DILONGESHA DIA 10
Mmunyi muudi mua kumanya tshitendelelu tshilelela?
1. Tshitendelelu tshilelela tshitu anu tshimue anyi?
“Nudimukile baprofete ba dishima.”—MATAYI 7:15.
Yezu wakalongesha bayidi bende tshitendelelu anu tshimue, ke tshitendelelu tshilelela. Ntshienze anu bu njila udi ufikisha ku muoyo wa tshiendelele. Yezu wakamba bua njila au ne: “Bantu bakese badi bamupeta.” (Matayi 7:14) Nzambi udi witaba anu tshitendelelu tshidi tshiangatshila malongesha mu Dîyi diende. Batendeledi balelela bonso badi mu buobumue, badi ne ditabuja dimue.—Bala Yone 4:23, 24; 14:6; Efeso 4:4, 5.
Tangila filme wa Nzambi udi witaba mishindu yonso ya dimutendelela anyi?
2. Yezu wakamba tshinyi bua bena Kristo ba dishima?
“Badi bamba patoke mudibu bamanye Nzambi, kadi badi bamuvila mu bienzedi biabu.”—TITO 1:16.
Yezu wakadimuija bantu, wamba ne: baprofete ba dishima bavua ne bua kunyanga malongesha malelela a bena Kristo. Baprofete aba badi bamueneka ku mêsu bu batendeledi balelela. Badi bamba mudi bitendelelu biabu bikale bia bena Kristo. Kadi udi mua kumanyina bantu aba ku tshidibu menemene. Nku tshinyi? Anu mu tshitendelelu tshilelela ke mudi bena Kristo balelela badi ne ngikadilu ne bienzedi bimpe.—Bala Matayi 7:13-23.
3. Udi mua kumanyina batendeledi balelela ku tshinyi?
Bala malu atanu adi alonda aa:
Batendeledi balelela badi banemeka Bible, bamumona bu Dîyi dia Nzambi. Badi baditatshisha bua kutumikila mibelu idimu. Nanku, tshitendelelu tshilelela katshitu tshiotshi tshilongesha ngenyi ya bantu nansha. (Matayi 15:7-9) Batendeledi balelela kabatu balongesha amue malu, kadi benza a tshianana to.—Bala Yone 17:17; 2 Timote 3:16, 17.
Bayidi balelela ba Yezu batu banemeka Dîna dia Nzambi, Yehowa. Yezu uvua unemeka dîna dia Nzambi bualu uvua udimanyisha bantu. Wakambuluisha bantu bua kumanya Nzambi, kubalongesha bua kusambila bua dîna dia Nzambi dijidibue. (Matayi 6:9) Muaba uudi musombele, ntshitendelelu kayi tshitu tshimanyisha bantu dîna dia Nzambi?—Bala Yone 17:26; Lomo 10:13, 14.
Bena Kristo balelela badi bayisha bua Bukalenge bua Nzambi. Nzambi wakatuma Yezu bua kuyisha lumu luimpe lua Bukalenge. Bukalenge bua Nzambi ke mbulamatadi umuepele wajikijila bantu ntatu yabu. Yezu wakatungunuka ne kuakula bua Bukalenge ebu too ne dituku dia lufu luende. (Luka 4:43; 8:1; 23:42, 43) Wakamba ne: bayidi bende bavua ne bua kuyisha pabu malu a Bukalenge ebu. Buebe wewe, muntu yeye mulue kukuambila malu a Bukalenge bua Nzambi, udi mua kuikala wa mu nzambi kayi?—Bala Matayi 24:14.
Bayidi ba Yezu kabatu babuelakana mu malu a pa buloba ebu to. Udi mua kubamanya, bualu kabatu babuelakana mu malu a tshididi, anyi mu bimvundu to. (Yone 17:16; 18:36) Kabatu kabidi bidikija bibidilu ne bienzedi bibi bidi nabi bantu bakuabu to.—Bala Yakobo 4:4.
Bena Kristo balelela badi ne dinanga dikole munkatshi muabu. Dîyi dia Nzambi ndibambuluishe bua kunemeka bantu ba bisamba bionso. Nansha mutu bitendelelu bia dishima bibuela mu mvita, batendeledi balelela batu bobu babenga kubuelamu. (Mika 4:1-3) Bobu batu bangata dîba diabu ne bintu bidibu nabi bua kuambuluisha bakuabu.—Bala Yone 13:34, 35; 1 Yone 4:20.
4. Mpindieu udi mua kumanya tshitendelelu tshilelela anyi?
Ntshitendelelu kayi tshidi tshiangatshila malongesha atshi onso anu mu Dîyi dia Nzambi, tshinemeka dîna diende ne tshimanyisha Bukalenge bua Nzambi bu mbulamatadi umuepele walua kukumbajila bantu majinga abu onso? Ntshitendelelu kayi tshidi ne dinanga ne katshiyi tshibuelakana mu mvita? Buebe wewe, ntshitendelelu kayi?—Bala 1 Yone 3:10-12.