Nshapita wa 16

Tshisumi bua ntendelelu wa Yehowa

BANA babo ne Yezu bakuabu​—bana bakuabu ba Mariya—​ke Yakobo, Yozefe, Simone ne Yudase. Bangabanga ne buobo buonso kuenza luendu pamue ne Yezu ne bayidi bende batangile ku Kapernaume, tshimenga tshidi pabuipi ne Mbuu wa Ngalileya, imue misangu badi banji kutuula ku nzubu wabo mu Nazarete bua dîku kusuikadi bintu bikalabu nabi dijinga.

Kadi, bua tshinyi Yezu udi uya ku Kapernaume pamutu pa kutungunuka ne mudimu wende mu Kana, mu Nazarete anyi mu muaba mukuabu mu tukunakuna tua mu Ngalileya? Diambedi, Kapernaume ntshimenga tshiasa pa muaba mulenga ne tshidi tshimueneka tshialabale bikole. Tshibidi, bavule ba ku bayidi bapiabapia ba Yezu mbasombelemu peshi badi pabuipi ne Kapernaume, nunku kabakushiya nzubu yabo ne kuya kule bua kulongeshibua mudimu nansha.

Mu matuku wonso adiye ushala mu Kapernaume, Yezu udi wenza midimu ya dikema, anu muabijadikaye yeye muine panyima pa ngondo mikese. Kadi, mu lupolo luipi Yezu ne bena diende badi batua tshiakabidi makasa mu njila. Bidi mu muvu wa disampila, badi mu njila batangile ku Yeruzaleme bua kuya kuenza difesto dia Pasaka wa mu 30 B.B. Mu lupolo ludibo kuine eku, bayidi bende badi bamona muanda kampanda udi utangila Yezu uvuabo imue misangu kabayi banji kumona diambedi.

Bilondeshile Mikenji ya Nzambi, bena Izalele mbalombibue bua kufila milambu ya nyama. Pa nanku, bua kupepejila bamue lutatu, bangenda-mushinga badi basumbisha nyama peshi nyunyu bua kipatshila aka. Kadi, badi babisumbisha munda mua ntempelo muine, ne badi biiba bantu pa kubasumbisha ku mishinga mipite bukole.

Yezu, muwule tente ne tshiji, udi wenza mfimbu ne mionji ne upatula basumbishi pambelu. Udi witshikija mfranga ya biamu ya bashintakaji ne utonkola mesa abu. “Umushayi bintu ebi apa!” ke mudiye ùsàmina basumbishi ba nkutshi. “Lekelayi kuvuija nzubu wa Tatuanyi nzubu wa bungenda-mushinga!”

Padi bayidi ba Yezu bamona muanda eu, badi bavuluka mulayi udi wakula bua Muana wa Nzambi: “Tshisumi bua nzubu webe netshindie mujima.” Kadi, bena Yuda badi bakonka ne: “Ntshimanyinu kayi tshiudi ne bua kutupesha, bu muudi wenza bintu ebi?” Yezu udi wandamuna ne: “Upulayi ntempelo eu, ne mu matuku asatu meme nemmuimanyike tshiakabidi.”

Bena Yuda badi bela meji ne: Yezu udi wakula bua ntempelo muena-dîna, ke padibo bamukonka ne: “Ntempelo eu wakiibakibua mu bidimu 46, ne wewe newumuimanyike tshiakabidi mu matuku asatu?” Pabi, Yezu udi wakula bua ntempelo wa mubidi wende. Bidimu bisatu pashishe, bayidi bende badi bavuluka mêyi aa padiye ubiishibua ku lufu. Yone 2:12-22; Matayo 13:55; Luka 4:23, NW.

▪ Panyima pa difesto dia dibaka mu Kana, Yezu udi wenza luendu mutangile miaba kayi?

▪ Bua tshinyi Yezu udi ukuata tshiji, ne ntshinyi tshidiye wenza?

▪ Bayidi ba Yezu badi bavuluka tshinyi pa kumona malu adiye wenza?

▪ Yezu udi wamba tshinyi pa bidi bitangila “ntempelo eu,” ne udi usua kumvuija tshinyi?