Kuikala bimpe mu lungenyi
Bible udi utubela bua kuepuka mishindu ya didiumvua idi mua kutuenzela bibi. Kadi udi utukankamija bua tuikale ne eyi idi mua kutuenzela bimpe.
TSHIJI
DÎYI DINENE DIA MU BIBLE: “Muntu udi kayi ukuata tshiji lubilu mmupite tshilobo.”—Nsumuinu 16:32.
TSHIDIDI DIUMVUIJA: Patudi tukumbana bua kukanda tshiji, bidi bituambuluisha. Nansha mutudi mua kumvua tshiji misangu mikuabu, kubenga kutshikanda kudi mua kutufikisha kubi. Bakebuludi ba lelu badi bamba ne: patu bantu ne tshiji, misangu ya bungi batu bamba anyi benza malu atubu balua kunyingalala pashishe.
TSHIUDI MUA KUENZA: Longa mua kukanda tshiji kumpala kua tshiotshi kukuenzeja malu. Bamue bantu batu bela meji ne: bena makanda ngaba batu kabayi bakanda tshiji, kadi kabiena nanku to, mbantu batekete. Bible udi wamba ne: “Bu tshimenga tshidibu bupule, katshiyi ne tshimanu, ke mudi muntu udi kayi mua kukanda tshilunji tshiende.” (Nsumuinu 25:28) Mushindu muimpe wa kukanda tshiji ngua kumanya malu onso mudiwu kumpala kua kuamba bualu kampanda anyi kubuenza. Bible udi wamba kabidi ne: “Busunguluji bua muntu budi butuyisha tshiji tshiende.” (Nsumuinu 19:11) Kukonkonona bimpe bualu ne bualu buonso mudibu kudi mua kutuambuluisha bua kukanda tshiji.
DIANYISHA
DÎYI DINENE DIA MU BIBLE: “Nuikale . . . bena dianyisha.”—Kolosayi 3:15.
TSHIDIDI DIUMVUIJA: Batu bamba ne: anu muntu udi uleja dianyisha ke udi mua kuikala ne disanka. Nansha bantu badi bafuishe anyi bajimije tshintu kampanda tshia mushinga mukole badi mua kujadika bualu ebu. Badi baleja ne: tshivua tshibambuluishe bua kupita bimpe ne tunyinganyinga ndikala ne dianyisha bua bidibu bashale nabi pamutu pa kuvuluka anu bikadibu bajimije.
TSHIUDI MUA KUENZA: Dituku dionso, ikala ufunda malu audi musue kulejila dianyisha. Malu aa kaena anu ne bua kuikala a manene to, nansha tumalu tukese bu mudi mutu kuulu kuimpe padi dîba dipatuka, kuyukila bimpe ne muntu uudi munange, anyi kumona butuku butshia. Malu mimpe aa adi mua kukuambuluisha bikole bua kuikala bimpe mu lungenyi, kadi anu wewe uelela meji ne uanyisha.
Wewe wela meji a tshiudi ulejila bena mu dîku dienu ne balunda bebe dianyisha, bidi mua kukuambuluisha bikole menemene. Wewe wanyisha muntu bua bualu kampanda buudi mumone kudiye, muambila anyi mufundila mukanda, mutumina mesaje ku Enternete peshi mu telefone. Kuenza nunku kudi pamuapa mua kukolesha malanda ebe nende ne kukupetesha disanka didi difumina ku difila.—Bienzedi 20:35.
MÊYI MANENE MAKUABU A MU BIBLE
Udi mua kuambula Bible mumana kukuata mu mêyi. Ukadi mu site wa jw.org mu miakulu mitue ku 40
EPUKA MAKOKIANGANYI.
“Ntuadijilu wa dikokangana udi anu bu kukangula tshiibi tshia mâyi a bungi; kumpala kua matandu kujuka, umbuka.”—NSUMUINU 17:14.
KUDISAMISHI MUTU TSHIANANA TSHIANANA BUA MATUKU ADI KUMPALA.
“Kanuditatshishi bua dituku didi dilonda nansha, bualu dituku didi dilonda nedikale ne yadi ntatu. Dituku ne dituku didi ne yadi ntatu idi midikumbanyine.”—MATAYI 6:34.
ANJI ELA MEJI PAMUTU PA KUENZA MALU ANU BUA MUUDI UDIUMVUA.
“Bukokeshi bua kunana lungenyi nebukulame, ne dijingulula dia malu nedikukube.”—NSUMUINU 2:11.