Yone Mubatiji udi ulongolola njila

Bidimu bitue ku 17 bikadi bipite katshia Yezu wela balongeshi nkonko mu ntempelo patshivuaye ne bidimu 12. Tudi mpindieu mu muvu wa luya mu tshidimu tshia 29 bikondo bietu ebi. Bantu ba bungi badi bakula bua Yone mulela wa Yezu udi uyisha mu buloba buonso bua ku luseke lua ku ouest kua Musulu wa Yadene.

Yone mmuntu uvua ukemesha ku tshimuenekelu ne mu ngakuilu. Bilamba biende bivua bienza ne miosa ya kamelu, ne uvua muvuale mukaba wa tshiseba mu tshimono. Uvua udia mpasu ne buitshi bua mu tshisuku. Uvua ne mukenji kayi? “Nyingalalayi bua mpekatu yenu, bualu Bukalenge bua mu diulu mbusemene pabuipi.”​—Matayi 3:2.

Mukenji wa Yone uvua ulenga bantu bavua balue kumuteleja. Ba bungi bavua bamona ne: bivua bikengela kunyingalala bua mpekatu, mmumue ne: kushintulula lungenyi luabu ne bienzedi biabu, balekela nsombelu wabu mubi wa kale. Bavua balua kudiye mbantu ba mu “Yelushalema, ba mu Yudaya mujima ne ba mu misoko yonso ya pabuipi ne Yadene.” (Matayi 3:5) Ba bungi ba ku bantu bavua balua kudi Yone bavua banyingalala bua mpekatu. Uvua ubabatiza, ubiina mu mâyi a Yadene. Bua tshinyi?

Uvua ubatiza bantu bu tshimanyinu anyi tshijadiki tshia dinyingalala diabu dia muoyo mujima bua mpekatu mienzela tshipungidi tshia Mikenji tshia Nzambi. (Bienzedi 19:4) Nansha nanku, bonso kabavua bakumbane bua kubatijibua to. Pavua bamue bamfumu ba bitendelelu, mmumue ne: Bafalese ne Basadoke balue kudi Yone, wakababikila ne: “Bana ba nyoka.” Kuambaye ne: “Kuamayi dimuma didi dikumbanangane ne dinyingalala bua mpekatu. Kanudiambidi munda muenu ne: ‘Tatu utudi nende ng’Abalahama’ to. Bualu ndi nnuambila ne: Nzambi udi ne bukole bua kujudila Abalahama bana ku mabue aa. Kasuyi kakadi kalale ku muji wa mitshi; nunku mutshi wonso udi kawuyi ukuama bimuma bimpe, badi ne bua kuwukosa ne kuwela mu kapia.”​—Matayi 3:7-10.

Bu muvua Yone umanyisha mukenji wa bukole, bantu bamuteleja ne ntema ya bungi ne ubatiza ba bungi, bakuidi ne bena Lewi bakatuma bantu bua kumukonka ne: “Wewe udi nganyi?”

Yone kuamba ne: “Meme tshiena Kristo to.”

Bobu ne: “Kadi udi nganyi? Udi Eliya anyi?”

Kuandamunaye ne: “Tshiena yeye to.”

Bobu ne: “Udi Muprofete anyi?”; bakula bua Muprofete munene uvua Mose muambe ne: uvua ne bua kulua.​—Dutelonome 18:15, 18.

Yone kuandamuna ne: “Tòo!”

Kutuadijabu kumusumisha bamba ne: “Wewe udi nganyi? Tuambila bua tumone mua kuandamuna badi batutume. Udi wamba tshinyi bua bualu buebe?” Wakamba ne: “Ndi dîyi dia muntu udi wela lubila mu tshipela ne: ‘Lulamijayi njila wa Yehowa,’ anu bu muvua muprofete Yeshaya muambe.”​—Yone 1:19-23.

Kumuebejabu ne: “Kadi wewe kuyi Kristo anyi Eliya peshi Muprofete, udi ubatizangana bua tshinyi?” Kubapeshaye diandamuna dia mushinga edi: “Meme ndi mbatizangana mu mâyi. Muntu mmuimane munkatshi muenu unudi kanuyi bamanye, yeye udi ulua panyima panyi.”​—Yone 1:25-27.

Bushuwa, Yone uvua mumanye ne: uvua ulongolola njila pavuaye ulongolola mioyo ya bantu bua kuitababu Masiya uvuabu balaye, muntu uvua ne bua kulua Mukalenge. Yone wakamba bua bualu buende ne: “Yeye udi ulua panyima panyi udi ne bukole kumpita meme, tshiena mukumbane bua kukopola sandala yende.” (Matayi 3:11) Yone wakamba mene ne: “Yeye udi ulua panyima panyi mmupite kumpala kuanyi, bualu uvuaku kumpala kuanyi.”​—Yone 1:15.

Nunku mukenji wa Yone wa ne: “Nyingalalayi bua mpekatu yenu, bualu Bukalenge bua mu diulu mbusemene pabuipi” uvua bushuwa pa dîba diawu. (Matayi 3:2) Mukenji au wakambuluisha bantu bua kumona ne: mudimu wa Yezu Kristo, Mukalenge uvua ne bua kufumina kudi Yehowa, ukavua pa kutuadija.