Tshitupa 11
Tshishimikidi Tshia Bulongolodi Bupiabupia Tshidi Mu Diashibua Mpindieu
1, 2. Mu dikumbana dia milayi ya mu Bible, ntshinyi tshidi tshienda tshienzeka tshitudi badimuenene?
TSHIDI tshitambe buimpe kabidi mbualu bua se: tshishimikidi tshia bulongolodi bupiabupia bua Nzambi tshidi mu diashibua kubangila ku mpindieu, nansha mudi eku bulongolodi bukulakaje bua Satana buenda bunyanguka. Tudi tudimuenena mudi Nzambi usangisha bantu ba mu bisamba bionso ne ubenza tshishimikidi tshia nsangilu mupiamupia wa pa buloba wapingana mu katupa kakese emu bulongolodi butukakane bua matuku etu aa. Mu Bible, mu 2 Petelo 3:13, badi babikila nsangilu mupiamupia eu ne: “buloba bupiabupia.”
2 Mulayi wa mu Bible udi wamba kabidi ne: ‘Mu matuku atshidi alua [matuku atudi mpindieu], bantu ba bungi nebayeku, nebambe ne: Luayi tubande ku mukuna wa Yehowa [ntendelelu wende mulelela], bua yeye atuyishe bienzedi biende, ne bua tuetu tuende mu njila yende.’ —Yeshaya 2:2-3.
3. (a) Mulayi wa mu Yeshaya udi ukumbana munkatshi mua bantu kayi? (b) Mmunyi mudi mukanda wa ndekelu wa mu Bible umvuija bualu ebu?
3 Mulayi eu udi wenda ukumbana mpindieu munkatshi mua aba badi bakokela ku ‘bienzedi bia Nzambi ne benda mu njila yende.’ Mukanda wa ndekelu wa mu Bible udi wakula bua nsangilu eu wa bantu badi banange ditalala wa bukua-matunga bu “musumba munene . . . wa mu matunga onso ne bisa bionso ne bisamba bionso ne miakulu yonso.” Udi kabidi dîku dia buena-muntu bulelela bua buloba bujima didi disadila Nzambi mu buobumue. Ne Bible udi usakidila ne: “Ng’aba badi bafumina ku dikenga dinene.” Mbuena kuamba ne: nebapanduke ku nshikidilu kua ndongoluelu’eu mubi wa malu.—Buakabuluibua 7:9, 14, NW; Matayo 24:3.
Buena-muntu bulelela bua bukua-matunga
4, 5. Ntshinyi tshidi tshienza bua buena-muntu bua buloba bujima bua Bantemu ba Yehowa buikalaku?
4 Miliyo mivule ya Bantemu ba Yehowa batu bateta ne muoyo mujima bua kuikala ne nsombelu udi mu diumvuangana ne mêyi-mashidimunyi ne njila bia Nzambi. Ditekemena diabu dia muoyo wa tshiendelele ndishindamene pa bulongolodi bupiabupia bua Nzambi. Pa kuikala ne nsombelu wa ku dituku dionso wa ditumikila mikenji ya Nzambi, badi bamuleja budisuile buabu bua kukokela ku mushindu wende wa kukokesha mpindieu ne mu bulongolodi bupiabupia. Miaba yonso, nansha bikale mu ditunga kayi anyi ne dikoba kayi, badi banemeka mêyi-makulu a muomumue—aa maleja kudi Nzambi mu Dîyi diende. Ke bua tshinyi badi benza buena-muntu bulelela bua bukua-matunga, nsangilu wa bulongolodi bupiabupia buenza kudi Nzambi.—Yeshaya 54:13; Matayo 22:37, 38; Yone 15:9, 14.
5 Bantemu ba Yehowa kabena badiambika lumu bua mudibu benza buena-muntu bua pa buabu bua buloba bujima. Mbamanye se: etshi ntshipeta tshia dikuata mudimu dia spiritu wa bukole wa Nzambi pa bantu badi bakokela ku mikenji yende. (Bienzedi 5:29, 32; Galatia 5:22, 23) Nzambi ke udi muenze bualu ebu. Anu bu muakamba Yezu: “Malu adi bantu kaba[y]i bamanye mua kuenza Nzambi udi mua kuênza.” (Luka 18:27) Nunku, Nzambi udi muenze bua se: bukua-mabulunge buikale bikondo ne bitshia mmuenze kabidi bua se: nsangilu eu mushindame wa bulongolodi bupiabupia ikalaku.
6. Bua tshinyi badi mua kubikila buena-muntu bua Bantemu ba Yehowa ne: tshishima tshia matuku etu aa?
6 Nenku, nkokeshilu wa Yehowa mu bulongolodi bupiabupia udi mua kudianjila kumuenekela ku bidiye wenza mu tshishimikidi tshia bulongolodi bupiabupia tshidi mu diashibua mpindieu. Ne, mu ngumvuilu kampanda, tshidiye muenze ne Bantemu bende ntshishima tshia matuku etu aa. Bua tshinyi? Bualu mmuibake Bantemu ba Yehowa mu buena-muntu bulelela bua buloba bujima, budibu kabayi mua kukosolola kudi malu adi abululangana bu mudi bipatshila bia matunga, makoba, peshi bia malu a Nzambi. Nansha mudi bungi bua Bantemu butue ku miliyo mivule ne bikala mu matunga mapite pa 200, mbadisuike pamue bu muntu umue mu tshisuikidi tshidi katshiyi kusulula. Buena-muntu ebu bua buloba bujima, bua pa buabu mu miyuki ya bantu, ntshishima tshia matuku etu aa bushuwa—Bualu buenza kudi Nzambi.—Yeshaya 43:10, 11, 21; Bienzedi 10:34, 35; Galatia 3:28.
Mushindu wa kumanya bantu ba Nzambi
7. Bilondeshile tshiakamba Yezu, mmunyi mutudi mua kujingulula balondi ba Yezu balelela?
7 Mmunyi mutudi kabidi mua kumanya bantu badi Nzambi wenza nabu mudimu bu tshishimikidi tshia bulongolodi buende bupiabupia? Ee, mbanganyi badi bakumbaja mêyi a Yezu adi mu Yone 13:34, 35? Wakamba ne: “Ndi nnupesha dîyi-dituma dipiadipia, bua nuenu nunangangane; anu bu mundi mununange, nuenu penu nunangangane. Ku bualu ebu bonso nebamanye se: nudi bayidi banyi, binuikala ne dinanga munkatshi muenu.” (NW) Bantemu ba Yehowa badi bitaba mêyi a Yezu ne benza malu mu diumvuangana nawu. Anu bu mudi Dîyi dia Nzambi dilongesha, badi ne ‘dinanga dikole munkatshi muabu.’ (1 Petelo 4:8) ‘Mbaluate dinanga, didi tshisuikidi tshia malu onso a buakane buonso.’ (Kolosai 3:14) Nunku, dinanga dia buena-muntu “mbudimbu” budi bubalame pamue pa buloba bujima.
8. Mbualu kayi bukuabu budi 1 Yone 3:10-12 ufila bua kumanya bantu ba Nzambi?
8 Bia muomumue, 1 Yone 3:10-12 (NW) udi wamba ne: “Bana ba Nzambi ne bana ba Diabolo mbamanyikile mu bualu ebu: Muntu yonso udi kayi wenza buakane kêna ufuma kudi Nzambi, nansha eu udi kayi munange muanabu. Bualu eu ke mukenji unuakumvua ku ntuadijilu, bua se: tudi ne bua kuikala ne dinanga dia umue ne mukuabu; ki mbienze bu Kaina, wakafuma kudi muntu mubi ne wakashipa muanabu.” Nenku, bantu ba Nzambi badi benza buena-muntu bua buloba bujima budi kabuyi ne tshinyangu.
Tshimanyinu tshikuabu
9, 10. (a) Nku mudimu kayi kudibu mua kumanyina basadidi ba Nzambi mu matuku a ku nshikidilu? (b) Mmunyi mudi Bantemu ba Yehowa bakumbaje Matayo 24:14?
9 Kudi mushindu mukuabu wa kumanya basadidi ba Nzambi. Mu mulayi wende udi wakula bua nshikidilu wa bulongolodi ebu, Yezu wakatela malu a bungi avua ne bua kujadika lupolu elu lua tshikondo bu matuku a ku nshikidilu. (Tangila Tshitupa 9.) Tshimanyinu tshia nshindamenu tshia mulayi eu ntshileja mu mêyi ende adi mu Matayo 24:14 (NW): “Lumu luimpe elu lua bukalenge neluyishibue pa buloba buonso buasa bu bumanyishi kudi matunga onso; ne pashishe nshikidilu nealue.”
10 Tudiku bamone mulayi eu wenda ukumbana anyi? Eyowa. Bu muakatuadija matuku a ku nshikidilu mu 1914, Bantemu ba Yehowa mbayishe lumu luimpe lua Bukalenge bua Nzambi pa buloba bujima bilondeshile dîyi-dituma kudi Yezu, mmuomumue ne: ku nzubu ya bantu. (Matayo 10:7, 12; Bienzedi 20:20) Miliyo mivule ya Bantemu badi bakumbula bantu mu ditunga dionso bua kuyukila nabu pa bidi bitangila bulongolodi bupiabupia. Ke tshidi tshikufikishe ku dipeta broshire eu, bu mudi mudimu wa Bantemu ba Yehowa muikale kabidi wa dipatula ne diabanya miliyare ya mikanda idi yakula bua Bukalenge bua Nzambi. Udiku mumanye bantu bakuabu batu bayisha Bukalenge bua Nzambi ku nzubu ne ku nzubu pa buloba bujima anyi? Ne Mâko 13:10 udi uleja ne: mudimu’eu wa diyisha ne dilongesha udi ne bua kuenjibua “diambedi,” bangabanga ne nshikidilu kuluaye.
Diandamuna ku tshilumbu tshibidi tshinene
11. Ntshinyi tshikuabu tshidi Bantemu ba Yehowa bakumbaja pa kukokela ku bukokeshi bua Nzambi?
11 Pa kukokela ku mikenji ne mêyi-maludiki bia Nzambi, Bantemu ba Yehowa badi bakumbaja bualu bukuabu. Badi baleja ne: Satana uvua muena dishima pakambaye ne: bantu kabavua mua kushala ne lulamatu kudi Nzambi padibu mu diteta, nunku bandamuna ku tshilumbu tshibidi tshinene, tshidi tshitangila muoyo-mutoke wa bantu. (Yobo 2:1-5) Nansha mudibu nsangilu wa miliyo ya bantu ba mu matunga onso, Bantemu badi baleja, bu muntu umue, bulamatshi ku bukokeshi bua Nzambi. Nansha mudibu bantu bapange bupuangane, badi balamata ku luseke lua Nzambi pa bidi bitangila tshilumbu tshia bumfumu bukulu pa bionso, nansha Satana ubafinakaja.
12. Ku ditabuja diabu, mbanganyi badi Bantemu ba Yehowa bidikija?
12 Lelu’eu, miliyo eyi ya Bantemu ba Yehowa badi basakidila bujadiki buabu ku ebu bua mulongolongo wa bantemu bakuabu ba mu bikondo bia kale bakaleja bulamatshi kudi Nzambi. Bamue ba ku buobu ke: Abele, Nowa, Yobo, Abrahama, Sara, Izaka, Yakoba, Debora, Luta, Davidi, ne Danyele, pa kutela anu bakese aba. (Ebelu, nshapita 11) Anu bu mudi Bible wamba, badi ‘divuba dinene dia bantemu ba lulamatu.’ (Ebelu 12:1, NW) Buobu aba ne bakuabu pamue ne bayidi ba Yezu bakalama muoyo-mutoke kudi Nzambi. Ne Yezu muine nkayende wakafila tshilejilu tshitambe bunene pa kulama muoyo-mutoke mupuangane.
13. Mmêyi kayi a Yezu adi malelela pa bidi bitangila Satana?
13 Ebi bidi bileja ne: tshivua Yezu muambile bamfumu ba bitendelelu bua Satana ntshilelela: ‘Kadi katataka nudi nukeba mua kunshipa, meme muntu udi munuambile bualu bulelela bundi mumvue kudi Nzambi. . . . Nuenu nudi bana ba diabolo, tatu wenu, nudi basue kuenza bu mudi nkuka ya tatu wenu. Ku tshibangidilu yeye uvua mushipianganyi, katu wimana mu bualu bulelela, bualu yeye kêna ne bualu bulelela munda muende. Pambaye dîyi dia mashimi, udi wamba malu ende mene; bualu yeye udi muena mashimi, ne udi tatu wau.’—Yone 8:40, 44.
Ntshinyi tshiudi usungula?
14. Ntshinyi tshidi tshienzeka bua tshishimikidi tshia bulongolodi bupiabupia mpindieu?
14 Tshishimikidi tshia bulongolodi bupiabupia tshidi Nzambi wenda wasa mpindieu munkatshi mua nsangilu wa bukua-matunga wa Bantemu ba Yehowa tshidi tshienda tshikola anu kukola. Tshidimu tshionso bantu nkama ya binunu badi benza mudimu ne budisunguidi buabu, bushindamene pa dimanya dijalame, bua kuitaba bukokeshi bua Nzambi. Badi balua bena mu nsangilu wa bulongolodi bupiabupia, balamata ku luseke lua Nzambi mu tshilumbu tshia bumfumu bukulu pa bionso, ne baleja ne: Satana mmuena dishima.
15. Mmudimu kayi wa ditapulula wenza Yezu mu tshikondo tshietu etshi?
15 Pa kusungula bukokeshi bua Nzambi, nebadiakaje bua kutekibua ku ‘tshianza tshia balume’ tshia Kristo padiye utapulula “mikoko” ne “mbuji.” Mu mulayi wende wa matuku a ku nshikidilu, Yezu wakadianjila kuamba ne: ‘Bisamba bionso nebisangakane kumpala kuende, yeye neabatapulule bu mudi mulami utapulula mikoko ne mbuji; neateke mikoko ku tshianza tshiende tshia balume ne mbuji ku tshianza tshiende tshia bakaji.’ Mikoko mbantu bena bupuekele bavua badisangishe ne bana babu ne Kristo ne babatue nyama ku mikolo, pa kukokela ku bukokeshi bua Nzambi. Mbuji mbantu ba mutshima mupape bavua babenge bana babu ne Kristo ne kabayi benze bualu nansha bumue bua kutua bukokeshi bua Nzambi nyama ku mikolo. Ne bipeta kayi? Yezu wakamba ne: “Bantu aba [mbuji] nebaye mu dikenga [“dibutuka,” NW] dia tshiendelele, kadi bantu bakane [mikoko] nebaye mu muoyo wa tshiendelele.”—Matayo 25:31-46.
16. Ntshinyi tshiudi ne bua kuenza biwasua kuikala ne muoyo mu Mparadizu utshilualua?
16 Bushuwa, Nzambi udi uditatshisha bua bualu buetu! Mu katupa kîpi emu neenzela bantu mparadizu muimpe pa buloba. Udiku musue kusomba mu Mparadizu au anyi? Bikalabi nanku, leja dianyisha diebe bua ndongoluelu ya Yehowa pa kulonga mua kumumanya ne kuenza malu mu diumvuangana ne biudi ulonga. ‘Keba Yehowa paudi mumanye mua kumusangana; umubikidile patshidiye pabuipi. Muntu mubi alekele kuenda mu njila wende mubi, udi kayi muakane alekele meji ende mabi, apingane biende kudi Yehowa, yeye neamufuile luse.’—Yeshaya 55:6, 7.
17. Bua tshinyi kakuena dîba dia kujimija mu disungula dia utudi basue kusadila?
17 Kakuena dîba dia kujimija nansha. Nshikidilu wa bulongolodi ebu bukulakaje udi pabuipi menemene. Dîyi dia Nzambi didi dibela ne: “Kanunangi bulongolodi ebu peshi malu a mu bulongolodi ebu. Biananga muntu bulongolodi ebu, dinanga dia Tatu kadiena munda muende . . . Kabidi, bulongolodi ebu budi bupita ne dijinga diabu kabidi, kadi eu udi wenza disua dia Nzambi udi ushala kashidi.” —1 Yone 2:15-17, NW.
18. Mmalu kayi a kuenza akuambuluisha bua kutekemena ne dieyemena dionso bua kuikala ne muoyo mu bulongolodi bupiabupia bua mpatshi bua Nzambi?
18 Bantu ba Nzambi badi balongeshibua mpindieu bua muoyo wa kashidi mu bulongolodi bupiabupia. Badi balonga mamanya a mu nyuma ne makuabu adi akengedibua bua kulubuluja mparadizu. Tudi tukukankamija bua kusungula Nzambi bu Mukokeshi ne kutua mudimu wa disungila mioyo udiye wenzeja pa buloba lelu’eu nyama ku mikolo. Longa Bible ne Bantemu ba Yehowa, ne fika ku dimanya Nzambi udi uditatshisha bushuwa bua bualu buebe ne wajikija makenga. Mu dienza nunku, wewe pebe udi mua kulua muena mu tshishimikidi tshia bulongolodi bupiabupia. Pashishe udi mua kutekemena ne dieyemena dionso bua kupeta dianyisha dia Nzambi ne kuikala ne muoyo wa kashidi mu bulongolodi abu bupiabupia bua mpatshi.
[Tshimfuanyi mu dibeji 31]
Bantemu ba Yehowa badi ne buena-muntu bulelela bua bukua-matunga
[Tshimfuanyi mu dibeji 32]
Tshishimikidi tshia bulongolodi bupiabupia bua Nzambi tshidi mu diashibua mpindieu