Nshapita Wa Dikumi Ne Muibidi
Tshidi batismo webe umvuija
1. Batismo wa mu mâyi udi ne bua kukoka ntema ya yonso wa kutudi bua tshinyi?
MU TSHIDIMU tshia 29 B.B., Yezu wakatambula, Yone Mubatiji wakamuina mu mâyi a Musulu wa Yadene. Yehowa nkayende uvua utangila muanda eu, e kulejaye ne: uvua mumuanyishe. (Matayo 3:16, 17) Nunku Yezu wakashiya tshilejilu tshivua bayidi bende bonso ne bua kulonda. Kunyima kua bidimu bisatu ne tshitupa, wakambila bayidi bende ne: ‘Bakumana kumpa bukokeshi buonso mu diulu ne pa buloba. Bualu bua meme ndi ne bukokeshi ebu, Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe.’ (Matayo 28:18, 19) Ukadi mutambule bu mudi dîyi diakatuma Yezu edi diamba anyi? Biwikala kuyi muanji kutambula, udiku munkatshi mua didilongolola bua kutambula anyi?
2. Nnkonko kayi idi itangila batismo idi ikengela kuandamuna?
2 Nansha mumane kutambula ta muikale udilongolola bua kutambula, tshidibi muntu yonso udi ujinga kukuatshila Yehowa mudimu ne kabidi ujinga bua kubuela mu bulongolodi buakane buende bupiabupia udi ne bua kukeba bua kumvua bimpe menemene tshidi batismo umvuija. Mona imue nkonko idi ikengela kuandamuna: Batismo udi bena Kristo bangata lelu udi umvuija tshintu tshimue ne batismo wa Yezu anyi? Kutambula ‘mu dîna dia Tatu ne mu dia Muana ne mu dia nyuma muimpe’ kudi kumvuija tshinyi? Ntshinyi tshidi tshikengela kuenza bua kuikala ne nsombelu udi upetangana ne diumvuija menemene dia batismo wa mu mâyi udi bena Kristo bangata lelu?
Batismo wa Yone
3. Batismo wa Yone uvua mulamina anu banganyi?
3 Ngondo bu isambombo kumpala kua Yezu kutambulaye, Yone Mubatiji wakaya kuyisha bantu mu tshipela tshia Yudaya wamba ne: ‘Kudimunayi mitshima yenu; bualu bua bukalenge bua mu diulu budi pepi.’ (Matayo 3:1, 2) Bantu bakateleja tshivua Yone wamba ne kutshitumikilabu. Bakatonda mpekatu yabu patoke, kunyingalalabu ne kuyilekela, ne pashishe kuyabu kudi Yone bua kutambula mu Musulu wa Yadene. Batismo au uvua anu bua bena Yuda.—Luka 1:13-16; Bienzedi 13:23, 24.
4. Bua tshinyi bena Yuda ba mu bidimu lukama bia kumpala bavua ne bua kudilengeja ku mpekatu yabu pa lukasa?
4 Bena Yuda abu bavua ne bua kukudimuna mutshima wabu pa lukasa. Mu tshidimu tshia 1513 K.B.B. ku mukuna wa Sinai, bankambua babu bakadia tshipungidi ne Yehowa Nzambi tshivua tshitangila tshisamba tshiabu tshijima. Kadi bua mpekatu minene ivuabu benze, kabavua bakumbaje malu avua atangila tshipungidi atshi to, nunku tshipungidi etshi tshiakabapisha. Mu tshikondo tshia Yezu, dikenga diakabakuata. ‘Dituku dinene [dia Yehowa] ne didi dikuatshisha bantu buôwa’ divua Malaki mumanyishe dikavua pabuipi. “Dituku” adi diakalua mu tshidimu tshia 70 B.B., pavua biluilu bia bena Lomo bibutule Yelushalema, kubutula ntempelo wende ne bena Yuda bapite pa muliyo mujima. Bakadianjila kutuma Yone Mubatiji, muntu uvua ne lukunukunu luvule bua ntendelelu mulelela kumpala kua kabutu aku, bionso ebi ‘bua kulongoluela [Yehowa] bantu badi ne mitshima yabu mimana kulongolola.’ Bavua ne bua kudilengeja ku mpekatu ivuabu benze bua ditupa ku Mikenji ya Mose ne kudilongolola bua kuitaba Yezu Muana wa Nzambi, uvua Yehowa mubatumine.—Malaki 4:4-6; Luka 1:17; Bienzedi 19:4.
5. (a) Pakalua Yezu bua kutambula, Yone wakelakana bua tshinyi? (b) Batismo wa Yezu uvua tshimfuanyi tshia tshinyi?
5 Yezu uvua pende munkatshi mua bantu bakalua kudi Yone bua kutambula. Bua tshinyi? Bu muvua Yone mumanye bimpe ne: Yezu kavua mua kutonda mpekatu bualu kavua nayi, wakamba ne: “Wewe ke uvua mua kuntua mu mayi. Kadi wewe ukadi ulua kundi!” Kadi batismo wa Yezu uvua ne tshimfuanyi tshia tshintu tshikuabu. Yezu wakamuandamuna ne: “Tuetu benze bionso ebi, netukumbaje bidi [Nzambi] utulomba.” (Matayo 3:13-15, MMV ) Bu muvua Yezu kayi ne mpekatu, batismo wende kavua tshimfuanyi tshia didilengeja ku mpekatu to; kabivua nansha mene bikengela bua kudilambulaye kudi Nzambi nansha, bualu yeye uvua wa mu tshisamba tshikavua tshimane kudilambula kudi Yehowa. Kadi batismo wende eu uvuaye muangate pavuaye ne bidimu 30 uvua wa pa buende, ne uvua tshimfuanyi tshia didifila diende kudi Tatuende wa mu diulu bua kuenza kabidi disua Diende.
6. Mmushindu kayi uvua Yezu wangata dienza disua dia Nzambi ne mushinga mukole?
6 Bua Kristo Yezu, disua dia Nzambi divua ditangila kuenza mudimu wa Bukalenge. (Luka 8:1) Divua kabidi ditangila kulambula muoyo wende wa muntu mupuangane bua kupikula bantu ne kuushiya bu tshishimikidi tshia tshipungidi tshipiatshipia. (Matayo 20:28; 26:26-28; Ebelu 10:5-10) Yezu wakangata tshivua batismo wende wa mu mâyi umvuija ne mushinga wa bungi menemene. Kakalekela bua lungenyi luende luya ku malu makuabu to. Ku ndekelu kua muoyo wende pa buloba, wakakumbaja disua dia Nzambi ne lulamatu luonso, kuvuijaye mudimu wa diyisha dia Bukalenge bua Nzambi mudimu wende munene.—Yone 4:34.
Batismo wa mu mâyi wa bayidi bena Kristo
7. Kubangila ku Pentekoste wa tshidimu tshia 33 B.B., ntshinyi tshivuabu bambile bena Kristo bua kuenza pa bidi bitangila batismo?
7 Bayidi ba Yezu ba kumpala bakabatambuisha mu mâyi kudi Yone ne pashishe bakaya kudi Yezu bua kuluabu bena mu Bukalenge bua mu diulu. (Yone 3:25-30) Ku bulombodi bua Yezu, bayidi abu bakatambuisha pabu bantu, ne batismo au uvua ne diumvuija dia muomumue ne dia wa Yone. (Yone 4:1, 2) Kadi, kubangila ku Pentekoste wa tshidimu tshia 33 B.B., bakabanga kuenza mudimu uvuabu babapeshe wa kutambuisha bantu ‘mu dina dia Tatu ne mu dia Muana ne mu dia nyuma muimpe.’ (Matayo 28:19) Neumone ne: bidi ne diambuluisha dia bungi bua kukonkonona tshidi batismo eu umvuija.
8. Kutambula “mu dina dia Tatu” kudi kumvuija tshinyi?
8 Kutambula “mu dina dia Tatu” kudi kumvuija tshinyi? Kudi kumvuija kuitaba dîna diende, muanzu udiye nawu, bumfumu buende, malu adiye mulongolole bua kuenza, ne mikenji yende. Tangila tshidi malu aa umvuija. (1) Bua bidi bitangila dîna diende, Musambu wa 83:18 udi wamba ne: ‘Wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ (2) Bua bidi bitangila muanzu udiye nawu, 2 Bakelenge 19:15 udi wamba ne: ‘Yehowa, wewe udi Nzambi nkayebe.’ (3) Bua bumfumu buende, Buakabuluibua 4:11 udi utuambila ne: ‘Wewe, [Yehowa] Nzambi wetu, udi muakane bua kuangata butumbi ne bunême ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua.’ (4) Tudi kabidi ne bua kumanya ne: Yehowa udi Mufidi wa muoyo udi ne dijinga dia kutusungila ku mpekatu ne lufu anu mudi Bible wamba ne: ‘Lupandu ludi lufuma kudi Yehowa.’ (Musambu 3:8; 36:9) (5) Tudi ne bua kuitaba ne: Yehowa ke Mufidi wa mikenji Mutambe Bunene, anu bu mudi Bible uleja ne: “Yehowa udi mulumbuluishi wetu, Yehowa udi mutueledi wa mikenji, Yehowa udi Mukalenge wetu.” (Yeshaya 33:22) Bu mudi mianzu yonso eyi mikale yende, badi batuambila ne: “Udi ne bua kunanga [Nzambi] webe ne mutshima webe wonso ne muoyo webe wonso ne lungenyi luebe luonso.”—Matayo 22:37, MML.
9. Kutambula ‘mu dîna dia Muana’ kudi kumvuija tshinyi?
9 Kutambula ‘mu dîna dia Muana’ kudi kumvuija tshinyi? Kudi kumvuija kumanya dîna dia Yezu Kristo, muanzu udiye nawu ne bumfumu buende. Dîna diende edi: Yezu didi diumvuija ne: “Yehowa udi lupandu.” Mbamupeshe muanzu udiye nawu eu bualu yeye udi Muana umuepele mulela wa Nzambi, tshifukibua tshia kumpala tshia Nzambi. (Matayo 16:16; Kolosai 1:15, 16) Bua Muana eu, Yone 3:16 udi wamba ne: ‘Nzambi wakatamba kusua ba pa buloba [badi mua kupikudibua], yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ Bu muakafua Yezu mu lulamatu, Nzambi wakamubisha ku lufu ne kumupeshaye bumfumu bukuabu. Bilondeshile mêyi a mupostolo Paulo, Nzambi ‘wakabandisha [Yezu] kulu kule’ munkatshi mua bifukibua bionso, kuluaye muntu udi mulondele Yehowa. Ke bua tshinyi ‘mu dîna dia Yezu binu bionso bitue panshi, ne bua ndimi yonso yambe patoke ne: Yezu Kristo udi Mukalenge, too ne ku butumbi bua Nzambi Tatu.’ (Filipoi 2:9-11) Ebi bidi biumvuija kutumikila mêyi a Yezu, adi mafume kudi Yehowa nkayende.—Yone 15:10.
10. Kutambula ‘mu dîna dia nyuma muimpe’ kudi kumvuija tshinyi?
10 Kutambula ‘mu dîna dia nyuma muimpe’ kudi kumvuija tshinyi? Kudi kumvuija kumanya mudimu wa nyuma muimpe ne mushindu udi nyuma muimpe ukuata mudimu eu. Kadi nyuma muimpe ntshinyi? Mbukole buenzeji bua Yehowa, budiye ukumbaja nabu malu ende. Yezu wakambila bayidi bende ne: ‘Nendombe Tatu, yeye neanupe musambi mukuabu, ikale nenu tshiendelele, nyuma wa bulelela.’ (Yone 14:16, 17) Nyuma eu uvua ne bua kubambuluisha bua kuenza tshinyi? Yezu wakabambila kabidi ne: ‘Nuenu nenuangate bukole, panupuekele nyuma muimpe pambidi penu; nenuikale bamanyi banyi mu Yelushalema ne mu Yudaya yonso ne Samalea ne ku mfudilu kua buloba.’ (Bienzedi 1:8) Yehowa wakafundisha kabidi Bible ku nyuma muimpe wende. ‘Kakuena diyisha dia baprofete diakalua ku disua dia muntu; kadi bantu bakamba dîyi dia kudi Nzambi benzeja kudi nyuma muimpe.’ (2 Petelo 1:21) Nunku tudi tuleja ne: tudi bamanye mudimu wa nyuma muimpe patudi tulonga Bible. Mushindu mukuabu utudi tuleja ne: tudi bamanye mudimu wa nyuma muimpe nkulomba Yehowa bua atuambuluishe tukuame “mamuma a nyuma,” adi mikale “dinanga, disanka, ditalala, muoyo-mule, bulenga, buimpe, ditabuja, bupole-malu, didikanda.”—Galatia 5:22, 23, NW.
11. (a) Diumvuija dilelela dia batismo lelu didi tshinyi? (b) Mmu mushindu kayi mudi batismo muikale bu kufua ne kubika?
11 Bantu ba kumpala bavua batambule bilondeshile mêyi a Yezu bavua bena Yuda ne bantu bavua bitabuje Buena-Yuda, kubangila mu tshidimu tshia 33 B.B. Kunyima kua matuku makese, bena Samalea bakapeta pabu mushindu wa kulua bayidi bena Kristo. Pashishe, mu tshidimu tshia 36 B.B., lubila elu luakaya kule, kufikalu too ne ku matshi a bantu ba bisamba bikuabu bavua kabayi batengula. Bangabanga ne bena Samalea ne bantu ba bisamba bikuabu kutambula, bavua ne bua kudilambula muntu ne muntu kudi Yehowa bua kumukuatshila mudimu bu bayidi ba Muanende. Etshi ke tshiakashala diumvuija dia batismo wa mu mâyi wa bena Kristo too ne mu matuku etu aa. Dinyibua dia muntu mujima mu mâyi ntshimfuanyi tshikumbanyine tshia diditshipa diende edi, bualu batismo udi bu dijikibua dia mu tshimfuanyi. Padibu bakuina mu mâyi a muaba udibu bakutambuisha, bidi bileja ne: udi ufua mu bumuntu buebe bua kumpala. Padibu bakujula mu mâyi amu, bidi bileja ne: udi ubika ku lufu bua kuenza disua dia Nzambi. ‘Batismo umue’ eu ke udi bonso badi balua bena Kristo balelela bapeta. Dîba didibu batambula, badi balua Bantemu ba Yehowa bena Kristo, babuela mu mulongo wa bena mudimu ba Nzambi bamanyike.—Efeso 4:5; 2 Kolinto 6:3, 4.
12. Batismo wa mu mâyi wa bena Kristo udi ufuanangana ne tshinyi, ne mmu mushindu kayi?
12 Batismo eu udi ne mushinga munene ku mêsu kua Nzambi. Tshilejilu, kunyima kua mupostolo Petelo mumane kuleja bua muvua Noa muibake buatu, muakapandukilabu yeye ne dîku diende ku Mvula wa kabutu, wakafunda ne: ‘Mâyi aa adi tshimfuanyi tshia dibatiza didi dinusungila mpindiewu: diodi edi kadiena anu ne bua kusukula bukoya bua mubidi, kadi mbua kulomba [Nzambi kuondo ka muoyo katoke]. Dibatiza didi dinusungila, diakalenga anu bua ku dibika dia Yezu Kristo ku lufu.’ (1 Petelo 3:21, MML) Buatu buvua tshijadiki tshimueneke bimpe tshia se: Noa uvua muenze ne lulamatu luonso mudimu uvua Nzambi mumupeshe. Pakajika mudimu wa dienza buatu, ‘buloba abu buakadiku mu tshikondo atshi buakabuikidibua ne mâyi, buakajimina.’ (2 Petelo 3:6) Kadi Noa ne dîku diende, ‘bantu muanda-mukulu bakapanda ku mâyi.’—1 Petelo 3:20, MMM.
13. Muena Kristo udi upandishibua ku tshinyi padiye wangata batismo wa mu mâyi?
13 Lelu’eu, aba badi badilambula kudi Yehowa bua ditabuja didibu nadi kudi Kristo mubishibue ku lufu badi batambula bua kuleja ne: bakavua badilambule. Badi benza disua dia Nzambi mu matuku etu aa ne mbasungidibue mu tshikondo etshi tshibi. (Galatia 1:3, 4) Kabatshiena kabidi mu njila wa kabutu wa ndongololuelu mubi eu to. Bakadi basungidibue ku kabutu aka ne Nzambi mmubapeshe kuondo ka muoyo kimpe. Mupostolo Yone udi ujadikila basadidi ba Nzambi ne: “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.”—1 Yone 2:17.
Tukumbajayi majitu etu
14. Bua tshinyi batismo nkayende kêna upetesha muntu lupandu?
14 Nebikale tshilema padi muntu wela meji ne: batismo nkayende udi ufikisha ku lupandu. Batismo udi ne mushinga anu padi muntu mudilambule kudi Yehowa mu bulelela ku butuangaji bua Yezu Kristo ne pashishe wenza disua dia Nzambi, ushala mumulamate too ne ku nshikidilu. ‘Wananukila too ne ku nshikidilu neasungidibue.’—Matayo 24:13.
15. (a) Disua dia Nzambi didi tshinyi lelu’eu bua bena Kristo bakadi batambule? (b) Kuikala muyidi muena Kristo kudi ne bua kuikala ne mushinga kayi mu nsombelu wetu?
15 Bua Yezu, disua dia Nzambi divua ditangila mushindu uvuaye wenza mudimu ne muoyo wende wa bumuntu. Uvua ne bua kuufila bu mulambu. Buetu tuetu, mibidi yetu tudi ne bua kuyifila kudi Nzambi, ne tudi ne bua kufila mulambu wa muoyo wetu mu dienza disua dia Nzambi. (Lomo 12:1, 2) Bushuwa, katuakuenza disua dia Nzambi bituikala ku misangu tuenza ku budisuile malu adi ba panu benza anyi bituikala bashile nsombelu wetu anu pa malu etu nkayetu, tuenzela Nzambi anu mudimu wa tshidingishilu. (1 Petelo 4:1-3; 1 Yone 2:15, 16) Pakakonka muena Yuda mukuabu tshivuaye ne bua kuenza bua kupeta muoyo wa tshiendelele, Yezu wakaleja mushinga wa kuikala ne bikadilu bimpe. Kadi wakaleja kabidi bualu bukuabu bua mushinga mutambe ebu, e kulejaye ne: bidi bikengela kuikala muyidi muena Kristo, anyi mulongi wa Yezu. Ke tshidi ne bua kuikala bualu bua kumpala mu nsombelu wa muntu. Kabuena ne bua kulua pa muaba muibidi munyima mua dikeba dia bintu to.—Matayo 19:16-21.
16. (a) Bena Kristo bonso badi ne mudimu kayi udi utangila Bukalenge? (b) Bilondeshile malu adibu baleje mu dibeji dia 116 ne dia 117, ng’imue ya ku mishindu mimpe kayi ya kuenza mudimu wa Bukalenge? (c) Didifila dietu ne muoyo mujima mu mudimu wa diyisha didi dijadika tshinyi?
16 Tudi kabidi ne bua kumanya ne: bua Yezu, disua dia Nzambi divua ditangila kuenza mudimu wa mushinga mukole wa Bukalenge bua Nzambi. Yezu uvua muntu uvua muedibue manyi bua kuikala Mukalenge. Kadi pavuaye pa buloba, wakenza kabidi mudimu wa dimanyisha Bukalenge ne lukunukunu luonso. Tudi ne mudimu wa kuyisha wa muomumue, ne tudi ne bua kudifilamu ne muoyo mujima. Patudi tuenza nunku, tudi tuleja dianyisha dietu bua bumfumu bunene bua Yehowa ne tuleja ne: tudi banange bantu netu. (Matayo 22:36-40) Tudi kabidi tuleja ne: tudi mu buobumue ne batendeledi netu badi pa buloba bujima (bonso badi bikale pabu bamanyishi ba Bukalenge). Bonso pamue, tudi tuya kumpala batangile ku tshipatshila tshietu tshia kuikala ne muoyo wa tshiendelele pa buloba bukokesha kudi Bukalenge abu.
Diambulula
• Mmalu kayi adi mafuanangane ne adi mashilangane pankatshi pa batismo wa Yezu ne batismo wa mu mâyi wa lelu’eu?
• Kutambula ‘mu dina dia Tatu ne mu dia Muana ne mu dia nyuma muimpe’ mmuomumue ne tshinyi?
• Ntshinyi tshidi tshikengela kuenza bua kukumbaja majitu adi atangila batismo wa mu mâyi wa bena Kristo?
[Bimfuanyi mu dibeji 116, 117]
IMUE MISHINDU YA KUYISHA BUKALENGE
Kudi balela betu
Kudi bena mudimu netu
Kudi balongi netu
Mu misesu
Ku nzubu ne ku nzubu
Mu dipinganyina bantu badi ne dijinga dia kumanya bivule
Mu dilonga ne bantu Bible kumabu