Timote uvua musue kuambuluisha bantu

Timote nnsongalume uvua ne disanka dia kuambuluisha bantu. Wakenza ngendu ya uya miaba ya bungi bua kuambuluisha bakuabu. Bualu ebu buakamupetesha nsombelu muimpe menemene. Udi musue kumanya muvua nsombelu wende anyi?—

Timote uvua mukolele mu tshimenga tshivuabu babikila ne: Luseta. Patshivuaye mupuekele, kakuende Loi ne mamuende Eunike bakatuadija kumulongesha malu a Yehowa. Pakakola Timote, wakajinga bua kuambuluisha bantu bakuabu bua kumanyabu pabu malu a Yehowa.

Patshivua Timote nsongalume, Paulo wakamulomba bua kuyabu nende ku ngendu miaba mikuabu bua kuyishaku. Timote kuitaba ne: ‘Eyowa, tuye!’ Uvua mudilongolole bua kuya kuambuluisha bakuabu.

Timote wakaya ne Paulo mu tshimenga tshia ku Makedoniya tshivuabu babikila ne: Tesalonike. Bua kufikaku, bakenda lua makasa ntanta mule, pashishe kuluabu kuangata buatu. Ndekelu wa bionso pakafikabu, bakambuluisha bantu ba bungi bua kumanyabu malu a Yehowa. Kadi bantu bakuabu bakabakuatshila tshiji, basua kubenzela bibi. Ke Paulo ne Timote kumbukabu, bobu kuya kuyisha miaba mikuabu.

Pakapita ngondo ndambu, Paulo wakalomba Timote bua kupinganaye ku Tesalonike bua kumona bana betu ne kumanya muvuabu. Bivua bimulomba dikima dia bungi bua kupinganaye mu tshimenga tshia njiwu atshi! Kadi Timote wakaya anu kuya, bualu uvua uditatshisha bua bana betu ba mu tshimenga atshi. Pakapinganaye kudi Paulo wakamutuadila ngumu mimpe. Bana betu ba ku Tesalonike bavua bimpe bitambe!

Timote uvua muenze mudimu ne Paulo bidimu bia bungi. Musangu mukuabu Paulo wakafunda ne: Timote ke muntu uvua mutambe buimpe uvuaye mua kutuma mu bisumbu bua kubiambuluisha. Timote uvua munange Yehowa, munange ne bantu.

Udiku pebe munange bantu ne musue kubambuluisha bua bamanye malu a Yehowa anyi?— Biobi nanku, newikale ne nsombelu wa disanka ne musangelu bia bungi anu muvua Timote!