Yehowa udi upesha Shimishona bukole bua bungi

Bena Isalele ba bungi bakabanga kabidi kutendelela mpingu, ke Yehowa kulekela bua bena Peleshete bakuate buloba buabu. Kadi kuvua bena Isalele bakuabu bavua banange Yehowa. Munkatshi muabu muvua Manoa. Yeye ne mukajende kabavua balele to. Dimue edi, Yehowa wakatuma muanjelu kudi mukaji wa Manoa. Muanjelu wakamuambila ne: ‘Neulele muana wa balume. Yeye neapandishe Isalele kudi bena Peleshete. Neikale Munazi.’ Banazi bavua banganyi? Bavua batendeledi ba Yehowa ba pa buapu. Kabavua banyishile Banazi bua kukosesha nsuki to.

Pakapita matuku, bakalelela Manoa muana wa balume, kumuinyikaye ne: Shimishona. Pakakola Shimishona, Yehowa wakamuvuija muntu wa bukole bua bungi menemene. Uvua mua kushipa nyama wa ntambue ne bianza nkayabi. Musangu mukuabu, Shimishona wakashipa bena Peleshete 30 yeye nkayende. Bena Peleshete bakamukina, kubangabu kukeba mushindu wa kumushipa. Dituku dikuabu butuku pavua Shimishona mulale mu Gaza, bakaya ku tshiibi tshia tshimenga atshi, kumuindilabu muaba au bua bamushipe mu dinda. Kadi mundankulu, Shimishona wakajuka, kuyaye ku tshiibi tshia tshimenga atshi, kutshijomonaye mu tshimanu. Wakateka tshiibi atshi pa makaya kuyaye natshi too ne ku mutu kua mukuna pabuipi ne Hebelone!

Pakapita matuku, bena Peleshete bakaya kudi Delila, mukaji ukavua Shimishona munange, kumuambilabu ne: ‘Netukupeshe bitupa bia arjan binunu ne binunu wewe mufike ku dimanya kudi bukole buende bua bungi ebu bufumina. Tudi basue kumukuata kumuela mu buloko.’ Delila uvua ukeba makuta, ke yeye kuitaba. Kumpala Shimishona uvua ubenga bua kumuambila kuvua bukole buende bufumina. Kadi Delila wakamuela mutoyi too ne pakateketaye ne kumuambila kuvua bukole buende bufumina. Wakamuambila ne: ‘Kabatu banji kunkosa nsuki nansha, bualu ndi Munazi. Bobu bankose nsuki, nenjimije bukole buanyi.’ Shimishona uvua muenze tshilema tshibi menemene pavuaye mumuambile bualu abu, ki mmuomu?

Diakamue Delila wakambila bena Peleshete ne: ‘Ngamanyi kudi bukole buende bufumina!’ Yeye kuladika Shimishona tulu pa bibelu, pashishe kumukoseshaye nsuki. Delila kuela dîyi ne: ‘Shimishona, bena Peleshete mbobu abu!’ Shimishona wakatabuluka, ne bukole buende bukavua bumujike. Bena Peleshete bakamukuata, kumushipabu mêsu, bobu kumuela mu buloko.

Dituku dikuabu bena Peleshete bavua badisangishe mu ntempelo wa nzambi wabu Dagona binunu ne binunu, bela mbila bamba ne: ‘Nzambi wetu mmutupeshe Shimishona! Patulayi Shimishona! Alue kutusekeshaku.’ Bakamuimanyika pankatshi pa makunji abidi, bamuseka. Shimishona kuelaye dîyi wamba ne: ‘Yehowa wanyi, mpesha koku makanda bua musangu eu kabidi.’ Dîba adi, nsuki ya Shimishona ikavua milepe kabidi. Yeye kusakila makunji a ntempelo ne bukole buende buonso. Nzubu mujima wakadibiankula panshi, kushipaye bantu bonso bavua mu ntempelo, ne Shimishona pende wakafua.