Buloba Ebu Mbutangile Kuepi?
Bilumbu bikole ne mianda idi ikuatshisha buôwa mbilue ngumu ya dituku dionso mu buloba bujima! Bualu ebu budi buleja tshinyi?
DIKUBIBUA DIA BANTU: Bombe mmitayike mu bisalu. Mbase balongeshi ne balongi bingoma mu tulasa. Mbabakule bana pavua baledi babu mu ditanaji. Mbakuate bantu bakaji ne bantu bakulakaje mu njila ne babenzele bibi mundamunya.
NSOMBELU MU BITENDELELU: Bitendelelu bidi biambuluisha bisumbu bia bantu badi baluangana mvita. Badi bafunda balombodi ba ekeleziya bua dishipesha bantu mu mvita ya dibutula bisamba bikuabu. Bansaserdose badi balala ne bansonga ku bukole; ekeleziya yabu idi isokoka malu aa. Diya dia bantu mu masangisha a bitendelelu ndikepele; badi bapanyisha nzubu ya bitendelelu.
BINTU BIDI BITUYUNGULUKE: Badi banyanga mêtu bua malu a bu-ngenda. Bapele badi bakosa mitshi yonso idi mu mêtu bua kupeta nkunyi anyi makala. Mâyi a muinshi mua buloba mmanyanguke bikole, kaayi kabidi mimpe bua kuanua to. Bintu bibi bidi bifumina mu biapu ne imue mishindu ya diloba ya lelu bidi bishipesha mishipa mu mâyi. Kapepe nkanyanguke bikole.
MPETU: Badi bamba mudi muntu yonso wa mu Afrike wa kuinshi kua Sahara upeta dolare mitue ku 480 ku tshidimu. Lukuka lua bamfumu ba midimu ludi lunyanga mudimu ne lubueja bantu ba bungi mu bulofu. Dibila didi dijimijija makuta a bantu badi balamisha makuta abu mu bibutshilu.
BIYOLE BIA NZALA: Misangu ya bungi bantu batue ku 800 000 000 pa buloba bujima batu balala ne nzala.
MVITA: Bantu bapite pa 100 000 000 bavua bafue mu mvita ivua mienzeke mu bidimu bia 1 900. Kudi bingoma bia nikleere bipite bungi bidi mua kubutula bantu bonso badi pa buloba, kubavingutula misangu ya bungi. Kudi kabidi mvita ya bena mu ditunga nkayabu. Malu a tshinyangu mmatampakane bikole pa buloba.
BIPUPU NE MASAMA MAKUABU: Kubangila mu 1918, gripe wa bena Espagne wakashipa bantu 21 000 000. Disama dia SIDA ndilue “tshipupu tshia katshia ne katshia tshidi tshitamba kushipa bantu.” Masama a kansere ne a mioyo adi akengesha bantu buloba bujima.
Kushindamenyi anu pa muanda umue patupu mu malu adibu bafila mu ngumu to. Mmalu a pale pale anyi? Peshi mmalu adi enza tshimanyinu kampanda tshidi ne mushinga wa bungi?
[Kazubu/Tshimfuanyi mu dibeji 5]
Nzambi utuku uditatshisha bua bualu buetu anyi?
Mianda ya tshikisu anyi dijimija dia bintu anyi dia bantu batudi banange mbitonde bantu bikole, bibafikisha too ne ku didiebeja tshidi Nzambi kayi wenzelaku tshintu kampanda bua kulekesha malu aa.
Nzambi udi uditatshisha bua bualu buetu. Udi ufila mibelu mimpe ne busambi bulelela lelu’eu. (Matayo 11:28-30; 2 Timote 3:16, 17) Ukadi mulongolole malu bua kujikija tshikisu, masama ne lufu bua kashidi. Malu adiye mutulongoluele adi aleja ne: kêna uditatshisha anu bua bantu ba ditunga dimue to, kadi udi uditatshisha bua bantu ba mu matunga onso, bisamba bionso ne miakulu yonso.—Bienzedi 10:34, 35.
Mmushindu kayi utudi tuditatshisha? Udi mumanye Mufuki wa diulu ne buloba bimpe anyi? Tshilejilu, dîna diende nnganyi? Mmalu kayi adiye mulongolole bua kuenza? Udi wandamuna nkonko eyi mu Bible. Udi utuambilamu malu adiye wenza bua kujikija tshikisu, masama ne lufu. Ntshinyi tshitudi ne bua kuenza bua tuetu kupeta masanka aa? Tudi ne bua kulonga malu adi amutangila ne adiye mulongolole bua kuenza. Mmunyi mutudi mua kutekemena malu adi Nzambi mulongolole bituikala katuyi tumuitabuja? (Yone 3:16; Ebelu 11:6) Tudi kabidi ne bua kutumikila malu adiye utulomba. (1 Yone 5:3) Utuku uditatshisha muebe muonso bua kuenza malu aa anyi?
Bua kumvua tshidi Nzambi mulekele malu mabi, tudi ne bua kuanji kumvua tshilumbu tshinene tshidiku. Bible udi umvuija tshilumbu etshi bimpe. Udi mua kubala malu adi atangila tshilumbu etshi mu dibeji dia 15 dia kakanda aka.