Mbipepele bua wewe kupeta meji
“Dîyi dionso didi mu Mifundu ndifundisha kudi Nzambi ku bukole bua nyuma wende.” (2 Timote 3:16) Mu mvese eu, tshiambilu tshia ne: ‘ndifundisha ku bukole bua nyuma wende’ tshidi tshileja ne: Nzambi Wa Bukole Buonso uvua muangate ngenyi yende muyele mu mitu ya bafundi ba Bible.
Nzambi mmusue bua meji ende akuambuluishe
“Meme, Yehowa . . . ndi nkulongesha bua diakalenga diebe, ndi nkulombola mu njila uudi ne bua kuendela. Bu wewe nansha muteye ntema ku mêyi anyi! Nunku ditalala diebe divua mua kulua bu musulu ne buakane buebe bu mavuala a mbuu.”—YESHAYA 48:17, 18.
Teka ne: wewe ke udi Nzambi wambila mêyi aa. Mmusue bua upete ditalala dia mu muoyo ne disanka didi dishala kashidi. Yeye muine neakuambuluishe bua kubipeta.
Meji a Nzambi adiku bua wewe kuapeta
“Badi ne bua kuanji kuyisha lumu luimpe mu bisamba bionso.”—MÂKO 13:10.
Mu “Lumu luimpe” alu mudi mulayi wa Yehowa wa kujikija makenga, wa kuvuija buloba Mparadizu, ne wa kubisha bantu batudi bafuishe. Bantemu ba Yehowa badi bayisha milayi ya mu Bible eyi pa buloba bujima.