Mulami wa buloko udi upeta bulelela

Mu Filipoyi muvua nsongakaji kampanda mupika uvua ne demon munda. Demon uvua wambuluisha nsongakaji au bua kuamba malu atshilualua, ne nsongakaji uvua upetesha bamfumu bende makuta a bungi ku mudimu au. Pavua Paulo ne Sila bafike mu Filipoyi, nsongakaji au wakaya wenda ubalonda munkatshi mua matuku a bungi. Demon au uvua umueleshisha mbila ne: “Bantu aba mbapika ba Nzambi Mutambe Bunene.” Ndekelu wa bionso, Paulo wakambila demon au ne: ‘Mu dîna dia Yezu, patuka munda muende!’ Demon kupatukaye munda mua nsongakaji.

Pavua bamfumu ba nsongakaji au bamone ne: nsongakaji wabu au kavua kabidi mua kubapetesha makuta, bakafiika munda bikole. Bakakoka Paulo ne Sila, kuyabu nabu kudi banene ba mbulamatadi bamba ne: ‘Bantu aba badi bashipa mikenji ne bajudija tshimvundu mu tshimenga tshijima!’ Banene ba mbulamatadi kutumabu dîyi bua bakume Paulo ne Sila ne babele mu buloko. Mulami wa buloko wakabela mu buloko bua munda menemene muvua mufiike fitutu, kubelaye ne mu bikunyi.

Pavua Paulo ne Sila batumbisha Yehowa ne misambu mu buloko amu, bena buloko bakuabu bavua bateleje. Diakamue, buloba buakakanka bikole mundankulu, buloko kunyukukabu kuulu too ne kuinshi. Biibi bia buloko kukangukabi, ne shene ivuabu basuike bena buloko ne bikunyi biakazebelela. Mulami wa buloko kuyaye lubilu mu buloko bua munda menemene, kumonaye ne: biibi bivua bikanguke. Bu muvuaye muele meji ne: bena buloko bavua banyeme, wakangata muele wa mvita bua kudishipa.

Diakamue Paulo wakamuela dîyi wamba ne: ‘Kudienzedi bibi to! Tuetu bonso tudi muaba eu!’ Mulami wa buloko kubuelaye lubilu, kudielaye ku makasa a Paulo ne Sila. Wakabebeja ne: “Ngenze tshinyi bua kupandishibua?” Bobu kumuandamuna ne: ‘Itabujayi Yezu wewe ne ba mu nzubu muebe.’ Pashishe Paulo ne Sila bakalongesha mulami wa buloko au ne bena mu nzubu muende bonso dîyi dia Yehowa, bobu kubabatiza.