Nshapita Wa Tshitema
Ditekemena dia dibishibua dia bafue didi difila bukole
1. Bu kakuyi ditekemena dia dibishibua dia bafue, ntshinyi tshivua mua kuenzekela bafue?
UKADIKU mufuishe ba kampanda benu anyi? Bu kuoku kakuyi dibishibua dia bafue, kuvua mua kutekemena bua kubamona kabidi nansha. Bavua mua kushala kashidi anu mudi Bible umvuija ne: ‘Bafue kabena bamanye bualu [nansha] bumue, bualu bua kakuena mudimu, kakuena kulongolola kua malu, kakuena lungenyi anyi meji ku Muaba wa Bafue [lukita] kuudi uya.’—Muambi 9:5, 10.
2. Nditekemena kayi dilengele didi bantu mua kupeta ku diambuluisha dia dibishibua dia bafue?
2 Diakalenga, ku diambuluisha dia dibishibua dia bafue, Yehowa mmupeshe bantu bakadi bafue bungi kabuyi kubala mushindu muimpe mutambe wa kubika ku lufu ne kupeta muoyo wa tshiendelele. Mbuena kuamba ne: kudi mushindu wa wewe kuikala ne ditekemena didi disanguluja mutshima edi dia se: dimue dituku, wadiakumonangana ne ba kampanda bebe bafuile mu bukua-panu bupiabupia bua Nzambi.—Mâko 5:35, 41, 42; Bienzedi 9:36-41.
3. (a) Mmu mishindu kayi mudi dibika dia bafue dimueneke dia mushinga mukole mu dikumbana dia malu adi Yehowa mulongolole? (b) Ndîba kayi menemene didi ditekemena dia dibika dia bafue dikale mpokolo wa bukole kutudi?
3 Dibika dia bafue didi ditumbusha buôwa bua lufu. Yehowa udi mua kulekela Satana uya kule mu dikeba diende dia kujadika ne: ‘bionso bidi muntu nabi yeye neabifile bua kusungila muoyo wende,’ kadi kakulekela basadidi bende ba lulamatu aba bakenga kashidi to. (Yobo 2:4) Yezu wakashala mulamate Nzambi too ne ku lufu, ke Nzambi kumubisha ku lufu ne kumupaye muoyo mu diulu. Ke bualu kayi Yezu wakaleja mushinga wa mulambu wende wa muntu mupuangane udi usungila mioyo yetu kumpala kua nkuasa wa butumbi wa Tatuende mu diulu. Ku diambuluisha dia dibika dia bafue, bena mu “tshisumbu tshikese tshia mikoko” anyi bantu aba baapiana Bukalenge pamue ne Kristo badi ne ditekemena dia kuikala nende mu Bukalenge bua mu diulu. (Luka 12:32) Bakuabu badi buobu ne ditekemena dia dibika ku lufu bua kuikala ne muoyo wa tshiendelele pa buloba bukudimuna mparadizu. (Musambu 37:11, 29) Bena Kristo bonso batu bamona ditekemena dia dibika ku lufu bu mpokolo wa bukole “bupite” padibu mu mateta adi abamuenesha lufu ne mêsu.—2 Kolinto 4:7, MMM.
Dibika dia bafue ke nshindamenu wa ditabuja dia bena Kristo
4. (a) Mmushindu kayi udi dibika dia bafue dikale ‘dilongesha dia ntuadijilu’? (b) Mmunyi mutu bantu ba bungi bangata dibika dia bafue?
4 Anu mudi Ebelu 6:1, 2 uleja, dibika dia bafue ‘ndilongesha dia ntuadijilu.’ (MMM) Ntshitupa tshia tshishimikidi tshia ditabuja tshidi tshiotshi katshiyiku, tupanga mushindu wa kulua bena Kristo bapie mu nyuma. (1 Kolinto 15:16-19) Kadi, dilongesha dia mu Bible dia dibika dia bafue mbualu budi bena panu mu tshibungi kabayi nansha belela meji to. Bu mudibu kabayi basue malu a Nzambi, tshidibu bamona buobu tshidi anu muoyo utudi nawu mpindieu. Nunku mbasombele anu dikeba masanka. Pashishe, kudi badi mu bitendelelu bia baledi anyi bankambua babu (bidi anyi bidi kabiyi munkatshi mua bia Bukua-buena-Kristo) badi ne meji a ne: badi ne anyima udi kayi ufua. Kadi dilongesha edi kadiena mua kupetangana ne dilongesha dia mu Bible dia dibika dia bafue nansha, bualu dibika dia ku lufu kadiena mua kuikala ne mushinga to bikala muntu ne anyima udi kayi ufua. Kukeba bua kusambakaja malongesha abidi aa kakuena kumvuika ne kakuena nansha kufila ditekemena kampanda to. Mmushindu kayi utudi mua kuambuluisha bantu ba muoyo muimpe badi bajinga kumanya bulelela?
5. (a) Bangabanga ne muntu kujingululaye tshidi dibika dia bafue, bidi bikengela kumanyaye tshinyi kumpala? (b) Mmvese kayi uwenza nende mudimu bua kumvuija tshidi anyima muikale? bua kumvuija tshidi tshienzekela bantu padibu bafua? (c) Tudi mua kuenza tshinyi padi muntu muikale ne Bible udi umueneka ubuitshidija bulelela?
5 Kumpala kua bantu abu kujingululabu ne: dibika dia bafue mbualu bulenga budibu batulongoluele, badi ne bua kuanji kumanya bimpe tshidi anyima muikale ne tshidi tshienzekela bantu padibu bafua. Misangu mivule, mvese mikese patupu itu mua kuambuluisha bua kumvuija muntu udi ne nzala ya kumanya bulelela bua mu Bible malu aa bimpe. (Genese 2:7; Musambu 146:3, 4; Yehezekele 18:4) Pabi, imue Bible ya matuku etu aa ne minga idibu bakudimune mudibu basue idi isokoka bulelela pa bidi bitangila anyima. Nunku bidi mua kuikala ne mushinga bua kutangila miaku ya mu miakulu ya kale yakafundabu Bible.
6. Mmunyi muudi mua kuambuluisha muntu bua kumanyaye tshidi anyima muikale?
6 Bible wa Traduction du monde nouveau udi mua kutuambuluisha bikole bualu mbakudimunemu bimpe menemene muaku wa mu tshiena-Ebelu eu: nèphèsh, ne wa tshiena-Greke udi ne diumvuija dia muomumue nawu eu: psukhê ne: “musûke” peshi “anyima.” Ku ndekelu kua Bible eu kudi mulongolongo wa mvese idi ne miaku eyi. Mu Bible mikuabu ya bungi kabena bakudimune mushindu umue miaku ibidi eyi to, mbakudimune tshilejilu ne: “anyima peshi musûke,” ne: “tshifukibua,” “muntu anyi tshintu tshidi ne muoyo,” “muntu” ne “muoyo”; mbakudimune tshiambilu tshia ne: “nèphèsh wanyi” ne: “ndi,” ne “nèphèsh webe” mbakudimune ne: “udi.” Difuanyikija Bible mikuabu ne wa Traduction du monde nouveau nediambuluishe mulongi udi ne muoyo wa kumanya bua kujingululaye ne: miaku ya mu miakulu ya ku mbangilu idibu bakudimune ne: “anyima” idi itangila bantu ne nyama. Kadi miaku ibidi eyi kayena ifila nansha kakese lungenyi lua anyima udi kayi umueneka, tshintu tshidibu kabayi mua kulenga tshidi mua kupatuka mu mubidi wa muntu padiye ufua ne kutungunuka ne kuikala ne muoyo muaba mukuabu nansha.
7. Mmushindu kayi uudi mua kuenza mudimu ne Bibe bua kumvuija tshidi tshienzekela badi mu Shéol? badi mu Hadès? ne badi mu Ngena?
7 Bible wa Traduction du monde nouveau udi kabidi upetangana miaba yonso idi muaku wa “Shéol” mutentulula ku wa tshiena-Ebelu wa she’ôl ne muaku “Hadès” mutentulula ku wa tshiena-Greke wa haïdês ne muaku “Géhenne” mutentula ku wa tshiena-Greke wa géénna. Muaku “Shéol” udi wamba tshintu tshimue ne eu wa “Hadès.” (Musambu 16:10; Bienzedi 2:27) Bible udi uleja bimpe ne: miaku yonso ibidi eyi: Shéol ne Hadès idi yumvuija lukita lua bukua-bantu ne badi bayitela anu padibu bakula bua lufu, ki mbua muoyo to. (Musambu 89:48; Buakabuluibua 20:13) Bible udi kabidi wakula bua ditekemena dia kupatuka mu lukita anyi kubika ku lufu. (Yobo 14:13; Bienzedi 2:31) Kadi kakuena ditekemena dia kuikala ne muoyo matuku atshilualua bua aba badi baya mu Ngena (Géhenne) nansha, ne kabena nansha bamba ne: anyima udi ne muoyo mu Ngena to.—Matayo 10:28.
8. Mmushindu kayi udi ngumvuilu muakanyine wa dibika dia bafue mua kuambuluisha muntu mu ngikadilu wende ne bienzedi biende?
8 Padibu batokeshila muntu malu aa, bidi mua kumuambuluisha bua kumvuaye mushinga udi nawu dibika dia bafue. Udi mua kutuadija kuleja dianyisha bua dinanga dia Yehowa didi dimusake bua kulongolola bualu bulenga bua nunku. Kanyinganyinga kadi naku badi bafuishe kadi mua kukepela bua disanka didibu badianjila kuikala nadi dia kumonangana mu ndongoluelu mupiamupia wa Nzambi ne babu bakafua. Kumvua malu aa kudi kabidi ne mushinga wa bungi bua kufika ku dimanya mushinga udi nawu lufu lua Yezu. Bena Kristo ba kumpala bavua bamanye bimpe ne: dibika dia Yezu Kristo ku lufu divua nshindamenu wa ditabuja dia bena Kristo, ne diodi ke didi diunzulule njila bua dibika ku lufu dia bakuabu. Bakayisha bua dibika dia Yezu ku lufu ne lukunukunu luonso, kuyishabu kabidi ne bua ditekemena didi dibika edi difila. Nunku, bantu badi ne dianyisha lelu’eu bua dibika dia bafue badi bakeba ne muoyo mujima bua kumanyisha bakuabu bulelela bua mushinga mukole ebu.—Bienzedi 5:30-32; 10:42, 43.
Dienza mudimu ne ‘nsapi wa muaba wa bafue’
9. Yezu uvua muenze mudimu kumpala ne “nsapi wa lufu ne wa muaba wa bafue” munyi?
9 Bonso badi ne bua kuya kukokesha ne Kristo mu Bukalenge buende bua mu diulu nebikale ne bua kuanji kufua. Kadi nansha nanku mbamanye bimpe mushindu wakabashindikilaye pakambaye ne: “Mvua mufue, mpindiewu ndi ne muoyo mu nkama ne nkama ya bidimu, mulame nsapi wa lufu ne wa muaba wa bafue.” (Buakabuluibua 1:18, MMM) Yezu uvua usua kuamba tshinyi? Uvua uleja bantu pa tshiakamuenzekela yeye nkayende. Yeye pende wakafua. Kadi Nzambi kakamulekela mu Hades to. Dituku disatu, Yehowa wakamubisha ne kumupesha muoyo wa mu nyuma, kakuyi kabidi mushindu wa kufuaye to. (Bienzedi 2:32, 33; 10:40) Nzambi wakamupesha kabidi “nsapi wa lufu ne wa muaba wa bafue” uvuaye ne bua kuenza nende mudimu bua kupatula bakuabu mu muaba wa bafue ne ku mpekatu wa Adama. Bu mudi Yezu muikale ne nsapi eyi, udi ne bukokeshi bua mua kubisha bayidi bende ba lulamatu ku lufu. Udi utuadija ne bela manyi a nyuma ba mu tshisumbu tshiende, ubapesha dipa dia mushinga mukole dia kuikala ne muoyo kabayi mua kufua mu diulu, anu bu muvua Tatuende mumupeshedi pende.—Lomo 6:5; Filipoi 3:20, 21.
10. Dibika ku lufu dia bena Kristo bela manyi ba lulamatu didi dituadija tshikondo kayi?
10 Ntshikondo kayi tshikala bena Kristo bela manyi mua kubishibua ku lufu bua kuya mu diulu? Bible udi uleja ne: bakadi batuadije kubabisha. Mupostolo Paulo wakaleja ne: bavua ne bua kubishibua mu tshikondo tshia ‘dikalaku dia Kristo,’ didi dituadije mu tshidimu tshia 1914. (1 Kolinto 15:23, NW) Padi bela manyi ba lulamatu bafua mpindieu mu tshikondo etshi tshia dikalaku dia Yezu, kabena bashala bafue too ne ku dipingana dia Mukalenge wabu to. Diakamue padibu bafua, badi babishibua mu nyuma, ‘bandamuka, mu dîba dikese, mu kuvinya kua dîsu.’ Ndisankapu kayi didibu nadi, bualu malu abu mimpe avuabu benze ‘adi aya nabu’!—1 Kolinto 15:51, 52; Buakabuluibua 14:13.
11. Nekuikale dibika dia bafue kayi bua bantu bonso, ne nedituadije tshikondo kayi?
11 Kadi kakuakuikala anu dibika ku lufu dia bantu aba bapiana Bukalenge payabu mu diulu to. Bu mudibu badibikila mu Buakabuluibua 20:6 ne: “dibika dia ku lufu dia kumudilu,” bidi biumvuija ne: dikuabu didi ne bua kulonda. Bantu babishabu mu dibika edi nebatekemene bua kupeta muoyo wa tshiendelele mu mparadizu pa buloba. Dibika edi nedienzeke tshikondo kayi? Mukanda wa Buakabuluibua udi uleja ne: nebienzeke pumbuka “buloba ne diulu” bidiku mpindieu, mmuomumue ne: ndongoluelu wa malu mubi eu ne bakokeshi badimu. Nshikidilu wa ndongoluelu wa kale eu ukadi pabuipi menemene. Pashishe, mu tshikondo tshidi Nzambi mujadike, dibika dia bafue dia pa buloba nedituadije.—Buakabuluibua 20:11, 12.
12. Mbanganyi bikala munkatshi mua bena lulamatu babishibua ku lufu pa buloba, ne bua tshinyi adi nditekemena didi ditusankisha?
12 Mbanganyi babishibua bua kusomba pa buloba? Munkatshi muabu nemuikale basadidi ba Yehowa ba lulamatu ba mu bikondo bia kale, balume ne bakaji “bavua babenga bua bantu kababasungididi,” anu bua ditabuja diabu dikole mu dibika dia bafue. Mbuena kuamba ne: kabavua mua kubenga Nzambi anu bua kuepuka lufu lua kanyawu, luvuabu kabayi batekemene to. Ndisankapu kayi dituikala nadi bua kumanyangana nabu ne kubateleja buobu nkayabu batulondela mu bule ne mu butshiama mianda idibu anu balonde mu tshikoso mu Bible! Mu bantu babika ku lufu bua kuikala ne muoyo pa buloba nemuikale Abele, ntemu wa Yehowa wa lulamatu wa kumpala; Hanoka ne Noa, bavua bamanyishi ba dikima ba mukenji wa Nzambi wa didimuija bantu kumpala kua Mvula wa Kabutu kuluaye; Abalahama ne Sala bavua bakidile banjelo; Mose mufikishi wa Mikenji ivuabu bamupeshe ku mukuna wa Sinai; baprofete ba dikima bu mudi Yelemiya, wakamona muakabutulabu Yelushalema mu 607 K.B.B.; ne Yone Mubatiji wakadiumvuila ne ende abidi muvua Nzambi umanyisha ne: Yezu udi Muanende. Nekuikale kabidi bantu ba lulamatu ba bungi (balume ne bakaji) badi bafue mu matuku aa a ku nshikidilu a ndongoluelu mubi eu.—Ebelu 11:4-38, MMV; Matayo 11:11.
13, 14. (a) Tshienzekela muaba wa bafue ne bafue badimu ntshinyi? (b) Mbanganyi babishibua ku lufu, ne bua tshinyi?
13 Mu bule bua matuku, pa kumbusha basadidi ba lulamatu ba Nzambi, bakuabu bantu nebabishibue pabu, kabayi bashiya muntu nansha umue mu lukita lua bukua-bantu to. Bungi bua bantu bumbushabu mu nkita ayi budi mua kumuenekela ku mushindu wikala Yezu ne bua kuenza mudimu ne ‘nsapi ya muaba wa bafue’ bua kuambuluisha bantu. Mbaleje malu aa mu tshikena-kumona tshiakapeshabu mupostolo Yone, muakamonaye muaba wa bafue ‘bawela mu dijiba dia kapia.’ (Buakabuluibua 20:14) Mmumue ne tshinyi? Mmuomumue ne: nebabutule muaba wa bafue ta lukita lua bukua-bantu butubutu. Kawakuikalaku kabidi to, nebumushemu bafue bonso, bualu, pa kumbusha dibika ku lufu dia batendeledi ba Yehowa ba lulamatu bonso, bua luse, Yezu neabishe kabidi too ne bantu badi kabayi bakane. Dîyi dia Nzambi didi ditujadikila ne: “Dibika dia bafue nedikaleku, ne dia bakane ne dia [badi kabayi bakane].”—Bienzedi 24:15.
14 Muntu nansha umue wa ku aba badi kabayi bakane kakubishibua ku lufu anu bua kumukoselabu tshibawu tshia kufuaye tshiakabidi to. Mu nsombelu muakane wikalaku pa buloba bujima buikala ku bukokeshi bua Bukalenge bua Nzambi, nebambuluishe bantu abu bua kuikalabu ne nsombelu udi upetangana menemene ne mikenji ya Yehowa. Tshikena-kumona atshi tshiakaleja ne: nebabulule “mukanda wa muoyo.” Nanku, nebafundemu mêna abu. ‘Nebabalumbuluishe muntu yonso pa malu ende’ avuaye wenza kunyima kua dibika diende ku lufu. (Buakabuluibua 20:12, 13, MMM) Nunku, bilondeshile bienzedi bikalabu nabi ku ndekelu, dibika diabu didi mua kuikala “dibika dia muoyo” ne kadiakuikala ‘dibika dia dipila’ didi muntu kayi mua kuepuka to.—Yone 5:28, 29.
15. (a) Wikala kayi mua kubishibua ku lufu nnganyi? (b) Dimanya dia bulelela pa bidi bitangila dibika dia bafue didi ne bua kutusaka ku tshinyi?
15 Kadi ki mbantu bonso bavua ne muoyo ne bakadi bafue babishibua ku lufu to. Bamue bavua benze mpekatu idibu kabayi mua kubafuila luse to. Bantu ba nanku kabena mu Hades peshi mu lukita to, kadi badi mu Ngena, mbuena kuamba ne: mbabutudibue bua kashidi. Munkatshi muabu nemuikale kabidi bantu babutulabu mu “dikenga dinene” dikadi mene pabuipi. (Matayo 12:31, 32; 23:33; 24:21, 22; 25:41, 46; 2 Tesalonike 1:6-9) Nunku, nansha mudi Yehowa uleja luse lua pa bualu padiye wanyisha bua kubisha bantu badi mu Hades, ditekemena dia dibika dia bafue kadiakuikala ne bua nsongo bituikala tulengulula bualu bua nsombelu utudi ne bua kuikala nende mpindieu. Kakuakuikala dibika ku lufu bua bantu badi batombokela bumfumu bunene bua Yehowa ku bukole to. Dimanya edi didi ne bua kutusaka bua kuleja ne: tudi tuanyisha bikole bulenga budi kabuyi butuakanyine budi Nzambi utuleja patudi tutumikila disua diende mu nsombelu wetu.
Ditekemena dia dibika dia bafue didi ditukolesha ku muoyo
16. Mmunyi mudi ditekemena dia dibika dia bafue mua kutupesha bukole bua bungi?
16 Bonso ba kutudi badi bitabuje ditekemena dia dibika dia bafue badi mua kupetelaku bukole bua bungi. Bua mpindieu, patudi tukulakaja, tudi bamanye bimpe ne: katuena mua kusemeja lufu kule to nansha buobu batuondapa mushindu kayi. (Muambi 8:8) Bituikala benzele Yehowa mudimu ne lulamatu mu bulongolodi buende, tudi mua kutekemena masanka mu matuku atshilualua ne dishindika dionso. Tudi bamanye bimpe ne: dibika dia bafue didi mua kutuambuluisha bua tuikale kabidi ne muoyo mu tshikondo tshidi Nzambi mulongolole. Mu tshikondo atshi nsombelu neikale mulenga be! Mupostolo Paulo wakabikila nsombelu eu ne: ‘muoyo wa bushuwa.’.—1 Timote 6:19; Ebelu 6:10-12.
17. Ntshinyi tshidi mua kutuambuluisha bua kulama lulamatu luetu kudi Yehowa?
17 Kumanya ne: nekuikale dibika dia bafue ne kumanya kabidi Eu udi mulongolole bualu ebu kudi kutusaka bua kuikala bakole mu ditabuja. Kudi kutupesha bukole bua kushala balamate Nzambi nansha buobu bakeba kutushipa kudi bantu badi batukengesha ne tshikisu tshionso. Satana mmutshinyishe bantu kukadi matuku a bungi ne lufu lua tshikoso bua kumona mua kubakuata ku bupika buende. Kadi Yezu kakatshina lufu lua nunku to. Wakalamata Yehowa too ne ku lufu luende. Ku diambuluisha dia mulambu wende udiye mupikule nawu bantu, Yezu wakabapetesha mushindu wa kubumbusha buôwa bua buena ebu.—Ebelu 2:14, 15.
18. Ntshinyi tshiakambuluisha basadidi ba Yehowa bua kuendabu lumu lunene lua bantu bena lulamatu?
18 Bua ditabuja didi nadi basadidi ba Yehowa mu mulambu wa Kristo ne mu dibika dia bafue, mbende lumu lua mudibu bantu bena lulamatu. Padibu babakengesha, badi baleja ne: ‘ki mbasue mioyo yabu’ kupita mushindu udibu banange Yehowa to. (Buakabuluibua 12:11) Ne meji onso, kabena bashipa mikenji ya Buena-Kristo bua kukeba bua kusungila muoyo wabu udibu nawu mpindieu to. (Luka 9:24, 25) Mbamanye bimpe ne: nansha buobu mua kujimija muoyo wabu mpindieu bualu badi bateka bumfumu bunene bua Yehowa pa muaba wa kumpala, neabavuluke, bushuwa neababishe ku lufu. Udi pebe ne ditabuja dia mushindu’eu anyi? Newikale nadi biwikala munange Yehowa mumunangilemu ne biwikala wanyisha mushinga udi nawu ditekemena dia dibishibua dia bafue.
Diambulula
• Bua tshinyi bidi bikengela bua muntu kuanjiye kumanya dilongesha didi ditangila anyima ne tshidi tshienzekela bantu padibu bafua kumpala kua kujingululaye dia dibika dia bafue?
• Wabishibua ku lufu nnganyi, ne dimanya edi didi ne bua kutusaka ku tshinyi?
• Mmunyi mudi ditekemena dia dibika dia bafue ditukolesha ku muoyo?
[Tshimfuanyi mu dibeji 84, 85]
Yehowa mmulaye ne: nekuikale dibika dia ku lufu dia bantu bakane ne badi kabayi bakane