Mmunyi muakadiunda dilongesha dia Busatu Bunsanto?

MU tshitupa etshi tshia dikonkonona dietu, udi mua kudiebeja ne: ‘Pikala Busatu Bunsanto kabuyi dilongesha dia mu Bible, mmunyi mudibo bulue dilongesha dia bukua-buena-nkristo?’ Bua bantu bavule, buakamanyishibua mu tshidimu tshia 325 B.B. mu Tshisangilu tshia bepiskopo tshia ku Nicée.

Bushuwa, kabiena nanku menemene to. Tshisangilu tshia bepiskopo tshia ku Nicée tshiakashindika ne: Kristo uvua wa mubidi bu wa Nzambi. Ke tshivua tshiase tshishimikidi tshia teoloji wa Busatu Bunsanto wakalonda. Kadi, kabavua bajadike Busatu Bunsanto nansha, bualu ku tshisangilu atshi, kabakaleja spiritu munsantu bu muntu muisatu wa mu Bunzambi busatu.

Buenzeji bua Constantin ku Nicée

MUNKATSHI mua bidimu bivule, kuvua buluishi bukole, buvua bushindamene pa Mifundu, butantamena lungenyi luvua lumuangalaka lua se: Yezu uvua Nzambi. Bua kuteta mua kujikija ndululu, mukalenge wa bena Roma Constantin wakabikidisha bepiskopo buonso ku Nicée. Anu bamue ba munkatshi muabo, batue bu ku 300 tshianana ke bakayaku.

Constantin kavua muena nkristo nansha. Badi bamba ne: wakakudimuna mutshima wende ku shoo; kadi wakangata batismo pakavuaye usua kukula muoyo. Mu mukanda wa The Early Church, Henry Chadwick udi wamba pa bidi bimutangila ne: “Anu bu tatuende, Constantin uvua utendelela Dîba dikena kutshimuna; . . . dikudimuka diende kadiena ne bua kuangatshibua bu dienzeja kudi buimpe kampanda . . . Tshivua dipangadika dia mfumu wa basalayi. Kumvua kuende kua dilongesha dia buena-nkristo kakuvua kutoke menemene to, kadi uvua ne dishindika dia se: ditshimuna dia ku mvita divua dipa dia kudi Nzambi wa bena nkristo.”

Mmudimu kayi uvua nawu muine mukalenge eu uvua kayi nansha mutambule, mu Tshisangilu tshia ku Nicée? Tudi tubala mu Encyclopædia Britannica pa muanda eu ne: “Constantin nkayende wakalombola tshisangilu etshi, uludika miyuki ne disuminyina dionso, ne yeye muine ke wakafila . . . diumvuija dinene diakavua kuleja diumvuangana didi pankatshi pa Kristo ne Nzambi didi mu mêyi a ditabuja akapatulabu kudi tshisangilu atshi, dia ‘wa mubidi umue ne Tatu’ . . . Batshinyishibue kudi mukalenge eu, bepiskopo buonso, pa kumusha amu babidi, bakatua biala pa mêyi a ditabuja, ba bungi kabiyi ku budisuile.”

Nenku, buenzeji bua Constantin buvua bunene be. Kunyima kua dikokangana dikole ku mêyi pa malu a ntendelelu munkatshi mua ngondo ibidi mijima, mfumu’eu mumpangano muena tshididi wakakosa tshilumbu, e kutua ku tshia aba bavua bamba ne: Yezu uvua Nzambi. Kadi mbua tshinyi? Bushuwa, kabivua ne: mbua pavuaye mutuishibue ku bidi Mifundu yamba. Bilondeshile mukanda wa A Short History of Christian Doctrine, “Constantin kavua mene ne bujinguludi nansha bukese bua nkonko ivua yedibua mu dilongesha dia bena teoloji wa bena Greke to.” Kadi, tshivuaye mumvue buende yeye, ntshia se: ditapuluka dia bitendelelu divua njiwu bua ditunga diende divuaye musue ne: buobumue bushindikibuemu.

Kadi, nansha umue wa ku bepiskopo ku Nicée kavua muakule bua Busatu kampanda to. Bakapangadika pa bidi bitangila Yezu kadi ki mpa mudimu wa spiritu musantu to. Bu Busatu kampanda buikale bulelela bua patoke bua mu Bible, kabavua mua kuikala babuambe mu tshikondo atshi anyi?

Didiunda diakalonda

KUNYIMA kua Nicée, dikokangana ku mêyi diakatungunuka munkatshi mua makumi a bidimu. Aba bavua bitabe ne: Yezu kavua muena mulongo ne Nzambi, bakabingishibua munkatshi mua tshikondo kampanda. Kadi, Mukalenge Théodose wakalua pashishe kukosa tshilumbu etshi e kubapisha. Wakashindika mêyi a ditabuja a Tshisangilu tshia ku Nicée bua matunga ende ne mu tshidimu tshia 381, wakabikidija Tshisangilu tshia ku Constantinople bua kutokesha dine diumvuija edi.

Tshisangilu etshi tshiakateka spiritu munsantu mu mulongo umue ne Nzambi ne Kristo. Bua musangu wa kumpala, ke Busatu Bunsanto bua Bukua-buena-nkristo kutuadijabu kumueneka bu mudibu lelu’eu.

Kadi, nansha kunyima kua Tshisangilu tshia ku Constantinople, bantu buonso kabakitaba Busatu Bunsanto. Ba bungi bakabenga dilongesha edi e kupetabo makengeshibua makole a ku mubidi. Kunyima kua siekele ya bungi ke kuakashisha Busatu Bunsanto kupeta diumvuija disunguluke ku diambuluisha dia mêyi-maludiki a ditabuja. Tshibungu tshia The Encyclopedia Americana tshidi tshileja ne: “Lungenyi lua Busatu Bunsanto luakadiunda bikole ku Mputu wa ku Weste, mu ndongeshilu wa mu Moyen Age wa filozofi ne teoloji, pakalumvuijabo mu miaku ya filozofi ne ya psikoloji.”

Ditabuja dia Athanase

Bakavua kuakaja diumvuija dia Busatu Bunsanto nangananga mu ditabuja dia Athanase. Athanase uvua mfumu wa tshitendelelu, wakatua ku tshia Constantin ku Nicée. Ditabuja didi dinyika dîna diende didi diamba ne: “Tudi tutendelela Nzambi umuepele mu Busatu Bunsanto. . . . Tatu udi Nzambi, Muana udi Nzambi, Spiritu Munsanto udi Nzambi; kadi kabena nzambi isatu, apu Nzambi umuepele.”

Kadi, bamanyi bapiluke mbapunge dîyi dimue ne: ditabuja edi kadivua dienza kudi Athanase to. Tudi tubala mu The New Encyclopædia Britannica ne: “Ekleziya wa ku Este kavua muanji kumanya ditabuja edi kumpala kua siekele wa 12. Katshia ku siekele wa 17, bamanyi bapiluke buonso badi bamba ne: ditabuja dia Athanase edi kadivua difunda kudi Athanase (ufuile mu 373 B.B.) to, kadi divua mua kuikala difunda mu siekele muitanu, ku sud wa France . . . Mbimueneke se: buenzeji bua ditabuja edi buakamueneka diambedi mu siekele muisambombo ne wa muanda-mutekete ku sud wa France ne ku Espagne. Bakadibueja diambedi mu nnemekelu wa Nzambi wa ekleziya mu Germanie mu siekele wa tshitema kakese pashishe mu Roma.”

Nenku, bituadije mu tshikondo tshia Kristo, biakakengela siekele ya bungi bua Busatu Bunsanto kuitabijibuabu kudi Bukua-buena-nkristo bujima. Ne mu bionso ebi, ntshinyi tshiakalombola mapangandika aa? Tshivua Dîyi dia Nzambi anyi tshivua mmuenenu ya bamfumu ba tshitendelelu anyi ba tshididi? Mu mukanda wa Origin and Evolution of Religion, E. W. Hopkins udi wandamuna ne: “Diumvuija dia ndekelu dia ekleziya dia busatu divua nangananga muanda wa malu a bulongolodi bua Ekleziya.”

Butontolodi bumanyisha

NJILA eu mubi udibo balonde kudi Busatu Bunsanto udi ukumbaja mêyi a Yezu ne a bapostolo bende pa bivua ne bua kulonda tshikondo tshiabo. Bakamba ne: nekulue butontolodi, dipambuka, dilekela dia ntendelelu mulelela too ne ku dialukila dia Kristo, pavua ntendelelu mulelela ne bua kuasuludibua tshiakabidi kumpala kua dituku dia Nzambi dia kabutu ka bulongolodi ebu bua malu.

Bua “dituku” adi, mupostolo Paulo wakamba ne: “Kadiakulua anu palua diambedi butontolodi ne biasokolodibua mupetudi wa mikenji.” (2 Tesalonike 2:3, 7, NW) Pashishe wakadianjila kuamba ne: “Pangikala muye, mbua ya luonji neibuele munkatshi muenu, kayiyi ifuila mikoko luse. Nansha munkatshi muenu nemuikale bantu bapatuka ne diumvuija kampanda dibi dia bulelela ku mishiku yabo bua kusaka balongi bua kubatuabu munyima.” (Bienzedi 20:29, 30, Jé) Balongi bakuabo ba Yezu bakafunda pa butontolodi ebu ne bua bamfumu ba bitendelelu ‘bapetudi ba mikenji.’​—Tangila, tshilejilu, 2 Petelo 2:1; 1 Yone 4:1-3; Yuda 3, 4.

Paulo wakafunda kabidi ne: “Tshikondo netshilue bushuwa tshikala bantu, pamutu pa kusankidila diyisha dilenga, bikale ba lukuluku bua malu mapiamapia ne badisunguile nkayabo bungi bukumbane bua balongeshi bilondeshile dianyisha diabu; ne nenku, pamutu pa kuteleja bulelela, nebateleje nsumuinu.”​—2 Timote 4:3, 4, Jé.

Yezu yeye muine wakumvuija kabengela kabo ka ntendelelu mulelela. Wakamba ne: uvua mumiamine maminu mimpe mu budimi buende, kadi muena lukuna, Satana, uvua ne bua kukunamu bisonsa bibi. Ke bualu kayi pavua blé ne bua kutuadija kutoloka, bisonsa bibi bivua pabi ne bua kutoloka. Nenku, bivua bikengela kutekemena dipambuka ku buena-nkristo bukezuke too ne ku tshikondo tshia dinowa, palua Kristo kuakaja malu wonso. (Matayo 13:24-43) Encyclopedia Americana udi umvuija pa muanda eu ne: “Dilongesha dia Busatu Bunsanto dia mu siekele muinayi kadivua diumvuangane ne dilongesha dia ntuadijilu dia bena nkristo bu muvuadi bulelela pa ngikadilu wa Nzambi; kadi, kabiyi nanku, divua dipambuka ku dilongesha edi.” Nenku, dipambuka edi diakafumina kuepi?​—1 Timote 1:6.

Kuakafumina buenzeji

KATSHIA ku kale menemene, bu ku tshikondo tshia Babilona, kuvua tshibidilu tshia kutendelela nzambi ya bampangano isatu isatu milamakaja, anyi masatu a nzambi. Buenzeji abu buvua kabidi bukole mu Ejipitu, mu Grèce ne mu Roma mu siekele mivule Kristo kayi muanji kulua, pavuaye pa buloba, ne panyima pa yeye mumane kuya. Ne kunyima kua lufu lua bapostolo, malongesha aa a bampangano akatuadija kubuela mu buena-nkristo.

Pa muanda eu muena histware Will Durant wakaleja ne: “Buena-nkristo kabuakashipa bumpangano, buakabuanyisha. . . . Ku Ejipitu ke kuakafumina ngenyi ya busatu kampanda bua bunzambi.” Siegfried Morenz udi pende wamba mu mukanda wa Egyptian Religion ne: “Busatu buvua muanda munene bua bena teoloji ba ku Ejipitu . . . Nzambi isatu mmisangishibue ne kuangatshibua bu nzambi umue, bakula buayi ku bumue. Nunku, bukole buenzeji bua ntendelelu wa bena Ejipitu mbuleje dituangaja dikole ne teoloji wa bena nkristo.”

Nunku, ku ndekelu kua siekele muisatu ne ntuadijilu wa muinayi, ku Alexandrie, mu Ejipitu, ke kubuejilebu buenzeji ebu kudi bamfumu ba bitendelelu, bu mudi Athanase, pa kukuatakaja ngenyi yakafikisha ku Busatu Bunsanto. Buenzeji buabo nkayabo buakatangalaka, mu mushindu udi mufikishe Morenz ku diangata “teoloji wa bena ku Alexandrie bu mutuangaji pankatshi pa bumpianyi bua malu a Nzambi a ku Ejipitu ne buena-nkristo.”

Mu mabeji a mbangilu a mukanda wa History of Christianity, wa Edward Gibbon, tudi tubalamu ne: “Pikala bumpangano buvua butshimunyibue kudi buena-nkristo, buena-nkristo buakanyangishibua pabo kudi bumpangano. Ntendelelu mukezuke wa Nzambi wa bena nkristo ba kumpala . . . wakashintuludibua kudi Ekleziya wa ku Roma, mu dilongesha kadiyi kujingulula dia busatu. Malongesha mavule a bampangano, makuatakaja kudi bena Ejipitu ne mavuija malelela kudi Platon, bakaitaba bu malelela ne a kueyemenyibua.”

Bilondeshile nkonga-miaku wa A Dictionary of Religious Knowledge, bantu bavule badi bamba ne: Busatu Bunsanto “ndilongesha dinyanguke diangata mu bitendelelu bia bampangano ne kudiasa mu mitabuja a buena-nkristo.” Ne mukanda wa The Paganism in Our Christianity, udi wamba ne: “Mbangilu wa [Busatu Bunsanto] udi yonso wa bumpangano.”

Ke bua tshinyi James Hastings wakafunda mu mukanda wa Encyclopædia of Religion and Ethics ne: “Tshilejilu, mu ntendelelu wa ku Inde, tudi tusangana busatu bua Brahmā, Siva ne Viṣṇu; mu ntendelelu wa ku Ejipitu, busatu bua Osiris, Isis ne Horus. . . . Lungenyi lua Busatu kampanda kaluena lusanganyibua anu mu ntendelelu ya kale idibo bakule mu mikanda nansha. Tuvuluije nangananga mmuenenu wa Dilongesha dia Platon Dienzulula pa Mutambe Bunene anyi Ntuadijilu wa Bionso,” udi “muleja bu busatu.” Ndiumvuangana kayi didi pankatshi pa muena filozofi wa bena Greke Platon ne Busatu Bunsanto?

Dilongesha dia Platon

BATU bela meji se: Platon wakalala panu bituadije mu 428 too ne mu 347 kumpala kua Kristo. Nansha muvuaye kayi mulongeshe Busatu Bunsanto mushindu udibu lelu’eu, malongesha ende a filozofi ke avua malongoluele dilongesha edi njila. Kunyima, bisumbu bia filozofi bivua bianyishe mitabuja a busatu biakamueneka, ne bivua ku buenzeji bukole bua malongesha a Platon pa bidi bitangila Nzambi ne bifukibua.

Nkonga-miaku wa Nouveau Dictionnaire universel wa bena France udi wamba bua buenzeji bua Platon ne: “Busatu bua mu dilongesha dia Platon, bushuwa, buvua buobu buine anu diakaja kampanda, dia masatu a kale a bisamba bia kale, mbumueneke bu busatu bufuka ku meji bua bena filozofi, bua ngikadilu budi bulele busatu bua bantu kampanda ba mu Nzambi badibo balongesha mu ekleziya ya buena-nkristo. . . . Ngumvuilu eu wa busatu bua Nzambi kudi muena filozofi eu wa bena Greke . . . udi usanganyibua mu bitendelelu bionso bia kale [bia bampangano].”

Tshibungu tshia The New Schaff-Herzog Encyclopedia of Religious Knowledge, tshidi tshileja buenzeji bua filozofi wa bena Greke ne: “Malongesha a Logos ne a Busatu Bunsanto akapeta diakaja diawu kudi Batatu [ba tshitendelelu] ba bena Greke bavua . . . ku buenzeji bukole bua filozofi wa Platon, buobo bine anyi ku butuangaji bua bakuabo. . . . Kakuena mushindu wa kuvila ne: ke mpokolo wa ntupakanyi ne dinyanguka bia Ekleziya.”

Tudi tubala mu mukanda wa The Church of the First Three Centuries ne: “Dilongesha dia Busatu Bunsanto ntshintu tshiakaja ku kakese ku kakese ne tshia kunyima eku; . . . mbangilu wadi kavua ne muji nansha umue mu Mifundu ya bena Yuda ne ya bena nkristo; . . . diakadiunda ne kuvua kubuela mu buena-nkristo ku diambuluisha dia Batatu bamuangalaji ba dilongesha dia Platon.”

Ku ndekelu kua siekele muisatu B.B., “buena-nkristo” ne malongesha mapiamapia menzeja ku malongesha a filozofi wa Platon biakasambakana kabitshiyi mua kubilamuna kabidi. Amu bu mudi Adolf Harnack ubiamba mu mukanda wende wa Outlines of the History of Dogma, dilongesha dia Ekleziya “diakela miji mikole menemene mu buloba bua nshidimukilu wa bena-Greke [meji a bampangano ba bena Greke]. Nenku ke muakaluadi bualu busokome kudi tshitupa tshinene tshia bena nkristo.”

Ekleziya uvua wamba mudi malongesha ende mapiamapia mikale mashindamene pa Bible. Kadi Harnack udi wamba ne: “Bulelela, Ekleziya wakitaba munda muende mianda mifuka ne meji kudi bena Greke, mmuenenu ya bitabataba ne bilele bia ntendelelu musokome wa bampangano.”

Mu mukanda wa A Statement of Reasons, Andrews Norton udi wamba bua Busatu Bunsanto ne: “Tudi mua kulondolola histware wa dilongesha edi, ne kumona mbangilu wadi, ki mmu masokolola a bena nkristo to, kadi, mmu filozofi wa Platon . . . Busatu Bunsanto ki ndilongesha dia Kristo ne bapostolo bende nansha, kadi mbingenyingenyi bifumine kudi balondi ba dilongesha dia Platon ba ku shòò.”

Nenku, mu siekele muinayi B.B., butontolodi buvuabo bamanyishe kudi Yezu ne bapostolo buakadiunda bikole. Ditantamuka dia Busatu Bunsanto didi mene amu dimue dia ku bijadiki biabu. Ekleziya ya batontolodi yakatuadija kuangata ngenyi mikuabu ya bampangano, bu mudi inferno wa kapia, dibenga kufua dia anyima, ne kutendelela mpingu. Mu ngakuilu wa mu nyuma, Bukua-buena-nkristo buakabuela mu tshikondo tshiabu tshia mîdima tshidianjila kumanyisha, tshivua ku bukenji bua kasumbu ka “mupetudi wa mikenji,” anyi bamfumu ba bitendelelu, kavua kenda anu kadiunda.​—2 Tesalonike 2:3, 7, NW.

Bua tshinyi baprofete ba Nzambi kabakabulongesha?

BUA tshinyi munkatshi mua binunu bia bidimu, muprofete wa Nzambi nansha umue kêna mulongeshe tshisamba tshiende Busatu Bunsanto? Ku shòò, Yezu kavuaku mua kuenza muende muonso bu muvuaye Mulongeshi Munene, bua kutokeshila balondi bende Busatu Bunsanto anyi? Nzambi uvuaku mua kufundisha ku spiritu wende nkama ya mabeji a Mifundu ne kupanga kukuata nayi mudimu bua kulongesha Busatu Bunsanto bu buobu buikale “dilongesha dia nshindamenu” dia ntendelelu anyi?

Bena nkristo badi mua kuitabuja se: siekele mivule kunyima kua Kristo ne kunyima kua yeye mumane kufundisha Bible ku spiritu wende, Nzambi uvua mua kulua kuitaba dibuela dia dilongesha kampanda divua kadiyi dimanyike kudi bamusadidi bende munkatshi mua binunu bia bidimu, edi didi dikale “bualu busokome budi kabuyi kukononona,” didi “dipite pa ngumvuilu wa bantu,” dilongesha divua ne mbangilu wadi mumanyike mu bumpangano ne divua “nangananga muanda wa malu a bulongolodi bua Ekleziya” anyi?

Bumanyishi bua mianda ya kale mbuleje patoke ne: dilongesha dia Busatu Bunsanto ndipàmbuka ku bulelela, ne kabidi mbutontolodi ku bulelela.

[Lungenyi lunene lua mu dibeji 8]

‘Dilongesha dia Busatu Bunsanto, dia mu siekele muinayi, divua dipàmbuka ku dilongesha dia bena nkristo dia ntuadijilu.’​—The Encyclopedia Americana.

[Kazubu mu dibeji 9]

“Busatu bua nzambi minene”

Siekele mivule kumpala kua tshikondo tshia Kristo, kuvua masatu a nzambi mu Babilone ne mu Assyrie bia kale. Mukanda wa “Mythologie générale” (Larousse) wa bena France udi utela bumue bua ku masatu a nzambi mu tshitupa atshi tshia Mezopotami: “Bifukibua bionso bivua bitapulula mu bitupa bisatu, tshitupa tshionso e kuluatshi bumpianyi bua nzambi kampanda. Anu wakapeta diulu; Enlil bakamupesha buloba; Ea wakalua mukokeshi wa mâyi. Buobu aba bakadikuatakaja e kuvua busatu bua nzambi minene.”

[Kazubu mu dibeji 12]

Busatu bua bena Hindu

Mukanda wa “The Symbolism of Hindu Gods and Rituals” udi wamba pa bidi bitangila busatu bua bena Hindu buvuaku siekele mivule kumpala kua Kristo: “Umue wa ku nzambi ya Busatu udi Siva. Badi bamuangata bu nzambi wa kabutu. Nzambi mikuabo ibidi idi Brahma, nzambi wa bufuki, ne Vishnu, nzambi wa dikubibua. . . . Nzambi yonso isatu idi mibuejakaja mu mushindu umuepele bua kuleja ne: basatu aba badi benza nzambi umue ne umuepele.”​—Bifunda kudi A. Parthasarathy, Bombay.

[Tshimfuanyi mu dibeji 8]

“Constantin kavua mene ne bujinguludi nansha bukese bua nkonko ivua yedibua mu dilongesha dia bena teoloji wa bena Greke to.”—A Short History of Christian Doctrine

[Bimfuanyi mu dibeji 10]

1. Ejipitu. Busatu bua banzambi Horus, Osiris, Isis, bidimu binunu bibidi K.B.B.

2. Babilone. Busatu bua banzambi Ishtar, Sin, Shamash, bidimu binunu bibidi K.B.B.

3. Palmyre. Busatu bua banzambi bua nzambi-ngondo, bua Mfumu wa diulu, bua nzambi-dîba, mu siekele wa kumpala mu B.B.

4. Inde. Bunzambi busatu bua bena Hindu, siekele wa 7 B.B.

5. Kampuchea. Bunzambi busatu bua bena Buddha, mu siekele wa 12 B.B.

6. Norvège. Busatu Bunsanto (Tatu, Muana, spiritu munsantu), mu siekele wa 13 B.B.

7. France. Busatu Bunsanto, mu siekele wa 14 B.B.

8. Italie. Busatu Bunsanto, mu siekele wa 15 B.B.

9. Allemagne. Busatu Bunsanto, mu siekele wa 19 B.B.

10. Allemagne. Busatu Bunsanto, mu siekele wa 20 B.B.