bua kuikadila mushindu kampanda anyi? Utu ubakankamija bua kumona mudi malu adibu balonga atangila nsombelu wabu anyi? Nansha mudibu kabayi mua kuebeja bu muakebeja bantu ba mu Pentekoste ne: “Netuenze tshinyi?,” wewe mubaleje mua kutumikila Dîyi dia Nzambi bilenga, nebibasake ku diangata dipangadika diakane.​—Bien. 2:37.

Padi baledi babala Bible ne bana babu, mbimpe babaleje mua kutumikila malu adibu balonga. (Ef. 6:4) Tshilejilu, udi mua kusungula mvese mikese tshianana mu nshapita ya kubala ku lumingu, kuyumvuija ne pashishe kubela nkonko bu mudi eyi: ‘Mmunyi mudi mvese eyi mua kutuludika? Tudi mua kukuata mudimu ne mvese eyi mu buambi mushindu kayi? Idi yamba tshinyi pa bidi bitangila Yehowa ne ngenzelu wende wa malu? Nebikoleshe dianyisha ditudi nadi kudiye munyi?’ Ubambile bafile mandamuna aa mu malu manene a mu Bible mu Kalasa ka Mudimu wa Nzambi. Bumue nebandamuine anu pa mvese idibu bavuluke.

Fila tshilejilu tshilenga

Udi ulongesha ku biudi wamba ne ku biudi wenza. Bienzedi biebe bidi bileja bantu mua kutumikila malu audi ubambila. Ke mutu bana balonga nanku. Batu bidikija baledi babu bualu mbasue kubafuana. Batu basue kumvua mutubi padi muntu wenza mutu baledi babu benza malu. Bia muomumue, padi bantu baudi ulongesha balua ‘bidikiji bebe, bu muudi wewe muidikiji wa Kristo,’ badi babanga kumvua bulenga bua kuendela mu njila ya Yehowa. (1 Kol. 11:1) Badi babanga kumona mudi Nzambi muikale nabu.

Nanku kufila tshilejilu tshimpe, ki mbualu bua bilele to. Kuikala tshilejilu tshilenga mu ditumikila Bible kudi kuleja bimpe batudi tulongesha mua kutumikila pabu Dîyi dia Nzambi. Kadi bidi bikengela kuikala ‘bantu ba tshijila, badi benza bidi [Nzambi] musue.’ (2 Pet. 3:11, MMV) Kumpala kua kuambila muntu udi ulonga nebe Bible bua kubala Bible dituku dionso, wikale pebe umubala dituku dionso. Biwikale musue ne: bana bebe balonde tshidi Bible wamba, wanji kutangilabi ni utu wenza malu atu Nzambi musue. Paudi wambila bantu bua kuyisha ne lukunukunu, ikala pebe nalu. Bua kusaka bakuabu ku dienza malu audi ulongesha, ikala pebe uenza.​—Lomo 2:21-23.

Wewe musue kuakaja mushindu wa kulongesha, udiebeje ne: ‘Mushindu undi ndongesha udi mua kufikisha bantu ku dishintulula ngelelu wabu wa meji, ngakuilu wabu, ne bikadilu biabu anyi? Ntu ndeja dishilangana didi pankatshi pa ngenyi ibidi peshi bikadilu bibidi, bua kutokeshila bantu malu anyi? Ntu ngenza tshinyi bua kuambuluisha balongi banyi ba Bible, bana banyi, peshi bantu badi mu bisangilu bua kuvuluka malu andi ngamba? Ntuku ndeja bantu patoke mushindu wa kutumikila malu adibu balonga anyi? Meme nkayanyi ntu ntumikila malu au anyi? Batuku bumvua bimpe menemene ne: padibu batumikila malu audi ubambila, bulunda buabu ne Yehowa budi bushemakana anyi?’ (Nsu. 9:10) Paudi musue kulua mulongeshi wa nsongo, kupu malu aa muoyo to. “Udilame biakane. Ulongolole bimpe dilongesha diebe. Unanukilemu. Wewe muenze nanku, neudisungidile, neusungidile kabidi bantu badi bakuteleja.”​—1 Tim. 4:16, MMV.