Muoyo Webe Mmutangile Penyi?

• Bantu ba bungi mbadine ne kasuki mu malu abu a buatshia-buila ne kabena nansha batamba kuela meji bua kudi muoyo wabu mutangile to.

• Bible udi utumanyisha malu mimpe adi matuindile kumpala eku. Udi kabidi utudimuija bua mushindu wikala malu adi bantu bolongolole ne bua kushintuluka. Bua tuetu kupeta malu mimpe adi Bible mulaye ne kuepuka kabutu, tudi ne bua kuenza malu mimpe ne lukasa luonso.

• Kudi bamue bantu badi bamanye malu adi Bible wamba ne bateta mua kuatumikila kadi balekela ntatu ya mu nsombelu ibasaka mu njila mubi.

• Udi ne disanka bua kudi muoyo webe uya mutangile anyi? Paudi ukeba kuenza malu kampanda, utuku wela meji pa tshidiwu mua kuenzela bipatshila biebe bia matuku adi kumpala anyi?

[Kazubu/Bimfuanyi mu dibeji dia 9]

Ntshinyi tshidi ne mushinga menemene buebe wewe?

Mmushinga kayi uudi wangata nawu malu adi alonda aa? Leja muaba udi nawu bualu buonso mu nsombelu webe.

A bungi a kudiwu adi ne muaba muakumbanyine mu nsombelu, kadi bu wewe ne bua kusungula, ntshinyi tshidi tshilua pa muaba wa kumpala, muibidi, muisatu, too ne ku wa dikumi?

․․․ Dipitshisha kapepe

․․․ Mudimu wanyi

․․․ Bukole buanyi bua mubidi

․․․ Disanka dianyi meme nkayanyi

․․․ Muena dibaka nanyi

․․․ Baledi banyi

․․․ Bana banyi

․․․ Nzubu muimpe, bilamba bilenga

․․․ Kuikala anu wa kumpala mu malu onso andi ngenza

․․․ Kutendelela Nzambi

[Kazubu mu dibeji dia 10, 11]

Mapangadika ebe adi akulombola kuudi musue menemene bua kuya anyi?

ELA MEJI PA MALU AA

DIPITSHISHA KAPEPE: Mishindu ya dipitshisha kapepe indi nsungula idi ingambuluisha bua kuikisha anyi? Idi inshiya ne mutshima kulu kulu, bifuane kunyanga bukole buanyi bua mubidi peshi kunshiya mulema matuku anyi onso a muoyo anyi? Mmanaya adi ansankisha bua mêba makese kadi mafuane kuntuadila masama a mioyo anyi? Nansha mushindu undi mpitshisha kapepe muikale muimpe, udiku ungangata mêba a bungi mpanga too ne bua kuenza malu a mushinga anyi?

MUDIMU WANYI: Udi ungambuluisha bua kukumbaja majinga anyi, peshi ukadi munkuate ku bupika? Udiku ungangata mêba ne bukole bia bungi bidi mua kumfikisha ku disama anyi? Ndi nsungula bua kutungunuka ne kuenza mêba a pa mutu ku mudimu anyi bua kusomba pamue ne muena dibaka nanyi peshi bana banyi? Mfumu wa mudimu yeye mundombe bua kuenza mudimu udi kuondo kanyi ka muoyo kabenga peshi utu upangishangana bua kuenza midimu ya Nzambi, nenguenze anu bua kulama mudimu wanyi anyi?

BUKOLE BUANYI BUA MUBIDI: Ntu mbulengulula anyi peshi ntu mbuangata ne mushinga wa bungi? Butu pa muaba wa kumpala mu miyiki yanyi yonso anyi? Mushindu undi mbuangata udiku uleja ne: ndi nditatshisha bua bena dîku dianyi anyi?

DISANKA DIANYI MEME NKAYANYI: Ke bualu bua kumpala budi ne mushinga kundi anyi? Ntu nditeka muaba wa kumpala kupita disanka dia muena dibaka nanyi peshi dia bena dîku dianyi anyi? Mushindu undi ndikeba udiku umvuangana ne dikala mutendeledi wa Nzambi mulelela anyi?

MUENA DIBAKA NANYI: Ntu ngangata muena dibaka nanyi bu mulunda anu padibi binsankisha anyi? Ntu nnemeka muena dibaka nanyi bu muntu udi muakanyine lumu anyi? Ditabuja dianyi dia Nzambi didiku dishintulula mushindu undi ngangata muena dibaka nanyi anyi?

BALEDI BANYI: Meme muikale ku bukokeshi bua baledi banyi, ntu mbatumikila, mbuena kuamba ne: mbandamuna ne kanemu, ngenza midimu idibu bampesha, ngalukila kumbelu pa dîba dionso didibu bangambila bua kupingana, ngepuka balunda ne malu adibu bankandike anyi? Meme muikale muntu mukulumpe, ntu nteleja baledi banyi ne kanemu, mbambuluisha padibi bikengedibua anyi? Ntu mbenzela malu bilondeshile tshidi muoyo wanyi musue peshi bilondeshile mibelu ya mu Dîyi dia Nzambi anyi?

BANA BANYI: Ntuku ndimona ne bujitu bua kulongesha bana banyi bikadilu bimpe anyi, peshi ntu ntekemena ne: nebabilonge mu tulasa? Ntuku nsomba ne bana banyi anyi peshi ntu mbashila anu bia kunaya nabi, bu mudi televizion ta ordinatere bua bapitshishe nabi dîba? Ntu mpesha bana banyi manyoka misangu yonso itubu kabayi batumikila mibelu ya Nzambi anyi, peshi ntu mbanyoka anu padibu benza malu adi amfikisha munda?

NZUBU MUIMPE, BILAMBA BILENGA: Ntshinyi tshitu tshinsaka bua kutangila mmuenekelu wanyi ne bintu bindi nabi: mbua bena mutumba bammone anyi? Mbua nsombelu muimpe wa dîku dianyi anyi? Mbua mundi mutendeledi wa Nzambi anyi?

KUIKALA ANU WA KUMPALA MU MALU ONSO ANDI NGENZA: Ntu mmona ne: mbia mushinga bua kuenza malu onso bimpe anyi? Ntu ngenza muanyi muonso bua kuikala anu wa kumpala anyi? Ntu ngumvua bibi padi muntu mukuabu wenza tshintu tshimpe kumpita anyi?

KUTENDELELA NZAMBI: Buanyi meme kusankisha Nzambi kudi ne mushinga wa bungi kupita kusankisha muena dibaka nanyi, bana banyi, baledi banyi, peshi mfumuanyi wa mudimu anyi? Bua meme kupeta nsombelu muimpe, ndiku mua kusemeja mudimu wa Nzambi pa muaba muibidi anyi?

BALA MIBELU YA MU BIBLE NE NTEMA

Nzambi udi ne muaba kayi mu nsombelu webe?

Muambi 12:13: ‘Utshine Nzambi, utumikile mikenji yende; ebu mbualu buonso budi muntu ne bua kuenza.’

UDIEBEJE NE: Nsombelu wanyi udiku uleja ne: ndi ngenza malu mu mushindu’eu anyi? Ditumikila mikenji ya Nzambi didiku diludika mushindu undi ngangata majitu anyi kumbelu, ku mudimu peshi mu kalasa anyi? Peshi malu makuabu anyi ntatu ke bidi binjadikila bungi bua mêba andi ne bua kuenzela Nzambi mudimu?

Udi ne malanda a mushindu kayi ne Nzambi?

Nsumuinu 3:5, 6: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’

Matayo 4:10: ‘Kukuila Mukalenge Nzambi webe, umuenzele yeye nkayende mudimu.’

UDIEBEJE NE: Ke mushindu untu ndiumvua bua Nzambi anyi? Malu antu ngenza ku dituku ku dituku ne mushindu untu ngangata ntatu bidiku bileja lulamatu ne dieyemena bia nunku anyi?

Dibala ne dilonga dia Bible bidi ne mushinga kayi kuudi?

Yone 17:3: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’

UDIEBEJE NE: Muaba undi nteka dibala dia Dîyi dia Nzambi ne dielelapu meji udiku uleja ne: ndi ngitaba bualu ebu anyi?

Dibuela mu bisangilu bia tshisumbu tshia bena Kristo didi ne mushinga kayi buebe wewe?

Ebelu 10:24, 25: “Tuvulukanganayi bua kukoleshangana mitshima bua kutamba kunanga ne kuenza malu mimpe. Katulekedi mua kubuela mu bisangilu bietu; . . . tutambe kuenza nanku bu munudi numona dituku dia Mfumu dikadi disemena pabuipi.”—Muanda Mulenga Lelu.

Musambu wa 122:1: ‘Ngakadi ne disanka pakangambilabu ne: Tuye mu nzubu wa Yehowa.’

UDIEBEJE NE: Nsombelu wanyi udiku uleja mundi ne dianyisha bua mibelu eyi idi mu Dîyi dia Nzambi anyi? Ngondo mushale, mvuaku mupumbishe bisangilu bua pamvua mulekele bualu bukuabu buangata muaba wabi anyi?

Utuku wambila bakuabu bualu bua Nzambi ne malu adiye mulongolole ne lukunukunu luonso anyi?

Matayo 24:14: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu; pashishe, nshikidilu nealue.’

Matayo 28:19, 20: ‘Ndayi bienu, nuvuije ba bisamba bionso bayidi, nubayishe mua kuenza malu onso angakanuambila.’

Musambu wa 96:2: ‘Nuimbile Yehowa musambu, nuvudijile dîna diende disanka; nuambile bantu lumu lua lupandu luende ku dituku ku dituku.’

UDIEBEJE NE: Mudimu eu udiku pa muaba wawu mu nsombelu wanyi anyi? Mushindu undi ng’wenza udiku uleja ne: ndi ngangata tshikondo tshitudi etshi ne mushinga anyi?