LUKONKO 5

Ndi mua kuenza tshinyi bobu bantatshisha mu kalasa?

BUA TSHINYI BIDI NE MUSHINGA?

Tshiwenza tshidi mua kulongolola malu anyi kuanyanga.

NTSHINYI TSHIUDI MUA KUENZA?

Fuanyikija bualu ebu: Thomas ki mmusue kuya mu kalasa lelu to. Anyi dituku didi dilonda. Peshi mene ki mmusue kudiatamu kabidi to. Mmuangate dipangadika edi bualu balongi babu mbamuendeshile lumu lubi kukadi ngondo isatu. Mbamuinyike kabidi mêna makuabu. Imue misangu, mulongi uvua ukuma mikanda ya Thomas tshianza bua ikuluke ne wenza bu ne: bivua bienzeke ku mpukampuka. Anyi pavuabu benda mu tshisumbu, mulongi uvua usakila Thomas, kadi pavuaye ukudimuka, kavua umona uvua mumusakile to. Dituku dishale, dimutatshisha diakakola pavua Thomas mupete mesaje ku Enternete bamukanyina . . .

Bu wewe muikale Thomas, uvua mua kuenza tshinyi?

ANJI ELA MEJI!

Kuena anu mupangile makanda to! Kadi, udi mua kuluisha muntu udi ukutatshisha eu kuyi umututa. Mushindu kayi?

KUENJI BUALU NANSHA BUMUE. Bible udi wamba ne: ‘Mupote udi upatula tshiji tshionso tshidiye natshi, kadi muena meji udi utshikanda, udi utshipolesha.’ (Nsumuinu 29:11) Wewe mudienzeje bua kushala mupuwe ne kuyi ushintulula tshimfuanyi tshiebe, badi bakutatshisha nebapange tshia kuenza.
KUDISOMBUEDI. Bible udi wamba ne: “Kanupingajidi muntu bubi ku bubi.” (Lomo 12:17) Kukeba bua kudisombuela nekunyangakaje kabidi malu bikole.
EPUKA NSOMBELU IDI MUA KUKUKEBELA BILUMBU. Bible udi wamba ne: “Muntu mudimuke udi utangila dikenga diamba kumukuata, udi usokoma.” (Nsumuinu 22:3) Koku mushindu, epuka bantu badi mua kukukebela bilumbu anyi nsombelu idi mua kuenza bua bakutatshishe.
BANDAMUNA MUVUABU KABAYI BATEKEMENE. Bible udi wamba ne: ‘Dîyi dia kalolo didi diandamuna tshiji.’ (Nsumuinu 15:1) Udi mua kubupitshisha mu bilele. Tshilejilu, muntu udi ukutatshisha yeye muambe ne: udi munene be, udi mua kusaka makaya ne kuamba ne: “Wewe musue, ndi mua kukuabanyina ndambu!”
UMBUKA MUABA AU. Nora udi ne bidimu 19 udi wamba ne: “Dipuwa didi dileja ne: udi mushindame ne udi ne makanda kupita muntu udi ukutatshisha. Didi dileja muudi ne bukole bua kudikanda, bualu budi udi ukutatshisha kayi nabu.”—2 Timote 2:24.
IKALA UDIANGATA NE MUSHINGA. Bantu batu batatshishangana batu bakeba bantu badi badimona kabayi ne mushinga ne kabayi mua kuenzela muntu bualu. Kadi bantu ba bungi batu batatshishangana nebalekele kukutatshisha bobu bamone ne: kuena ubapesha mpunga wa kukutatshishabu.
AMBILA MUNTU MUKUABU. Muntu kampanda uvua mulongeshi udi wamba ne: “Mvua ngambila mulongi yonso udibu batatshisha bua yeye kuambila muntu mukuabu bualu abu. Ke bualu buimpe bua kuenza, ne bidi mua kuambuluisha bua kabatatshishi muntu mukuabu.”

Nsongalume udi udiangata ne mushinga mushale mushindame kumpala kua muntu udi umutatshisha — Kudiangata ne mushinga nekukupeteshe bukole budi muntu udi ukutatshisha kayi nabu

UVUA MUMANYE ANYI?

Pa kumbusha ditatshishangana ku mubidi, kudi mishindu mikuabu bu mudi:

Diamba muntu mêyi mabi. “Tshiena mua kupua muoyo mêna avuabu bampeshe anyi malu avuabu bangamba to. Bavua bamfikishe ku didimona tshiyi ne mushinga, bu muntu tshianana, udi kayi ne bua nsongo budiye mua kuenza. Mvua njinga kunguwujabu nansha dîsu pamutu pa kungambabu mêyi mabi.”—Celine udi ne bidimu 20.
Didiumvua nkaya. “Balongi betu bakatuadija kungepuka. Mu dikisha dia mu midi bavua benza bu ne: ku mêsa abu kakuena muaba bua tshisombi nabu. Munkatshi mua tshidimu tshijima, mvua ndila ne ndia pa nkayanyi.”—Haley udi ne bidimu 18.
Ditatshisha muntu ku Enternete. “Anu ne miaku mikese tshianana ku ordinatere, udi mua kunyangila muntu lumu anyi nsombelu wende. Bidi mua kumueneka bu ne: kuamba nunku nkunekesha, kadi mmalu atu enzeka.”—Daniel udi ne bidimu 14.

**NKONKO IDI ITANGILA DITATSHISHANGANA**
MBULELELA ANYI NDISHIMA?	MANDAMUNA
1 Ditatshishangana ndituadije kukadi bidimu binunu bia bungi.	1 Mbulelela. Tshilejilu, Bible udi wakula bua Banefilima, dîna dia tshisumbu tshia bantu didi diumvuija ne: ‘Bantu badi bakulula bakuabu.’—Genese 6:4, NWT.
2 Ditatshisha muntu ndimuneka anyi dimuela tshipela mu mushindu udi kawuyi umuenzela bibi. Nkuela bilele patupu.	2 Ndishima. Ditatshishangana ditu difikisha bansonga ba bungi ku didishipa.
3 Mushindu muimpe wa kupangisha muntu bua kukutatshisha nkumututa.	3 Ndishima. Bantu batu batatshishangana batu misangu ya bungi ne bukole kupita badibu batatshisha, nunku kabiena ne mushinga bua kudisombuela to.
4 Wewe mumone batatshisha muntu, mbimpe kuenza bu kuena mumone bualu.	4 Ndishima. Mu nsombelu eu, wewe mumone bualu kuyi mubuleje, udi pebe ne tshilumbu. Wewe mumone batatshisha muntu, amba bua dimutatshisha kaditungunuki.
5 Misangu ya bungi, bantu batu batatshishangana batu ne mukana bualu batu badimona kabayi ne mushinga.	5 Mbulelela. Nansha mutu bamue bantu badi batatshishangana badiangata ne mushinga, kabatu nawu to, ne batu bapuekesha bakuabu milongo bua kudiumvuabu bimpe.
6 Bantu badi batatshishangana badi mua kushintuluka.	6 Mbulelela. Bantu badi batatshishangana badi mua kushintulula ngelelu wabu wa meji ne ngenzelu wabu wa malu bobu babambuluishe.