TSHITUPA TSHIA 10

Badi bela muluishi wa ditabuja patoke

KUMPALA menemene kua Yehowa Nzambi kufuka buloba, wakafuka banjelu mu diulu. Kadi muanjelu mukuabu wakatuadija kujinga ntendelelu udi mukumbanyine anu Nzambi nkayende. Pakalondaye dijinga adi, wakadivuija nkayende Satana, mmumue ne: “Muluishi” anyi muntu udi uluisha Nzambi. Mmunyi muvua Satana muluishe Nzambi?

Satana wakashima Eva bua kutombokela Nzambi. Ne budimu buonso, wakaleja muvua Yehowa Nzambi mumusokoke tshintu tshimpe pavuaye mumukandike bua kudia bimuma bia mutshi kampanda. Ne dikamakama dionso wakamba muvua Nzambi muena dishima ne kusakaye Eva bua kubenga bulombodi bua Nzambi. Wakamba ne: ‘Nzambi udi mumanye ne: panuadia mamuma au, mêsu enu neabululuke, nenuikale bu Nzambi, nenumanye malu mimpe ne malu mabi.’ (Genese 3:⁠5) Ne butatakane buonso Eva wakitaba mashimi a Satana. Wakashipa mukenji wa Nzambi ne kufikishaye Adama bua kuenza bia muomumue. Katshia anu ku tshikondo atshi, Satana mmuluishi wa bantu bonso badi ne ditabuja dilelela. Mmutungunuke ne kushima bantu too ne lelu. Mushindu kayi?

Ditabuja dibi didi ditangalaka

Satana wakanyanga bana ba Isalele ne ditendelela mpingu ne malongesha a bantu. Yezu Masiya wakambila bamfumu ba tshitendelelu tshiabu ne: bu muvuabu balongesha “malongesha a bantu,” ntendelelu wabu uvua wa patupu. (Matayi 15:⁠9) Pavua tshisamba atshi tshibenge Masiya, Nzambi wakatshibenga. Yezu wakabambila ne: “Nebanunyenge Bukalenge bua Nzambi, nebabupeshe tshisamba tshidi tshikuama mamuma abu.” (Matayi 21:43) Nunku bayidi ba Yezu bakalua tshisamba tshivua Nzambi wanyisha.

Pashishe Satana wakadifila bua kunyanga bayidi ba Yezu. Wakakokesha anyi? Yezu wakaleja tshivua ne bua kuenzeka pakafilaye tshilejilu kampanda tshivua ne mulayi. Mu tshilejilu atshi, muntu mukuabu wakakuna mponda muimpe mu budimi. Pashishe muluishi mukuabu wakakuna lupela mu mponda. Bakashiya bintu bibidi ebi bikolela pamue too ne ku tshikondo tshia dinowa. Pashishe bakatapulula lupela ku mponda ne kuloshabu. Kadi bakalama mponda mu mayeba a muena budimi.

Pashishe Yezu wakumvuija bayidi bende tshivua tshilejilu atshi tshiumvuija. Yeye muine ke Mukunyi. Wakamba kabidi ne: “Maminu mimpe mbana ba Bukalenge, kadi lupela mbana ba mubi; muena lukuna uvua mulukune udi Diabolo. Dinowa didi nshikidilu wa ndongoluelu wa malu, ne banowi mbanjelu.” (Matayi 13:​38, 39) Yezu wakafuanyikija bayidi bende balelela ne mponda. Kadi Satana wakakuna bayidi ba dishima, benze bu lupela, munkatshi mua bayidi balelela ba Yezu aba. Nunku, anu muvua Yezu nkayende mumanyishe, bidimu biakalonda panyima pa lufu luende, bayidi ba dishima bakamueneka. Bobu aba bakapatula malongesha a batontolodi bu mudi dia Busatu bunsantu, didi dileja ne: kudi bantu basatu mu Nzambi umue. Bayidi ba dishima aba bakatuadija kutendelela mpingu ne kudibuejakaja mu malu a tshididi. Anu bayidi bakese ke bavua bashale balamate malongesha a Yezu ne muoyo mujima.

Badi balama ditabuja dilelela

Kadi anu bu muvua Yezu muleje, malu avua ne bua kushintuluka. Banjelu ba Nzambi bavua ne bua kutapulula bantu bavua kabayi ne ditabuja dilelela bua kubabutula. Pashishe bantu bavua ne ditabuja dilelela bavua ne bua kumueneka kakuyi lutatu. Ndekelu wa bionso, bavua ne bua kubutula Satana Diabolo, muluishi wa ditabuja wa ku ntuadijilu. Bushuwa, ditabuja dilelela divua ne bua kutshimuna!

Kadi, mmunyi muudi mua kumanya bantu badi ne ditabuja dilelela lelu? Netuandamune lukonko elu mu tshitupa tshidi tshilonda.

[Kazubu mu dibeji 25]

Mmunyi muwandamuna?

• Satana mmufumine penyi?

• Mmunyi mudi Satana mutete bua kunyanga ditabuja?

• Umvuija tshilejilu tshia Yezu tshia mponda ne lupela.

[Tshimfuanyi mu dibeji 25]

Satana uvua mudinge Eva kupitshila ku nyoka

[Tshimfuanyi mu dibeji 25]

Satana mmupambuishe bantu ne ditendelela dia mpingu ne malongesha a bantu

[Tshimfuanyi mu dibeji 25]

Banjelu ba Nzambi badi bakeba bantu badi bajinga kupeta ditabuja dilelela