Tshitupa 1
Nzambi Utuku Uditatshisha Bua Bualu Buetu Anyi?
1, 2. Ndukonko kayi ludi bantu badiela pa bidi bitangila Nzambi, ne mbua tshinyi?
MU TSHIKONDO kampanda mu nsombelu webe, ukadiku mua kuikala mudiebeje ne: ‘Bu bikala Nzambi udi uditatshisha bushuwa bua bualu buetu muikalaku, bua tshinyi udi ulekela makenga bungi nunku?’ Buonso buetu tukadi bapetangane ne makenga peshi tudi bamanye muntu kampanda udi nawu.
2 Bushuwa, mu miyuki ya bantu ya kale bantu mbapetangane ne bisama pamue ne dibungama bifumine ku mvita, tshikisu, dibunda bibawu, dipanga buakane, bupele, masama, ne lufu lua banangibue babu. Anu mu siekele eu wa 20 nkayamu, mvita mmishipe bantu bapite pa miliyo 100. Miliyo nkama ya bakuabu bakatapika peshi bakajimija mbanza ne bintu biabu. Malu makuate buôwa mmenzeke mu tshikondo tshietu etshi, mafikishe bungi kabuyi kubala bua bantu ku kanyinganyinga kakole, binsonji bivule, ne mmuenenu wa dipanga ditekemena.
3, 4. Mmunyi mudi bavule bela meji bua dilekelela dia makenga kudi Nzambi?
3 Bamue badi balua bena luonji ne bela meji ne: bikala Nzambi muikalaku, kêna bushuwa uditatshisha bua bualu buetu. Anyi badi nansha mua kuela meji ne: Nzambi kenaku to. Tshilejilu, muntu kampanda wakakenga bua disubishangana difume ku kansungasunga ka bisa diakakebesha lufu lua balunda ne bena dîku mu Mvita ya Kumpala ya Buloba bujima wakebeja ne: “Nzambi uvua penyi patuvua nende dijinga?” Mukuabu, wakapanduka ku dishipibua dia miliyo ya bantu kudi bena Nazi mu Mvita Mibidi ya Buloba bujima, uvua mubungamija bikole kudi makenga akamonaye ne wakamba ne: “Bu wewe mua kulaka dimuma dianyi dia muoyo, didi mua kukulùnga.”
4 Nenku, bantu bavule kabena mua kumvua bua tshinyi Nzambi muimpe udi ulekela malu mabi enzeka. Badi badiebeja né utu bushuwa uditatshisha bua bualu buetu peshi né utuku mene. Ne bavule ba kudibu badi bela meji ne: makenga neikaleku misangu yonso mu nsombelu wa bantu.
[Tshimfuanyi mu dibeji 2, 3]
Bulongolodi bupiabupia budi kabuyi ne makenga budi pabuipi anyi?