Mu bulongolodi buetu kamuena kasumbu ka balombodi badibu bafuta to. Kadi anu bu muvuabi bienzeka mu tshisumbu tshia bena Kristo pakatuadijatshi, badi bateka batangidi badi bakumbane “bua kulama tshisumbu tshia Nzambi.” (Bienzedi 20:28) Bakulu aba mbantu badi bashindame mu malu a Nzambi, badi balombola tshisumbu ne batshilama kabayi “benzeja ku bukole, kadi ku budisuile kumpala kua Nzambi; kabiyi bua dinanga dia bintu bipeta mu njila mibi, kadi ne muoyo wa disanka.” (1 Petelo 5:1-3) Bua diakalenga dietu, bakulu aba batu benza mudimu kayi?

Badi baditatshisha buetu, batulama kabidi. Bakulu badi balongesha bantu Dîyi dia Nzambi, benza bua balame malanda mimpe ne Nzambi. Bu mudi bakulu bamanye ne: Nzambi ke udi mubapeshe mudimu wa mushinga mukole eu, kabena bakokesha bantu bende to, kadi badi babambuluisha bua bikale bimpe ne bikale ne disanka. (2 Kolinto 1:24) Anu bu mutu mulami wa mikoko uditatshisha bua mukoko wonso, ke mudi bakulu baditatshisha bua kumanya muena mu tshisumbu yonso.​—Nsumuinu 27:23.

Badi batulongesha bua kuenza disua dia Nzambi. Lumingu luonso, bakulu badi balombola bisangilu bia tshisumbu bua kukolesha ditabuja dietu. (Bienzedi 15:32) Bana betu ba balume badi balamate Nzambi aba, badi kabidi bantunga mulongo mu mudimu wa buambi, benza netu mudimu ne batulongesha mishindu yonso ya kuyisha.

Badi bakankamija yonso wa kutudi. Bua kumona mua kuambuluisha yonso wa kutudi bua ikale mu malanda mimpe ne Yehowa, bakulu badi mua kuyikila netu ku nzubu yetu anyi ku Nzubu wa Bukalenge bua kutuambuluisha ne kutukolesha ne mêyi a mu Bible.​—Yakobo 5:14, 15.

Pa kumbusha midimu idibu benza mu tshisumbu, bakulu ba bungi badi kabidi ne midimu ya bianza idibu benza ne majitu mu mêku, bionso ebi bidi bibalomba dîba ne didifila dia bungi. Bana betu badi benza mudimu mukole aba mbakumbane bua tuetu kubanemeka.​—1 Tesalonike 5:12, 13.

• Bakulu badi ne mudimu kayi mu tshisumbu?

• Bakulu batu baditatshisha bua yonso wa kutudi mushindu kayi?

Bible udi wakula bua bitupa bibidi bia bantu balume badi batangila malu a mu tshisumbu: “batangidi ne basadidi ba mudimu.” (Filipoyi 1:1) Mu kuamba kuimpe, mu tshisumbu tshionso mutu bana betu ba mushindu eu. Basadidi ba mudimu badi benza mudimu kayi bua diakalenga dietu?

Badi bambuluisha kasumbu ka bakulu. Basadidi ba mudimu badi mua kuikala bansonga anyi bakulumpe. Mbantu badi mu malanda makole ne Nzambi, mbantu ba kueyemena, mbenji ba mudimu ba tshisumi. Badi benza midimu ya mushinga mukole, ya kulama bulongame mu tshisumbu ne midimu mikuabu. Padibu benza midimu eyi, bakulu badi bapeta dîba dia kutamba kudifila mu mudimu wa kulongesha ne wa kulama mikoko.

Badi benza midimu idi ne mushinga. Bamue batu ne mudimu wa kuakidila bantu bonso badi balua mu bisangilu. Bakuabu badi batangila biamu bia mêyi, babanya mikanda, balama tshibutshilu tshia makuta tshia tshisumbu anyi batangila malu a teritware anyi tshitupa tshidi bena mu tshisumbu mua kuyishila. Badi kabidi bambuluisha mu mudimu wa kulama Nzubu wa Bukalenge bimpe. Bakulu badi mua kubalomba bua kuambuluisha bana betu bakadi bakulakaje. Mushindu udi basadidi ba mudimu benza mudimu wonso udibu babapesha ne disanka, udi usaka bena mu tshisumbu bonso bua kubanemeka.​—1 Timote 3:13.

Mbena Kristo ba tshitembu. Basadidi ba mudimu badi batekibua bua ngikadilu yabu mimpe ya buena Kristo. Padibu benza midimu mu bisangilu, badi bakolesha ditabuja dietu. Tshilejilu tshimpe tshidibu bafila mu mudimu wa kuyisha tshidi tshitusaka bua kuyisha petu bikole. Mushindu udibu beleshangana diboko ne bakulu, udi wambuluisha bua disanka ne buobumue bikale mu tshisumbu. (Efeso 4:16) Mu kupita kua matuku, bobu pabu badi mua kukumbana bua kulua bakulu.

• Basadidi ba mudimu mbantu ba mushindu kayi?

• Mmunyi mudi basadidi ba mudimu bambuluisha tshisumbu bua kuendatshi bimpe?

Badi bakula bikole bua Bânaba ne mupostolo Paulo mu Mikanda ya bena Kristo ivuabu bafunde mu tshiena Greke. Bantu aba bavua benza mudimu bu batangidi bena ngendu, benda batangila bisumbu bia bena Kristo bikavuaku tshikondo atshi. Bua tshinyi? Bualu bavua baditatshisha bua diakalenga dia bana babu bena Kristo. Tshilejilu, Paulo wakamba ne: uvua ukeba ‘kupingana bua kutangila’ bena Kristo nende bua kumanya muvuabu. Uvua mudisuike bua kuenza ngendu ya kilometre ya bungi bua kuya kubakankamija. (Bienzedi 15:36) Ke dijinga didi nadi batangidi bena ngendu lelu.

Badi balua bua kutukolesha. Mutangidi wa tshijengu yonso udi utangila bisumbu bitue ku 20. Udi wenza lumingu lumue mu tshisumbu tshionso, udi utangila tshisumbu tshionso misangu ibidi ku tshidimu. Dimanya dia bana betu ba balume aba ne dia bakaji babu (pikalabu basele) didi mua kutuambuluisha bikole. Badi baditatshisha bua kumanya bakulumpe ne bana. Batu basue kuya netu mu buambi, bu mudi patutu tuya kulonga Bible ne bantu. Bana betu aba batu baya ne bakulu bua kutangila bena mu tshisumbu bua kubakolesha. Badi benza miyuki mu bisangilu ne mu mpuilu bua kutukankamija.​—Bienzedi 15:35.

Badi baditatshisha bua bantu bonso. Batangidi ba bijengu badi baditatshisha bikole bua malanda a bena mu bisumbu ne Nzambi. Badi benza tshisangilu ne bakulu ne basadidi ba mudimu bua kumona mudi tshisumbu tshienda, ne kubapesha mibelu idi mua kubambuluisha bua kuambula majitu abu. Badi bambuluisha bampanda-njila bua kulengeja mushindu udibu bayisha. Badi basue kumanyangana ne bantu bapiabapia badi babuela mu bisangilu ne basanka bikole padibu bumvua ne: badi benda bakola mu malu a Nzambi. Bana betu bonso aba badi badifila ne muoyo umue bu ‘benzejanganyi netu ba mudimu bua diakalenga dietu.’ (2 Kolinto 8:23) Tuidikijayi ditabuja diabu ne didifila diabu mu malu a Nzambi.​—Ebelu 13:7.

• Batangidi ba bijengu batu benda batangila bisumbu bua tshinyi?

• Mmunyi mudi difika diabu mu tshisumbu mua kutuambuluisha?

Padi malu makole enzeka muaba kampanda, Bantemu ba Yehowa batu badilongolola diakamue bua kuambuluisha bana babu badi malu au makuate. Diditatshisha dia mushindu eu didi dileja mutudi banangangane ne muoyo mujima. (Yone 13:34, 35; 1 Yone 3:17, 18) Tutu tuenza tshinyi bua kuambuluisha bana betu?

Tudi tufila makuta. Pavua tshiyole tshia nzala tshikole tshienzeke mu Yudaya tshikondo tshia bapostolo, bena Kristo ba mu Antiyokiya bakatumina bena Kristo nabu ba mu Yudaya makuta bua kubambuluisha. (Bienzedi 11:27-30) Bia muomumue, patudi tumvua ne: bana betu ba muaba kampanda badi mu lutatu lukole, tudi tufila bintu mu tshisumbu tshietu bua babatumine.​—2 Kolinto 8:13-15.

Tudi tufila diambuluisha didi dikengela. Bakulu badi muaba udi lutatu luenzekele badi bakeba bua kumanya tshidi tshifikile muanetu yonso. Kasumbu kadi katangila malu a diambuluisha kadi mua kulongolola bua kufila manga, biakudia, mâyi mimpe a kunua, bilamba ne miaba idi bantu mua kusomba. Bantemu ba bungi badi ne dimanya mu malu kampanda badi mua kudifutshila njila bua kuya kuambuluisha anyi kulongolola nzubu ya bantu ne Nzubu ya Bukalenge idi minyanguke. Buobumue buetu ne dimanya ditudi bapete mu dienza mudimu pamue bidi bituambuluisha bua kusangisha lukasa bintu bidi bikengedibua ne kupeta benji ba mudimu. Nansha mutudi tutamba kuambuluisha “bana betu mu ditabuja,” tudi kabidi tuambuluisha bantu bakuabu padiku mushindu, katuyi tutangila tshitendelelu tshiabu.​—Galatiya 6:10.

Tudi tubasamba ne Dîyi dia Nzambi. Bantu badi mu lutatu badi dijinga nangananga ne busambi. Mu bikondo bia mushindu eu, tudi tupetela bukole kudi Yehowa, “Nzambi wa busambi buonso.” (2 Kolinto 1:3, 4) Ne disanka dionso, tudi tuambila bantu badi bashikile malu adi Bible mulaye, tubajadikila ne: mu katupa kîpi emu, Bukalenge bua Nzambi nebujikije malu onso adi akebela bantu ntatu ne makenga.​—Buakabuluibua 21:4.

• Mu tshikondo tshia ntatu mikole, tshitu tshiambuluisha Bantemu bua kufila diambuluisha ne lukasa luonso ntshinyi?

• Mmushindu kayi utudi mua kuenza mudimu ne Dîyi dia Nzambi bua kuambuluisha bantu badi bapanduke ku njiwu?

Matuku makese kumpala kua Yezu kufuaye, wakayikila ne bayidi bende banayi aba pa nkayabu: Petelo, Yakobo, Yone ne Andele. Wakajula lukonko lunene elu pavuaye ubambila bua tshimanyinu tshia dikalaku diende mu matuku a ku nshikidilu: “Nnganyi menemene udi mupika wa lulamatu udi mudimuke uvua mfumuende muteke ku mutu kua bena mudimu bende, bua kubapesha biakudia biabu mu tshikondo tshiakanyine?” (Matayi 24:3, 45; Mâko 13:3, 4) Yezu uvua ujadikila bayidi bende ne: bu muvuaye ‘mfumuabu,’ ne bu muvuaye upingana mu diulu, uvua ne bua kuteka bantu bavua ne bua kupesha bayidi bende biakudia bia mu nyuma mu matuku onso a ku nshikidilu. Bavua mua kuenza mupika eu mbanganyi?

Nkasumbu kakese ka bayidi ba Yezu bela manyi. “Mupika” udi ulongesha batendeledi nende ba Yehowa malu a Nzambi mu tshikondo tshiakanyine. Kudi mupika wa lulamatu eu ke kutudi batekemene bua kuikala kupeta ‘biakudia bietu bidi bikengela mu tshikondo tshiakanyine.’​—Luka 12:42.

Badi batangila bena mu nzubu wa Nzambi. (1 Timote 3:15) Yezu uvua mupeshe mupika eu mudimu munene eu: Kutangila mudimu wa tshitupa tshia bulongolodi bua Yehowa tshidi pa buloba, bu mudi: kutangila bintu bidi bulongolodi ebu nabi pa buloba, kulombola mudimu wa diyisha, ne kutulongesha ku diambuluisha dia bisumbu bietu. Nunku, bua kutupesha bintu bitudi nabi dijinga dîba ditudi nabi dijinga, “mupika wa lulamatu udi mudimuke” udi ufila biakudia ku diambuluisha dia mikanda itudi tuyisha nayi, ne dia malu a mu bisangilu ne a mu mpuilu.

Mupika udi ne lulamatu ku malongesha malelela a mu Bible ne ku mudimu wende wa kuyisha lumu luimpe. Mmudimuke mu mushindu udiye ulama ne meji onso bintu bia Kristo bidi pa buloba. (Bienzedi 10:42) Yehowa udi ubenesha mudimu wa mupika eu padiye ukoka bantu ba bungi bua balue Bantemu bende ne umuambuluisha bua kulongesha malu a bungi.​—Yeshaya 60:22; 65:13.

• Uvua Yezu muteke bua kulongesha bayidi bende malu a Nzambi nnganyi?

• Mmu mushindu kayi udi mupika muikale ne lulamatu ne mudimuke?

Mu bidimu lukama bia kumpala, kasumbu kakese ka bantu kenza ne “bapostolo ne bakulu ku Yelushalema” ke kavua kenza kasumbu kaludiki. Bena mu kasumbu aku bavua bangata mapangadika manene bua diakalenga dia tshisumbu tshijima tshia bena Kristo bela manyi. (Bienzedi 15:2) Tshilejilu, pavuabu bangate dipangadika kampanda mu buobumue, bavua bakonkonone tshivua Dîyi dia Nzambi diamba, ne balonde buludiki bua nyuma wa Nzambi. (Bienzedi 15:25) Ke mudi Kasumbu kaludiki ka lelu kenza.

Nzambi udi ukuata mudimu ne Kasumbu kaludiki bua kuenza disua diende. Bana betu ba balume bela manyi badi mu Kasumbu kaludiki badi banemeka Dîyi dia Nzambi bikole ne badi ne dimanya dia bungi mu mushindu wa kulombola mudimu wetu ne malu makuabu adi atangila ntendelelu wetu. Batu badisangisha lumingu luonso bua kuakula malu adi atangila ntendelelu wetu pa buloba bujima. Anu bu mu bidimu lukama bia kumpala, badi bafila mibelu ya mu Bible ku diambuluisha dia mikanda anyi ku butuangaji bua batangidi bena ngendu peshi mu mishindu mikuabu. Dienza nunku didi diambuluisha batendeledi ba Nzambi bua kuela meji mushindu umue ne kuenza malu mushindu umue. (Bienzedi 16:4, 5) Bena mu Kasumbu kaludiki badi baludika dilongolola dia malongesha a mu Bible, bakankamija bantu bonso bua kuteka mudimu wa kuyisha Bukalenge bua Nzambi pa muaba wa kumpala, ne batangila dipesha dia bana betu majitu mu tshisumbu.

Badi balekela nyuma wa Nzambi ubalombola. Bena mu Kasumbu kaludiki badi bakeba buludiki kudi Mfumu Mutambe Bunene wa diulu ne buloba, Yehowa, ne kudi Yezu, udi ku mutu kua tshisumbu. (1 Kolinto 11:3; Efeso 5:23) Bena mu kasumbu aka kabena badiangata bu bamfumu ba batendeledi ba Nzambi to. Bobu ne bena Kristo bela manyi bakuabu bonso “badi batungunuka ne kulonda Muana wa mukoko [Yezu] kuonso kudiye uya.” (Buakabuluibua 14:4) Bena mu Kasumbu kaludiki badi banyisha bikole patudi tusambila bua bualu buabu ne bua mudimu udibu benza.

• Bavua mu kasumbu kaludiki ka mu bidimu lukama bia kumpala mbanganyi?

• Mmunyi mudi bena mu Kasumbu kaludiki ka lelu bakeba buludiki bua Nzambi?

Muaku “Betele” mmufumine mu tshiena-Ebelu. Udi umvuija “Nzubu wa Nzambi.” (Genese 28:17, 19) Mbikumbane bua kubikila nzubu idi Bantemu ba Yehowa base pa buloba bujima bua kulombola mudimu wa kuyisha ne: Betele. Kasumbu kaludiki kadi ku biro bietu binene bidi mu New York (mu États-Unis). Koku ke kadi kalombola midimu idi yenzeka mu Betele yonso. Betele idi mu matunga a bungi. Bantemu badi benza mudimu mu nzubu eyi badi benza dîku dia Betele. Mbasombe pamue, benza mudimu pamue, badia pamue ne balonga Bible pamue anu bu bena mu dîku dimue.​—Misambu 133:1.

Bena mu dîku dia Betele badi muaba wa pa buawu, badi badifila ku budisuile bua kuenza mudimu wa bungi. Mu Betele yonso mudi bena Kristo balume ne bakaji badi badifile bua kuenza disua dia Nzambi, badi bafila dîba diabu dionso bua malu a Bukalenge. (Matayi 6:33) Kabatu babafuta to. Kadi batu babapesha muaba wa kulala, biakudia ne tukuta tukese bua kudiambuluisha natu. Muntu yonso udi ku Betele udi ne mudimu wa kuenza. Bamue badi benza mudimu mu biro, ku tshikuku anyi mu nzubu wa kudiila. Bakuabu badi bapatula mikanda anyi bayilamakaja, basukula nzubu, basukula bilamba, balongolola bintu bidi binyanguke anyi benza midimu mikuabu.

Mmuaba udibu benza mudimu bua kutungunuja mudimu wa kuyisha. Kipatshila kanene ka Betele yonso nka kuambuluisha bantu ba bungi bua bamanye bulelela budi mu Bible. Mukanda eu ntshimue tshia ku bintu bidi bimanyisha bantu bulelela ebu. Kasumbu kaludiki ke kavua kenze bua bafunde mukanda eu. Mushindu kayi? Kavua katumine tusumbu tua bakudimunyi tudi pa buloba bujima mukanda eu mu ordinatere bua bawukudimune mu miakulu mikuabu. Pashishe, bobu kuwupatulabu pa mabeji mu Betele kampanda ne kuwutumabu mu bisumbu bipite pa binunu 100. Padi bena mu dîku dia Betele benza midimu yonso eyi, badi bakuatshisha mudimu wa kuyisha lumu luimpe, mudimu udi ne bua kuenzeka ne lukasa.​—Mâko 13:10.

• Batu benza mudimu ku Betele mbanganyi? Batu bapeta bintu bidibu nabi dijinga mushindu kayi?

• Mudimu udibu benza ku Betele yonso udi ukuatshisha mudimu kayi wa lukasa?

Bena mu dîku dia Betele batu benza midimu ya bungi bua kutungunuja mudimu wa kuyisha mu ditunga dimue anyi a bungi. Tshilejilu, badi bakudimuna mikanda, bayipatula pa mabeji, bayilamakaja ne balongolola bua kuyabanya. Bapatula filme ne matadi a kuteleja, ne benza malu makuabu bilondeshile muaba udibu.

Komite wa filiale ke udi ulombola midimu. Kasumbu kaludiki nkafile dilombola dia Betele yonso mu bianza bia Komite wa filiale. Komite eu mmuenza ne bakulu bapiluke, bobu bakese, mbasatu. Komite eu udi umanyisha Kasumbu kaludiki mudi mudimu wenda mu teritware udibu bamukosele, ne bualu buonso budi mua kumuenekamu. Malu aa adi ambuluisha Kasumbu kaludiki bua kumanya malu a kufunda mu mikanda ne a kulonga mu bisangilu anyi mu mpuilu ne mu mpungilu. Batu batuma baleji-mpala ba Kasumbu kaludiki bua kutangila Betele ne kufila mibelu kudi bena mu Komite ya filiale bua kukumbajabu mudimu wabu bimpe. (Nsumuinu 11:14) Batu balongolola bua muleji-mpala wa biro bietu bidi bilombola mudimu wetu wa pa buloba bujima enze muyuki bua kukankamija bena mu teritware udi Betele utangila.

Badi bambuluisha bisumbu. Bana betu badi benza Komite wa filiale batu bafila dianyisha bua kuenza bisumbu bipiabipia. Badi kabidi balombola mudimu wa bampanda-njila, bamisionere ne batangidi ba bijengu badi benza mudimu mu teritware udi Betele wabu utangila. Badi balongolola mpuilu ne mpungilu, balombola mudimu wa dibaka dia Nzubu ya Bukalenge ne balondesha bua bisumbu bikale bipeta mikanda idibi nayi dijinga. Midimu yonso idibu benza ku Betele idi yambuluisha bua kutungunuja mudimu wa diyisha.​—1 Kolinto 14:33, 40.

• Komite wa filiale utu wambuluisha Kasumbu kaludiki mushindu kayi?

• Ku Betele batu benza midimu kayi?

Bua tuetu kumanyisha “lumu luimpe” kudi “tshisamba tshionso, tshisa tshionso, muakulu wonso ne bantu bonso,” tutu tupatula mikanda mu miakulu mipite pa 750. (Buakabuluibua 14:6) Tutu tukumbaja mudimu mukole eu mushindu kayi? Batu batuambuluisha kudi kasumbu ka bafundi (badi mu matunga kampanda) ne bakudimunyi badi badifila ne muoyo mujima. Bonso aba batu Bantemu ba Yehowa.

Batu banji kufunda malu onso mu Anglais. Kasumbu kaludiki katu kalombola mudimu wa Tshibambalu tshia difunda udi wenzekela ku biro bietu binene (mu États-Unis). Tshibambalu etshi tshidi tshilombola midimu idi bafundi benza ku biro bietu binene ne mu imue Betele. Bu mudi bafundi bikale mu matunga mashilangane, bidi bituambuluisha bua kuakula bua biena-bualu bidi bilenga bantu ba mishindu mishilangane ne bienza bua mikanda yetu ikale isankisha bantu ba mu matunga mashilangane.

Badi batumina bakudimunyi malu akadibu bafunde. Padibu bamona ne: malu adibu bafunde mmakumbane, badi baatumina tusumbu tua bakudimunyi badi miaba mishilashilangane, mu ordinatere. Bakudimunyi badi mpindieu bakudimuna, bafuanyikija bidibu bakudimune ne Anglais, ne balongolola bilema bikuabu. Badi badienzeja bua kupeta “mêyi majalame a bulelela” adi aleja mu muakulu wabu malu adibu bambe mu Anglais.​—Muambi 12:10.

Ordinatere idi yambuluisha bua kufunda ne kukudimuna ne lukasa. Ordinatere kayena mua kuenza mudimu pa muaba wa bantu badi bafunda ne bakudimuna to. Kadi idi mua kubambuluisha bua kuenza mudimu ne lukasa bualu idi ne madiksionere ne programe kampanda ya ordinatere ne bintu bikuabu bidi mua kubambuluisha bua kuenza makebulula. Bantemu ba Yehowa mbenze programe wa ordinatere udibu babikila ne: MEPS (Multilanguage Electronic Publishing System). Programe wa MEPS eu udi ubambuluisha bua kuenza mudimu ne malu adibu bafunde mu miakulu ya bungi, bua kualamakaja ne bimfuanyi bidi biumvuangana nawu, ne bua kuapesha tshimuenekelu tshia mukanda udi ne bua kupatuka.

Bua tshinyi tudi tudienzeja nunku bua kupatula mikanda too ne mu miakulu idibu bakula anu kudi bantu binunu bikese? Bualu Yehowa mmusue ne: “bantu ba mishindu yonso bapandishibue ne bafike ku dimanya dijalame dia bulelela.”​—1 Timote 2:3, 4.

• Bua kufunda malu adi mu mikanda yetu, batu benza tshinyi?

• Tudi tukudimuna mikanda yetu mu miakulu ya bungi bua tshinyi?

Bulongolodi buetu butu bupatula Bible ne mikanda mikuabu miliyo mivule tshidimu tshionso, buyabanya tshianana. Tutu tuibaka Nzubu ya Bukalenge ne ya Betele, tuyakajilula kabidi. Tutu tuambuluisha bana betu badi benza mudimu ku Betele, bamisionere ne aba badi bapeta ntatu mu tshikondo tshidi bipupu bienzeka. Nunku, udi mua kudiebeja ne: ‘Makuta a kuenza nawu malu aa atu afumina penyi?’

Katutu tufutshisha makuta, tulomba tshia dikumi anyi tuendesha tubondo bua kusangisha makuta to. Nansha mudi mudimu wetu wa kuyisha ulomba makuta a bungi, katutu tukeba anu bua bantu batupeshe makuta to. Bakafunda mu nimero muibidi wa Tshibumba tshia Nsentedi (kukadi bidimu bipite pa 100) ne: tudi tuitaba ne: Yehowa ke udi utukuatshisha, nunku “katuakuikala tuenda tulomba anyi tusangisha makuta kudi bantu to.” Ke tshitutu anu tuenza.​—Matayi 10:8.

Mudimu wetu udi wenda ne makuta mafila ku budisuile. Bantu ba bungi batu basanka bua mudimu wa kuyisha utudi tuenza, ke bualu kayi batu bafila makuta bua kuwukuatshisha. Bantemu ba Yehowa nkayabu batu ne disanka dia kufila dîba diabu, bukole buabu, makuta abu ne bintu bidibu nabi bua disua dia Nzambi dienzeke pa buloba bujima. (1 Kulondolola 29:9) Mu Nzubu wa Bukalenge mutu tushete tutubu bela makuta kudi bantu badi basue kufila makuta. Udi kabidi mua kufidila makuta ebe mu site wetu wa jw.org. Bantu ba bungi batu bafila makuta kabatu anu babanji to. Mbafuane mukaji mukamba uvua Yezu muanyishe bua tukuta tukese tua binjanja tubidi tuvuaye muele mu tshibutshilu tshia mu ntempelo. (Luka 21:1-4) Nunku, muntu yonso udi mua kuikala ne tshibidilu tshia ‘kuteka tshintu ku luseke’ bua afile “bu mudiye mupangadije mu muoyo wende.”​—1 Kolinto 16:2; 2 Kolinto 9:7.

Tudi bajadike ne: Yehowa neatungunuke amu ne kusaka bantu badi basue ‘kumutumbisha ne bintu biabu bia mushinga’ bua kutua mudimu wa Bukalenge buende nyama ku mikolo bua kukumbaja disua diende.​—Nsumuinu 3:9.

• Tshidi tshienza bua bulongolodi buetu buikale bushilangane ne bitendelelu bikuabu ntshinyi?

• Mmudimu kayi ututu tuenza ne makuta atu bantu bafila?

Anu mudi dîna “Nzubu wa Bukalenge” dileja, dilongesha dinene dia mu Bible ditutu tulongelamu ndimanyine pa Bukalenge bua Nzambi buvua tshiena-bualu tshinene tshia mudimu wa Yezu.​—Luka 8:1.

Nzubu ya Bukalenge ke miaba minene itutu tutendelela Yehowa. Ku Nzubu ya Bukalenge ke muaba utu Bantemu ba Yehowa badilongoluela bua kuyisha lumu luimpe. (Matayi 24:14) Nzubu ya Bukalenge itu mishilangane ku bunene ne ku mushindu udibu bayase; kadi mmibaka bunene bukumbane. Bisumbu bia bungi bitu bisangila Nzubu wa Bukalenge umuepele. Bidimu bishale ebi, tudi bibake Nzubu ya Bukalenge mipiamipia binunu bia bungi (bienze anu bu ne: tuvua tuibaka itanu ku dituku), bualu kudi divula dia bamanyishi ne dia bisumbu. Mudimu eu udi wenzeka mushindu kayi?​—Matayi 19:26.

Batu bayibaka ne mapa matumina ndongoluelu wa mudimu wa luibaku. Batu batuma mapa aa ku Betele bua kuikale makuta adibu nawu dijinga kudi bisumbu bidi bisua kuibaka Nzubu ya Bukalenge anyi kuyilongolola.

Batu bayibaka kudi bena budisuile ba miaba idi bantu ne nsombelu mishilashilangane. Mu matunga a bungi mudi Tusumbu tua dibaka dia Nzubu ya Bukalenge. Tusumbu tua bibaki ne bena budisuile batu bumbuka mu tshisumbu tshimue baya mu tshikuabu, baya too ne mu bisumbu bidi kule mu ditunga didibu, benda bambuluisha bena mu bisumbu abi bua kuasa Nzubu ya Bukalenge. Mu matunga makuabu, mbateke bana betu badi bapiluke mu luibaku bua kulombola dibaka dia Nzubu ya Bukalenge ne diyakajilula mu tshijengu tshidibu babakosele. Nansha mutu bana betu ba bungi batu mudimu wabu wa bianza mu tshijengu atshi muikale wa dibaka benda bambuluisha ku budisuile miaba yonso idi Nzubu ya Bukalenge ibakibua mu nseke ayi, bena mu tshisumbu tshidibu bibakila ke ba bungi batu benza mudimu au ku budisuile. Nyuma wa Yehowa ne mushindu udi bana betu badifila ne muoyo mujima ke bidi biendesha mudimu eu.​—Misambu 127:1; Kolosayi 3:23.

• Bua tshinyi tudi tubikila miaba itutu tutendelela ne: Nzubu ya Bukalenge?

• Tudi bafike ku dibaka Nzubu ya Bukalenge pa buloba bujima mushindu kayi?

Nzubu ya Bukalenge ya Bantemu ba Yehowa yonso itu ne dîna dinsantu dia Nzambi. Nunku, kuyilama ne mankenda, ne tshimuenekelu tshimpe ne kuyilongolola, ndiakalenga dinene, kabidi ntshitupa tshinene tshia ntendelelu wetu. Muntu yonso udi mua kuambuluisha mu bualu ebu.

Ikala udilongolola bua kumushiya ne mankenda padi bisangilu bijika. Misangu yonso padi bisangilu bijika, bana betu ba balume ne ba bakaji batu ne disanka dia kukomba mu Nzubu wa Bukalenge, bua kumushiya ne mankenda. Batu bamusukula ne mâyi musangu umue ku lumingu. Mukulu anyi musadidi wa mudimu ke utu ulombola mudimu eu; utu ne dibeji didi ne malu a kulonda. Bilondeshile dijinga didiku, bena budisuile badi mua kukomba, kukolopa, kumbusha mpuishi, kulongolola bibasa, kusukula nkumba ne tshiowedi, kukupula mmuenu, kuboya butshiafu, kukomba pambelu, kupempa mashinde ne kukosa bilongo bia mu lupangu. Kudi dituku didibu balongolole ku tshidimu bua kusukula Nzubu wa Bukalenge munda ne pambelu. Kuenza midimu eyi ne bana betu batshidi batekete, mmushindu wa kabalongesha bua kunemeka muaba wetu wa ntendelelu.​—Muambi 5:1.

Udi pebe mua kuambuluisha bua kulongolola bintu bidi binyanguke. Tshidimu tshionso, batu bakenketa bimpe Nzubu wa Bukalenge munda ne pambelu bua kuakaja tumue tubintu tudi tunyanguke, bua kubenga kulua kutula makuta a bungi. (2 Kulondolola 24:13; 34:10) Padi Nzubu wa Bukalenge ne mankenda, mulama kabidi bimpe, udi muaba udi mukumbanyine bua kutendelela Nzambi. Tuetu bikale banange Yehowa ne muaba wetu wa ntendelelu, netuenze petu mudimu eu. (Misambu 122:1) Kuenza nanku kudi kabidi kutumbishisha ntendelelu wetu.​—2 Kolinto 6:3.

• Ki mbimpe kulengulula muaba utudi tutendelela bua tshinyi?

• Bidi bikengela kuenza malu kayi bua kulama Nzubu wetu wa Bukalenge ne mankenda?

Udiku musue kuenza amue makebulula bua kuvudija dimanya diebe dia Bible anyi? Udiku musue kumanya amue malu bua mvese, bua muntu, bua muaba anyi bua tshintu kampanda tshidibu batele mu Bible anyi? Utuku wela meji bikala Dîyi dia Nzambi mua kukuambuluisha mu bualu kampanda budi bukutonde anyi? Bala mikanda idibu balamine ku Nzubu wa Bukalenge.

Bua kuenza makebulula. Imue misangu, kuena mua kuikala ne mikanda yonso ya Bantemu ba Yehowa mu muakulu wenu to. Kadi ku Nzubu wa Bukalenge kudi mikanda ya bungi idi mipatuke bidimu bidi panshi ebi. Kudi mua kuikala kabidi nkudimuinu mikuabu ya Bible, diksionere dimpe ne mikuabu mikanda mimpe. Wewe musue, udi mua kubala mikanda eyi, kumpala kua bisangilu kutuadija anyi padibi bijika. Nuenu bikale ne ordinatere ku Nzubu wa Bukalenge, mudi mua kuikala ditadi dia Watchtower Library. Ditadi edi didi ne mikanda yetu ya bungi be! Ndipepele bua kuenza nadi makebulula, bua tshiena-bualu, bua muaku anyi bua mvese uudi ukeba.

Bua kuambuluisha balongi ba mu Tshisangilu tshia Nsombelu ne mudimu wetu. Tshilaminu tshia mikanda tshia ku Nzubu wa Bukalenge tshidi mua kukuambuluisha bimpe paudi ulongolola midimu yebe. Mutangidi wa Tshisangilu tshia Nsombelu ne mudimu wetu ke udi utangila mikanda eyi. Udi ne bua kulondesha bua kumanya bikalabu bakadi bakumbaje mikanda mipiamipia, ne bikalayi miteka mu bulongame. Yeye anyi mulongeshi webe wa Bible udi mua kukuleja mua kupeta malu audi ukeba. Kadi kabatu bapatuka ne mikanda eyi mu Nzubu wa Bukalenge bua kuya nayi muaba mukuabu to. Tutu tubulula mikanda eyi bimpe bua kuyilama biakane; katutu tufundamu tshintu to.

Bible udi wamba ne: bua tuetu kupeta “dimanya dia Nzambi,” tudi ne bua kudikeba anu bu “biuma bisokoka.” (Nsumuinu 2:1-5) Mikanda idi ku Nzubu wa Bukalenge idi mua kukuambuluisha bua kutuadija kukeba dimanya dia Nzambi.

• Mbintu kayi bia kuenza nabi makebulula bidi ku Nzubu wa Bukalenge?

• Badi mua kukuambuluisha bua kuenza makebulula mbanganyi?

Yezu Kristo wakambila bayidi bende ne: “Butoke buenu bukenkeshe kumpala kua bantu, bua bamone bienzedi bienu bimpe, batumbishe Tatu wenu udi mu diulu.” (Matayi 5:16) Ke bualu kayi, tudi tuenza mudimu bimpe ne bintu bidi bena sianse bapatule lelu, bu mudi Enternete. Site wetu wa jw.org ke muaba wa ku Enternete udi mumanyike udi muntu mua kumanyina malongesha a Bantemu ba Yehowa ne midimu yabu. Mmalu kayi adi mu site eu?

Mandamuna a mu Bible ku nkonko itu bantu batamba kudiela. Udi mua kupeta mandamuna a imue nkonko minene itu bantu batamba kudiela. Tshilejilu, trakte wa Makenga kaakujika anyi? ne wa Bafue badi bulelela mua kulua ne muoyo kabidi anyi? idi mu site eu mu miakulu mipite pa 600. Udi mua kupetamu kabidi Bible wa Nkudimuinu wa bulongolodi bupiabupia mu miakulu mipite pa 130, mikanda ya kulonga nayi Bible bu mudi mukanda wa Bible utu ulongesha tshinyi menemene? ne bibejibeji bia Tshibumba tshia Nsentedi ne bia Tabulukayi! Udi mua kubala anyi kulondesha dibala dia imue ya ku mikanda eyi ku Enternete; udi nansha mua kuyambuila mu programe bu mudi wa MP3, PDF anyi wa EPUB. Udi mua kupatula amue malu pa mabeji bua kuambuluisha nawu muntu kampanda mu muakulu wende. Kudi too ne filme ya mu miakulu ya tumama. Udi mua kuambula kabidi drama ya dibala dia Bible, drama ya malu a mu Bible, ne mijiki mimpe iudi mua kuteleja paudi wikisha.

Malu makuabu a Bantemu ba Yehowa. Badi bela kabidi malu mapiamapia adi enzeka ne filme ya mudimu wetu wa pa buloba bujima, ya malu adi mafikile Bantemu ba Yehowa ne ya mudibu bambuluishe bantu mu bikondo bia bipupu. Neupete mamanyisha bua mpungilu ikala ne bua kuenzeka ne adrese ya biro bia filiale ya bungi.

Mushindu eu ke utudi tukenkesha butoke bua bulelela too ne miaba ya kule pa buloba. Malu aa adi ambuluisha bantu ba pa buloba bujima too ne badi mu Antarktike. Tudi tujinga ne: “dîyi dia Yehowa ditungunuke ne kumuangalaka lukasa” pa buloba bujima, bua butumbi bua Nzambi.​—2 Tesalonike 3:1.

• Mmushindu kayi udi site wetu wa jw.org wambuluisha bantu bua kulonga bulelela budi mu Bible?

• Mmalu kayi audi musue kulongela mu site wetu eu?