Yezu udi wondopa muana wa balume udibu bakuate kudi demon

Pavua Yezu, Petelo, Yakobo, ne Yone bapueka ku mukuna, bakatuilangana ne musumba munene wa bantu. Kudi bualu kampanda bubi. Bafundi mbanyunguluke bayidi, eku benda bakokangana nabu. Bantu badi basanka padibu bamona Yezu ne badi banyema baya bua kumuela muoyo. Udi ubebeja ne: “Nudi nukokangana nabu bua tshinyi?”​—Mâko 9:16.

Muntu kampanda mu musumba wa bantu udi utua binu kumpala kua Yezu ne umvuija ne: “Mulongeshi, mvua mulue ne muananyi wa balume kuudi, bualu udi ne nyuma wa kamama. Muaba wonso udiye umukuatshila, udi umukulula panshi, ne udi upatula ntutu mukana, usumakaja mênu ne ujimija bukole. Mvua mulombe bayidi bebe bua kumuipata, kadi kabavua bakokeshe bua kuenza nanku to.”​—Mâko 9:17, 18.

Bidi bimueneka ne: bafundi bavua babipisha bayidi bualu bavua bapangile bua kuondopa muana wa balume pamuapa bapepeja mudimu wabu. Nunku pamutu pa Yezu kuandamuna tatu uvua ne kanyinganyinga eu, udi wambila musumba wa bantu ne: “Nuenu tshipungu tshia bantu badi kabayi ne ditabuja ne bakonyangale, ndi ne bua kutungunuka ne kuikala nenu too ne dîba kayi?” Mêyi makole aa avua bushuwa atangila bafundi bavua batatshisha bayidi bende pavuaye kayiku. Yezu udi ukudimuka kudi tatu uvua mutekeshibue eu ne: “Luayi nende kundi.”​—Matayi 17:17.

Padi muana wa balume ufika pabuipi ne Yezu, demon uvua mumukuate udi umukumisha panshi ne umupaluisha bikole. Muana wa balume wakatungunuka ne kubunguluka panshi upatula ntutu mukana. Ke Yezu kuebeja tatu ne: “Mbibange kumuenzekela nunku katshia ku dîba kayi?” Yeye kuandamuna ne: “Katshia ku buana buende ne uvua umukulula misangu ne misangu mu kapia ne mu mâyi kabidi bua kumubutula.” Muntu eu wakalomba ne: “Wewe mua kuenza bualu kampanda, tumvuila koku luse, utuambuluishe.”​—Mâko 9:21, 22.

Tatu eu uvua mushikile, bualu nansha bayidi ba Yezu kabavua bakumbane bua kumuambuluisha to. Bua kuandamuna Tatu uvua mushikile eu, Yezu wakamukankamija, umujadikila ne: “Dîyi dia ne: ‘Wewe mua!’ Mona, malu onso adi mua kukumbana bua muntu udi ne ditabuja.” Diakamue tatu wakela dîyi, kuambaye ne: “Ndi ne ditabuja! Ngambuluisha muaba undi dijinga ne ditabuja!”​—Mâko 9:23, 24.

Yezu wakamona musumba wa bantu ulua lubilu, uya mutangile kudiye. Bu muvua bantu bonso aba batangila Yezu, wakakanyina demon wamba ne: “Wewe nyuma wa kamama ne mapapa, ndi nkutumina dîyi ne: patuka munda muende ne kubuedi munda muende kabidi to!” Pavua demon wenda upatuka, wakenza bua muana wa balume ele mbila ne apaluke bikole menemene. Pashishe muana wa balume eu wakadiadija muaba au muenze bu mufue. Pakamona bantu ba bungi bualu ebu bakamba ne: “Mmufue!” (Mâko 9:25, 26) Kadi pakakuata Yezu muana eu ku tshianza, wakajuka ne “wakondopibua kumbukila ku dîba adi.” (Matayi 17:18) Bushuwa, bantu bakakema bikole bua tshivua Yezu muenze.

Kumpala, pavua Yezu mutume bayidi bua kuyisha, bavua bakumbane bua kuipata bademon. Kadi mpindieu padibu nende mu nzubu, badi bamuebeja ne: “Bua tshinyi katuvua bakokeshe bua kumuipata?” Yezu wakabumvuija ne: bivua bienzeke nanku bua dipangila diabu dia ditabuja, wamba ne: “Wa mushindu eu udi mua kupatuka anu ku disambila.” (Mâko 9:28, 29) Ditabuja dikole pamue ne dilomba Nzambi bukole mu disambila ke bivua bikengela bua kuipata demon wa bukole au.

Yezu wakajikija wamba ne: “Bulelela ndi nnuambila ne: nuenu ne ditabuja bunene bua lutete lua mutâda, nenuambile mukuna eu ne: ‘Umbuka muaba eu, ndaku kuaka,’ wowu newumbuke, ne kakuena bualu buanukolela.” (Matayi 17:20) Bushuwa etshi tshivua ditabuja dikole menemene!

Bipumbishi ne ntatu bidi bitupangisha bua kuya kumpala mu mudimu wa Yehowa bidi mua kumueneka bu bikole bua kupita nabi ne katuyi mua kubiumbusha anu bu mukuna wetu muena dîna eu. Kadi tuetu ne ditabuja, tudi mua kutantamena bipumbishi ne ntatu bidi bu mukuna ebi.