TSHITUPA TSHIA 9
Malu atudi tulongela kudi Mulombodi Masiya
NZAMBI wakadianjila kumanyisha ne: uvua ne bua kuteka Masiya bu Mulombodi bua bisamba bionso. Nzambi mmumanye mulombodi utudi nende dijinga menemene ne wakasungula Mulombodi mutambe buimpe. Masiya uvua Mulombodi wa mushindu kayi? Uvua bu jenerale munene wa basalayi anyi? Bu muena tshididi wa mayele a bungi anyi? Bu muena nkindi wa meji anyi? Bilondeshile Mifundu minsantu, Masiya uvua muprofete wa pa buende; muprofete au uvua Yezu Kristo.—Matayi 23:10.
Nzambi wakenza muende muonso bua Yezu aledibue mupuangane, wa tshijila. Pashishe Yezu wakakandamena malu onso avua Satana muenze bua kumunyanga. Mu malu onso avua Yezu wamba ne wenza wakaleja mushindu muakane udi Nzambi wenza mudimu ne bukole buende, buakane buende, meji ende ne dinanga. Tumonayi tshitudi mua kulongela ku tshilejilu tshia Yezu.
Uvua wambuluisha bantu bakuabu ne bukole buvua Nzambi mumupeshe. Yezu uvua uditashisha bushuwa bua bantu, ne uvua ubakumbajila majinga abu ne bukole buvuaye nabu. Wakamba ne: “Ndi ngumvuila bantu aba luse, bualu . . . kabena ne tshiakudia.” (Mâko 8:2) Pashishe Yezu wakadisha mu tshishima misumba ya bantu ivua milue kuteleja malongesha ende.
Yezu wakenza kabidi ngendu, wenda ulongesha bantu ne “wondopa masama a mishindu yonso ne ukolesha bantu bavua ne matekete a mishindu yonso.” (Matayi 4:23) Ke bualu kayi misumba ya bantu ivua imulonda, ne “bantu bonso bavua bakeba kumulenga bualu bukole buvua bupatuka munda muende, buondopa bantu bonso.” (Luka 6:19) Bushuwa, Yezu “kavua mulue bua bamuenzele mudimu to, kadi wakalua bua kuenzela bakuabu mudimu ne kufila muoyo wende bu tshia kupikula natshi bantu ba bungi.” (Matayi 20:28)a Balombodi ba pa buloba bungi kayi badi ne lungenyi lua didifila lua nunku?
Uvua uleja buakane bua Nzambi. Yezu uvua ulonda mikenji ya Nzambi ne wenza malu bilondeshile tshivuayi yamba. Anu bu muvua Mifundu minsantu midianjile kuamba, uvua mua kuikala muambe mêyi aa: “Ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi.” (Musambu 40:8) Yezu uvua wenzela bantu bonso malu ne bunême, ne kanemu, kakuyi kansungasunga anu mudi Nzambi wenza, nansha bobu bikale babanji anyi bapele, balume anyi bakaji, bana anyi bantu bakole. Dituku dikuabu, bayidi ba Yezu bakakanyina baledi bavua balua ne bana babu kudi Yezu. Kadi Yezu wakamba ne: “Lekelayi bana batekete balue kundi, kanubakandiki to, bualu Bukalenge bua Nzambi mbua bantu badi bu bobu.”—Mâko 10:14.
Uvua uleja meji a kudi Nzambi. Yezu uvua mumanye bantu bimpe menemene. “Yeye nkayende uvua mumanye tshivua munda mua bantu.” (Yone 2:25) Pavua baluishi ba Yezu batume bantu bua kumukuata, bantu abu bakamba ne: “Katshia katuena banji kumvua muntu wakula bu muntu au to.” Yezu uvua mupetele meji avuaye nawu penyi? Wakamba ne: “Malu andi ndongesha ki nganyi to, kadi nga udi muntume.”—Yone 7:16, 46.
Uvua uleja dinanga dia Nzambi. Yezu uvua kabidi uditeka pa muaba wa bantu bakuabu. Muntu mukuabu uvua ne “nsudi ya bungi menemene” wakamulomba ne: “Mukalenge, wewe musue udi mua kundengejaku.” Yezu wakumvua luse, “wakolola tshianza, kumulengaye wamba ne: ‘Ndi musue. Lengejibua.’ Diakamue nsudi yende yakajimina.” (Luka 5:12, 13; Mâko 1:41, 42) Bushuwa, Yezu uvua musue kusulakaja muntu uvua ukenga au.
Yezu udiku uditatsha buebe wewe pebe anyi? Yezu nkayende udi wandamuna ne: “Luayi kundi, nuenu bonso badi batata ne midimu mikole ne bambule majitu manene, nennupeshe bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu mutshima, nunku nenupete bukole mu mioyo yenu.”—Matayi 11:28, 29.
Yezu ke Mulombodi mutambe buimpe utudi mua kupeta. Ke bualu kayi udi utulomba bua ‘kulonga malu kudiye.’ Newitabe bualu budiye ukulomba ne muoyo mujima anyi? Wewe muenze nunku newikale ne disanka.
[Mêyi adi kuinshi]
a Bua kumanya malu adi atangila tshia kupikula natshi, bala nshapita 5 wa mukanda wa Bible utu ulongesha tshinyi menemene?
[Kazubu mu dibeji 23]
Mmunyi muwandamuna?
• Mmudimu kayi uvua Nzambi mupeshe Yezu?
• Nngikadilu kayi ivua Yezu muleje? Nngikadilu kayi idi itamba kukusankisha?
• Mbualu kayi budi Yezu utulomba?
[Tshimfuanyi mu dibeji 23]
Yezu uvua wambuluisha bantu ne kalolo
[Tshimfuanyi mu dibeji 23]
Yezu uvua munange bana
[Tshimfuanyi mu dibeji 23]
Yezu uvua uditeka pa muaba wa bantu bavua basama ne uvua ubuondopa