Tudi tukujingila difika dilenga mu Kalasa ka Mudimu wa Nzambi!

KALASA ka Mudimu wa Nzambi kadi kambuluisha balongi miliyo mivule lumingu luonso elu mu matunga mapite pa 200. Bamue mbapiabapia. Bakuabu bakadi benzamu bidimu bia bungi. Kalasa aka kadi kenzeka mu miaba binunu ne binunu, kadi kabidi ne muaba mene uudi. Bakulumpe ne bana, bena bisamba bionso, badi balonge bia bungi ne bikese badi mu kalasa aka. Kabena bafuta kantu nansha kamue to.

Pakabangishabu kalasa aka mu bisumbu bia Bantemu ba Yehowa mu tshidimu tshia 1943, bakaleja tshivuabu bakenzele, bamba ne: bivua bua “kulongesha ‘bena lulamatu’ bonso, bantu bonso badi bumvue Dîyi dia Nzambi ne baditabuje, bua ‘kuikala bakumbane bua kulongesha bakuabu’ . . . , mbakenze bua kuambuluisha muntu yonso bua . . . ikale mumanye mua kumvuija bakuabu ditekemena didiye nadi munda muende.” (Course in Theocratic Ministry, dib. 4) Tshipatshila tshia kalasa aka ki ntshishintuluke to.

Bana betu, ntshinyi tshitudiku mua kuenza ne dipa dia kuakula didi Nzambi mutupeshe edi? Bible udi wandamuna ne: ‘Bintu bionso bidi bipuyakana bitumbishe Yehowa!’ (Mus. 150:6) Mutshima wa Tatu wetu wa mu diulu utu usanka patutu tumutumbisha. Patudi tumutumbisha, tudi tumuleja ne: mitshima yetu idi ne dianyisha bua bimpe bionso bidiye utuenzela ne bua mushindu udiye mutunange. Ke bualu kayi Bible udi ulomba bena Kristo bua ‘kufila kudi Nzambi mulambu wa kumutumbisha nawu, udi mamuma a mishiku idi ijikula ditabuja dia dîna diende.’ (Eb. 13:15) Tudi basue kukuambuluisha bua umanye mua kutumbisha Yehowa ne tshipedi tshidiye mukupeshe etshi bimpe. Mulongi wetu, tudi tukujingila difika dilenga mu Kalasa ka Mudimu wa Nzambi!

Nansha mudi kalasa aka katamba kushindamena pa mushindu wa kubala, ne wa kulongesha ne kuakula kumpala kua bantu, nekakuambuluishe kabidi mu mishindu mikuabu. Wewe mudifilamu, neumanye mua kudibadila, mua kuteleja ne kuvuluka malu, kulonga, kukeba mamanyisha makuabu, kukonkonona ne kulongolola malu, kuyikila, kuandamuna nkonko, ne kufunda malu. Malu a kulonga, a kufila bu mandamuna a nkonko ne midimu ya kuenza mu kalasa nebishindamene bionso pa Bible ne pa mikanda ya kumulonga nayi. Padi lungenyi luebe lupeta malu malelela adi mu Dîyi dia Nzambi, neumanye mua kuela meji mutu Nzambi musue. Nebikuambuluishe bikole mu malu onso. Mulongeshi munene William Lyon Phelps wa mu iniversite kampanda (wa mu bidimu bia 1900) wakaleja mushinga udi nawu Dîyi dia Nzambi e kufundaye ne: “Badi mua kuamba ne: muntu yonso udi mumanye Bible bikole mmuntu mumanye mukanda. . . . Buanyi meme, mbimpe kumanya Bible kuyi mulonge mu iniversite, pamutu pa kulonga iniversite kadi kuyi mumanye Bible.”

Mua kupeta diambuluisha bimpe

Mulongi wetu, udi ne bua kuenza amue malu bua Kalasa ka Mudimu wa Nzambi kukuambuluishaku menemene. Paulo wakambila mulunda wende Timote ne: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’ (1 Tim. 4:15) Kadi ntshinyi tshiudi mua kuenza menemene?

Wenze muebe muonso mua kuenza bua kuikala kubuela lumingu luonso mu Kalasa ka Mudimu wa Nzambi. Ukuate mudimu bimpe ne mukanda webe eu. Ufunde dîna diebe muaba wadi mu dibeji didi ne tshiena-bualu tshia mukanda eu. Wikale nawu misangu yonso iudi ulua mu kalasa aka. Bualu mudi miaba mikuabu iudi mua kufundila amue malu. Paudi upetamu malu audi mumone ne: neakuambuluishe, uele kalongo. Wewe mumone ne: bualu kampanda budibu bambe mu kalasa nebukuambuluishe, ubufunde miaba itudi bashiye ku nseke ne kuinshi mu mukanda eu.

Programe wa Kalasa ka Mudimu wa Nzambi udi pa buende. Programe eu nealeje muikalaku kenzeka. Wewe umuela mu mukanda eu, mbimpe be!

Paudi udilongolola lumingu luonso, wikale muvuluke ne: Bible ke mukanda munene utudi tuenza nawu mudimu. Wanji kubala nshapita idibu bafile lumingu alu. Padiku mushindu, ubale kabidi makuabu malu akonkononabu mu kalasa, bualu adi pawu ne mushinga wa bungi.

Imue misangu, badi mua kuela bantu nkonko padi kalasa kenzeka. Ikala wandamuna. Nebikuambuluishe bikole bua kuvuluka malu manene ne kuatumikila.

Kadi bantu bonso badi badifundishe mu kalasa aka nebapete midimu ya kuenzamu. Uyenze bimpe. Uditatshishe muebe muonso bua kukumbaja bilenga ngikadilu wa bungamba-malu udibu bakulombe. Nebakupeshe mibelu bua wewe kudiunda kuya kumpala mu nyuma. Witabe mibelu eyi ne muoyo mujima. Ufunde mibelu idi mua kukuambuluisha mu mukanda webe eu. Mibelu mishindamene pa Bible eyi, ne idibu bafila ne muoyo umue neikuambuluishe bikole be, nansha wewe muikale mulongi wa kale! Bualu bitu bikole bua muntu kudimona mudi bakuabu bamumona.​—Nsu. 1:5.

Udi musue kudiunda kuya kumpala ne lukasa anyi? Enza malu adi alonda aa. Ikala udilongolola bua mudimu wa mulongi yonso. Itaba bua kuenza mudimu wa mulongi udi kayipu to, nanku neumone muakuambuluishabi. Padi balongi bakuabu bapita kumpala, ubalonde bimpe, bualu tutu tumanyina amue malu kudi bakuabu.

Wewe udianjila kudibadila mukanda eu paudi ne mushindu, neuye kumpala kabidi lukasa menemene. Pawikala mumane kulonga bimpe malongesha 15 adi alonda edi, utuadije tshitupa tshia “Programe muenza bua kulua ngamba-malu ne mulongeshi muimpe,” kutuadija mu dibeji dia 78. Anji bala dilongesha dionso ne enza midimu idibu bakulomba. Ulonde mibelu idimu paudi uya mu buambi. Malu aa neakuambuluishe bikole bua kulua ngamba-malu ne mulongeshi muimpe wa Dîyi dia Nzambi.

Kalasa ka Mudimu wa Nzambi nekakufikishe ku dienza bualu bua mushinga wa bungi menemene. Bu mutudi ne muoyo bua disua dia Nzambi, nanku patudi tumutumbisha tudi tuleja ne: tudi bamanye bua tshinyi tudi ne muoyo. Yehowa Nzambi ke utudi ne bua kutumbisha bikole menemene! (Buak. 4:11) Malu atudi tulonga mu kalasa aka adi atuambuluisha bua kutumbisha Nzambi: tudi tuela meji mushindu muimpe, tuenza malu ne budimu, ne tuambila bantu malu malelela a mpatshi adi mu Dîyi dia Nzambi.