Dinanga

BANTU BADI DIJINGA NE DINANGA BIKOLE. Kakuena dibaka, anyi dîku, anyi bulunda bidi mua kutanta koku kakuyi dinanga. Nunku mbikumbane bua kuamba ne: dinanga didi ne mushinga wa bungi bua kuikala ne ditalala dia mu lungenyi ne disanka. Kadi “dinanga” dine didi diumvuija tshinyi?

Dinanga ditudi tuakuila ki ndinanga dia mulume ne mukaji didi padi, mu bulelela, ne mushinga to. Kadi ndinanga ditambidile didi disaka muntu bua kutabalela bakuabu ne muoyo umue bua diakalenga diabu, uteka too ne malu abu kumpala kua ende. Ndinanga didibu balombola kudi mêyi manene a mu Bible kadi dikale kabidi ne musangelu ne disanka.

Mona mudi Bible umvuija dinanga bimpe bia dikema: “Dinanga didi ne lutulu ne bulenga. Dinanga kadiena ne mukawu. Kadiena ne diambu, kadiena didiuwuja, kadiena dienza malu a bundu, kadiena didikebela anu masanka adi, kadiena dikuata tshiji. Kadiena dibalulula malu mabi. Kadiena disanka bua malu adi kaayi makane, kadi didi disanka ne bulelela. Didi dikolesha muoyo mu malu onso, . . . ditekemena malu onso, dinanukila mu malu onso. Dinanga kadiena dishikila nansha.”​—1 Kolinto 13:4-8.

Dinanga dia nunku “kadiena dishikila nansha” bualu diodi nedikale anuku. Kadi ditu dikola mu bungi bua matuku. Bu mudidi kabidi ne lutulu, ne bulenga, ne difuilangana luse, “didi tshisuikidi tshipuangane tshia buobumue.” (Kolosayi 3:14) Nunku, malanda adi masuikakaja ne dinanga dia nunku atu anenga ne apetesha bantu disanka nansha mudi muntu ne muntu ne biende bilema. Tuangate tshilejilu tshia dîku.

MU BOBUMUE KU DIAMBULUISHA DIA “TSHISUIKIDI TSHIPUANGANE TSHIA BUOBUMUE”

Yezu Kristo wakalongesha mêyi manene a mushinga bua dibaka. Tshilejilu, wakamba ne: “‘Mulume neashiye tatuende ne mamuende, nealamate mukajende, ne bubidi buabu nebalue mubidi umue’ . . . Bua bualu ebu, muntu kapanduludi tshidi Nzambi musuike kaba kamue to.” (Matayi 19:5, 6) Kudi mêyi menene matue ku abidi mu mvese eu.

“BUBIDI BUABU NEBALUE MUBIDI UMUE.” Malanda a mu dibaka ke malanda matambe bukole adi bantu mua kudia, ne dinanga didi mua kuakuba ku dipanga lulamatu, mmumue ne: muntu ulua “mubidi umue” ne muntu udi kayi muena dibaka nende. (1 Kolinto 6:16; Ebelu 13:4) Dipanga lulamatu ditu dinyanga dieyemenangana ne didi mua kushipa dibaka. Kuoku kuikale bana, bidi mua kutamba kubatatshisha badiumvua kabayi banangibue, kabayi mu bukubi, anyi mene balamina baledi munda.

“TSHIDI NZAMBI MUSUIKE KABA KAMUE.” Dibaka kabidi ndia tshijila. Bena dibaka badi banemeka bualu ebu badi badienzeja bua kukolesha dibaka diabu. Kabena bakeba pa kubuelela bua kushipa dibaka padibu bapeta ntatu to. Dinanga diabu ndikole ne didi dibidilangana ne nsombelu udibu bapeta. Dinanga dia nunku “didi dikolesha muoyo mu malu onso,” dibambuluisha bua kumanya mua kupita ne ntatu bua bashale mu diumvuangana ne mu ditalala.

Padi muena dibaka yonso uteka majinga a muena diende kumpala kua ende bua kuleja mudiye mumunange, bidi biambuluisha bana bikole. Nsongakaji mukuabu diende Jessica wakamba ne: “Papa ne maman mbanangangane bikole ne badi banemekangana. Pandi mmona maman unemeka papa ne mapangadika ende, nangananga kumpala kuetu tuetu bana, bidi binsaka bua kumufuana.”

Dinanga nngikadilu mutambe bunene wa Nzambi. Bible udi wamba ne: “Nzambi udi dinanga.” (1 Yone 4:8) Nunku kabiena bikemesha bua mudibu babikila Yehowa ne: “Nzambi wa disanka” to. (1 Timote 1:11) Netuikale petu ne disanka tuetu tuditatshisha bua kuidikija ngikadilu ya Mufuki wetu, nangananga dinanga diende. Efeso 5:1, 2 udi wamba ne: “Nulue bidikiji ba Nzambi bu bana bende bananga, ne nutungunuke ne kuenda mu dinanga.”