NSHAPITA WA 21
Tudiku mua kuditambisha bua bualu kampanda anyi?
KUDITAMBISHA kudi kumvuija tshinyi? Udiku mumanye tshidiku kumvuija anyi?— Mona tshilejilu etshi. Ukadiku mutete kuenza bualu buudi kuyi mumanye bimpe anyi? Pamuapa uvua muidikije bua kututa ndundu ne dikasa. Anyi uvua mutete bua kunaya muonji. Kuvuaku muntu uvua mukuseke dîba adi wamba ne: “Aka! Aka! Meme ndi mua kuenza bimpe kukupita wewe kule ne kule” anyi?— Mmumue ne: muntu au uvua uditambisha.
Utu umvua tshinyi padi bakuabu baditambisha? Utu usanka anyi?— Nunku udi wela meji ne: bakuabu badi mua kumvua tshinyi paudi wewe uditambisha?— Udi mumone ne: mbualu buimpe wewe wambila muntu ne: “Ndi mukupite” anyi?— Yehowa utu musue bantu batu benza nanku au anyi?—
Mulongeshi Munene uvua mumanye bantu bavua bela meji ne: mbapite bakuabu. Bavua baditambisha anyi badiela mulu, bapetula bakuabu bonso. Nunku dituku dikuabu Yezu wakabalondela muyiki kampanda bua kubaleja ne: kuditambisha nkubi. Tutelejayi.
Muyiki au udi wakula bua Mufalese ne mulambuishi wa bitadi. Bafalese bavua balongeshi ba malu a Nzambi bavua misangu mivule benza malu anu bu ne: bavua bantu bakane anyi bansantu kupita bantu bakuabu. Mufalese wa mu muyiki wa Yezu wakaya yeye mu ntempelo wa Nzambi wa ku Yelushalema bua kusambila.
Bua tshinyi Nzambi uvua muanyishe mulambuishi wa bitadi kadi kubenga kuanyisha Mufalese?
Yezu wakamba ne: mulambuishi wa bitadi wakaya pende mu ntempelo bua kusambila. Bantu ba bungi kabavua basue balambuishi ba bitadi to. Bavua bamona ne: balambuishi ba bitadi bavua babashima bua kubiba makuta. Mbualu bulelela bua se: balambuishi ba bitadi ba bungi kabavua bantu ba malu malelela to.
Mufalese wakatuadija kusambila Nzambi mu ntempelo amu mushindu eu: ‘Nzambi, ndi nkuela tuasakidila bua mundi tshiyi muenji wa mpekatu bu bantu bakuabu to. Tshitu ngiba bantu anyi ngenza malu makuabu mabi to. Tshiena bu mulambuishi wa bitadi wawa naka to. Ndi muntu muakane. Ntu nsomba ne nzala misangu ibidi ku lumingu bua meme kupeta dîba dia bungi dia kuela meji pa bualu buebe. Ntu mfila mu ntempelo tshia dikumi tshia bintu bionso bindi mpeta.’ Mufalese eu uvua bushuwa muele meji ne: uvua mupite bakuabu, ki mmuomu anyi?— Kabidi wakambila Nzambi malu a nanku.
Kadi mulambuishi wa bitadi yeye kavua nanku to. Kavua nansha ujula mpala mulu pavuaye usambila to. Uvua muimanyine pa bule muinamije mpala panshi. Mulambuishi wa bitadi uvua unyingalala bikole bua mpekatu yende, uvua ukuma mu tshiadi bua kuleja kanyinganyinga kende. Kakateta bua kuambila Nzambi mushindu uvuaye muimpe to. Kadi, wakasambila ne: ‘Nzambi, umfuile luse bualu ndi muenji wa mpekatu.’
Udi wela meji ne: nganyi wa ku babidi aba uvua usankisha Nzambi? Mmufalese uvua wela meji ne: mmuntu muimpe anyi? Peshi uvua mulambuishi wa bitadi uvua unyingalala bua mpekatu yende?—
Yezu wakamba ne: mulambuishi wa bitadi ke wakasankisha Nzambi. Bua tshinyi? Yezu wakumvuija ne: ‘Bualu bua muntu yonso udi uteta bua kudileja bu se: mmupite bantu bakuabu nebamupuekeshe. Kadi eu udi udipuekesha ku mêsu ende nkayende nebamubandishe.’—Luka 18:9-14.
Yezu uvua ufila dilongesha kayi mu muyiki wende eu?— Uvua ulongesha ne: mbibi kuela meji ne: tuetu tudi bapite bakuabu. Tudi mua kuikala katuyi tuamba mukana nunku ne: tudi bapite bakuabu, kadi mu malu atudi tuenza, tudi mua kuleja ne: tudi tudimona tuetu bapite bakuabu. Ukadiku pebe muenze nunku anyi?— Mona tshiakenza mupostolo Petelo.
Pavua Yezu muambile bapostolo bende ne: nebamunyeme pamukuatabu, Petelo wakadikuma mu tshiadi wamba ne: ‘Nansha bakuabu bonso bakunyeme, meme tshiakukunyema nansha!’ Kadi Petelo uvua udishima. Uvua mutambe kudieyemena bikole. Wakalua kunyema Yezu. Kadi wakapingana anu bu mutuamona mu Nshapita wa 30 wa mukanda eu.—Matayo 26:31-33.
Tuangatayi tshilejilu tshia matuku etu aa. Badi mua kuikala banuela nkonko mu kalasa, wewe ne mulongi nebe. Newenze tshinyi wewe mumanye mua kufila mandamuna lukasa anu dîba didibu banuela nkonko adi, kadi mulongi nebe mukuabu au kayi mua kuandamuna bu wewe? Bushuwa, udi udiumvua bimpe paudi mumanye mandamuna. Kadi bidiku mua kuikala bimpe wewe utembangana ne mukuebe udi ne lujoko lua kuandamuna au anyi?— Mbualu buimpe bua kukeba mua kudibandisha ne kupuekesha mukuebe anyi?—
Ke tshivua Mufalese au muenze. Uvua uditambisha ne: yeye uvua mupite mulambuishi wa bitadi. Kadi Mulongeshi Munene wakamba ne: Mufalese uvua udishima. Bushuwa, muntu kampanda udi mua kuikala mumanye kuenza amue malu bimpe kupita muntu mukuabu. Kadi ki mbuena kuamba ne: udi menemene mupite bakuabu to.
Wewe muikale mumanye malu a bungi kupita muntu mukuabu, bidi bikuvuija muntu wa pa buende anyi?
Nunku bituikala bamanye malu a bungi kupita muntu mukuabu, ke bualu butudi mua kuditambishila anyi?— Elabi meji pa bualu ebu. Tuetu ke bavua bafuke buôngo buetu anyi?— Tòo, Nzambi ke uvua mutupeshe buonso buetu buôngo. Kabidi malu a bungi atudi bamanye, tudi baamanyine kudi muntu mukuabu. Pamuapa tudi baabale mu mukanda kampanda. Peshi kudi mua kuikala muntu udi mutuambilewu. Nansha ne: tuvua bafike ku dimanya bualu tuetu nkayetu, kadi mmunyi mutuvua bafike ku dibumanya?— Ku diambuluisha dia buôngo buvua Nzambi mutupeshe.
Padi muntu wenza muende muonso, bualu buimpe buudi mua kuenza nkumuambilaku dîyi didi mua kumukolesha ku muoyo. Muambile ne: udi musue bualu budiye muenze. Udi nansha mua kumuambuluisha bua kutambaye kubuenza bimpe. Si ke tshiudi mua kuanyisha bua bantu bakuenzele wewe, ki mmuomu anyi?—
Bua tshinyi kuditambisha nkubi wewe muikale ne bukole bua bungi kupita muntu mukuabu?
Kudi bamue bantu badi ne bukole kupita bakuabu. Newenze tshinyi wewe muikale ne bukole kupita muanenu wa balume anyi wa bakaji? Mbualu buudi mua kuditambishila anyi?— Tòo, kabiena nanku to. Biakudia bitudi tudia ke bidi biambuluisha bua se: tuikale ne bukole. Nzambi udi utupesha munya ne mvula ne bintu bikuabu bidi bikengedibua bua kumenesha biakudia, ki mmuomu anyi?— Nanku, Nzambi ke utudi ne bua kuela tuasakidila tuetu bikale ne bukole bua bungi.—Bienzedi 14:16, 17.
Kakuena muntu nansha umue wa kutudi utu musue kumvua muntu uditambisha, ki mmuomu anyi?— Tuvulukayi mêyi a Yezu aa: ‘Nuenzele bantu malu onso anudi basue [bua] banuenzele.’ Tuetu tuenza nanku, katuakuikala bu Mufalese wakadikuma mu tshiadi wa mu muyiki uvua Mulongeshi Munene mulonde to.—Luka 6:31.
Umue musangu muntu mukuabu wakabikila Yezu ne: muimpe. Mulongeshi Munene wakambaku ne: ‘Eyowa, ndi muimpe’ anyi?— Tòo, kakamba nanku to. Kadi wakamba ne: “Kakuena muntu mulenga nansha umue, anu [Nzambi] nkayende.” (Mâko 10:18, MMM) Nansha muvua Mulongeshi Munene muikale muntu mupuangane, kakaditambisha to. Kadi wakambika Yehowa Tatuende butumbi buonso.
Nunku, kudiku muntu utudi mua kuditambisha bua bualu buende anyi?— Eyowa, udiku. Tudi mua kuditambisha bua bualu bua Mufuki wetu Yehowa Nzambi. Patudi tumona bulengele bua mushindu udi dîba dibuela ku dilolo peshi bintu bikuabu bia kukema bidi Nzambi muenze, tudi mua kuambila muntu ne: ‘Yehowa, Nzambi wetu wa malu a kukema, ke udi mubienze!’ Tuikalayi dîba dionso badiakaje bua kuakula bua malu a kukema adi Yehowa muenze ne aluaye kuenza mu matuku atshilualua.
Muana eu udi uditambisha bua tshinyi?
Bala tshidi Mifundu yamba bua diditambisha anyi didiela mulu, bua umanye mushindu utudi ne bua kuepuka diditambisha: Nsumuinu 16:5, 18; Yelemiya 9:23, 24; 1 Kolinto 4:7 ne 13:4.