Bademon mbashipianganyi!
Satana ne bademon batu anu benzedianganyi ba bibi ne ba njiwu. Ku ntuadijilu, Satana wakashipa bimuna ne basadidi ba muena lulamatu Yobo. Kunyima, wakashipa bana dikumi ba Yobo ne “mvunde mukole” bua kubutula nzubu uvua bana aba. Kunyima, Satana wakatua Yobo “disama dia biuwuja binene pambidi ponso, bituadije munda mua makasa too ne ku lubombo lua mutu wende.”—Yobo 1:7-19; 2:7.
Mu tshikondo tshia Yezu, bademon bavua bavuija bamue bantu tumama ne bafofo. (Matayi 9:32, 33; 12:22) Bakakengesha mukuabo muntu ne kumusaka bua kuikala uditapa mputa ne mabue. (Mâko 5:5) Bakasaka muana wa balume bua kuela mbila, bamututa panshi ne “bamunyukula bikole.”—Luka 9:42.
Ku kale, bademon bavua batua bamue bantu masama ne benza bua bakuabu baya nkoyi
Lelu, Satana ne bademon badi anu bashipangana bipite ne ku kale. Bualu, mudimu wabo mubi mmuvulangane katshia babipata mu diulu. Luapolo idi ifumina pa buloba bujima idi ishindika tshikisu tshiabo. Badi bakengesha bamue bantu ne masama makole. Badi batatshisha bakuabo butuku, babapangisha tulu peshi babalotesha bilota bikuata buowa. Bakuabo badi babanyanga ne tshikisu tshia masandi. Bakuabo pabo, bademon badi babavuija bena mukupa, bashipianganyi anyi badishipi.
Bademon lelu’eu badi bavuija bakuabo bantu bena tshikisu; badi bakengesha bakuabo butuku, babalotesha bilota bikuata buowa
Lintina, mukaji wa ku ditunga dia Suriname, udi ulonda ne: demon kampanda, anyi spiritu mubi, wakashipa bantu 16 ba mu dîku diabo ne wakamukengesha yeye muine ku mubidi ne mu lungenyi munkatshi mua bidimu 18. Mu muyuki wende, wakamba ne: bademon batu “basanka bua kukengesha bantu badi babenga kubatumikila too ne ku lufu.”
Kadi, Yehowa udi mua kukuba basadidi bende mu mvita idi Satana ubela.—Nsumuinu 18:10.