Utu mumanye Bantemu ba Yehowa bungi munyi? Bamue ba kutudi badi mua kuikala bena mutumba benu, bena mudimu nebe, balongi benu, anyi uvua mua kuikala muyikile nabu malu a Nzambi. Tudi banganyi menemene? Bua tshinyi tutu tuyisha bantu?

Tudi anu bu bantu bonso. Tudi bafume miaba mishilangane, bakole mishindu mishilangane. Bamue bavua mu nzambi mikuabu, bakuabu kabavua bitaba ne: Nzambi utuku to. Kadi kumpala kua kuluabu Bantemu, buonso buetu tuvua bakonkonone bimpe bimpe malu adi Bible wamba. (Bienzedi 17:11) Tuetu kuitaba malu au, ke muntu ne muntu kuangata dipangadika dia kutendelela Yehowa Nzambi.

Dilonga dietu dia Bible didi dituambuluisha. Tutu petu tupeta ntatu ne tuenza bilema anu bu bantu bonso. Kadi bu mututu tuluangana bua kutumikila mibelu ya mu Bible dituku dionso, nsombelu wetu mmulongoloke. (Misambu 128:1, 2) Ke bualu kayi tutu tuambila bantu bakuabu malu malenga atudi tulonga aa.

Tutu tulonda mêyi a Nzambi. Mêyi aa adi mu Bible. Adi atuambuluisha bua kudiumvua bimpe, kunemeka bakuabu, kuamba bulelela, kuikala ne bulenga ne ngikadilu mikuabu mimpe. Adi atuambuluisha bua kuikala ne makanda a mubidi ne kuenza malu adi ambuluisha bantu. Adi ambuluisha bena mu dîku bua bikale mu buobumue ne bua bikale ne bikadilu bilenga. Bu mutudi bashindike ne: “Nzambi kena ne kansungansunga,” tudi tuenza dîku didi pa buloba bujima, katuyi tusunguluja dikoba anyi tshisamba nansha ditunga. Nansha mutudi bu bantu bonso, tudi tuenza kasumbu ka bantu ba wabu mushindu.​—Bienzedi 4:13; 10:34, 35.

• Bantemu ba Yehowa mbafuanangane ne bantu bakuabu ku tshinyi?

• Bantemu badi bapeta bibidilu kayi padibu balonga Bible?

Bamue bantu batu bela meji ne: dîna dia Bantemu ba Yehowa ndîna dia tshitendelelu tshipiatshipia. Pabi, mbatuadije kubikila batendeledi ba Nzambi umuepele mulelela ne: “bantemu,” kukadi bidimu bipite pa 2 700. (Yeshaya 43:10-12) Bavua batubikila ne: Balongi ba Bible too ne mu 1931. Kadi bua tshinyi tuakangata dîna dia Bantemu ba Yehowa?

Didi dileja Nzambi utudi tutendelela. Yehowa ke dîna dia Nzambi. Dîna edi didi misangu binunu bia bungi mu mikanda ya kalekale. Mu Bible ya bungi, mbadiumbushe, bapingaje mêna a tshianana anyi mianzu bu mudi: Maweja, Mfumu anyi Mukalenge. Pabi, Nzambi mulelela wakambila Mose ne: dîna diende menemene ditu Yehowa. Kumuambilaye kabidi ne: “Edi ndîna dianyi bua kashidi.” (Ekesode 3:15) Dîna edi divua dimusunguluja ne nzambi yonso ya dishima. Tudi ne disanka dia bungi dia kubikidibua mu dîna dia tshijila edi.

Didi dileja mudimu utudi nawu. Bantu ba bungi ba kale, kutuadijila ku Abele, bavua bayisha bakuabu malu a Yehowa. Bantu bu mudi: Noa, Abalahama, Sala, Mose, Davidi ne bakuabu ba bungi bakalonda tshilejilu tshiende, kubuelabu pabu mu ‘tshisumbu tshinene tshia bantemu.’ (Ebelu 11:4–12:1) Tudi badisuike bua kumanyisha malu malelela adi atangila Nzambi, anu bu mudi muntu mua kuakuila mukuabu ku kabadi padiye kayi muenze bualu.

Tudi tuidikija Yezu. Badi babikila Yezu mu Bible ne: “ntemu wa lulamatu ne mulelela.” (Buakabuluibua 3:14) Yezu wakamba ne: uvua ‘mumanyishe dîna dia Nzambi’; kuambaye kabidi ne: uvua mutungunuke ne “kumanyisha bulelela.” (Yone 17:26; 18:37) Nunku, bayidi balelela ba Yezu badi babikidibua mu dîna dia Yehowa; badi kabidi bamanyisha dîna edi. Ke tshidi Bantemu ba Yehowa baditatshisha bua kuenza.

• Balongi ba Bible bakangata dîna dia Bantemu ba Yehowa bua tshinyi?

• Yehowa mmupete bantemu pa buloba katshia ku tshikondo kayi?

• Udi Ntemu wa Yehowa munene nnganyi?

Bible uvua muambe ne: kunyima kua lufu lua Yezu, balongeshi ba dishima bavua ne bua kupatuka munkatshi mua bena Kristo ba kumpala bua kubueja malongesha a dishima. (Bienzedi 20:29, 30) Ke tshiakalua kuenzeka menemene! Bakasambakaja malongesha a Yezu ne a bitendelelu bia dishima, kuenzabu Buena-Kristo bua dishima. (2 Timote 4:3, 4) Kadi mmunyi mutudi mua kujadika lelu eu ne: tudi bamanye malongesha a mu Bible bimpe menemene?

Tshikondo tshia Yehowa kumanyisha bulelela tshiakalua. Yehowa uvua muambe ne: ‘tshikondo tshia ku nshikidilu, dimanya dilelela nedivulangane.’ (Danyele 12:4, NW) Mu tshidimu tshia 1870, kasumbu kampanda ka bantu bavua bakeba kumanya bulelela kakajingulula ne: malu a bungi avuabu balongesha mu bitendelelu kaavua mu Bible to. Ke bualu kayi bakatuadija kukeba bua kumvua malu anu bu muvuawu mu Bible. Yehowa wakabambuluisha bua kumvua malu au.

Bantu bavua basue kumanya Nzambi bakalonga Bible bimpe bimpe. Bavua balonga Bible ne muoyo umue. Bavua balonga Bible anu mushindu ututu petu tumulonga lelu. Tshilejilu, bavua bayikila tshiena-bualu tshimue ku tshimue. Pavuabu bapeta mvese uvuabu kabayi bumvua bimpe, bavua bakeba mvese mikuabu ivua yumvuija mvese au. Pavuabu bapeta diumvuija kampanda divua diumvuangana ne mvese mikuabu, bavua badifunda. Bu muvuabu balekela mvese nkayayi yumvuija mikuabu, bakamanya kabidi tshidi Bible wamba bua dîna dia Nzambi, Bukalenge buende, tshidiye musue kuenzela bantu ne buloba, tshidi bantu balua patubu bafua ne dibika dia ku lufu. Dilonga diabu diakabambuluisha bua kulekela bilele ne malongesha a dishima.​—Yone 8:31, 32.

Mu 1879, balongi ba Bible aba bakamona ne: dîba divua dikumbane dia kumanyisha bantu bakuabu malu aa. Ke bualu kayi bakabanga kupatula anu mu tshidimu atshi tshibejibeji tshia Tshibumba tshia Nsentedi tshidi tshimanyisha Bukalenge bua Yehowa tshitudi tupatula too ne lelu. Tudi tumanyisha bantu malu malelela aa lelu mu matunga 240, mu miakulu mipite pa 750. Katshia dimanya dilelela kaditu dianji kuvulangana nunku to!

• Pakafua Yezu, tshiakafikila malongesha malelela a mu Bible ntshinyi?

• Tshivua tshituambuluishe bua kumanya kabidi malongesha malelela a mu Bible ntshinyi?

Kumpala, tuetu Bantemu ba Yehowa tuvua tuenza mudimu ne Bible ya mishindu ya bungi, tuyipatula ne tuyabanya kabidi. Kadi bu mudi Nzambi musue bua muntu yonso apete “dimanya dijalame dia bulelela,” tuakalua kumona ne: bivua bikengela kupatula nkudimuinu wa Bible uvua mua kuambuluisha bantu bimpe menemene. (1 Timote 2:3, 4) Ke bualu kayi kubangila mu 1950, tuakatuadija kupatula bitupa bia Bible wetu wa Nkudimuinu wa bulongolodi bupiabupia. Bible eu mbamukudimune biakane mu miakulu mipite pa 130.

Bantu bavua dijinga ne Bible mupepele bua kumvua. Miakulu itu ishintuluka, kadi imue Bible ishala ne miaku ya kale idi bantu kabatshiyi bamanye. Bavua bangule kabidi imue mivungu ya kale ya kueyemena ivua ipetangana bikole ne bivua bafundi ba Bible nkayabu bafunde. Mivungu eyi mmiambuluishe bantu bua kumvua kabidi bimpe menemene malu avua mafunda mu Bible mu tshiena Ebelu, mu tshiena Alama ne mu tshiena Greke.

Bantu bavua dijinga ne Bible udi ne malu anu muvuawu mu Dîyi dia Nzambi. Bakudimunyi ba dîyi divua Nzambi mufundishe badi ne bua kudilonda anu muvuaye mudifundishe pamutu pa kushintululamu bimue bintu. Kadi pabi, mu Bible ya bungi lelu, kamuena dîna dia Nzambi to. Dîna dia Nzambi n’Yehowa.

Bantu bavua dijinga ne Bible uvua utumbisha eu udi mumufundishe. (2 Samuele 23:2) Mu Nkudimuinu wa bulongolodi bupiabupia mbapingaje dîna edi Yehowa miaba mitue ku 7 000 anu muvuadi mu mivungu ya Bible ya kale, bu eu udibu baleje mu tshimfuanyi tshidi kuinshi eku. (Misambu 83:18) Bible eu udi wenza disanka bua kumubala bualu udi uleja meji a Nzambi mu mushindu mupepele. Bua kumupatula, batu banji kukebulula malu bikole munkatshi mua bidimu bia bungi. Nansha nuenu ne Bible eu mu muakulu wenu anyi kanuyi nende, tudi tukulomba bua wikale ubala Bible uudi nende dituku dionso.​—Yoshua 1:8; Misambu 1:2, 3.

• Tuvua bapatule nkudimuinu mupiamupia wa Bible bua tshinyi?

• Tshitudi ne bua kuikala tuenza dituku dionso ntshinyi bua kumanya disua dia Nzambi?