Badi bakuata Yezu

Yezu ne bapostolo bavua bapitshila mu Tshibandabanda tshia Kidilona batangile ku Mukuna wa Olive. Mundankulu mukavua mupite ne ngondo ukavua tshitongatonga. Padibu bafika mu budimi bua Getesemane, Yezu udi ubambila ne: “Shalayi muaba eu, nushale batabale.” Pashishe Yezu wakasemena ndambu mu budimi abu, kutuaye binu. Wakasambila Yehowa ne kanyinganyinga kakole wamba ne: “Disua diebe dienzeke.” Pashishe Yehowa wakatuma muanjelu bua kukolesha Yezu. Pakapingana Yezu kudi bapostolo, wakabasangana balale. Kubambilaye ne: ‘Bikayi! Edi ki ndîba dia nuenu kulala to! Dîba ndikumbane dia kumfilabu mu bianza bia baluishi banyi.’

Mutantshi Yudase udi weyeka, muikale ne tshisumbu tshinene tshia bantu tshiambule miele ne mitshi. Uvua mumanye muaba wa kupetela Yezu bualu bavua ne tshibidilu tshia kuya mu budimi abu. Yudase uvua muambile basalayi ne: uvua mua kubaleja Yezu. Wakaya diakamue kudi Yezu, kumuelaye muoyo ne: ‘Muoyo Mulongeshi,’ pashishe kumutuaye mishiku. Yezu kumuambila ne: ‘Yudase, udi untungila tshitungu ne dintua dia mishiku anyi?’

Yezu wakasemena, kuebejaye tshisumbu tshia bantu atshi ne: “Nudi nukeba nganyi?” Bobu kuamba ne: “Yezu muena Nazaleta.” Ke yeye kuandamuna ne: “Mmeme eu”; pashishe bantu abu kualukilabu tshianyima, kukulukabu. Yezu wakakonka kabidi tshisumbu tshia bantu atshi ne: “Nudi nukeba nganyi?” Bakandamuna kabidi ne: “Yezu muena Nazaleta.” Yezu kubandamuna ne: ‘Si ndi munuambile ne: mmeme eu. Lekelayi aba baye.’

Pavua Petelo mujingulule tshivua tshienzeka, wakapatula muele, kukosaye Malako mupika wa muakuidi munene ditshi. Kadi Yezu wakalenga ditshi dia muntu au, kumuondopaye. Pashishe wakambila Petelo ne: ‘Pingaja muele webe. Wewe muluangane ne muele, neufuile ku muele.’ Basalayi abu bakakuata Yezu, kumusuikabu maboko, bapostolo kunyemabu. Pashishe musumba wa bantu au wakaya nende kudi Ana, mfumu wa bakuidi. Ana wakela Yezu nkonko ne kumutumaye ku nzubu kua muakuidi munene Kayifa. Kadi ntshinyi tshivua tshifikile bapostolo?