Bua tshinyi bantu kabatshiena banemekangana mu mêku abu?
BUA TSHINYI BIDI NE MUSHINGA BUA BENA MU MÊKU KUNEMEKANGANA
Bena mu mêku bobu banemekangana, nebasombe mu ditalala.
Mukanda wa Les couples heureux ont leurs secrets. Les sept lois de la réussite udi wamba ne: mulume ne mukajende bobu banemekangana, badi balejangana dituku dionso mudibu banangangane mu “malu manene ne mu malu makese.”
Makebulula kampanda adi aleja ne: bana batu banemekangana batu babangata ne mushinga wa bungi, malanda adi pankatshi pabu ne baledi babu atu ashema, ne kabatu nangananga bapeta masama a mitu to.
TSHIUDI MUA KUENZA
Longolola malu pamue ne ba mu dîku diebe. Tshia kumpala, enza bua muena mu dîku yonso umvue tshidi kunemekangana kumvuija. Tshibidi, funda malu audi musue ne: muena mu dîku yonso enze ne adiye mua kuepuka. Tshisatu, yukidilanganayi bua malu anudi balongolola au bua nuenu bonso nuikale ne lungenyi lumue lua tshia kuenza bua kunemekangana.
Ikala tshilejilu. Patu bena mu dîku diebe benza bilema, utu ubamba anyi? Patubu baleja wabu mmuenenu, utu ubaseka anyi? Peshi patu muena mu dîku dienu uyukila nebe, utu umukosa ku mêyi anyi umumona bu muntu udiakuila anyi?
Mayele: Mona dikala ne kanemu bu dibanza dia kufuta muena dibaka nebe ne bana bebe. Kumonyi dikala ne kanemu bu tshintu tshidibu bakumbanyine anyi kabayi bakumbanyine to.
Nansha kuyi witaba tshidi muntu wamba, munemeka. Paudi wakula, epuka mêyi a buena aa: “Tshiwewe utu anu” anyi “kawewe utu anu.” Mêyi mashile a nunku adi mua kutapa muena mu dîku dienu ku muoyo anyi kunufikisha kubi.
TSHITU BANTEMU BA YEHOWA BENZA
Bantemu ba Yehowa batu bakankamija bena mu mêku bua kunemekangana. Misangu ya bungi batu bapatula biena-bualu, mikanda, broshire, ne filme bidi biakula bua dinemekangana. Batu babipesha bantu kabayi babafutshisha tshintu.
BUA MULUME NE MUKAJENDE: Tshiena-bualu tshitu tshipatuka tshia ne: Diambuluisha kudi bena mêku tshidi mua kuambuluisha balume ne bakaji babu bua . . .
kuikala bateleji bimpe
kubenga kujilangana
kulekela kutandangana
(Keba tshiena-bualu tshia ne: “Diambuluisha kudi bena mêku” mu jw.org)
BUA BALEDI: Tshiena-bualu tshia ne: Diambuluisha kudi bena mêku tshidi mua kuambuluisha baledi bua kulongesha bana babu bua . . .
kutumikila
kuenza midimu ya kumbelu
kuambila muntu mêyi bu mudi: “bua luse, koku” ne “tuasakidila”
(Bala tshiena-bualu tshia ne: “Dikolesha bana” ne tshia ne: “Dikolesha bansonga” mu jw.org)
Tangila kabidi tshisakidila tshia ne: “Les parents s’interrogent,” mu mukanda wa Les jeunes s’interrogent. Réponses pratiques, volume 1. (Bala tshiena-bualu tshia ne: “Les parents s’interrogent” mu jw.org)
BUA BANSONGA: Mu tshitupa tshia Bansonga ne bana ba bitende mudi biena-bualu, filme, ne mabeji adi ne biena-bialu kampanda. Bionso ebi bidi mua kuambuluisha bansonga bua . . .
kusomba bimpe ne baledi babu ne bana babu
kuakula ne kanemu kumpala kua baledi babu bua mikenji idibu babelela
kumanya tshia kuenza bua baledi babu kubeyemena
(Bala tshiena-bualu tshia ne: “Bansonga ne bana ba bitende” mu jw.org)
Bantu batu babuela mu site wa jw.org tshianana, kabayi bafuta makuta. Kabatu babalomba bua kudifundishamu anyi kulua bena mu dingomba kampanda to. Kabatu nansha babakonka malu adi abatangila to.