Mu Bukalenge bua Nzambi “ditalala nedivulangane”

Mu katupa kîpi emu, Bukalenge bua Nzambi, mmumue ne: mbulamatadi mujadika kudi Nzambi utuvua bindile munkatshi mua bidimu bia bungi nebufile ditalala ne diumvuangana pa buloba bujima. Anu mudibu balaye mu Misambu 72:7, “ditalala nedivulangane.” Kadi ntshikondo kayi tshiatuadija Bukalenge bua Nzambi kukokesha buloba bujima? Nebukokeshe mushindu kayi? Mmunyi muikala Bukalenge mua kukuambuluisha?

BUKALENGE BUA NZAMBI NEBULUE DÎBA KAYI?

Bible ukavua mumanyishe malu manene a bungi avua ne bua kuleja ne: Bukalenge bua Nzambi bukadi pa kulua. Malu aa ke adi enza “tshimanyinu” tshidi tshikonga malu bu mudi: mvita pa buloba bujima, biyole bia nzala, masama, dikanka dia buloba miaba ya bungi, ne divulangana dia dishipa dia mikenji.—Matayi 24:3, 7, 12; Luka 21:11; Buakabuluibua 6:2-8.

Mulayi mukuabu udi wamba ne: “Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale badinangi, banangi ba makuta, . . . kabayi batumikila baledi babu, kabayi ne dianyisha, kabayi ne lulamatu, kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, . . . badiuwuja ne lutambishi, banangi ba masanka pamutu pa kuikala banangi ba Nzambi.” (2 Timote 3:1-4) Kuvua amu bamue bantu bavua ne ngikadilu itudi batele eyi. Kadi lelu eu ikadi imueneka kudi bantu ba bungi.

Milayi eyi yakatuadija kukumbana mu tshidimu tshia 1914. Bushuwa, bena malu a kale, bamfumu ba mbulamatadi, ne bafundi mbaleje pabu muvua malu mashintuluke pa buloba panyima pa tshidimu atshi. Tshilejilu, Peter Munch muena malu a kale wa mu Danemark wakafunda ne: “Mvita ivua mibudike mu tshidimu tshia 1914 ke yakashintulula malu bikole menemene mu nsombelu wa bantu. Kumpala kua tshidimu atshi, bantu bavua bela meji ne: malu a pa buloba avua enda alengela, . . . kadi pashishe tuakabuela mu tshikondo tshia bipupu, malu avua akuatshisha buôwa, lukinu, ne dipangika dia bukubi miaba yonso.”

Kadi bionso abi bivua bileja ne: panyima pa malu au ditalala nedilue. Malu au adi aleja ne: Bukalenge buakokesha buloba bujima bukadi pabuipi. Yezu muine wakakula bua bualu buimpe ebu pakalejaye tshimanyinu tshia nshikidilu wamba ne: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”—Matayi 24:14.

Lumu luimpe elu ke tshiena-bualu tshinene tshia mukenji udi Bantemu ba Yehowa bayisha. Bulelela, Tshibumba tshia Nsentedi tshidi tshimanyisha Bukalenge bua Yehowa ke tshidi mene tshibejibeji tshiabu tshinene. Tshidi tshiakula pa tshibidilu bua malu mimpe ikala Bukalenge bua Nzambi mua kuenzela bantu ne buloba.

BUKALENGE BUA NZAMBI NEBUKOKESHE MUSHINDU KAYI?

Diandamuna didi mu malu anayi a mushinga aa:

1. Bukalenge bua Nzambi kabuakuenza mudimu ne bamfumu ba tshididi ba mu bulongolodi ebu to.

2. Bamfumu ba tshididi ba mu bulongolodi ebu kabakujinga bua kulekela bukokeshi buabu to, ne nebaluishe ne dipanga dia meji dionso Bukalenge bua Nzambi.—Misambu 2:2-9.

3. Bukalenge bua Nzambi nebubutule makalenge a tshididi adi ajinga kutungunuka ne kukokesha bantu. (Danyele 2:44; Buakabuluibua 19:17-21) Mvita ya ndekelu ya pa buloba bujima eyi badi bayibikila ne: mvita ya Armagedone.—Buakabuluibua 16:14, 16.

4. Bantu bonso badi bakokela Bukalenge bua Nzambi ne muoyo mujima nebakubibue ku mvita ya Armagedone ne nebabuele mu bulongolodi bupiabupia bua ditalala. Nebenze tshidi Bible ubikila ne: “Musumba munene wa bantu,” bikala pamuapa miliyo mivule.—Buakabuluibua 7:9, 10, 13, 14.

MMUNYI MUIKALA BUKALENGE MUA KUKUAMBULUISHA?

Bualu bua kumpala bua kuenza bua kuikala muena dia Bukalenge bua Nzambi ndilongeshibua. Bualu pavua Yezu usambila Nzambi wakamba ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela, ne yeye uuvua mutume, Yezu Kristo.”—Yone 17:3.

Padi bantu bafika ku dimanya Yehowa Nzambi ne bamuangata bu muntu mulelela, bidi bibambuluisha mu mishindu ya bungi. Tukonkonone bilejilu bibidi ebi: Tshia kumpala, badi bapeta ditabuja dikole kudiye. Ditabuja adi, diashila pa bijadiki, didi dibajadikila ne: Bukalenge bua Nzambi mbualu bulelela ne bukokeshi buabu bukadi pabuipi. (Ebelu 11:1) Tshibidi, badi bafika ku dinanga Nzambi ne bantu nabu bikole. Dinanga didibu banange Nzambi didi dibasaka bua kumutumikila ne muoyo umue. Dinanga didibu banange bantu nabu didi dibasaka bua kutumikila mêyi a Yezu atubu batamba kubikila ne: Dîyi dia mushinga mukole. Adi amba ne: “Anu bu munutu basue bua bantu banuenzele malu, nubenzele pabu mushindu wa muomumue.”—Luka 6:31.

Anu bu tatu wa dinanga, Mufuki wetu mmusue bua tuikale ne nsombelu muimpe menemene. Mmusue bua tupete tshidi Bible ubikila ne: “Muoyo wa bushuwa.” (1 Timote 6:19) Muoyo utudi nawu lelu eu ki ‘nngua bushuwa to.’ Bualu bantu miliyo ya bungi badi ne nsombelu mukole menemene ne badi baluangana bikole bua kukumbaja majinga abu. Bua kukuleja kadiosha ka “muoyo wa bushuwa,” tukonkonone amue malu mimpe ikala Bukalenge bua Nzambi mua kuenzela bantu bakokeshabu.